ເຄີຍບໍ່? ພຽງແຕ່ອອກຈາກບ້ານບໍ່ຮອດໜຶ່ງຊົ່ວໂມງ ກໍເລີ່ມຮູ້ສຶກຮ້ອນ ເຫື່ອອອກ ຕົວໜຽວ ຈົນເສື້ອຜ້າທີ່ໃສ່ກາຍເປັນສິ່ງທີ່ເຮັດໃຫ້ຮູ້ສຶກອຶດອັດຕະຫຼອດມື້ ໂດຍສະເພາະໃນມື້ທີ່ອາກາດຮ້ອນຈັດ ການເລືອກເສື້ອຜ້າຈຶ່ງບໍ່ໄດ້ຂຶ້ນກັບພຽງແຕ່ຮູບແບບ ຫຼື ຄວາມສວຍງາມເທົ່ານັ້ນ ແຕ່ເນື້ອຜ້າກໍເປັນອີກໜຶ່ງປັດໄຈສຳຄັນທີ່ບໍ່ຄວນມອງຂ້າມ

ເພາະຜ້າແຕ່ລະຊະນິດມີຄຸນສົມບັດແຕກຕ່າງກັນ ທັງການລະບາຍອາກາດ ການດູດຊັບຄວາມຊຸ່ມ ແລະ ສຳຜັດເມື່ອສວມໃສ່ກັບຜິວໜັງ ມື້ນີ້ມ່ວນຈຶ່ງຮວບຮວມ 8 ຊະນິດຜ້າທີ່ຂຶ້ນຊື່ເລື່ອງຄວາມເຢັນສະບາຍ ໃສ່ແລ້ວບໍ່ອຶດອັດ ເໝາະສຳລັບຜູ້ທີ່ຕ້ອງໃຊ້ຊີວິດທ່າມກາງອາກາດຮ້ອນ ຈະມີຜ້າຊະນິດໃດໜ້າສົນໃຈແດ່ ໄປເບິ່ງກັນເລີຍ!

1. ຜ້າລິນິນ (Linen)

ຜ້າລິນິນຖືເປັນໜຶ່ງໃນຕົວເລືອກຍອດນິຍົມສຳລັບການແຕ່ງຕົວໃນຊ່ວງລະດູຮ້ອນ ເພາະຜະລິດຈາກເສັ້ນໃຍຂອງຕົ້ນແຟລັກ (Flax) ມີໂຄງສ້າງເສັ້ນໃຍທີ່ຊ່ວຍໃຫ້ອາກາດໄຫຼວຽນໄດ້ດີ ລະບາຍຄວາມຮ້ອນໄດ້ດີ ແລະ ສາມາດດູດຊັບຄວາມຊຸ່ມຈາກຮ່າງກາຍໄດ້ ໂດຍບໍ່ເຮັດໃຫ້ເນື້ອຜ້າຮູ້ສຶກໜັກຈົນເກີນໄປ

ນອກຈາກນີ້ ຜ້າລິນິນຍັງມີເອກະລັກສະເພາະຕົວຈາກເນື້ອສຳຜັດທີ່ເບິ່ງເປັນທຳມະຊາດ ແລະ ຮອຍຍັບທີ່ກາຍເປັນສະເໜ່ຂອງເນື້ອຜ້າ ເໝາະກັບການແຕ່ງຕົວສະໄຕລ໌ Minimal, Old Money ຫຼື Casual Look ບໍ່ວ່າຈະເປັນເສື້ອເຊີດ ກາງເກງຂາຍາວ ຫຼື ຊຸດເດຣສ ກໍຊ່ວຍໃຫ້ລຸກເບິ່ງລຽບງ່າຍແຕ່ມີສະໄຕລ໌

2. ຜ້າຝ້າຍ (Cotton)

ອີກໜຶ່ງຜ້າຄລາສສິກທີ່ຫຼາຍຄົນຄຸ້ນເຄີຍ ນັ້ນກໍຄືຜ້າຝ້າຍ ເຊິ່ງຜະລິດຈາກເສັ້ນໃຍທຳມະຊາດຂອງຕົ້ນຝ້າຍ ມີຄຸນສົມບັດເດັ່ນໃນການດູດຊັບຄວາມຊຸ່ມ ເນື້ອຜ້ານຸ່ມສະບາຍ ແລະ ລະບາຍອາກາດໄດ້ດີ ໂດຍສະເພາະຜ້າຝ້າຍທີ່ມີເນື້ອບາງ ແລະ ການທໍທີ່ບໍ່ແໜ້ນຈົນເກີນໄປ

