Muan Listen - ມ່ວນຊວນຟັງ

ຟັງ ຈັງຫວະຊີວິດ ຈາກ ຕານຸ ວັນນະສິນ ເພງທີ່ໃຫ້ກຳລັງໃຈ ແລະ ສ້າງພະລັງບວກໃຫ້ຊີວິດ

ໂດຍ: Khainapha Chanthathilath

18 March 2026● 133

ຕານຸ ວັນນະສິນ ປ່ອຍເພງໃໝ່ “ຈັງຫວະຊີວິດ” ອອກມາໃຫ້ໄດ້ຟັງກັນ ແລະ ຖືວ່າໄດ້ເຂົ້າມາຊ່ວຍຮິວໃຈ (Healing) ໃຫ້ທຸກຄົນໃນຊ່ວງທີ່ກຳລັງເຈິກັບບັນຫາຕ່າງໆທີ່ກຳລັງບຸກເຂົ້າມາພ້ອມກັນ, ບາງເທື່ອສິ່ງທີ່ເຮົາຄາດຫວັງໄວ້ ຫຼື ປາຍທາງທີ່ເຮົາພະຍາຍາມໄປໃຫ້ເຖິງໃນຕອນນີ້ຈະຮູ້ສຶກວ່າມັນວ່າງເປົ່າ.

ຄວາມຝັນເລີ່ມເລື່ອນລອຍ, ຫຼາຍສິ່ງ-ຫຼາຍຢ່າງທີ່ກຳລັງຕາມຫາມັນກໍຍິ່ງຫ່າງໄກອອກໄປ. ໃນຊີວິດຂອງເຮົາມັກຈະມີການປ່ຽນແປງ ແລະ ມີຫຍັງເກີດຂຶ້ນຕະຫຼອດເວລາ. ຫຼາຍຄົນມັກທີ່ຈະອອກຕາມຫາບາງສິ່ງບາງຢ່າງທີ່ມີຄຸ່ນຄ່າ ແລະ ການຫາຄວາມໝາຍຂອງການມີຢູ່ສະເໝີ.

ແຕ່ຈັງຫວະຊີວິດຂອງຄົນເຮົາບໍ່ເທົ່າກັນ, ຖ້າຕອນນັ້ນເຮົາ ກ້າເລືອກ, ກ້າກຳນົດ ແລະ ກ້າຍອມຮັບ ເຮົາອາດຈະໄດ້ພົບຄວາມສວຍງາມທີ່ມີຄຸນຄ່າ ແລະ ໄດ້ຮູ້ຈັກກັບຄວາມໝາຍຊີວິດທີ່ດີໃນແບບຂອງເຮົາແລ້ວກໍໄດ້. 

ການໄດ້ຜະຈົນໄພໃນໂລກທີ່ກວ້າງໃຫຍ່ນີ້ ພໍຊີວິດໄດ້ເຈິຄວາມລຳບາກທີ່ບໍ່ຄາດຄິດ ແລະ ຍິ່ງມັນຍາກເທົ່າໃດ ເຮົາຍິ່ງໄດ້ຮຽນຮູ້ ທຸກຄົນສາມາດທີ່ຈະເລືອກກຳນົດຈັງຫວະຊີວິດຂອງເຮົາໄດ້ຕັ້ງແຕ່ຕອນນີ້ “ເພາະຄວາມຝັນຂອງເຮົາຄືຄວາມໝາຍຂອງການມີຢູ່ ຂໍໃຫ້ມີຄວາມເຊື່ອໝັ້ນ ແລະ ລໍຄອຍທີ່ຈະພົບກັບວັນທີ່ສວຍງາມ”.

ເພງ ຈັງຫວະຊີວິດ ໄດ້ປຽບເໝືອນຄວາມໝາຍຂອງຊີວິດ ແລະ ຄວາມຝັນ ທີ່ມີຈັງຫວະເປັນທຳນອງຂອງບົດເພງທີ່ເຮົາຕ້ອງເປັນຜູ້ຮຽບຮຽງ ຫຼື ຄົ້ນຫາເອງ, ພ້ອມບອກໃຫ້ເຮົາຮູ້ວ່າການມີຊີວິດຢູ່ຈະສົມບູນໄດ້ ກໍຕໍ່ເມື່ອເຮົາມີຈຸດໝາຍ ຫຼື ມີຄວາມຝັນເປັນເຄື່ອງມືຫຼໍ່ລ້ຽງໃຈ.

ເພງນີ້, ເປັນເພງສຸດທ້າຍໃນອາລະບ້ຳ The Rhythmarries ທີ່ປະກອບມີທັງໝົດ 5 ເພງຄື” Perfect Goodbye, 404, ຄຳຕອບ, 1998 ແລະ ຈັງຫວະຊີວິດ.

ມ່ວນຊວນຟັງ ຢາກໃຫ້ທຸກຄົນລອງເບິ່ງລະຫວ່າງທາງ  ແລະ ຢ່າພຽງແຕ່ມຸ່ງໜ້າໄປທີ່ປາຍທາງພຽງຢ່າງດຽວ ຈົນລືມໃຫ້ຄວາມສຳຄັນກັບປະສົບການຫຼາຍຢ່າງທີ່ກ້າວເຂົ້າມາໃນຊີວິດ ເພາະຖ້າເຮົາບໍ່ໃສ່ໃຈເລີຍມັນອາດຈະແນມບໍ່ເຫັນຄວາມສວຍງາມທີ່ມີຄ່າໃນຕອນນັ້ນເລີຍກໍໄດ້.