Muan Watch - ມ່ວນຊວນເບິ່ງ

ເອົາໃຈຊ່ວຍຄົນໂສດຈີບກັນໃນລາຍການ Better Late Than Single

ໂດຍ: Khainapha Chanthathilath

14 August 2025● 287

ຖ້າໂສດມາທັງຊີວິດ ແລ້ວຈະພົບຮັກແທ້ຢູ່ໃສ?

ເປັນຄຳຖາມທີ່ຫຼາຍຄົນກໍຢາກຫາຄຳຕອບວ່າ ຍ້ອນຫຍັງ? ເຮົາຈຶ່ງຍັງໂສດກັນຢູ່ຈົນຮອດຕອນນີ້. ມື້ນີ້ ມ່ວນ ເລີຍໄດ້ນຳລາຍການວາໄຣຕີ້ອອກເດດຈາກເກົາຫຼີທີ່ມີຊື່ວ່າ Better Late Than Single ມາແຊຣ໌ໃຫ້ທຸກຄົນໄດ້ເບິ່ງກັນ ແລະ ເຮົາອາດຈະມີບາງມຸມທີ່ຄ້າຍຄືກັນກັບພວກເຂົາກໍໄດ້ເລີຍເຮັດໃຫ້ໂສດ.

Better Late Than Single

ລາຍການ Better Late Than Single ໄດ້ລວບລວມໜຸ່ມຫຼໍ່-ສາວໂສດ 10 ຄົນ ທີ່ບໍ່ເຄີຍມີແຟນມາກ່ອນໃນຊີວິດ ນຳພວກເຂົາມາຢູ່ຮ່ວມກັນເພື່ອທຳຄວາມຮູ້ຈັກ ແລະ ຮຽນຮູ້ເລື່ອງຄວາມຮັກ ໃຫ້ລອງເປີດໃຈເປັນຄັ້ງທຳອິດ. ລາຍການເປີດຕອນດ້ວຍໜຸ່ມສາວໜ້າຕາດີ ແຕ່ຂີ້ອາຍ, ຂາດຄວາມໝັ້ນໃຈ ເຊິ່ງບາງຄົນຍັງໄດ້ຮັບການ Makeover ຈົນເກືອບຈື່ບໍ່ໄດ້ ແລະ ຍິ່ງຢາກຮູ້ອີກວ່າ ພວກເຂົາໂສດມາຈົນຮອດມື້ນີ້ໄດ້ແນວໃດ?

ຄວາມຮູ້ສຶກທຳອິດທີ່ໄດ້ເບິ່ງຮູ້ເລີຍວ່າ ໜຸ່ມໆ ໃນລາຍການນັ້ນບໍ່ມີທັກສະດ້ານການອອກເດດ ຫຼື ເລື່ອງຄວາມຮັກເລີຍ ຈົນຄົນເບິ່ງຢາກຮ້ອງໃສ່ດັງໆບອກໃຫ້ພວກເຂົາຮູ້ຕົວ.

ຕິດຕາມໄດ້ທີ່ Netflix ມີທັງໝົດ 10 ຕອນ.

ຄວາມແຕກຕ່າງທີ່ເຫັນໄດ້ຊັດເຈນລະຫວ່າງ ໜຸ່ມ-ສາວ ແຕ່ລະຄົນໃນລາຍການ, ສາວໆຈະຄວາມສາມາດດ້ານຄວາມສຳພັນແບບປົກກະຕິ ຮູ້ເຂົ້າຫາ, ຈີບເປັນ ແລະ ຮູ້ໃຊ້ສະເໜ່ໃນບາງເທື່ອ, ຍົກເວັ້ນ ໜຸ່ມໆ ທີ່ເບິ່ງຄືຍັງ “ບໍ່ເຂົ້າໃຈ” ໃນຫຼາຍຈັງຫວະ ຈົນເຮັດໃຫ້ສາວໆງົງຕາມ. ສົມກັບຄຳນິຍາມທີ່ຫຼາຍຄົນມັກເວົ້າວ່າ “ໂສດດ້ວຍຄວາມສາມາດແທ້ໆ”.

ເມື່ອພວກເຂົາຢູ່ຮ່ວມກັນກໍກໍ່ເກີດມິດຕະພາບໃໝ່ໆ ແລະ ເຫດການທີ່ເຮັດໃຫ້ເຫັນວ່າເປັນຫຍັງພວກເຂົາຄືຍັງໂສດຢູ່ເຊັ່ນ ໜຸ່ມຫຼໍ່ສາຍແຂງທີ່ຕັ້ງໃຈຫຼິ້ນສະເກັດຢ່າງຈິງຈັງ ຈົນລືມສົນໃຈຄູ່ເດດຂອງຕົນເອງ. ສະເໜ່ຂອງລາຍການນີ້ຢູ່ທີ່ “ຄວາມເຂີນແບບໂຕແຕກ” ເພາະຜູ້ເຂົ້າຮ່ວມທຸກຄົນບໍ່ມີປະສົບການອອກເດດມາກ່ອນ ເຊິ່ງການສົນທະນາ, ທ່າທາງ ຫຼື ການຈ້ອງຕາ ກໍເຕັມໄປດ້ວຍຄວາມໜ້າຮັກບໍ່ມີການປະດິດແຕ່ງ ເຮັດໃຫ້ຄົນເບິ່ງຮູ້ສຶກອົບອຸ່ນໃຈ ແລະ ຍິ້ມຕາມຕະຫຼອດລາຍການ.

ມ່ວນ ຄິດວ່າຫຼັງຈາກພວກເຮົາໄດ້ເບິ່ງລາຍການນີ້ແລ້ວ ອາດຈະໄດ້ຮັບແຮງບັນດານໃຈໃນການເປີດໃຈເປັນຄັ້ງທຳອິດ ແລະ ອາດຮອດເວລາທີ່ຈະໄດ້ສະຫຼະໂສດອີກດ້ວຍ.