ຄວາມຮັກທີ່ມີໃຫ້ເຈົ້າ ຢາກໃຫ້ເຮົາເປັນຫຼາຍກວ່າໝູ່ ຟັງເພງ “ເປັນໄປໄດ້ບໍ” ຈາກ Napha Yaganagi
ນະພາ ຢາການາກິ ນັກຮ້ອງໜ້າໃໝ່ໃນສັງກັດ Miracle Music ໄດ້ຈັດສົ່ງເພງເສົ້າສຸດຊຶ້ງທີ່ມີຊື່ວ່າ “ເປັນໄປໄດ້ບໍ “, ທີ່ໄດ້ເລົ່າເຖິງຄວາມຮູ້ສຶກພິເສດທີ່ຫຼາຍກວ່າໝູ່ທີ່ເປັນໄປໄດ້ຍາກຂອງ ຫວັງ ແລະ ຫຼົງ (ນັກສະແດງເອັມວີຫຼັກໃນເລື່ອງ).
“ຂ້ອຍມີສິດບໍ່ ຈະຮັກເຈົ້າຫຼາຍກວ່ານັ້ນ
ແຕ່ຂໍໃຫ້ເຈົ້າບໍ່ປ່ຽນໄປ ບໍ່ຫ່າງໄກ
ຢາກໃຫ້ເຮົາຍັງຊິດໃກ້ ແລະ ຢາກໃຫ້ເຈົ້າຍັງສົນໃຈ
ເປັນໄປໄດ້ບໍ”
ເພງທີ່ເສົ້າຂະໜາດນີ້ເປັນຜົນງານການແຕ່ງເນຶ້ອຮ້ອງຂອງນ້ອງ ນະພາ ຢາການາກິ ເດີທຸກຄົນ, ຄວາມສາມາດທີ່ປະກອບກັບການຮ້ອງທີ່ໂດດເດັ່ນຂະໜາດນີ້ຖືວ່າເປັນທີ່ຈັບຕາເບິ່ງອີ່ຫຼີ່ໃນວົງການເພງລາວເຮົາ.
ເອັມວີຕອນເລີ່ມຕົ້ນແມ່ນໄດ້ເລົ່າເຖິງຄວາມຮູ້ສຶກຂອງຫວັງທີ່ໄດ້ສະແດງອອກໃຫ້ເຮົາເຫັນໄດ້ຢ່າງຊັດເຈນ, ຜ່ານການກະທຳ ແລະ ສາຍຕາທີ່ແນມຫາແຕ່ ຫຼົງ. ການສະແດງອອກທາງສາຍຕາທີ່ມີທັງຮັກ ແລະ ເປັນຫ່ວງປົນຄວາມເສົ້າໂສກຢູ່ໃນນັ້ນ. ໃນມຸມມອງທີ່ມ່ວນໄດ້ເບິ່ງການກະທຳນັ້ນ, ກໍອົດທີ່ຈະຮູ້ສຶກສົງສານບໍ່ໄດ້. ເພາະຫວັງຖືວ່າເປັນຄົນທີ່ຢືນຢູ່ຄຽງຂ້າງຫຼົງໃນທຸກເວລາ.
ໃນສ່ວນຄວາມຮູ້ສຶກຂອງຫຼົງແມ່ນມ່ວນກໍຍັງຕີຄວາມໝາຍບໍ່ອອກເທື່ອເພາະນ້ອງໄດ້ສະແດງອອກດ້ວຍຄວາມສັບສົນ ແລະ ບໍ່ຊັດເຈນ. ມັນຄ້າຍກັບວ່າຄວາມຮູ້ສຶກທີ່ມີຢູ່ມັນແມ່ນຫຍັງກັນແທ້, ເພາະດ້ວຍຄວາມໃກ້ຊິດທີ່ມີຫຼາຍຂຶ້ນຈາກການທີ່ຫວັງໄດ້ດູແລຫຼົງເລີຍອາດເຮັດໃຫ້ຫວັ່ນໄຫວໄດ້ ແລະ ເກີດຄວາມຮູ້ສຶກພິເສດຂຶ້ນມາ.
ໃຜທີ່ຍັງບໍ່ໄດ້ເບິ່ງໜັງສັ້ນກ່ອນກໍອາດຈະງົງໆກັນວ່າເປັນຫຍັງບົດສະຫຼຸບຄືເປັນແບບນີ້ເພາະໃນສາກສຸດທ້າຍກັບເປັນຫວັງເອງທີ່ເປັນຄົນປະຕິເສດຫຼົງ. ເພາະເບິ່ງໃນເອັມວີເບິ່ງຈັງໃດກໍຮູ້ວ່າຫວັງນັ້ນຮູ້ສຶກຫຼາຍກ່ອນແນ່ນອນ, ມັນອາດຈະຍ້ອນຄວາມເຂົ້າໃຈຜິດບາງຢ່າງເຮັດໃຫ້ເລື່ອງລາວຂອງພວກເຂົາທັງສອງນັ້ນເປັນໄປບໍ່ໄດ້.
ມ່ວນເລີຍຢາກຊວນທຸກຄົນໄປຟັງ, ໄປຕິດຕາມກັນຕໍ່ທັງໃນເອັມວີເພງ ແລະ ໜັງສັ້ນໃນ YT ກັນເລີຍເດີ, ແລ້ວຢ່າເສຍນ້ຳຕາຄືມ່ວນລະ.
ໂດຍ: ທີມບັນນາທິການ Muan