ບໍ່ມີແຮງທີ່ຈະລຸກອອກໄປໃສ, ມັນເມື່ອຍ, ມັນເບື່ອ ແລະ ເກີດອາການບໍ່ມີແຮງກັບມາໃຊ້ຊີວິດຕາມປົກກະຕິ ຫຼື ບໍ່ຢາກຈະເຮັດຫຍັງເລີຍ. ອາການແບບນີ້ມັກຈະເກີດຂຶ້ນຫຼັງຈາກການພັກແບບຍາວໆເຊັ່ນ: ການພັກໃນຊ່ວງປີໃໝ່ລາວ, ເຄົ້າດາວ-ປີໃໝ່ສາກົນ ແລະ ການລາພັກຮ້ອນ.
ອາການແບບນີ້ເອີ້ນວ່າ Post Holiday Blues ຫຼື ອາການຊຶມເສົ້າຫຼັງຈາກພັກຍາວນັ້ນເອງ ເຊິ່ງຫຼາຍໆຄົນທີ່ກຳລັງຮູ້ສຶກແບບນີ້ຢູ່ມັນບໍ່ແມ່ນເລື່ອງແປກເດີ, ເພາະໃນສະໝອງເຮົາຍັງສັ່ງການໃຫ້ຫວນນຶກເຖິງ ແລະ ວົນວຽນໂຫຍຫາຊ່ວງເວລາແຫ່ງຄວາມສຸກ.
ເພາະໃນຊ່ວງພັກຍາວພວກເຮົາໄດ້ພັກຜ່ອນ, ໄດ້ຢູ່ກັບຄົນທີ່ຮັກ, ໄດ້ເຮັດສິ່ງທີ່ມັກ, ສະໝອງຂອງພວກເຮົາປ່ອຍໂດພາມີນ ແລະ ເຊໂຣໂທນິນ ຊຶ່ງເປັນສານທີ່ເຮັດໃຫ້ມີຄວາມສຸກ.
ພໍໝົດຊ່ວງເວລາດີໆ ແລະ ຕ້ອງກັບມາສູ່ຄວາມເປັນຈິງ, ສະໝອງຈຶ່ງເກີດສະພາບ Happy Crash ຫຼື ຄວາມສຸກຕົກຫຼົ່ນ ນັ້ນເອງ. ອີກເຫດຜົນໜຶ່ງຄືຈັງຫວະຊີວິດປ່ຽນແປງກະທັນຫັນເຊັ່ນ: ຈາກການຕື່ນນອນສວາຍສະບາຍໆ ປັບມາເປັນຕື່ນເຊົ້າກະທັນຫັນກັບສູ່ຄວາມເຄັ່ງຄຽດອີກຄັ້ງ.
ວິທີຮັບມືເບື້ອງຕົ້ນ:
1. ຄ່ອຍໆປັບຕົວ:
ບໍ່ຈຳເປັນຕ້ອງກັບມາເລັ່ງເຄື່ອງໃຫ້ໄວທັນທີ ຄ່ອຍໆເອີ້ນຫາຈັງຫວະຊີວິດ Routine ເກົ່າກັບມາເຊັ່ນ: ຈັດຕາຕະລາງຊີວິດງ່າຍໆກ່ອນ.
2. ເຕີມພະລັງນ້ອຍໆໃນມື້ທຳມະດາເຊັ່ນ:
ຟັງເພງທີ່ມັກ, ກິນກາເຟຮ້ານທີ່ມັກ, ອອກກຳລັງກາຍ ຫຼື ນັດລົມກັບໝູ່ເພື່ອນຫຼັງເລີກຮຽນ ຫຼື ເລີກວຽກ.
3. ບໍ່ໂທດຕົນເອງ:
ຄວາມຮູ້ສຶກນີ້ບໍ່ແມ່ນຄວາມຜິດຂອງເຈົ້າ, ມັນເປັນເລືອງທຳມະຊາດຂອງມະນຸດທີ່ສາມາດເກີດຂຶ້ນໄດ້.
4. ວາງແຜນພັກໃນເທື່ອຕໍ່ໄປ:
ການມີບາງສິ່ງບາງຢ່າງໃຫ້ເຮົາຕັ້ງຕາລໍຄອຍຈະຊ່ວຍໃຫ້ມີກຳລັງໃຈຫຼາຍຂຶ້ນເຊັ່ນ: ວາງແຜນທ່ຽວສັ້ນໆ ຫຼື ມື້ພັກຕໍ່ໄປທີ່ຢາກເຮັດຫຍັງ.
5. ຂອບໃຈທີ່ຕົວເອງ:
ທີ່ຜ່ານມາເຈົ້າໄດ້ເຮັດຫຍັງມາໜັກຫຼາຍແລ້ວ ຄວນຂອບໃຈຕົວເອງທີ່ໄດ້ພັກແດ່, ກັບມາໃຊ້ພະລັງງານ ແລະ ເລັ່ງໃສ່ເປົ້າໝາຍໃໝ່ໃຫ້ສຳເລັດ.
ໂດຍ: ທີມບັນນາທິການ Muan