ຜ້າຝ້າຍຈຶ່ງເໝາະສຳລັບນຳມາຕັດເສື້ອຍືດ ເສື້ອເຊີດ ແລະ ຊຸດລຳລອງທີ່ຕ້ອງສວມໃສ່ເປັນປະຈຳ ແນວໃດກໍຕາມ ຜ້າຝ້າຍກໍມີຂໍ້ຄວນລະວັງ ເຖິງແມ່ນຈະດູດຊັບເຫື່ອໄດ້ດີ ແຕ່ກໍອາດກັກເກັບຄວາມຊຸ່ມໄວ້ ແລະ ແຫ້ງຊ້າກວ່າຜ້າບາງຊະນິດ ດັ່ງນັ້ນ ຄວນເລືອກເນື້ອຜ້າທີ່ບໍ່ໜາຈົນເກີນໄປ ຫາກຕ້ອງອອກໄປເຮັດກິດຈະກຳກາງແຈ້ງ

3. ຜ້າເຣຢອນ (Rayon)

ສຳລັບຜູ້ທີ່ມັກເສື້ອຜ້າທີ່ພິ້ວໄຫວ ແລະ ມີສຳຜັດນຸ່ມລື່ນ ຜ້າເຣຢອນເປັນອີກໜຶ່ງຕົວເລືອກທີ່ໜ້າສົນໃຈ ຜະລິດຈາກເສັ້ນໃຍເຊວລູໂລສທີ່ຜ່ານການແປຮູບ ມີຄຸນສົມບັດໃນການດູດຊັບຄວາມຊຸ່ມໄດ້ດີ ສຳຜັດນຸ່ມ ແລະ ມີການທິ້ງຕົວທີ່ສວຍງາມ

ຈຸດເດັ່ນຂອງຜ້າເຣຢອນຄືເນື້ອຜ້າທີ່ພິ້ວໄຫວ ເຮັດໃຫ້ເສື້ອຜ້າເບິ່ງສວຍງາມ ແລະ ບໍ່ແນບຕິດກັບຮ່າງກາຍຈົນເກີນໄປ ເໝາະສຳລັບເສື້ອເບລົາສ໌ ຊຸດເດຣສ ກະໂປງ ແລະ ກາງເກງຊົງຫຼວມ ແຕ່ຄວນເບິ່ງແຍງຮັກສາຕາມຄຳແນະນຳທີ່ລະບຸໄວ້ໃນປ້າຍເສື້ອ ເພາະຜ້າເຣຢອນບາງຊະນິດອາດຫົດຕົວ ຫຼື ສູນເສຍຮູບຊົງໄດ້ງ່າຍ ຫາກຊັກບໍ່ຖືກວິທີ

4. ຜ້າເທນເຊວ (TENCEL™ Lyocell)

ຫາກກຳລັງຊອກຫາຜ້າທີ່ໃຫ້ສຳຜັດນຸ່ມລື່ນ ແລະ ມີຄວາມພຣີມຽມ ຜ້າ TENCEL™ Lyocell ເປັນອີກໜຶ່ງຕົວເລືອກທີ່ໜ້າລອງ ຜະລິດຈາກເຊວລູໂລສຂອງໄມ້ ໂດຍຜ່ານຂະບວນການຜະລິດເສັ້ນໃຍທີ່ນຳຕົວທຳລະລາຍກັບມາໃຊ້ໃໝ່ໃນລະບົບການຜະລິດ

ຜ້າຊະນິດນີ້ມີຈຸດເດັ່ນດ້ານສຳຜັດທີ່ນຸ່ມລຽບ ການດູດຊັບຄວາມຊຸ່ມ ແລະ ການທິ້ງຕົວທີ່ສວຍງາມ ເຮັດໃຫ້ສວມໃສ່ໄດ້ສະບາຍ ແລະ ເໝາະກັບເສື້ອຜ້າທີ່ຕ້ອງການຄວາມພິ້ວໄຫວ ບໍ່ວ່າຈະເປັນເສື້ອເຊີດ ຊຸດເດຣສ ຫຼື ກາງເກງຂາຍາວ

5. ຜ້າໄຜ່ (Bamboo Viscose)

ຜ້າໄຜ່ແມ່ນຜ້າທີ່ຜະລິດຈາກເຊວລູໂລສຂອງຕົ້ນໄຜ່ ຜ່ານຂະບວນການແປຮູບໃຫ້ກາຍເປັນເສັ້ນໃຍ ໂດຍສ່ວນໃຫຍ່ທີ່ພົບໃນຕະຫຼາດຈະເປັນ Bamboo Viscose ມີສຳຜັດນຸ່ມລື່ນ ດູດຊັບຄວາມຊຸ່ມໄດ້ດີ ແລະ ໃຫ້ຄວາມຮູ້ສຶກສະບາຍເມື່ອສຳຜັດກັບຜິວໜັງ

