13 ປີ ອາດບໍ່ແມ່ນເວລາດົນປານໃດສຳລັບແບຣນແຟຊັນໃນຕ່າງປະເທດ, ແຕ່ສຳລັບແບຣນກະເປົາລາວທີ່ເລີ່ມຈາກສູນ ໃນຕະຫຼາດທີ່ຄົນສ່ວນຫຼາຍຍັງເລືອກໃຊ້ຂອງນອກ, 13 ປີ ຄືໄລຍະທີ່ຕ້ອງພິສູດໂຕເອງມາຕະຫຼອດ.

ວັນທີ 3 ຕຸລາ 2026 ທີ່ຜ່ານມາ NAREE ໄດ້ຈັດງານ NAREE 13 Year Anniversary ຢູ່ຮ້ານຂອງແບຣນເອງ ທີ່ນະຄອນຫຼວງວຽງຈັນ. ງານນີ້ບໍ່ແມ່ນພຽງແຕ່ງານສະຫຼອງວັນເກີດ ແຕ່ມັນເປັນຈຸດປ່ຽນຂອງແບຣນ, ເພາະຜູ້ກໍ່ຕັ້ງ ກະຕ່າຍ – ມະໂນທິບ ສິຣິປະພັນ ໄດ້ປະກາດທິດທາງໃໝ່ ແລະ ເປີດໂຕແບຣນໃໝ່ໄປພ້ອມກັນ.

ໃນບົດຄວາມນີ້ ທີມມ່ວນຈະພາທຸກຄົນຢ້ອນກັບໄປເບິ່ງວ່າ NAREE ເລີ່ມຕົ້ນມາແນວໃດ, ຜູ້ກໍ່ຕັ້ງຕັ້ງເປົ້າໝາຍຫຍັງໄວ້ສຳລັບກ້າວຕໍ່ໄປ ແລະ ຮູ້ຈັກ MAISONAREE ແບຣນໃໝ່ທີ່ເອົາເສັ້ນໄຍກ້ວຍມາເຮັດເປັນຜ້າ.

ຈາກກະເປົາແບຣນທຳອິດຂອງລາວ ກ້າວສູ່ 13 ປີ

ຫຼາຍຄົນອາດບໍ່ຮູ້ວ່າ NAREE ຖືກລາຍງານວ່າເປັນແບຣນກະເປົາແບຣນທຳອິດຂອງລາວ. ຈຸດເລີ່ມຕົ້ນແມ່ນເລີ່ມມາຈາກການແຂ່ງຂັນແຜນທຸລະກິດ STEPS Young Entrepreneur ທີ່ທະນາຄານໂລກຈັດຂຶ້ນໃນລາວ ຊ່ວງປີ 2012 – 2013. ມະໂນທິບ ໄດ້ຮັບເງິນລາງວັນຈາກການແຂ່ງຂັນ ແລະ ເອົາເງິນນັ້ນມາເລີ່ມສ້າງແບຣນ ໂດຍການຝຶກທີມອອກແບບ ແລະ ຊ່າງຂອງໂຕເອງ.

ກະເປົາ NAREE ເລີ່ມວາງຂາຍຢ່າງເປັນທາງການຢູ່ວຽງຈັນຊ່ວງທ້າຍປີ 2014. ໃນຕອນນັ້ນ ລາວຜະລິດໄດ້ພຽງ 50–100 ໜ່ວຍຕໍ່ຄັ້ງ ເຊິ່ງຍັງບໍ່ທັນພຽງພໍກັບຄວາມຕ້ອງການຂອງລູກຄ້າ. ຫຼັງຈາກນັ້ນບໍ່ດົນ ແບຣນກໍເປີດຮ້ານທຳອິດໃນຕົ້ນປີ 2015. ວັດສະດຸຫຼັກແມ່ນໜັງ ແລະ ຜ້າໄໝລາວ ເຊິ່ງເປັນສ່ວນໜຶ່ງທີ່ເຮັດໃຫ້ກະເປົາ NAREE ມີເອກະລັກຕັ້ງແຕ່ມື້ທຳອິດ.

