ເຈາະເລິກພຶດຕິກຳ Agnes ມັກຮຽກຮ້ອງຄວາມສົນໃຈ ແລະ ການຮຽນແບບຄົນອື່ນເປັນຄື ເງົາ

ຫຼາຍຄົນທີ່ໄດ້ເບິ່ງຊີຣີສ໌ Wednesday ຊີຊັນ 2, ອາດຈະຮູ້ສຶກບໍ່ມັກ ແລະ ຮູ້ສຶກລຳຄານ Agnes DeMil ກັນຢ່າງແນ່ນອນ ເພາະໃນບົດບາດຂອງລາວແມ່ນໄດ້ສະແດງໃຫ້ເຫັນເຖິງພຶດຕິກຳຫຼາຍຢ່າງທີ່ບໍ່ໜ້າຮັກເລີຍເຊັ່ນ ການຄຸກຄາມຄວາມເປັນສ່ວນຕົວ (Stalker) ແລະ ການຮຽນແບບຕົວຕົນທຸກຢ່າງຂອງ Wednesday ທີ່ໃຜໆກໍຄົງຄິດວ່າໜ້າລຳຄານ ໂດຍພຶດຕິກຳເຫຼົ່ານີ້ທີ່ລາວເປັນ ກໍມັກຈະສ້າງຄວາມເດືອດຮ້ອນໃຫ້ຄົນອື່ນ ແລະ ສົ່ງຜົນກະທົບຕໍ່ຄວາມສຳພັນກັບຄົນອ້ອມຂ້າງໄດ້ (ເຊິ່ງກະທົບກັບ Wednesday ແລະ Enid ເຕັມໆເລີຍ).

ສຳລັບຕົວລະຄອນ Agnes ແມ່ນເຮັດໃຫ້ພວກໄດ້ເຫັນພາບຄວາມຈິງແຈ້ງຂຶ້ນ ແຖມຍັງສາມາດຖອດຖອນບົດຮຽນຈາກຕົວລະຄອນນີ້ໄດ້ ເພາະ ພຶດຕິກຳທີ່ອ້າງອີງຈາກຊີວິດຈິງຂອງຄົນທີ່ກຳລັງຄົ້ນຫາຕົວຕົນ ຫຼື ການເປັນ ພຽງເງົາທີ່ຕ້ອງການເປັນທີ່ຍອມຮັບ ແລະ ບໍ່ຢາກຖືກເບິ່ງຂ້າມຈາກສັງຄົມ.

ທຸກຄົນລອງສັງເກດຄົນອ້ອມຂ້າງຂອງພວກເຮົາເບິ່ງ ເພາະບາງທີ່ເຮົາອາດພົບເຫັນຄົນທີ່ມີພຶດຕິກຳແບບນີ້ຢູ່ (ບາງທີ່ອາດແມ່ນເຮົາເອງທີ່ເປັນຄື Agnes) ເຊິ່ງມັນບໍ່ແມ່ນເລື່ອງທີ່ຮ້າຍແຮງ (ແຕ່ຖ້າຂາດສະຕິ ກໍເປັນສິ່ງທີ່ເຮັດໃຫ້ຮຸນແຮງຂຶ້ນທັນທີ) ບາງຄັ້ງອາດເຮັດໃຫ້ລຳຄານ ຫຼື ອຶດອັດໃຈໄດ້, ບາງຄົນກໍສະແດງອອກຢ່າງຊັດເຈນ ຫຼື ບາງຄົນກໍຊົງຄືໆແຕ່ກໍບໍ່ຊັດເຈນ ເພາະຍັງສັບສົນ.

ລອງສຳຫຼວດຄວາມຫຍຸ້ງຍາກທາງດ້ານຈິດໃຈ ແບບເຈາະເລິກເຖິງພຶດຕິກຳແບບ Agnes ກັນຕື່ມ, ວ່າຍ້ອນຫຍັງລາວຈຶ່ງເປັນ “ເງົາທີ່ຕ້ອງການໃຫ້ຖືກແນມເຫັນ” ແລະ ສາເຫດໃດຈຶ່ງໄດ້ສະແດງພຶດຕິກຳແບບນີ້ອອກມາ ເພາະບົດຄວາມນີ້ອາດຈະເປັນຄຳຕອບທີ່ຄ້າງຄາໃນໃຈມາດົນໃຫ້ທຸກຄົນກໍໄດ້ ຮຽນຮູ້ໄປນຳກັນ ເພື່ອຫາວິທີແກ້ໄຂ ແລະ ດູແລສະພາບຈິດໃຈເພື່ອການຢູ່ຮ່ວມກັນກັບຄົນອື່ນໄດ້ດີຂຶ້ນ.