ດ້ວຍຄຸນສົມບັດຂອງເນື້ອຜ້າທີ່ນຸ່ມ ແລະ ທິ້ງຕົວດີ ຈຶ່ງນິຍົມນຳມາໃຊ້ຕັດເສື້ອຍືດ ຊຸດນອນ ແລະ ເສື້ອຜ້າລຳລອງ ແນວໃດກໍຕາມ ບໍ່ຄວນເຂົ້າໃຈວ່າຜ້າໄຜ່ທຸກຊະນິດມີຄຸນສົມບັດຄືກັນ ເພາະຂະບວນການຜະລິດ ແລະ ການປະສົມເສັ້ນໃຍມີຜົນຕໍ່ຄຸນສົມບັດຂອງເນື້ອຜ້າ

6. ຜ້າຊີເຊີກເກີ (Seersucker)

ຖ້າເວົ້າເຖິງຜ້າທີ່ເໝາະກັບອາກາດຮ້ອນ ຜ້າຊີເຊີກເກີຖືເປັນອີກໜຶ່ງຊະນິດທີ່ໜ້າສົນໃຈ ເພາະມີເອກະລັກຈາກພື້ນຜິວທີ່ເປັນລອນນູນສະຫຼັບກັບພື້ນຜິວລຽບ ເຮັດໃຫ້ເນື້ອຜ້າບໍ່ແນບຕິດກັບຜິວໜັງຫຼາຍຈົນເກີນໄປ ເກີດເປັນຊ່ອງວ່າງລະຫວ່າງຜ້າກັບຜິວ ທີ່ຊ່ວຍໃຫ້ອາກາດໄຫຼວຽນໄດ້ດີຂຶ້ນ

ນອກຈາກຈະຊ່ວຍໃຫ້ສວມໃສ່ສະບາຍແລ້ວ ຍັງມີຮູບລັກທີ່ໂດດເດັ່ນ ໃຫ້ຄວາມຮູ້ສຶກສົດໃສ ເໝາະກັບການນຳມາຕັດເສື້ອເຊີດ ກາງເກງຂາສັ້ນ ແລະ ຊຸດເຊັດສຳລັບລະດູຮ້ອນ ໂດຍສະເພາະຜູ້ທີ່ມັກການແຕ່ງຕົວສະໄຕລ໌ Summer Fashion

7. ຜ້າແຊມເບຣ (Chambray)

ຫຼາຍຄົນອາດເຂົ້າໃຈວ່າຜ້າແຊມເບຣເປັນຜ້າຢີນຊະນິດໜຶ່ງ ແຕ່ໃນຄວາມເປັນຈິງແລ້ວ ທັງສອງມີຄວາມແຕກຕ່າງກັນ ໂດຍຜ້າແຊມເບຣມັກທໍດ້ວຍເສັ້ນດ້າຍຢືນສີໜຶ່ງ ແລະ ເສັ້ນດ້າຍພຸ່ງສີຂາວ ເຮັດໃຫ້ເກີດລັກສະນະຄ້າຍຄືຜ້າຢີນ ແຕ່ໃນຫຼາຍຮູບແບບຈະມີເນື້ອສຳຜັດທີ່ບາງ ແລະ ເບົາກວ່າ

ຈຸດເດັ່ນຄືຄວາມສວຍງາມແບບ Denim Look ທີ່ໃຫ້ຄວາມຮູ້ສຶກ Casual ແຕ່ບໍ່ໜັກ ຫຼື ໜາຈົນເກີນໄປ ເໝາະສຳລັບຕັດເສື້ອເຊີດ ເສື້ອຄຸມ ແລະ ຊຸດລຳລອງ ສຳລັບຜູ້ທີ່ຕ້ອງການຄວາມເທ່ແບບສະບາຍໆ

8. ຜ້າໂພລີເອສເຕີຊະນິດລະບາຍອາກາດ (Breathable Polyester)

ເຖິງວ່າຜ້າໂພລີເອສເຕີຈະເປັນເສັ້ນໃຍສັງເຄາະ ທີ່ບໍ່ມີຄຸນສົມບັດດູດຊັບຄວາມຊຸ່ມຄືກັບເສັ້ນໃຍທຳມະຊາດ ແຕ່ປັດຈຸບັນໄດ້ມີການພັດທະນາເນື້ອຜ້າໂພລີເອສເຕີໃຫ້ເໝາະກັບການໃຊ້ງານໃນສະພາບອາກາດຮ້ອນຫຼາຍຂຶ້ນ ໂດຍສະເພາະຜ້າທີ່ອອກແບບມາໃຫ້ມີໂຄງສ້າງຊ່ວຍລະບາຍອາກາດ ແລະ ຈັດການຄວາມຊຸ່ມ (Moisture-Wicking)