ການໃສ່ຄວາມເປັນລາວໄວ້ໃນລາຍລະອຽດ ຍັງເປັນສິ່ງທີ່ແບຣນຮັກສາມາຈົນເຖິງທຸກມື້ນີ້. ເບິ່ງໄດ້ຈາກສັນຍາລັກ ແມງກະເບື້ອ ຂອງ NAREE ທີ່ອອກແບບໂດຍເອົາຕົວອັກສອນ “ນ” ແລະ “ຣ” ມາປະສົມກັບສິລະປະຮ່ວມສະໄໝ.

ເມື່ອແບຣນເຕີບໂຕຂຶ້ນ ເລື່ອງທີ່ຕ້ອງຄິດຕໍ່ກໍຄືທິດທາງ. ໃນປີ 2026 ນີ້ NAREE ຈຶ່ງແຍກອອກເປັນ 2 ແບຣນ ຄື NAREE ແລະ MAISONAREE. ທັງສອງແບຣນມີບຸກຄະລິກຕ່າງກັນ ແຕ່ຍັງມາຈາກຮາກດຽວກັນ ແລະ ມີຄຸນຄ່າຮ່ວມກັນຄື ຄວາມຄິດສ້າງສັນ. NAREE ຈະເນັ້ນແຟຊັນສາກົນເປັນຫຼັກ ໂດຍຍັງມີງານຫັດຖະກຳລາວເຂົ້າມາປະກອບ.

ສ່ວນ MAISONAREE ແມ່ນເນັ້ນຜ້າຈາກເສັ້ນໄຍກ້ວຍ ແລະ ວັດສະດຸທຳມະຊາດ ທີ່ຜ່ານຂະບວນການຫັດຖະກຳຢ່າງພິຖີພິຖັນທຸກຂັ້ນຕອນ ໂດຍລວມຕົວຕົນ, ຜືນຜ້າ, ງານອອກແບບ ແລະ ສິລະປະເຂົ້າກັນ ຈົນກາຍເປັນຄວາມງາມທີ່ມີເລື່ອງລາວ ແລະ ສຳຜັດໄດ້ຈິງ.

ຢາກໃຫ້ສິນຄ້າລາວກາຍເປັນທາງເລືອກໜຶ່ງຂອງສິນຄ້າລະດັບໂລກ.

ນີ້ຄືຄຳເວົ້າຂອງ ກະຕ່າຍ – ມະໂນທິບ ສິຣິປະພັນ ຜູ້ກໍ່ຕັ້ງ ແລະ CEO ຂອງ NAREE ໃນມື້ງານ.

ຄວາມມຸ່ງໝັ້ນນີ້ສຳລັບລາວບໍ່ແມ່ນເລື່ອງໃໝ່ເລີຍ. ຕັ້ງແຕ່ປີ 2017 ທີ່ລູກຄ້າປະຈຳເກືອບທັງໝົດຍັງເປັນຄົນລາວ, ລາວກໍເຄີຍບອກແລ້ວວ່າ ເປົ້າໝາຍຂອງແບຣນແມ່ນການພາກະເປົາລາວອອກສູ່ສາກົນ. ສິ່ງທີ່ຕ່າງໄປໃນປີນີ້ຄື NAREE ເດີນທາງມາຮອດ 13 ປີ ທີ່ເຕັມປ່ຽມໄປດ້ວຍຄຸນນະພາບ ແລະ ຄວາມເຊື່ອໝັ້ນຈາກລູກຄ້າເປັນພື້ນຖານແລ້ວ.

ລາວເລົ່າວ່າ ໃນຂັ້ນຕໍ່ໄປ NAREE ຈະຂະຫຍາຍຊ່ອງທາງ ໃຫ້ຄົນທົ່ວໂລກເຂົ້າເຖິງສິນຄ້າລາວໄດ້ງ່າຍຂຶ້ນ ແລະ ກ້າວທຳອິດຂອງທິດທາງໃໝ່ນີ້ ກໍຖືກເປີດໂຕໃຫ້ເຫັນໃນຄືນດຽວກັນ.

ເປີດໂຕແບຣນໃໝ່ MAISONAREE

ທຸກຄົນເຄີຍຄິດບໍວ່າ ເສັ້ນໄຍຈາກຕົ້ນກ້ວຍທີ່ເຮົາເຫັນທົ່ວໄປ ຈະເອົາມາເຮັດເປັນຜືນຜ້າ ແລະ ອອກແບບເປັນຊິ້ນງານແຟຊັນໄດ້?

