ລົມກັນເກືອບຕາຍສຸດທ້າຍບໍ່ໄດ້ເປັນຫຍັງກັນ ຍ້ອນຫຍັງຈຶ່ງເປັນແບບນີ້?

ລົມກັນມາຕັ້ງດົນແຕ່ສະຖານະບໍ່ໄດ້ເປັນຫຍັງກັນເລີຍ ເປັນໄດ້ແຕ່ຄົນລົມກັນ. ຫຼາຍຄົນເປັນແບບນີ້ບໍ? ຢາກລົມແຕ່ບໍ່ຢາກຄົບ, ເຮັດທຸກຢ່າງແບບແຟນກັນແຕ່ບໍ່ໄດ້ເປັນແຟນກັນ, ຈີບມາຕັ້ງດົນກໍບໍ່ມີຫຍັງຄືບໜ້າແລ້ວສະຫຼຸບເຮົາເປັນຫຍັງກັນລະ? ຫຼື ເຮົາຍັງດີບໍ່ພໍ ຫຼື ແນວໃດ? ຄຳຖາມທີ່ບໍ່ມີຄຳຕອບຕໍ່ໃຫ້ຖາມຈັກເທື່ອກໍຄົງຕອບໄດ້ວ່າ ເຮົາກະລົມກັນໄປຊິແຫຼະ..! ລົມໄປເລື້ອຍໆ..!

ໃຜແດ່ຢູ່ໃນສະຖານະແບບນີ້ ຢາກເລື່ອນສະຖານະຈັກເທື່ອກະບໍ່ໄດ້. ຈະບອກວ່ານີ້ແມ່ນແຟນຂ້ອຍກໍຢ້ານອີກຄົນປະຕິເສດໄປເລີຍ, ແລ້ວເຮົາຕ້ອງເຮັດແນວໃດລະ? ແຕ່ໃນຄວາມເປັນຈິງແລ້ວເລື່ອງນີ້ມັນອາດຈະຊັບຊ້ອນກວ່ານັ້ນອາການແບບນີ້ຄົນນັ້ນໆແມ່ນຄິດຫຍັງຢູ່ ເພື່ອມາໃຫ້ທຸກຄົນໄຂຂໍ້ສົງໄສ ແລະ ອາດຈະເຮັດທຸກຄົນມີວິທີໃນການຊະນະໃຈຄົນທີ່ເຮົາມັກໄດ້ເປັນແຟນສົມໃຈເຮົາມາເບິ່ງຄຳຕອບໄປພ້ອມໆກັນເລີຍ.

1. ບໍ່ຢາກຜູກມັດ

ຫຼັກໆເລີຍຄືຢ້ານການໃຊ້ຊີວິດຮ່ວມກັບຄົນອື່ນ ແລະ ຍັງບໍ່ພ້ອມ, ຍັງຢ້ານວ່າມັນຈະຜິດຜາດແບບໃນອະດີດ, ບໍ່ຢາກເຮັດໃຫ້ໃຜເສຍໃຈ ຫຼື ເສຍໃຈນຳໃຜອີກ, ບໍ່ຢາກຮັບຜິດຊອບຄວາມຮູ້ສຶກໃຜ, ມັກຢູ່ຄົນດຽວຫຼາຍກວ່າຢູ່ແບບບໍ່ໄວ້ໃຈໃຜບໍ່ເຊື່ອໃຈໃຜງ່າຍໆ, ຮູ້ສຶກວ່າການມີໃຜມັນເປັນພາລະທີ່ໜັກ ຈົນເຖິງຄວາມຄິດທີ່ວ່າເຂົາເຈົ້າອາດຈະບໍ່ແມ່ນສຳລັບຄົນໃນຄອບຄົວ ເຮັດໃຫ້ມັກຈະປະຕິເສດ ຫຼື ຍື້ເວລາທີ່ຈະຄົບຢ່າງຈິງຈັງອອກໄປເລື້ອຍໆ.

2. ຍັງຫວງຄວາມໂສດຢູ່

ຍັງມີຄວາມຫວງອິດສະລະໃນຊີວິດ ເພາະໂສດແປວ່າອິດສະລະ! ບາງຄົນອາດຍັງບໍ່ພ້ອມທີ່ຈະໃຫ້ຄົນອື່ນມາຮ່ວມຕັດສິນໃຈ, ເພາະຖ້າເຂົາເຂົ້າມາໃນຊີວິດເຮົາແລ້ວບໍ່ມີຫຍັງດີຂຶ້ນ ຢູ່ໂສດໆໄປແບບນີ້ກໍດີກວ່າ ເລີຍບໍ່ຢາກຕົກລົງເປັນແຟນໃຜງ່າຍໆ.