ຜ້າຊະນິດນີ້ມັກພົບໃນເສື້ອກິລາ ແລະ ເສື້ອຜ້າສຳລັບກິດຈະກຳກາງແຈ້ງ ມີຂໍ້ດີຄືນ້ຳໜັກເບົາ ແຫ້ງໄວ ແລະ ບໍ່ກັກເກັບເຫື່ອໄວ້ໃນເນື້ອຜ້າຫຼາຍຄືກັບຜ້າຝ້າຍບາງຊະນິດ ແນວໃດກໍຕາມ ຜ້າໂພລີເອສເຕີທົ່ວໄປບໍ່ໄດ້ລະບາຍອາກາດໄດ້ດີສະເໝີໄປ ຈຶ່ງຄວນເລືອກຜ້າທີ່ອອກແບບມາເພື່ອລະບາຍຄວາມຮ້ອນໂດຍສະເພາະ

ນອກຈາກການເລືອກຊະນິດຂອງເສັ້ນໃຍແລ້ວ ຍັງມີລາຍລະອຽດເລັກໆ ນ້ອຍໆ ທີ່ຊ່ວຍໃຫ້ການແຕ່ງຕົວໃນມື້ທີ່ອາກາດຮ້ອນສະບາຍຂຶ້ນໄດ້ອີກດ້ວຍ

• ເລືອກເນື້ອຜ້າທີ່ບໍ່ໜາຈົນເກີນໄປ: ຜ້າທີ່ມີນ້ຳໜັກເບົາ ແລະ ໂຄງສ້າງການທໍບໍ່ແໜ້ນທຶບຈົນເກີນໄປ ຈະຊ່ວຍໃຫ້ອາກາດໄຫຼວຽນໄດ້ດີຂຶ້ນ
• ເລືອກເສື້ອຜ້າຊົງຫຼວມ: ຊ່ວຍຫຼຸດການສຽດສີ ແລະ ບໍ່ເຮັດໃຫ້ເນື້ອຜ້າແນບຕິດກັບຜິວໜັງຫຼາຍຈົນເກີນໄປ
• ເລືອກສີເສື້ອຜ້າໃຫ້ເໝາະສົມ: ສີອ່ອນມັກດູດຊັບຄວາມຮ້ອນຈາກແສງແດດໜ້ອຍກວ່າສີເຂັ້ມ ຈຶ່ງເໝາະກັບການແຕ່ງຕົວກາງແຈ້ງ
• ກວດເບິ່ງສ່ວນປະສົມຂອງເສັ້ນໃຍ: ເສື້ອຜ້າບາງຊະນິດອາດມີການປະສົມເສັ້ນໃຍຫຼາຍປະເພດ ຄວນກວດເບິ່ງປ້າຍລະບຸສ່ວນປະສົມກ່ອນຊື້ ເພື່ອໃຫ້ໄດ້ຄຸນສົມບັດທີ່ກົງກັບຄວາມຕ້ອງການ

ການເລືອກເສື້ອຜ້າໃຫ້ເໝາະກັບສະພາບອາກາດ ບໍ່ຈຳເປັນຕ້ອງແລກກັບຄວາມສວຍງາມສະເໝີໄປ ເພາະພຽງແຕ່ເລືອກຊະນິດຜ້າໃຫ້ເໝາະສົມ ກໍສາມາດຊ່ວຍໃຫ້ການແຕ່ງຕົວໃນມື້ທີ່ອາກາດຮ້ອນກາຍເປັນເລື່ອງທີ່ສະບາຍຂຶ້ນໄດ້

ບໍ່ວ່າຈະເປັນຜ້າລິນິນທີ່ລະບາຍອາກາດໄດ້ດີ ຜ້າຝ້າຍທີ່ນຸ່ມສະບາຍ ຜ້າເທນເຊວທີ່ມີສຳຜັດລື່ນ ຫຼື ຜ້າຊີເຊີກເກີທີ່ມີພື້ນຜິວເປັນເອກະລັກ ລ້ວນແຕ່ເປັນຕົວເລືອກທີ່ໜ້າສົນໃຈສຳລັບລະດູຮ້ອນ

ເພາະສຸດທ້າຍແລ້ວ ແຟຊັ່ນທີ່ດີບໍ່ແມ່ນພຽງແຕ່ການແຕ່ງຕົວໃຫ້ເບິ່ງດີເທົ່ານັ້ນ ແຕ່ຕ້ອງເປັນເສື້ອຜ້າທີ່ເຮັດໃຫ້ເຮົາຮູ້ສຶກດີ ແລະ ໝັ້ນໃຈໄດ້ຕະຫຼອດທັງມື້ອີກດ້ວຍ!