ການຟັງເປັນທັກສະທີ່ສຳຄັນທີ່ຫຼາຍຄົນເບິ່ງຂ້າມແຕ່ໃນຄວາມເປັນຈິງແລ້ວການຟັງຢ່າງຕັ້ງໃຈ ແລະ ມີສະມາທິສາມາດຊ່ວຍສ້າງຄວາມສຳພັນທີ່ໜຽວແໜ້ນ ແລະ ມີຄວາມໝາຍໄດ້.
ການຟັງທີ່ດີບໍ່ໄດ້ໝາຍເຖິງພຽງແຕ່ການໄດ້ຍິນຄຳເວົ້າຂອງອີກຝ່າຍເທົ່ານັ້ນແຕ່ເປັນການຟັງເພື່ອໃຫ້ເຂົ້າໃຈອາລົມ, ຄວາມຮູ້ສຶກ ແລະ ຄວາມຕ້ອງການທີ່ແທ້ຈິງຂອງພວກເຂົາ.
ການຟັງຢ່າງຕັ້ງໃຈ (Active Listening) ຄືການເປີດຮັບທຸກສິ່ງທີ່ອີກຝ່າຍເວົ້າໂດຍບໍ່ຂັດຈັງຫວະ ຫຼື ຮີບຮ້ອນທີ່ຈະຕອບສະໜອງໃນທັນທີເພື່ອສະແດງອອກວ່າເຈົ້າໃສ່ໃຈ, ບໍ່ວ່າຈະເປັນການສະແດງອອກດ້ວຍພາສາກາຍ, ການງຶກຫົວ ຫຼື ການສົບຕາທີ່ເຮັດໃຫ້ອີກຝ່າຍຮູ້ສຶກວ່າເຈົ້າໃຫ້ຄວາມສຳຄັນກັບສິ່ງທີ່ລາວກຳລັງເວົ້າ ແລະ ເຮັດໃຫ້ລາວຮູ້ສຶກໄດ້ຮັບການສະໜັບສະໜຸນດ້ວຍຄວາມເຂົ້າໃຈ (Empathy) ຢ່າງຈິງໃຈ.
ໃນທາງຈິດຕະວິທະຍາ, ການຟັງທີ່ດີເຮັດໃຫ້ຜູ້ຄົນຮູ້ສຶກວ່າໄດ້ຖືກການຍອມຮັບ ເພາະສິ່ງນີ້ຈະຊ່ວຍໃຫ້ເກີດຄວາມໄວ້ວາງໃຈ, ສ້າງຄຸນຄ່າໃຫ້ຄູ່ສົນທະນາຫຼາຍ ແລະ ຄວາມສຳພັນທີ່ດີຍິ່ງຂຶ້ນ.
ຄົນທີ່ຟັງໄດ້ດີມັກຈະເປັນຄົນທີ່ມີສະເໜ່ມີຄວາມເປັນມິດສາມາດເຂົ້າໃຈ ແລະ ເປັນຄົນທີ່ໜ້າຈື່ຈຳ. ແກ້ໄຂບັນຫາໄດ້ຢ່າງມີປະສິດທິພາບ ເພາະພວກເຂົາຮັບຮູ້ສິ່ງທີ່ເປັນຮາກຖານຂອງບັນຫາຢ່າງແທ້ຈິງ.
ການຟັງຢ່າງມີປະສິດທິພາບ The Listening Theory
- ຟັງໂດຍບໍ່ຕັດສິນ: ຫຼີກເວັ້ນການສະແດງທ່າທາງ ຫຼື ຄວາມຄິດທີ່ເຮັດໃຫ້ອີກຝ່າຍຮູ້ສຶກວ່າຖືກຕັດສິນ, ໃຫ້ຟັງດ້ວຍຄວາມເປີດໃຈ ແລະ ເຄົາລົບຄວາມຄິດຂອງລາວ.
2. ໃຊ້ພາສາກາຍ: ສະແດງຄວາມສົນໃຈຜ່ານທ່າທາງເຊັ່ນ: ການສົບຕາ, ການງຶກຫົວ ຫຼື ຍິ້ມ, ເພື່ອສະແດງວ່າເຈົ້າໃສ່ໃຈໃນສິ່ງທີ່ລາວກຳລັງເວົ້າ.
3. ສະຫຼຸບສິ່ງທີ່ໄດ້ຍິນ: ລອງເວົ້າຊ້ຳ ຫຼື ສະຫຼຸບສິ່ງທີ່ລາວເວົ້າ, ເພື່ອຢືນຢັນວ່າເຈົ້າເຂົ້າໃຈກົງກັນ ແລະ ສ້າງຄວາມໝັ້ນໃຈໃຫ້ອີກຝ່າຍຮູ້ສຶກວ່າເຈົ້າຟັງແທ້.
4. ລອງຕັ້ງຄຳຖາມທີ່ດີ ແລະ ສ້າງສັນ: ຖາມຄຳຖາມເພີ່ມເຕີມທີ່ສ້າງສັນເພື່ອໃຫ້ລາວໄດ້ອະທິບາຍຄວາມຮູ້ສຶກ ຫຼື ມຸມມອງຂອງລາວຢ່າງເລິກເຊິ່ງ.