3. ພຽງແຕ່ຢາກບໍລິຫານສະເໜ່

ສຳລັບບາງຄົນຄວາມສຳພັນກໍຄືກັບເກມທີ່ເຂົາເຈົ້າຢາກຈະລອງຫຼິ້ນໆ ຄົບພໍແກ້ເຫງົາແກ່ເບື່ອໄປຊື່ໆ, ພໍໝົດຄວາມສົນໃຈ ຫຼື ບໍ່ໄດ້ດັ່ງໃຈກໍເຊົາຄົບໄປເທົ່ານັ້ນ. ຄົບພໍໃຫ້ຮູ້ສຶກຕື່ນເຕັ້ນ ພໍມີຫຍັງເຮັດ, ພໍມີຄົນລົມໄປຊື່ໆ ເຊິ່ງຖ້າເຮົາພົບຄົນແບບນີ້ກໍຄົງຕ້ອງເຈັບໜັກໄປໜ້ອຍໜຶ່ງເລີຍ

4. ພຽງແຕ່ຢາກມີຄົນລົມ

ກັບບາງຄົນກໍຄືເກັ່ງແຕ່ປາກ ພໍຊິເອົາແທ້ຂຶ້ນມາກັບບໍ່ມີຄວາມກ້າຮັກໃຜຈິງຈັງ, ບໍ່ໝັ້ນໃຈ ເປັນແຕ່ຄົນທີ່ຂີ້ເຫງົາໄປຊັ້ນແຫຼະ ແຖມຍັງເອົາຄວາມເຫງົາໄປລົງນຳຄົນອື່ນອີກ ຖ້າພົບຄົນແບບນີ້ເຮົາກໍຕ້ອງທຳໃຈໜ້ອຍໜຶ່ງເພາະເຮົາກໍຄືຄົນແກ້ເຫງົາຂອງເຂົາເຈົ້າໄປວັນໆເທົ່ານັ້ນເອງ.

5. ບໍ່ຢາກຄອບຄອງໃຜ

ເປັນຄວາມຮູ້ສຶກທີ່ເຮົາໄປເຫັນດອກໄມ້ງາມໆ ແຕ່ຖ້າເຮົາເດັດມັນມາມັນກໍຢູ່ນຳເຮົາໄດ້ບໍ່ດົນແປບໜຶ່ງກໍຕາຍກໍແຫ່ວໄປ ແລ້ວມັນຈະດີກວ່າບໍຖ້າເຮົາຈະປ່ອຍໃຫ້ມັນງາມຄາຕົ້ນຢູ່ແບບນັ້ນ ມັນຈະໄດ້ອວດຄວາມງາມຂອງມັນໃຫ້ໃຜຕໍ່ໃຜໄດ້ແຍງໄດ້ຊົມ, ຄວາມມັກທີ່ບໍ່ຢາກຄອບຄອງກໍຈະປະມານນັ້ນແຫຼະ. ບາງຄັ້ງການທີ່ມາຄົບນຳເຮົາມັນກໍບໍ່ໄດ້ໝາຍຄວາມວ່າຈະດີຈະສົມຫວັງຕະຫຼອດຈະດີກວ່າບໍ ຖ້າຍື້ຄວາມສຳພັນບໍ່ໃຫ້ເກີນເລີຍໃຫ້ເຂົາໄດ້ມີໂອກາດເບິ່ງຄົນໃໝ່ໆອີກຕື່ມທີ່ອາດຈະດີກວ່າເຮົາ.

ຄວາມສຳພັນທີ່ເປັນຕາຢ້ານ ແລະ ຄວນຫຼີກລ່ຽງທີ່ສຸດຄື ການທີ່ເຮົາມັກແລ້ວບໍ່ໄດ້ຄົບ ໃຫ້ໃຈໄປແລ້ວກະຍັງຢູ່ແບບບໍ່ມີສະຖານະ ແລ້ວເຂົາຍັງບໍ່ຍອມປ່ອຍເຮົາໄປອີກ ຍັງມາເຮັດເປັນຫວງແບບກັກໄວ້ຢູ່ ແຕ່ກໍຍັງບໍ່ໃຫ້ຄວາມຊັດເຈນ ເປັນຄົນລົມໄປແບບນັ້ນແຫຼະ ແບບນີ້ບອກໄດ້ເລີຍວ່າເຮົາຕ້ອງຕັດໃຈ ຮິບໜີອອກມາ ເຖິງຈະມັກສຳໃດ໋ກໍຕ້ອງ save ໃຈຕົວເອງໄວ້ກ່ອນເພາະຖ້າຝືນຫ້ອງ ICU ກໍອາດເອົາບໍ່ທັນ.

ແຕ່ກໍບໍ່ແມ່ນວ່າຄວາມສຳພັນແບບນີ້ຈະບໍ່ມີວັນໄດ້ເລື່ອນສະຖານະເລີຍ ບາງຄົນອາດຍັງຕ້ອງການໄດ້ໃຊ້ເວລາ, ບາງຄົນອາດຈະຍັງມີອະດີດທີ່ຝັງໃຈຢ້ານທີ່ຈະເລີ່ມຕົ້ນ ຢ້ານທີ່ຈະມີຄວາມຮັກໄປເລີຍ ເຊິ່ງຖ້າເຂົາຮັກເຮົາມີໃຈໃຫ້ເຮົາອີ່ຫຼີເຊື່ອເທາະວ່າມັນຈະມີມື້ທີ່ເຂົາຈະຕອບຮັບເຮົາເຂົ້າໄປໃນຊີວິດ, ແຕ່ຖ້າຄົບໄປແລ້ວບໍ່ມີຄວາມໝັ້ນໃຈເລີຍບໍ່ຈະມີຫຍັງປ່ຽນແປງກໍຕ້ອງອອກມາເດີ້ ຄົນໃໝ່ຖ້າຢູ່ໃດ໋!!. ແຕ່ຢ່າງໃດກໍຕາມຖ້າເຮົາພົບຄົນທີ່ແມ່ນ ແລ້ວມັນແມ່ນຄົນນີ້ອີ່ຫຼີກໍບໍ່ແຄ້ວກັນດອກທຸກຄົນ.

ໂດຍ: ທີມບັນນາທິການ Muan