ຄົນໃນອາຊີຮູ້ຈັກຜ້າເສັ້ນໄຍກ້ວຍມາຫຼາຍຮ້ອຍປີແລ້ວ. ຢູ່ໂອກິນາວາ ປະເທດຍີ່ປຸ່ນ ມີຜ້າເສັ້ນໄຍກ້ວຍທີ່ເອີ້ນວ່າ Bashofu ເຊິ່ງໄດ້ຮັບການຂຶ້ນທະບຽນເປັນມໍລະດົກທາງວັດທະນະທຳທີ່ບໍ່ເປັນວັດຖຸທີ່ສຳຄັນຂອງຊາດ ຕັ້ງແຕ່ປີ 1974. ສ່ວນຢູ່ຟິລິບປິນ ກໍມີຜ້າຈາກເສັ້ນໄຍຂອງພືດຕະກູນກ້ວຍມາແຕ່ສະໄໝບູຮານ. ການເຮັດຜ້າປະເພດນີ້ບໍ່ງ່າຍ. ເສັ້ນໄຍແຕ່ລະເສັ້ນຍາວບໍ່ຮອດ 1 ແມັດ, ຊ່າງຈຶ່ງຕ້ອງມັດຕໍ່ກັນເທື່ອລະເສັ້ນ ກ່ອນຈະເອົາໄປຍ້ອມ ແລະ ທໍໄດ້.

MAISONAREE ນຳເອົາວັດສະດຸທີ່ມີປະຫວັດແບບນີ້ ມາເລົ່າໃນແບບຂອງຄົນລາວ. ແບຣນເຮັດສິ່ງທໍຈາກເສັ້ນໄຍກ້ວຍ ແລະ ວັດສະດຸທຳມະຊາດ ທີ່ຜ່ານຂະບວນການຫັດຖະກຳຢ່າງລະອຽດທຸກຂັ້ນຕອນ.

ໃນມື້ງານມີແຟຊັນໂຊ ທີ່ໃຫ້ທຸກຄົນໄດ້ເຫັນແນວທາງຂອງແບຣນ ທີ່ເອົາແຟຊັນ ແລະ ສິລະປະລາວມາຢູ່ນຳກັນ. ຄວາມເປັນລາວຂອງ MAISONAREE ບໍ່ໄດ້ຢູ່ແຕ່ໃນວັດສະດຸທີ່ນຳໃຊ້ເທົ່ານັ້ນ.

ສັນຍາລັກຂອງແບຣນກໍມາຈາກ 2 ເລື່ອງທີ່ຄົນລາວຄຸ້ນເຄີຍ ນັ້ນກໍຄື ໝາກນ້ຳເຕົ້າປຸງ ເຊິ່ງເປັນນິທານທີ່ເລົ່າຕໍ່ກັນມາແຕ່ບູຮານວ່າ ຄົນລາວເກີດມາຈາກໝາກນ້ຳເຕົ້າປຸງ. ພ້ອມນັ້ນກໍນຳໃຊ້ເຕັກນິກການຕ່ຳຫູກທໍໄໝ ທີ່ເປັນພູມປັນຍາຂອງຄົນລາວ ແລະ ສະແດງໃຫ້ເຫັນສີມື ແລະ ຄວາມຄິດສ້າງສັນຂອງແມ່ຍິງລາວ.

ນອກຈາກນັ້ນ MAISONAREE ຍັງເຮັດວຽກຮ່ວມກັບຊ່າງຫັດຖະກຳລາວໂດຍກົງ. ແບຣນເອົາພູມປັນຍາທີ່ມີຢູ່ແລ້ວມາອອກແບບໃຫ້ເປັນຜົນງານຮ່ວມສະໄໝ, ໂດຍມີເປົ້າໝາຍເພື່ອຮັກສາ ແລະ ສ້າງຄຸນຄ່າໃຫ້ກັບຄວາມຄິດສ້າງສັນຂອງຄົນລາວ.

ນອກຈາກການເປີດໂຕແບຣນໃໝ່ ຄືນນັ້ນຍັງມີອີກຫຼາຍໂຊ ທີ່ເລົ່າເລື່ອງ 13 ປີຂອງ NAREE ໃນແບບທີ່ຕ່າງກັນ.

