10/10 ວັນສໍາຄັນຂອງຄົນຄິດຫຼາຍ ຊວນດູແລສຸຂະພາບຈິດຕົນເອງເພື່ອພັດທະນາຄວາມສຳພັນ
ຄິດຫຼາຍ, ວິຕົກກັງວົນ ແລະ ໃສ່ໃຈຄວາມຮູ້ສຶກຄົນອື່ນຫຼາຍເກີນໄປ ທຸກຄົນເປັນແບບນັ້ນກັນບໍ່? ພ້ອມກັບມີຄວາມຮູ້ສຶກວ່າການໃຊ້ຊີວິດໃນແຕ່ລະມື້ມັນຄືເມື່ອຍແທ້? ຈົນເຮັດໃຫ້ຄວາມຮັກ, ຄວາມສຳພັນ ຫຼື ສິ່ງທີ່ຢູ່ອ້ອມຕົວເຮົາມັນສົ່ງຜົນກະທົບຕໍ່ຈິດໃຈຂອງເຮົາໂດຍບໍ່ຮູ້ຕົວ ແລະ ບໍ່ເປັນໄປຕາມໃຈຕ້ອງການ. ຍ້ອນພວກເຮົາມັກເບິ່ງຂ້າມສະພາບຈິດໃຈຂອງເຮົາເອງ ທາງອົງການສຸຂະພາບຈິດໂລກຈຶ່ງໄດ້ກຳນົດເອົາວັນທີ 10 ຕຸລາ ຂອງທຸກໆປີ ເປັນ “ວັນສຸຂະພາບຈິດໂລກ World Mental Health Day” ເພື່ອບອກເຕືອນວ່າຈິດໃຈຂອງເຮົານັ້ນມີຄ່າ ແລະ ມັນເປັນພື້ນຖານຂອງຄວາມສຸກ.
ສຸຂະພາບຈິດຂອງເຮົາສຳຄັນ (Mental Health)
ບັນຫາ ສຸຂະພາບຈິດ ບໍ່ແມ່ນເລື່ອງທີ່ຄວນເບິ່ງຂ້າມແຕ່ມັນຄື ພື້ນຖານຂອງທຸກຄວາມສຳພັນ ແລະ ການໃຊ້ຊີວິດຂອງເຮົາ, ຫຼາຍຄັ້ງທີ່ເຮົາກົດດັນຕົວເອງຫຼາຍເກີນໄປ, ຄິດຫຼາຍເກີນໄປຈົນລືມວ່າ ການດູແລຈິດໃຈຂອງເຮົາເອງ ຄືສິ່ງສຳຄັນທີ່ສຸດເຊັ່ນກັນ. “ການດູແລຕົນເອງ” ບໍ່ແມ່ນຄວາມເຫັນແກ່ຕົວ ແຕ່ມັນຄືການສ້າງພື້ນທີ່ປອດໄພໃນໃຈ ເພື່ອໃຫ້ເຮົາສາມາດຮັກຄົນອື່ນໄດ້ຢ່າງເຕັມທີ່ ແລະ ບໍ່ຝືນໃຈ.
ຖ້າເຮົາຕ້ອງການຄວາມສຳພັນທີ່ເຂັ້ມແຂງທີ່ບໍ່ໄດ້ເກີດຈາກການທຸ້ມເທຈົນໝົດແຮງ ແຕ່ເກີດຈາກການຮູ້ຈັກການໃຊ້ເວລາເພື່ອ ພັກຜ່ອນ, ຮູ້ຈັກຟັງສຽງຫົວໃຈຂອງຕົນເອງ. ຄວາມສຳຄັນຂອງ 10 ຕຸລາ ວັນສຸຂະພາບຈິດໂລກ ໄດ້ສ້າງຂຶ້ນເພື່ອປູກຈິດສໍານຶກການຮັບຮູ້ວ່າສຸຂະພາບຈິດກໍມີຄວາມສຳຄັນເທົ່າກັບສຸຂະພາບຮ່າງກາຍ, ເພື່ອຫຼຸດຜ່ອນອັກຄະຕິ ແລະ ການຕັດສິນຄຸນຄ່າຂອງຄົນ ພ້ອມທັງຊຸກດັນໃຫ້ຄົນເປີດໃຈ ແລະ ຮຽນຮູ້ທີ່ຈະຂໍຄວາມຊ່ວຍເຫຼືອ.
