ນອນກໍເມື່ອຍ ຢູ່ລ້າໆກໍເມື່ອຍ ແນະນຳ 5 ວິທີເອົາຊະນະຄວາມເມື່ອຍລ້າ
ນອນໄວສໍ່າໃດກໍຍັງເມື່ອຍ, ກິນກາເຟເຂັ້ມໆກໍຍັງລ້າ. ຖ້າໝູ່ເພື່ອນຄົນໃດເປັນແບບນີ້ມ່ວນຂໍບອກເລີຍວ່າເພິ່ນບໍ່ໄດ້ເມື່ອຍຢູ່ຄົນດຽວເດີ.
ງານວິໄຈຂອງ Radboud University ໄດ້ສໍາຫຼວດຜູ້ຄົນ 2 ໝື່ນກວ່າຄົນແລ້ວພົບວ່າ 30% ມີອາການເມື່ອຍລ້າຕະຫຼອດເວລາຈົນກະທົບການໃຊ້ຊີວິດປະຈໍາວັນ, ເຮັດໃຫ້ວຽກງານມີຄວາມສ່ຽງ ແລະ ລາມໄປເຖິງຄວາມສໍາພັນອ້ອມໂຕ.
ອາການເມື່ອຍຂອງແຕ່ລະຄົນນັ້ນບໍ່ຄືກັນເນື່ອງຈາກຮ່າງກາຍ ແລະ ສຸຂະພາບຈິດໃຈທີ່ແຕກຕ່າງການໄປ, ແຕ່ທາງການແພດມີຫຼັກຖານວ່າຄວາມເມື່ອຍສາມາດນໍາພາໄປສູ່ໂລກໄພຕ່າງໆໄດ້.
ຫາກຄົນເມື່ອຍ 24 ຊົ່ວໂມງແບບເຮົາຢາກຈະເອົາຊະນະຄວາມເມື່ອຂອງຕົນເອງຄວນເລີ່ມຕົ້ນແນວໃດ? ແອັດມິນຂໍແນະນໍາ 5 ວິທີທີ່ໝູ່ເພື່ອນສາມາດນໍາໄປໃຊ້ໄດ້ກ່ອນໄປພົບແພດ.
1. ເສີມທາດເຫຼັກ
ຫາກຮ່າງກາຍຂອງເຮົາມີທາດເຫຼັກໜ້ອຍກວ່າປົົກກະຕິກໍອາດນໍາໄປສູ່ພະວະເລືອດຈາງເຊິ່ງເປັນໜຶ່ງໃນສາເຫດທີ່ເຮັດໃຫ້ເຮົາເມື່ອຍໄດ້. ເຮົາສາມາດເສີມທາດເຫຼັກໄດ້ດ້ວຍການກິນຊີ້ນສັດ, ຜັກໃບຂຽວ, ຖົ່ວ, ເຂົ້າໂອ໊ດ ແລະ ເຂົ້າສາລີ ຫຼື ສາມາດໃຊ້ອາຫານເສີມໄດ້.
2. ກິນຊັອກໂກແລັດເຂັ້ມໆ
ເຂັ້ມໆທີ່ວ່າໝາຍເຖິງ Dark Chocolate ຂົມໆທີ່ມີປະລິມານນໍ້າຕານໜ້ອຍ ແລະ ຜົງໂກໂກ້ສູງໆ ເພາະດາຣ໌ກຊັອກໂກແລັດມີສານທີ່ເພີ່ມລະດັບການໝຸນວຽນເລືອດເຂົ້າສູ່ສະໝອງເຮັດໃຫ້ຖືກກະຕຸ້ນການຕື່ນໂຕຂອງເສັ້ນປະສາດ.
3. ດື່ມນໍ້າຫຼາຍໆ
ໃນຍຸກນີ້ເຮົາມັກຈະດື່ມນໍ້າຫວານຫຼາຍກວ່ານໍ້າລ້າ ເຮັດໃຫ້ເກີດພາວະຂາດນໍ້າເຊິ່ງເປັນໜຶ່ງໃນສາເຫດທີ່ນໍາພາໄປສູ່້ຄວາມເມື່ອຍລ້າໃນທຸກໆມື້. ຈິບນໍ້າຫຼາຍໆ ດື່ມໃຫ້ເປັນນິໄສເດີ.
4. ຢ່າປ່ອຍໃຫ້ຕົວເອງຕຶງຄຽດ
ຄວາມຄຽດເຮັດໃຫ້ຕ່ອມໄຕຂອງເຮົາຜະລິດຮໍໂມນບໍ່ດຸ່ນດ່ຽງ ແລະ ເຮັດໃຫ້ເຮົາເມື່ອງ່າຍ, ບໍ່ສົດໃສ ແລະ ອ່ອນເພຍ. ເຖິງວ່າຄວາມຄຽດຈະເປັນເລື່ອງທໍາມະຊາດແຕ່ເຮົາກໍສາມາດປັດເປົ່າມັນອອກໄດ້ດ້ວຍການເຮັດກິດຈະກໍາທີ່ເຮົາມັກ ແລະ ອອກກໍາລັງການເບົາໆ.
5. ອອກກໍາລັງກາຍສູ້
ໃຜຄິດວ່າຍິ່ງອອກກໍາລັງກາຍຍິ່ງເມື່ອຍແມ່ນຄິດໃໝ່ໄດ້ເລີຍ, ການອອກກໍາລັງກາຍເພື່ອໃຫ້ຮ່າງກາຍແຂງແຮງຈະໄປກະຕຸ້ນເລັ່ງຮໍໂມນຄວາມສຸກ (Oxytocin) ຂອງເຮົາ ແລະ ສົ່ງຜົນໃຫ້ເຮົາມີແຮງຫຼາຍຂຶ້ນແລ້ວຍັງສົດໃສອີກດ້ວຍ.
ຫາກໝູ່ເພື່ອນຄົນໃດລອງທຸກວິທີແລ້ວກໍຍັງຮູ້ສຶກເມື່ອຍ, ມ່ວນແນະນໍາໃຫ້ໄປກວດສຸຂະພາບກັບແພດຜູ້ຊ່ຽວຊານເດີ. ຢ່າເສຍດາຍເງິນທີ່ຈ່າຍໄປເພື່ອຮັກສາຮ່າງກາຍຕົວເອງ, ອະນາຄົດໝູ່ເພື່ອນຈະຂອບໃຈຕົວເອງທີ່ລົງທຶນແນ່ນອນ.
ໂດຍ: ທີມບັນນາທິການ Muan