Muan Listen - ມ່ວນຊວນຟັງ

ຟັງ ຍັງຄິດຮອດຢູ່ເດີ້ ຈາກ vvvvanno ຂໍ້ຄວາມຈາກຮັກເກົ່າ ເຖິງເຈົ້າທີ່ເລີ່ມຕົ້ນໃໝ່ແລ້ວ

ໂດຍ: Khainapha Chanthathilath

21 January 2026● 167

ຖ້າຫາກທຸກຄົນມີຄວາມເຊື່ອໃນຄວາມບັງເອີນທີ່ຈະເຮັດໃຫ້ເຮົາໄດ້ຮູ້ຈັກໃນເລື່ອງ “ຈຳເປັນ” ໃດໜຶ່ງ ຫຼື ລາງສັງຫອນຄືວ່າຄົນມາບອກ ຫຼື ໄດ້ເຫັນເອງບໍ່? ມັນຈະເກີດຂຶ້ນແບບເຮັດໃຫ້ເຮົາບໍ່ທັນໄດ້ຕັ້ງໂຕ ຖ້າເປັນຄືກັນທຸກຄົນຕ້ອງລອງຟັງເພງນີ້ເລີຍ “ດີໃຈນຳເດີ້” ຈາກ vvvvanno ທີ່ໄດ້ຂຽນຂຶ້ນຈາກປະສົບການຈິງ.

ໃນວົງຈອນຂອງຄວາມຮັກ, ການມູຟອອນ (Move on) ບໍ່ໄດ້ແປວ່າເຮົາຈະສາມາດລົບທຸກຢ່າງຖິ້ມໄປໄດ້ທັງໝົດ ແຕ່ມັນຄືການເກັບທຸກຄວາມຊົງຈຳໄວ້ເລີກໃນໃຈ. ເພງ “ດີໃຈນຳເດີ້” ຖືເປັນຕົວແທນຂອງຄວາມຮູ້ສຶກໃນມຸມຂອງຄວາມຮັກທີ່ເຈັບປວດ ແລະ ມັນກໍໄດ້ເລີ່ມຈາງຫາຍໄປຕາມການເວລາ.

ສິ່ງທີ່ຍັງຢູ່ກໍຄືຄວາມຜູກພັນທີ່ມີຄວາມຄິດຮອດຢູ່ ຍັງຄົງເຮັດໜ້າທີ່ຂອງມັນພາຍໃຕ້ຄວາມງຽບຂອງຄວາມຮູ້ສຶກ.

ໃຜທີ່ກຳລັງອົກຫັກ ຫຼື ຍັງລືມເຂົາບໍ່ໄດ້ ພໍໄດ້ຟັງຍິ່ງເຮັດໃຫ້ມັນຈຸກໃນໃຈ ຄວາມເສົ້າຈະດຶງໃຫ້ເຮົາຈົມຢູ່ກັບຄວາມຮູ້ສຶກຄືກັບປະໂຫຍກໃນເພງນີ້ “ຄິດຮອດຊ່ວງເວລາທີ່ດີ ແລະ ຄວາມປາດຖະໜາດີຕໍ່ຄົນຮັກເກົ່າຢູ່ ແຕ່ດ້ວຍຄວາມທີ່ເປັນມະນຸດ ເລິກໆແລ້ວ ເລີຍປະຕິເສດບໍ່ໄດ້ວ່າ ຍັງຄິດຮອດຢູ່ເດີ້”

ການຄິດຮອດຄົນເກົ່າບໍ່ແມ່ນເລື່ອງຜິດ ແລະ ມັນບໍ່ໄດ້ແປວ່າເຮົາບໍ່ເຂັ້ມແຂງ ແຕ່ມັນຄືການຢືນຢັນວ່າ ຄັ້ງໜຶ່ງເຮົາເຄີຍມີຊ່ວງເວລາທີ່ງົດງາມຮ່ວມກັນທີ່ຄວນແກ່ເກັບບັນທຶກໄວ້ໃນຄວາມຊົງຈຳຕະຫຼອດໄປ.