|
Getting your Trinity Audio player ready...
|
ເຮົາຈະສາມາດໃຫ້ອະໄພຄົນທີ່ນອກໃຈເຮົາໄດ້ແທ້ບໍ? ແນ່ນອນວ່າເວລາທີ່ເຮົາຖືກຄົນທີ່ເຮົາຮັກນອກໃຈເຮົາກໍຕ້ອງຮູ້ສຶກໃຈຮ່້າຍ, ຜິດຫວັງ ແລະ ເສຍໃຈຢູ່ແລ້ວ. ແຕ່ມັນກໍຢູ່ທີ່ເຮົາແລ້ວວ່າຈະໃຫ້ອະໄພເຂົາ ຫຼື ຈົບຄວາມສໍາພັນເພື່ອຕົວເຮົາເອງ?
ອີງຕາມຂໍ້ມູນສະຖິຕິຈາກ Newsweek ໂດຍສະເລ່ຍແລ້ວຄົນເຮົານັ້ນມີໂອກາດທີ່ຈະນອກໃຈແຟນເຖິງ 35-40% ເຊິ່ງຖືວ່າເປັນຕົວເລກທີ່ສູງພໍສົມຄວນ. ການນອກໃຈສາມາດເກີດຈາກຫຼາຍໆເຫດຜົນຄື: ຄວາມບໍ່ພໍໃນໃນຄວາມສໍາພັນ, ຄວາມເຈົ້າຊູ້ຂອງເຈົ້າຂອງເອງ, ຄວາມຕ້ອງການທາງເພດທີ່ສູງ, ຄົນຮັກບໍ່ສາມາ່ຕອບສະໜອງເລື່ອງເທິງຕຽງໄດ້ ແລະ ອື່ນໆ. ບໍ່ວ່າຈະຍ້ອນເຫດຜົນໃດກໍຖືວ່ານອກໃຈຢູ່ດີ.
ກ່ອນທີ່ເຮົາຈະຕັດສິນໃຈວ່າຄວນໃຫ້ອະໄພ ຫຼື ຈົບຄວາມສໍາພັນກັບອີກຝ່າຍໃຫ້ລອງຢຸດຫາຍໃຈແລ້ວລອງເລີ່ມຈາກ:
1. ໃຫ້ເວລາຕົວເອງໄດ້ຄິດ ແລະ ຮັກສາແຜໃຈ
ໃຊ້ເວລາຈັດການຄວາມຮູ້ສຶກຂອງຕົນເອງກ່ອນເພາະເຮົາຈະຮູ້ສຶກເຖິງຫຼາກຫຼາຍອາລົມຫຼັງຈາກຮູ້ວ່າແຟນຂອງເຮົານອກໃຈເຊິ່ງມັນບໍ່ຕ່າງຫຍັງກັບຄວາມຮູ້ສຶກອົກຫັກ. ຖ້າຢູ່ກັບຕົວເອງແລ້ວບໍ່ໄຫວແທ້ໆໃຫ້ໄປລະບາຍກັບໝູ່ ຫຼື ຄອບຄົວທີ່ເຮົາໄວ້ໃຈເພື່ອໃຫ້ມີຄົນຊ່ວຍຮັບຟັງເຮົາ.
2. ຖາມແຟນວ່າ ‘ເປັນຫຍັງຈຶ່ງນອກໃຈ?’
ຕັ້ງຄໍາຖາມກັບອີກຝ່າຍເພື່ອຫາເຫດຜົນທີ່ເຮັດໃຫ້ລາວໄປມີຄົນອື່ນ. ເຮົາຕ້ອງຮູ້ຄໍາຕອບວ່າ ເຂົາກັບຄົນອື່ນໄປຮອດຂັ້ນຕອນໃດແດ່? ໄປກິນເຂົ້າ, ເບິ່ງໜັງ, ລົມກັນທຸກມື້ ຫຼື ພຽງແຕ່ມີເພດສໍາພັນນໍາກັນເທົ່ານັ້ນ? ຫຼື ຮັກຄົນອື່ນໄປແລ້ວ?
3. ຢືນຢັນຄວາມຮູ້ສຶກຂອງກັນແລະກັນ
ຫາກເຂົາໃຫ້ຄໍາຕອບມາວ່າພຽງເຜີໄປມີຄວາມສໍາພັນກັບຄົນອື່ນ, ແຕ່ຄວາມຮູ້ສຶກຂອງເຂົາທີ່ມີໃຫ້ເຮົານັ້ນຍັງບໍ່ປ່ຽນແປງ ເຮົາກໍອາດຈະສາມາດພະຍາຍາມຮັກສາຄວາມສໍາພັນນີ້ໄດ້. ຫາກຄໍາຕອບທີ່ໄດ້ແມ່ນເຂົາ ‘ຮັກຄົນອື່ນແລ້ວ’ ສະແດງວ່າເຮົາຄວນຈະເລີ່ມທໍາໃຈແລ້ວ.
4. ເລືອກວ່າຈະ ຕັດໃຈ ຫຼື ໃຫ້ອະໄພ
ຂັ້ນຕອນສຸດທ້າຍຕ້ອງແມ່ນເພິ່ນເອງທີ່ຕັດສິນໃຈ. ຫຼັງຈາກທີ່ໄດ້ທົບທວນ, ຕັ້ງຄໍາຖາມ ແລະ ໄດ້ຄໍາຕອບຈາກເຂົາມາແລ້ວກໍຕ້ອງມາຊັ່ງນໍ້າໜັກເບິ່ງວ່າເພິ່ນຮັກລາວພໍທີ່ຈະໃຫ້ອະໄພບໍ່? ແລະ ເພິ່ນຮັກຕົວເອງຫຼາຍພໍທີ່ຈະປ່ອຍເຂົາໄປບໍ?
ໂດຍ: ທີມບັນນາທິການ Muan