ການເລີ່ມຕົ້ນເບິ່ງແຍງຕົນເອງ (Self-Care Tips)
- The Power of Say No (ພະລັງແຫ່ງການປະຕິເສດ): ການຮູ້ຈັກທີ່ຈະເວົ້າຄຳວ່າ “ບໍ່” ກັບສິ່ງທີ່ເຮັດໃຫ້ເຮົາເມື່ອຍ ຫຼື ມັນເກີນຄວາມສາມາດຫຼາຍເກີນໄປ ສິ່ງນີ້ຄືການປົກປ້ອງຕົນເອງ ແລະ ຄວາມສຳພັນທີ່ດີຂອງທັງສອງຝ່າຍ ແມ່ນຕ້ອງໃຫ້ “ພື້ນທີ່ສ່ວນຕົວ” ກັນ ແລະ ກັນ ທີ່ຈະມີພື້ນທີ່ຫາຍໃຈຢ່າງສະບາຍອາລົມ.
- ຖ້າເມື່ອຍກໍຕ້ອງພັກ: ການພັກຜ່ອນບໍ່ແມ່ນຄວາມຂີ້ຄ້ານ ແຕ່ເປັນການລົງທຶນກັບຈິດໃຈ ເພື່ອຊ່ວຍໃຫ້ພວກເຮົາມີເວລາຟື້ນຟູພະລັງງານກັບມາເຮັດໃນສິ່ງຕ່າງໆໄດ້ດີຂຶ້ນ ພ້ອມທັງການດູແລຄົນທີ່ເຮົາຮັກ.
- ສ້າງພື້ນທີ່ປອດໄພໃນຄວາມສຳພັນ: ໃນທຸກຄວາມສຳພັນສັນຍາວ່າຈະບໍ່ຕັດສິນກັນ ໃຫ້ເປີດໃຈເຂົ້າໃຈຄວາມຮູ້ສຶກຂອງກັນ ແລະ ກັນ. ພ້ອມທີ່ຈະຮັບຟັງທຸກຄວາມຮູ້ສຶກ ເຖິງຈະເປັນເລື່ອງທີ່ຫຍຸ້ງຍາກກໍຕາມ ເພາະວ່າຄວາມປອດໄພທາງດ້ານອາລົມແມ່ນພື້ນຖານສໍາລັບຄວາມສໍາພັນທີ່ຈະເລີນເຕີບໃຫຍ່.
- ໃຫ້ເວລາກັບຄວາມສຳພັນ: ລອງສ້າງຄວາມທ້າທາຍຄວາມສຳພັນດ້ວຍການເຮັດ Social media detox ພ້ອມກັນໃນມື້ວັນສຸກ ຫຼື ວັນເສົາ, ເພື່ອໃຊ້ເວລານັ້ນໃຫ້ເຕັມທີ່ກັບຄົນທີ່ຢູ່ຕໍ່ໜ້າ ຫຼື ພຽງແຕ່ຢູ່ກັບຕົວເອງໂດຍບໍ່ມີໂທລະສັບ ເພື່ອໃຫ້ຕົວເຮົາເອງໄດ້ພັກຜ່ອນ ແລະ ປ່ອຍໃຫ້ມີເວລາໃນການສ້າງຄວາມສໍາພັນກັບຄົນອື່ນໆ.
ການດູແລສຸຂະພາບຈິດຂອງເຮົາເອງ ຄວນໃສ່ໃຈດູແລ ໂດຍບໍ່ຕ້ອງຖ້າໃຫ້ຮອດແຕ່ ວັນທີ 10 ຕຸລາ ແລະ ການຮັກສາຈິດໃຈກັນໃນທຸກໆມື້ ແມ່ນສາມາດສ້າງຄວາມສໍາພັນໄປໃນເຊີງບວກ, ການຮັກຕົນເອງ ແລະ ເຄົາລົບກັນ ເັຮດໃຫ້ສຸຂະພາບຈິດຂອງເຮົາແຂງແຮງ ເຮົາກໍສາມາດດຳລົງຊີວິດຢ່າງມີຄວາມສຸກ.