ບໍ່ແມ່ນທຸກຄວາມຫ່ວງໃຍຈະມາຈາກຄວາມຮັກ ເພາະໃນບາງຄັ້ງກໍຕ້ອງການພຽງແຕ່ “ການຄວບຄຸມ” ທີ່ມາໃນຮູບແບບທີ່ແນບນຽນເພື່ອບໍ່ໃຫ້ເຈົ້ານັ້ນຮູ້ຕົວໄດ້ໄວເພື່ອຫຼີກລ້ຽງຈາກລາວ ເຊິ່ງໃນຄວາມສຳພັນ ພວກເຮົາທຸກຄົນຕ້ອງການຄວາມຮູ້ສຶກທີ່ປອດໄພ, ເປັນຕົວເອງ ແລະ ໄດ້ຮັບຄວາມຮັກທີ່ຈິງໃຈ.
ແຕ່ບາງຄັ້ງ, “ຄວາມຮັກ” ທີ່ເຮົາໄດ້ຮັບອາດບໍ່ບໍລິສຸດຄືທີ່ຄິດ ຖ້າລາວມັກສະແດງພຶດຕິກຳທີ່ເຮັດໃຫ້ເຈົ້າຮູ້ສຶກຜິດຢູ່ຕະຫຼອດເວລາ, ມັກໃຊ້ຄວາມງຽບເປັນອາວຸດ, ມັກຊັກຈູງ, ມັກການຄວບຄຸມ ຫຼື ບິດເບືອນຄວາມຄິດຂອງເຈົ້າ ສິ່ງທີ່ລາວໄດ້ສະແດງອອກເຫຼົ່ານີ້ເອີ້ນວ່າ Manipulation ຫຼື ການຄວບຄຸມແບບແອບແຝງ.
Manipulation behavior ເປັນຫຍັງຫຼາຍຄົນຈຶ່ງຕິດຢູ່ໃນຄວາມສຳພັນແບບນີ້ ເພາະວ່າສ່ວນໃຫຍ່ແລ້ວພວກເຮົາເຊື່ອວ່າຄວາມຮັກຕ້ອງອົດທົນ, ຍອມໃຈອ່ອນເພາະລາວມາເຮັດດີນຳ (Love Bombing) ເຊື່ອວ່າຄົນທີ່ຮັກຈະປ່ຽນແປງໄດ້ ຫຼື ບາງຄັ້ງເຈົ້າເອງກໍບໍ່ແນ່ໃຈວ່າພຶດຕິກຳເຫຼົ່ານັ້ນ “ຜິດປົກກະຕິ” ແທ້ ຫຼື ບໍ່.
ຮູບແບບຂອງ Manipulation ທີ່ຄວນລະວັງ
- Gaslighting– ເຮັດໃຫ້ເຈົ້າສົງໄສໃນຄວາມຮູ້ສຶກຂອງຕົວເອງເຊັ່ນ “ເຈົ້າຄິດຫຼາຍໄປເອງ” ຫຼື “ຂ້ອຍບໍ່ເຄີຍເວົ້າ ຫຼື ຄິດແບບນັ້ນ”.
- Silent Treatment – ໃຊ້ຄວາມງຽບແທນທີ່ຈະສື່ສານ, ເພື່ອເຮັດໃຫ້ເຈົ້າຮູ້ສຶກຜິດ ຫຼື ຍອມຈຳນົນ.
- Guilt-tripping – ເຮັດໃຫ້ເຈົ້າຮູ້ສຶກຜິດເພື່ອຄວບຄຸມການຕັດສິນໃຈເຊັ່ນ “ຖ້າຮັກຂ້ອຍແທ້ ເຈົ້າຄວນເຂົ້າໃຈຂ້ອຍຕົວະ”.
- Blame Shifting – ໂຍນຄວາມຜິດໃຫ້ເຈົ້າສະເໝີ ເຖິງວ່າຕົວລາວເອງຈະຜິດ.
- Love Bombing – ຊ່ວງທຳອິດທຸ່ມເທຫຼາຍ, ເຮັດໃຫ້ເຈົ້າຫຼົງຮັກ ກ່ອນທີ່ຈະເລີ່ມຄວບຄຸມແບບແນບນຽນ.
ວິທີປ້ອງກັນຕົວເອງຈາກຄວາມສຳພັນໃນຮູບແບບ Manipulation
- ເຊື່ອຄວາມຮູ້ສຶກຂອງຕົວເອງ: ຖ້າເຈົ້າຮູ້ສຶກບໍ່ເປັນຕົວເອງໃນຄວາມສຳພັນນັ້ນ ມັນຮອດເວລາແລ້ວທີ່ເຈົ້າຕ້ອງທົບທວນເບິ່ງຄືນ.
- ສື່ສານຢ່າງກົງໄປກົງມາ: ຄວາມສຳພັນທີ່ດີຄວນສາມາດລົມກັນໄດ້, ບໍ່ໃຊ້ຄວາມງຽບ ຫຼື ຄຳເວົ້າບິດເບືອນ.
- ຕັ້ງຂອບເຂດໃຫ້ຊັດເຈນ: ຖ້າລາວຮັກເຈົ້າແທ້ ລາວກໍຈະເຄົາລົບຂອບເຂດຂອງເຈົ້າ.
- ຂໍຄວາມຊ່ວຍເຫຼືອ: ການປຶກສາ ໝູ່, ຄອບຄົວ ຫຼື ຜູ້ຊ່ຽວຊານສາມາດຊ່ວຍໃຫ້ເຈົ້າເຫັນເຫດຜົນຂອງສິ່ງຕ່າງໆຊັດເຈນຂຶ້ນ.
ຄວາມຮັກບໍ່ຄວນເປັນການຕໍ່ສູ້ເພື່ອ “ຍອມ” ແຕ່ຄວນເປັນພື້ນທີ່ປອດໄພທີ່ໃຫ້ພວກເຮົາສາມາດເຕີບໃຫຍ່ໄປນຳກັນ ແລະ ຖ້າຄວາມຮັກນັ້ນເຮັດໃຫ້ເຈົ້າຮູ້ສຶກໂຕນ້ອຍລົງທຸກມື້, ເຈົ້າຄວນຕ້ອງຕັ້ງຄຳຖາມວ່າມັນເປັນຄວາມຮັກທີ່ຈິງໃຈ ຫຼື ພຽງແຕ່ຕ້ອງການການຄວບຄຸມທີ່ສະແດງໃນບົດບາດການໃຊ້ຄວາມຫ່ວງໃຍເປັນໂຕຫຼອກ.