ສະຫຼຸບພຶດຕິກຳຂອງ Agnes DeMille

Agnes ມີຄວາມຕ້ອງການເປັນສ່ວນໜຶ່ງ ແລະ ການຖືກຍອມຮັບໃນສັງຄົມ (Social Validation) ເຊິ່ງລາວພະຍາຍາມເຮັດທຸກຢ່າງເພື່ອໃຫ້ຖືກຍອມຮັບຈາກ Wednesday, ອາການບໍ່ໝັ້ນໃຈໃນຕົນເອງ (Low Self-Esteem) ເລີຍຮຽນແບບພຶດຕິກຳຂອງ Wednesday ທຸກຢ່າງເພື່ອຮຽກຮ້ອງຄວາມສົນໃຈ ແລະ ຄິດລົບມີຄວາມຢ້ານທີ່ຈະຖືກຖິ້ມ ຄິດວ່າຕົນເອງເປັນພຽງເງົາບໍ່ສຳຄັນ ເຊິ່ງທັງ 3 ພຶດຕິກຳເຫຼົ່ານີ້ໄດ້ສະແດງອອກດ້ານການກະທຳທີ່ເຫັນໃນຊີຣີສ໌.

ວິທີການດູແລຈິດໃຈ ແລະ ເຫັນຄຸນຄ່າໃນຕົນເອງ

1. ຍອມຮັບ ແລະ ເຂົ້າໃຈ: ການທີ່ຮູ້ສຶກໂດດດ່ຽວ, ບໍ່ໝັ້ນໃຈ ຫຼື ຢາກໃຫ້ຄົນອື່ນມາສົນໃຈເປັນເລື່ອງປົກກະຕິຂອງຄົນ, ຢ່າຟ້າວຕັດສິນຕົວເອງ ຫຼື ດ້ອຍຄ່າ. ການທີ່ຍອມຮັບຄວາມຮູ້ສຶກເຫຼົ່ານີ້ໄດ້ ຄືຂັ້ນຕອນທຳອິດທີ່ຈະຊ່ວຍເຮົາດີຂຶ້ນ.
2. ຄົ້ນຫາຕົນເອງ: ເຊົາຮຽນແບບຄົນອື່ນ ແລະ ລອງຊອກຫາສິ່ງທີ່ຕົນເອງມັກ ລອງຖາມຕົວເອງວ່າ: ມັກເຮັດຫຍັງ?, ສິ່ງໃດທີ່ເປັນເອກະລັກຂອງເຮົາ ຫຼື ຄວາມສຸກຂອງເຮົາແທ້ໆແມ່ນຫຍັງ?. ຖ້າພົບແລ້ວໃຫ້ໃຊ້ເວລາກັບສິ່ງນັ້ນໃຫ້ຫຼາຍຂຶ້ນ, ເລີ່ມຕົ້ນຈາກສິ່ງເລັກໆນ້ອຍໆທີ່ເຮັດໃຫ້ຮູ້ສຶກພູມໃຈໃນຕົນເອງ.
3. ສ້າງຄວາມສຳພັນທີ່ຈິງໃຈ: ຢ່າສ້າງມິດຕະພາບເພື່ອໃຫ້ໄດ້ພຽງແຕ່ການຖືກຍອມຮັບ ແຕ່ໃຫ້ສ້າງເພາະຢາກເຂົ້າໃຈຄົນອື່ນ, ລອງເປີດໃຈກັບຄົນທີ່ໃຫ້ການຊ່ວຍເຫຼືອ, ສະໜັບສະໜຸນເຮົາໂດຍບໍ່ຕ້ອງປ່ຽນແປງຕົນເອງ ເພາະການມີໝູ່ທີ່ເຂົ້າໃຈຈະຊ່ວຍໃຫ້ຮູ້ສຶກມີຄຸນຄ່າ ແລະ ບໍ່ໂດດດ່ຽວອີກຕໍ່ໄປ.
4. ຮູ້ຈັກທີ່ຈະຮັກຕົນເອງ: ຢ່າປຽບທຽບຕົນເອງກັບຊີວິດຄົນອື່ນ, ຍ້ອງຍໍໃນຄວາມຄວາມເກັ່ງຂອງຕົນເອງ ພ້ອມໃຫ້ກຳລັງໃຈວ່າເຮົາເປັນຄົນທີ່ມີຄຸນຄ່າ, ເບິ່ງແຍງສຸຂະພາບ ແລະ ຈິດໃຈໃຫ້ດີ.

ພວກເຮົາສາມາດເປັນຕົນເອງທີ່ມີເອກະລັກ ພ້ອມຄຸນຄ່າທີ່ບໍ່ຄືໃຜໄດ້ ແລະ ສາມາດເປັນທີ່ເພິ່ງພາໃຫ້ຄົນອື່ນ ໂດຍທີ່ບໍ່ຕ້ອງສ້າງຄວາມເດືອດຮ້ອນໃຫ້ໃຜ ເທົ່ານີ້ເຮົາກໍເປັນຄົນທີ່ດີ ແລະ ພູມໃຈໃນສິ່ງທີ່ເປັນກໍພຽງພໍແລ້ວ.