ເປີດເລື່ອງລາວ ‘Red Flavor’ ເພງ K-Pop ທີ່ເຄີຍສ້າງປາກົດການໄດ້ໄປສະແດງຢູ່ເກົາຫຼີເໜືອ
Key Takeaways:
- ເພງ "Red Flavor" ຂອງ Red Velvet ໄດ້ຮັບການຍົກຍ້ອງວ່າເປັນເພງຊາດແຫ່ງລະດູຮ້ອນ, ສະແດງເຖິງຄວາມສົມດຸນລະຫວ່າງຄວາມສົດໃສ ແລະ ຄວາມມີສະເໜ່.
- ດົນຕີ Electropop ຂອງ "Red Flavor" ຖືກອອກແບບມາໃຫ້ຮູ້ສຶກເຖິງຄວາມສົດຊື່ນ, ແລະ ເນື້ອເພງ "빨간 맛 (Red Flavor) 궁금해 Honey" ໄດ້ກາຍເປັນປະໂຫຍກທີ່ຕິດຫູ.
- MV ຂອງ "Red Flavor" ໂດດເດັ່ນດ້ວຍ Concept ການສ້າງສັນ, ໂດຍສະມາຊິກແຕ່ລະຄົນໄດ້ຮັບໝາກໄມ້ປະຈຳຕົວທີ່ເປັນສັນຍາລັກ.
- "Red Flavor" ສະແດງໃຫ້ເຫັນສະຖິຕິທີ່ຍືນຍົງ, ກັບຄືນມາຢູ່ໃນ Top 100 ຂອງ MelOn ທຸກລະດູຮ້ອນ ແລະ ມີຍອດເຂົ້າຊົມ MV ຫຼາຍກວ່າ 200 ລ້ານເທື່ອ.
- Red Velvet ໄດ້ສ້າງປະຫວັດສາດດ້ວຍການໄປສະແດງທີ່ນະຄອນຫຼວງພຽງຢາງ, ສປປ ເກົາຫຼີ ໃນປີ 2018, ນຳສະເໜີເພງ "Red Flavor" ແລະ "Bad Boy" ເປັນຕົວແທນຂອງ K-Pop ທີ່ທັນສະໄໝ ແລະ ມີສະເໜ່.
ໃນໂລກຂອງ K-Pop ທີ່ປ່ຽນແປງໄວແບບລາຍວັນ, ມີບໍ່ເທົ່າໃດເພງທີ່ຈະສາມາດຮັກສາສະເໜ່ໄດ້ຂ້າມທົດສະວັດ. ແຕ່ຖ້າຈະເວົ້າເຖິງເພງທີ່ເປັນຄືກັບເພງຊາດຂອງລະດູຮ້ອນ, “Red Flavor” ຈາກ Red Velvet ຄືຄຳຕອບທີ່ແຟນເພງທົ່ວໂລກຍົກໃຫ້ເປັນທີໜຶ່ງໃນໃຈ.
ມື້ນີ້ Muan ຈະພາມາຮູ້ຈັກກັບເລື່ອງລາວຄວາມສຳເລັດຂອງເພງນີ້ ທັງໃນແງ່ດົນຕີ, Concept ແລະ ເຫດການປະຫວັດສາດທີ່ຄັ້ງໜຶ່ງເຄີຍຖືກເລືອກໃຫ້ໄປສະແດງສົດຢູ່ເກົາຫຼີເໜືອ.
ສູດສຳເລັດຂອງເພງຊາດລະດູຮ້ອນ
ການປ່ອຍ “Red Flavor” ໃນປີ 2017 ຄືຈຸດປ່ຽນທີ່ເຮັດໃຫ້ Red Velvet ກາຍເປັນ Summer Queen ຢ່າງສົມບູນແບບ. ຄວາມອັດສະຈັນຂອງເພງນີ້ຄືຄວາມສົມດຸນລະຫວ່າງຄວາມສົດໃສ ແລະ ຄວາມມີສະເໜ່ ທີ່ກົງກັບຊື່ຂອງວົງ.
ໃນແງ່ຂອງການຜະລິດ, ດົນຕີແບບ Electropop ທີ່ມີສຽງສັງເຄາະສູງ, ຈັງຫວະທີ່ໄວ ແລະ ພະລັງງານທີ່ລົ້ນເຫຼືອຂອງເພງນີ້ ຖືກອອກແບບມາໃຫ້ຟັງແລ້ວຮູ້ສຶກເຖິງຄວາມສົດຊື່ນຄືກັບການດື່ມນ້ຳໝາກໄມ້ເຢັນໆ.
