ຢ່າເອົາແຕ່ໂທດຕົວເອງ ເຈົ້າກຳລັງບໍ່ຮັກຕົວເອງຢູ່ແມ່ນບໍ? ສັງເກດພຶດຕິກຳເຈົ້າເລີຍ

ລອງມາສັງເກດໂຕເອງເບິ່ງວ່າ ຕອນນີ້ໝູ່ເພື່ອນກຳລັງຮັກຄົນອື່ນເກີນໄປຈົນລືມໃສ່ໃຈຄວາມຮູ້ສຶກໂຕເອງຢູ່ ຫຼື ບໍ່? ຈົນປ່ອຍໃຫ້ຄົນອື່ນທຳຮ້າຍຈິດໃຈໂຕເອງ ກາຍເປັນຄົນທີ່ຮັກໂຕເອງໜ້ອຍລົງ. ລອງຖາມໂຕເອງກັນເບິ່ງ ເພາະມັນບໍ່ແມ່ນສິ່ງທີ່ດີຢ່າງແນ່ນອນ ຖ້າກາຍເປັນຄົນທີ່ບໍ່ຮັກໂຕເອງ ແລະ ຂັບເຄື່ອນຊີວິດດ້ວຍຄວາມຮັກຈາກຄົນອື່ນຈົນສູນເສຍຄວາມເປັນໂຕເອງໄປ. ມາລອງກວດເບິ່ງກັນວ່າ ໝູ່ເພື່ອນກຳລັງບໍ່ຮັກໂຕເອງຢູ່ ຫຼື ບໍ່?

1. ໃຫ້ຄວາມສຳຄັນກັບຄົນອື່ນຫຼາຍເກີນໄປ ເປັນເລື່ອງທີ່ບໍ່ສົມຄວນປານໃດ ເພາະຍິ່ງໃຫ້ໃຈໄປກັບຄົນທີ່ເບິ່ງເຫັນຄ່າຂອງເຈົ້າພຽງແຕ່ບາງເວລາ ຍິ່ງຖືວ່າເປັນການທຳຮ້າຍໂຕເອງແບບບໍ່ທັນຮູ້ໂຕອີກຊໍ້າ.

2. ຮ້ອງໄຫ້ເສຍໃຈກັບຄວາມຮັກທີ່ບໍ່ດີ ຈົນບໍ່ເປັນອັນເຮັດຫຍັງອັນອື່ນ. ແນ່ນອນແຫຼະວ່າ ການທີ່ຈະໃຫ້ຄວາມຮັກເປັນເລື່ອງສຳຄັນອັນດັບໜຶ່ງເປັນເລື່ອງທີ່ບໍ່ຜິດ ແຕ່ຢ່າລືມວ່າໃນໂລກນີ້ມີຫຼາຍມຸມມອງ. ຫຼາຍຄົນສູນເສຍໂຕເອງຈົນໄຮ້ສະຕິໃນການໃຊ້ຊີວິດ ແລະ ຄິດເຖິງແຕ່ເລື່ອງເກົ່າໆວົນໄປວົນມາ ເມື່ອໂຕເອງຜິດຫວັງໃນຄວາມຮັກ ເຊິ່ງນີ້ເປັນສິ່ງທີ່ບໍ່ດີຢ່າງແນ່ນອນ.

3. ນ້ອຍໃຈໃນໂຊກຊະຕາຂອງໂຕເອງ ການຈົ່ມວ່າໃຫ້ຊີວິດຂອງໂຕເອງບໍ່ໄດ້ຊ່ວຍຫຍັງເລີຍ ຊໍ້າບໍ່ໜຳຍັງຊິຖືກສັງຄົມ-ຄົນອ້ອມໂຕເບິ່ງວ່າເປັນຄົນຂີ້ແພ້. ບໍ່ມີໃຜບໍ່ເຄີຍເຈິອຸປະສັກ. ທາງທີ່ດີຄວນເອົາເວລາມາປ່ຽນແປງໂຕເອງ ເຮັດໃຫ້ອະນາຄົດກ້າວຕໍ່ໄປຈະດີກວ່າ.

4. ໂຫຍຫາແຕ່ສິ່ງທີ່ຈະເຂົ້າມາຊ່ວຍເຕີມເຕັມ ຖ້າເຮັດແບບນີ້ຊີວິດນີ້ຄົງບໍ່ໄດ້ພົບກັບຄວາມສຸກທີ່ແທ້ຈິງຢ່າງແນ່ນອນ ແລະ ຍັງຈະຖືກເບິ່ງເປັນຄົນທີ່ຕ້ອງການຄວາມຮັກ ບໍ່ສາມາດຢືນດ້ວຍໂຕເອງໄດ້.

5. ແລ່ນຕາມສິ່ງທີ່ກຳລັງແລ່ນໜີເຈົ້າໄປ ມີແຕ່ຈະເຮັດໃຫ້ເສຍເວລາ ແລະ ເມື່ອຍລ້າແບບບໍ່ມີປະໂຫຍດ. ນີ້ບົ່ງບອກວ່າ ສິ່ງນັ້ນບໍ່ແມ່ນຂອງເຈົ້າຕັ້ງແຕ່ທຳອິດ ເພາະຖ້າມັນເປັນຂອງເຈົ້າແທ້ ເຈົ້າຈະຕ້ອງບໍ່ຮູ້ສຶກເມື່ອຍ ຫຼື ໃຊ້ຄວາມພະຍາຍາມຫຼາຍຂະໜາດນັ້ນ. ຢ່າມົວເສຍເວລາໄປກັບເລື່ອງບໍ່ເປັນເລື່ອງເລີຍ.

ໂດຍ: ທີມບັນນາທິການ Muan