ເກັ່ງມາຕະຫຼອດ ສຸດທ້າຍກໍແພ້ໃຫ້ຄົນເກົ່າ ຟັງ ມັນຄົງຈະດີ ຈາກ LIL ROXZ ft PT FLOW
ພໍລົມໜາວຮອບໃໝ່ເລີ່ມພັດມາທັກທາຍ, ຄວາມຮູ້ສຶກທຳອິດທີ່ເຂົ້າມາໃນຫົວເລີຍກໍຄື… ຄວາມເຫງົາ.
ເຊື່ອວ່າຫຼາຍຄົນຄົງເປັນຄືກັນ ພໍອາກາດມັນເຢັນລົງ, ຟ້າມືດໄວຂຶ້ນ ໃຈມັນກໍມັກຈະອ່ອນແອ ແລະ ມັກໄປຄິດຮອດເລື່ອງເກົ່າໆ ໂດຍສະເພາະ ຄົນບາງຄົນທີ່ເຄີຍຍ່າງຈັບມືຜ່ານຄວາມໜາວນີ້ນຳກັນ. ບັນຍາກາດແບບນີ້ແຫຼະທີ່ມັນເຮັດໃຫ້ເຂົ້າໃຈທຸກຢ່າງໄດ້ດີເລີຍ.
ພໍ ມ່ວນຊວນຟັງ ໄດ້ມາຟັງ ມັນຄົງຈະດີ ຂອງ Lil Roxz ກັບ PT FLOW ຍິ່ງເຮັດໃຫ້ອາລົມມັນດິ່ງໄປກວ່າເກົ່າ ເພາະເພງນີ້ມັນຄືເພງຂອງຄົນຂີ້ເຫງົາທີ່ກຳລັງຄິດຮອດໃຜຈັກຄົນຢູ່. ຍິ່ງໄດ້ມາເປີດເພງຟັງໃນຕອນເຢັນໆແບບນີ້, ມັນຄືການດຶງເອົາຄວາມຮູ້ສຶກທັງໝົດອອກມາ.
ປານວ່າເປັນເພງທີ່ຊ່ວຍຕອກຢ້ຳຄວາມເຈັບຊ້ຳໆທີ່ເຮົາເຄີຍເຮັດໂຕບໍ່ດີມາກ່ອນ ເພາະໃນຫົວຍັງມີແຕ່ພາບເກົ່າໆ, ຍັງຈື່ທຸກລາຍລະອຽດຂອງເຂົາໄດ້ດີເກີນໄປ.
ທ່ອນແຣັບໃນເພງໄດ້ສື່ສານການເລົ່າເລື່ອງທີ່ຈິງໃຈ ແລະ ມາເລົ່າບັນຫາໃຫ້ເຮົາຟັງວ່າ ຕອນທີ່ຄົບກັນກໍພະຍາຍາມປ່ຽນແປງຕົວເອງທຸກຢ່າງເພື່ອຮັກສາຄວາມສຳພັນໄວ້ສຸດຄວາມສາມາດ.
ແຕ່ສຸດທ້າຍ… ເມື່ອຮັກມັນໄປຕໍ່ບໍ່ໄດ້ ກໍຕ້ອງຍອມຮັບຄວາມຈິງແລ້ວປ່ອຍໃຫ້ເຂົາໄປມີຄວາມສຸກໃນເສັ້ນທາງໃໝ່ ຖ້າເຂົາສາມາດດູແລກັນໄດ້ດີກວ່າຕອນທີ່ຢູ່ໃນອ້ອມກອດເຮົາ.
ພໍຮອດມື້ທີ່ບໍ່ມີເຂົາແລ້ວ, ຄວາມເສົ້າມັນກໍສະສົມຈົນບາງເທື່ອຄິດຢ້ອນເວລາກັບໄປມື້ທີ່ຍັງບໍ່ທັນຮັກໃຜເລີຍກໍມີ ເພື່ອຈະໄດ້ບໍ່ຕ້ອງເຈັບປວດແບບນີ້ ແຕ່ຊີວິດມັນຢຸດບໍ່ໄດ້, ເວລາກໍຍັງຍ່າງຕໍ່ໄປ.
ສິ່ງດຽວທີ່ຄົນເຮົາເຮັດໄດ້ໃນມື້ທີ່ອາກາດໜາວໆແລ້ວຂາດເຂົາ ກໍຄືການກອດຕົວເອງໃຫ້ອຸ່ນ ພ້ອມກັບພາໃຈຂອງໂຕເອງກ້າວຜ່ານຄວາມເສົ້າໄປໃຫ້ໄດ້ ໂດຍທີ່ຍັງແອບຫວັງໃຫ້ເຂົາມີຄວາມສຸກໃນບ່ອນທີ່ບໍ່ມີເຮົາກໍພໍ.