ພ້ອມນີ້, ເນື້ອຮ້ອງ 빨간 맛 (Red Flavor) 궁금해 Honey ມັນເປັນປະໂຫຍກລ້າງສະໝອງທີ່ຝັງເລິກຢູ່ໃນຫົວຂອງຄົນຟັງຕັ້ງແຕ່ຄັ້ງທຳອິດເລີຍ.
ລະຫັດລັບໝາກໄມ້
MV ນີ້ແມ່ນບົດຮຽນຂອງການສ້າງ Concept ທີ່ເຮັດໃຫ້ຄົນຈື່ ບໍ່ວ່າຈະເປັນການໃຫ້ສະມາຊິກແຕ່ລະຄົນມີໝາກໄມ້ປະຈຳຕົວ ເຊັ່ນ: Irene ແມ່ນໝາກໂມ, Seulgi ແມ່ນໝາກນັດ, Wendy ແມ່ນໝາກກ້ຽງ, Joy ແມ່ນໝາກກີວີ ແລະ Yeri ແມ່ນໝາກລາແຊັງ.
ສະຖິຕິທີ່ຕາຍຍາກ
Red Flavor ຄືເພງທີ່ກັບມາຂຶ້ນ chart ຕະຫຼອດ, ເພາະທຸກປີເມື່ອຮອດລະດູຮ້ອນ ເພງນີ້ຈະດີດຕົວເອງກັບມາຢູ່ Top 100 ຂອງການຈັດອັນດັບ MelOn ຢູ່ສະເໝີ.
ໃນສ່ວນຂອງ MV, ເພງນີ້ມີຜູ້ເຂົ້າຊົມເຖິງ 213 ລ້ານຄັ້ງທາງຢູທູບຕັ້ງແຕ່ປ່ອຍໃຫ້ຟັງ ມາຈົນຮອດ 2026. ນີ້ຖືວ່າເປັນໜຶ່ງໃນ 5 ເພງທີ່ມີຜູ້ຟັງຫຼາຍກວ່າ 200 ຄັ້ງຂອງເຂົາເຈົ້າ.
ນອກຈາກນີ້ ເພງນີ້ຍັງເປັນເພງມາດຕະຖານ ທີ່ Trainee ທຸກຄົນຕ້ອງຮຽນເຕັ້ນ ຖ້າຢາກສະແດງເຖິງພະລັງ ແລະ ຄວາມເປັນມືອາຊີບ.
ພາລະກິດປະຫວັດສາດ
ເຫດການທີ່ສຳຄັນທີ່ສຸດໃນປະຫວັດສາດ ຄືການທີ່ Red Velvet ໄດ້ໄປສະແດງທີ່ ນະຄອນຫຼວງພຽງຢາງ ຂອງ ສປປ ເກົາຫຼີ ຫຼື ເກົາຫຼີເໜືອ ໃນປີ 2018.
ເປັນຫຍັງຕ້ອງເປັນ Red Velvet? ພວກເຂົາຖືກເລືອກເພາະມີຄວາມສົມດຸນທີ່ສຸດລະຫວ່າງຄວາມເປັນມິດ ແລະ ຄວາມເປັນມືອາຊີບ.
ໃນຊ່ວງເວລາທີ່ຄວາມສຳພັນທາງການເມືອງລະຫວ່າງສອງເກົາຫຼີພວມເປີດກວ້າງ, Red Velvet ຄືຕົວແທນຂອງຄວາມສົດໃສ ທີ່ທົ່ວໂລກຍອມຮັບ.
ໃນເວທີປະຫວັດສາດນັ້ນ, ສາວໆບໍ່ໄດ້ສະແດງພຽງແຕ່ເພງ Red Flavor ເທົ່ານັ້ນ ແຕ່ພວກເຂົາຍັງໄດ້ນຳເອົາເພງ Bad Boy ໄປສະແດງນຳ.
ໃນຄັ້ງນັ້ນເປັນການສະແດງໃຫ້ເຫັນເຖິງອີກມຸມໜຶ່ງຂອງ K-Pop ທີ່ທັງທັນສະໄໝ ແລະ ມີສະເໜ່ທີ່ເປັນທີ່ນິຍົມໄປທົ່ວໂລກ.
ເຖິງວ່າຜູ້ຊົມໃນເກົາຫຼີເໜືອຈະບໍ່ຄຸ້ນເຄີຍກັບດົນຕີແບບນີ້, ແຕ່ການທີ່ Red Velvet ສາມາດສື່ສານຜ່ານທັງຄວາມສົດໃສ ແລະ ຄວາມມີສະເໜ່ໄດ້ໃນເວທີດຽວ ມັນເປັນຫຼັກຖານທີ່ດີທີ່ສຸດວ່າດົນຕີສາມາດທະລຸຜ່ານທຸກກຳແພງການເມືອງ ແລະ ເຂົ້າເຖິງຫົວໃຈຄົນໄດ້ແທ້.