ວັນຈັນອີກແລ້ວ? ວິທີເລີ່ມຕົ້ນອາທິດໃໝ່ແນວໃດບໍ່ໃຫ້ໝົດໄຟໄປກ່ອນ

ເຊົ້າວັນຈັນອັນແສນສົດໃສຂອງໃຜຫຼາຍຄົນ, ແຕ່ມັນກໍບໍ່ແມ່ນສຳລັບບາງຄົນທີ່ຈະຮູ້ສຶກແບບນັ້ນ. ມີສາເຫດຫຼາຍຢ່າງທີ່ເຮັດໃຫ້ເຮົາບໍ່ມັກວັນຈັນຈາກທີ່ກຳລັງພັກໃນວັນເສົາ-ອາທິດດີໆ ຜ່ານໄປແປັບດຽວມື້ວັນຈັນກໍກັບມາອີກແລ້ວມັນຈະໄວເກີນໄປແລ້ວໃດ໋.

ທຸກຄົນຕ່າງຮູ້ດີເມື່ອວັນຈັນວົນກັບມາອີກຄັ້ງ ກໍເທົ່າກັບວຽກກຳລັງຖ້າເຮົາໂດຍກອງໃຫຍ່ເຕັມໂຕະ ເລື່ອງທີ່ຊວນເຈັບປະສາດກະຕາມມາອີກ! ບໍ່ວ່າຈະຈາກວຽກງານ, ຫົວໜ້າ ແລະ ເພື່ອນຮ່ວມງານ ຫຼື ອື່ນໆ. ຕ່າງກໍເຮັດໃຫ້ເຮົາໝົດໄຟເບື່ອໜ່າຍກັບອີຫຍັງແບບນັ້ນຈົນຢາກໜີໄປໄກໆ ແລະ ໄດ້ແຕ່ລໍຄອຍຖ້າໃຫ້ຮອດວັນສຸກໄວໆ.

ຄວາມຮູ້ສຶກເຫຼົ່ານັ້ນມັນສາມາດປ່ຽນກັນໄດ້ ມາລອງວິທີດັ່ງນີ້ເບິ່ງ ເພື່ອປ່ຽນມຸມມອງວັນຈັນຂອງພວກເຮົາໃຫ້ສົດໃສຍິ່ງຂຶ້ນ

1. ປ່ຽນທັດສະນະຄະຕິຕໍ່ວັນຈັນ

ປ່ຽນຄວາມຄິດທີ່ມີຕໍ່ວັນຈັນຈາກດ້ານລົບມາເປັນດ້ານບວກ ເລີ່ມຈາກໃຫ້ເຊື່ອວ່າວັນຈັນເປັນວັນແຫ່ງການເລີ່ມຕົ້ນທີ່ດີ ເລື່ອງໃດບໍ່ດີກໍປ່ອຍໄປມັນໄປເພື່ອເລີ່ມໃໝ່.

2. ເຮັດກິດຈະກຳທີ່ດີຕໍ່ໃຈ

ພັກຜ່ອນໃຫ້ພຽງພໍ ແລະ ຕື່ນໃຫ້ເຊົ້າກວ່າປົກກະຕິເພື່ອເຮັດກິດຈະກຳຕ່າງໆເຊັ່ນ: ການອາບນ້ຳອຸ່ນ, ການກິນອາຫານເຊົ້າແຊບໆ, ອອກກຳລັງກາຍໜ້ອຍໜຶ່ງກ່ອນໄປເຮັດວຽກ ເພາະມັນຈະຊ່ວຍໃຫ້ກາຍພ້ອມໃຈພ້ອມເພື່ອການເຮັດວຽກຢ່າງມີຄຸນນະພາບ.

3. ວາງແຜນໄວ້ໃນແຕ່ລະອາທິດ

ກຳນົດ ແລະ ວາງແຜນວຽກງານໃນແຕ່ລະອາທິດ ເພື່ອໃຫ້ງ່າຍຕໍ່ການລຳດັບຄວາມສຳຄັນຂອງແຕ່ລະວຽກງານວ່າວຽກໃດຄວນເຮັດກ່ອນ ວຽກໃດຈຶ່ງຄ່ອຍເຮັດເພື່ອປັບເລື່ອງການບໍລິຫານເວລາໃຫ້ເຮົາມີເວລາພັກ

4. ຄິດທົບທວນເຖິງອາທິດທີ່ຜ່ານມາ

ຄິດຍ້ອນເຖິງເລື່ອງລາວທີ່ຜ່ານມາ ເລື່ອງໃດທີ່ເຮັດໄດ້ດີ ເລື່ອງໃດທີ່ຕ້ອງປັບປຸງ ເລື່ອງໃດທີ່ຜິດພາດໄປ. ເຊິ່ງນັ້ນກໍນຳມາເພື່ອເປັນບົດຮຽນ ແລະ ພັດທະນາຕົນເອງໃຫ້ດີຂຶ້ນ.

ອາການໝົດໄຟເມື່ອຮອດວັນຈັນຈະຄ່ອຍໆຫາຍໄປ ເມື່ອເຮົານຳວິທີຂ້າງເທິງມາປັບໃຊ້ໃຫ້ເຂົ້າກັບການໃຊ້ຊີວິດຂອງເຮົາ ຖ້າຍັງຄຽດ ຫຼື ກົດດັນກໍໃຫ້ລາງວັນເລັກໆນ້ອຍໆ ເພື່ອໃຫ້ຕົວເອງຜ່ອນຄາຍ ແລະ ພ້ອມຕໍ່ການເຮັດວຽກໃນຄັ້ງຕໍ່ໄປ.

ໂດຍ: ທີມບັນນາທິການ Muan