ໂຊອື່ນໆພາຍໃນງານ: ດົນຕີລາວຮ່ວມສະໄໝ, ແຟຊັນໂຊ, ການເຕັ້ນ ແລະ ຄໍເລັກຊັນໃໝ່

ງານເປີດດ້ວຍດົນຕີລາວ ແລະ ການກ່າວເປີດງານຈາກຜູ້ກໍ່ຕັ້ງ. ຕໍ່ມາແມ່ນແຟຊັນໂຊກະເປົາ ທີ່ລວມທຸກຄໍເລັກຊັນຕະຫຼອດ 13 ປີ ມາໄວ້ໃນເວທີດຽວ. ກະເປົາແຕ່ລະໜ່ວຍຖືກນຳສະເໜີໂດຍນາງແບບ, ນາຍແບບ, ນາງງາມ ແລະ ຊາຍງາມແຖວໜ້າຂອງລາວ.

ຈາກນັ້ນມີການສະແດງ Contemporary Dance ທີ່ເລົ່າເລື່ອງການເຕີບໂຕຂອງແບຣນຜ່ານທ່າເຕັ້ນ. ຫຼັງຈາກຍ້ອນເບິ່ງອະດີດແລ້ວ NAREE ກໍພາທຸກຄົນເບິ່ງໄປຂ້າງໜ້າ ດ້ວຍ 2 ຄໍເລັກຊັນໃໝ່ ນັ້ນກໍຄື:

• NAREE Everyday Look 2027: ເສື້ອຜ້າທີ່ໃສ່ໄດ້ທຸກມື້ ແຕ່ຍັງສະແດງຕົວຕົນຂອງຄົນໃສ່.
• NAREE Gala 2027: ຄໍເລັກຊັນທີ່ເນັ້ນຄວາມຫຼູຫຼາ ຜ່ານຄວາມໃສ່ໃຈໃນລາຍລະອຽດ ແລະ ຄຸນນະພາບ.

ປິດທ້າຍງານດ້ວຍເພງ Dare to Fly ຈາກສິລະປິນລາວ OLA BLACKEYES ຜູ້ທີ່ເປັນທັງຄູ່ຊີວິດ ແລະ ຢູ່ຄຽງຂ້າງ ມະໂນທິບ ມາໂດຍຕະຫຼອດ. ເພງນີ້ແຕ່ງຂຶ້ນເພື່ອເລົ່າເຖິງການເດີນທາງ, ການເຕີບໂຕ ແລະ ຄວາມຝັນຂອງ NAREE.

ກ້າວຕໍ່ໄປຂອງແບຣນລາວ

ຖ້າເບິ່ງຢ້ອນກັບໄປ NAREE ເລີ່ມຈາກເງິນລາງວັນທີ່ໄດ້ຈາກການແຂ່ງຂັນແຜນທຸລະກິດ ແລະ ກະເປົາບໍ່ເທົ່າໃດຮ້ອຍໜ່ວຍ. ມາຮອດປີທີ 13 ແບຣນໄດ້ແບ່ງອອກເປັນ 2 ຊື່, ມີຄໍເລັກຊັນເສື້ອຜ້າ ແລະ ກຳລັງວາງແຜນອອກສູ່ສາກົນ. ສິ່ງທີ່ບໍ່ປ່ຽນຕະຫຼອດທາງ ຄືການເອົາຄວາມເປັນລາວ, ຄວາມຄິດສ້າງສັນ ແລະ ຄຸນນະພາບ ໃສ່ໄວ້ໃນທຸກຊິ້ນງານ.

ແຕ່ການທີ່ສິນຄ້າລາວຈະກາຍເປັນທາງເລືອກໜຶ່ງໃນລະດັບໂລກໄດ້ ອາດບໍ່ໄດ້ຂຶ້ນກັບແບຣນຢ່າງດຽວ. ຄຳຖາມທີ່ທີມມ່ວນຢາກຖາມທຸກຄົນຄື: ກ່ອນຄົນທົ່ວໂລກຈະເລືອກຂອງລາວ, ເຮົາຄົນລາວເອງເລືອກໃຊ້ຂອງລາວແລ້ວ ຫຼື ຍັງ?