|
Getting your Trinity Audio player ready...
|
ໃນຄັ້ງໜຶ່ງເຮົາອາດຈະພົບເຫັນຄົນປະເພດເຮັດຕົວເປັນ “ສູນກາງຈັກກະວານ ຫຼື ໂລກໝຸນອ້ອມຕົວຂ້ອຍ” ການພົວພັນກັບຄົນປະເພດນີ້ເຮັດໃຫ້ເຮົາຮູ້ສຶກອຶດອັດບໍ່ສະບາຍໃຈເພາະມັກຖືກດູດພະລັງງານບວກໄປຈົນໝົດ, ໃຫ້ຢູ່ຫ່າງໆໄດ້ຍິ່ງດີ.
ຜົນກະທົບຈາກການຖືກດູດພະລັງງານບວກແມ່ນຖືວ່າມີຜົນຮ້າຍຫຼາຍກວ່າທີ່ຄິດ, ເພາະພວກເຂົາເຫຼົ່ານີ້ມັກສ້າງບັນຍາກາດທີ່ເປັນພິດຜ່ານພຶດຕິກຳຂອງຕົນເອງຢ່າງບໍ່ຮູ້ໂຕເຮັດໃຫ້ຄົນທີ່ຢູ່ອ້ອມຂ້າງໄດ້ຮັບຜົນກະທົບເຕັມໆ.
ແຕ່ຖ້າຫາກວ່າເຮົາຫຼີກລ່ຽງບໍ່ໄດ້ເພາະວ່າຄົນປະເພດນັ້ນອາດຈະມາໃນຮູບແບບຄົນສະໜິດຄື: ໝູ່ເພື່ອນ, ຍາດພີ່ນ້ອງ ຫຼື ຫົວໜ້າເຮົາ. ຈະມີວິທີຈັດການແນວໃດໃຫ້ບໍ່ມີບັນຫາ ແລະ ຫຼີກລ່ຽງການຂັດແຍ້ງໃຫ້ດີທີ່ສຸດ:
1. ສ້າງກົດ ແລະ ຕັ້ງຂອບເຂດຢ່າງຊັດເຈນ
ທຸກຄົນມີຂີດຈຳກັດແຕກຕ່າງກັນ ແລະ ຮູ້ຂອບເຂດທີ່ຕົນເອງວ່າມີພື້ນທີ່ເທົ່າໃດ, ຖ້າເຈົ້າຮູ້ສຶກວ່າຄົນນີ້ລົບກວນພື້ນທີ່ສ່ວນຕົວເຈົ້າຫຼາຍເກີນໄປໃຫ້ເລີ່ມຕົ້ນສ້າງກົດເພື່ອເຮັດໃຫ້ມີຄວາມເຄົາລົບເຊິ່ງກັນ ແລະ ກັນ. ກຳນົດຂອບເຂດຂອງເຈົ້າວ່າເຂົາສາມາດເຮັດຫຍັງໄດ້ແດ່ເພື່ອສ້າງພື້ນທີ່ຄວາມສະບາຍໃຈ.
2. ລົມກັນແບບເປີດໃຈກົງໄປກົງມາ
ຖ້າພວກເຂົາເຫຼົ່ານັ້ນມັກຈະເຮັດໃຫ້ເຈົ້າຮູ້ສຶກບໍ່ສະບາຍໃຈ, ເຈົ້າສາມາດເວົ້າຢ່າງເປີດໃຈ ແລະ ລົມດ້ວຍເຫດຜົນດ້ວຍນໍ້າສຽງທີ່ສຸພາບ, ເລົ່າໃຫ້ເຂົາຟັງເຖິງບັນຫາ ແລະ ສະເໜີວິທີແກ້ໄຂ.
3. ຍ້ອງຍໍໃນເວລາທີ່ເຂົາເຈົ້າຕ້ອງການ
ບາງຄັ້ງຄົນເຮັດເປັນສູນກາງຂອງທຸກສິ່ງທຸກຢ່າງອາດຈະຕ້ອງການຄວາມສົນໃຈ ແລະ ການຍອມຮັບ, ພະຍາຍາມໃຫ້ກຳລັງໃຈເມື່ອພວກເຂົາເຮັດບາງສິ່ງບາງຢ່າງໄດ້ດີ. ເພື່ອຊ່ວຍໃຫ້ເຂົາເຈົ້າຮູ້ສຶກພໍໃຈໂດຍທີ່ບໍ່ຕ້ອງສະແດງອອກເກີນໄປ.
4. ໃຊ້ເວລາເພື່ອແຍກຕົວເອງອອກມາ
ຖ້າຢູ່ກັບຄົນແບບນັ້ນເຮັດໃຫ້ເຈົ້າຮູ້ສຶກອິດເມື່ອຍ ຫຼື ເຮັດໃຫ້ພະລັງງານບວກຫຼຸດລົງຕໍ່າ, ເຈົ້າຄວນຈັດສັນເວລາ ແລະ ຢູ່ຫ່າງຈາກພວກເຂົ້າໃນບາງຄັ້ງທີ່ສາມາດເຮັດໃຫ້ເຈົ້າພັກຜ່ອນໄດ້ຢ່າງສະບາຍໃຈ. ຖ້າຮູ້ສຶກວ່າໄດ້ເພີ່ມພະລັງງານບວກໄດ້ພຽງພໍແລ້ວກໍກັບໄປຫາເຂົາໄດ້ເພື່ອຮັກສາຄວາມສໍາພັນໃນໄລຍະຍາວ.
5. ເດັດຂາດ ຫ້າມໃຈອ່ອນ
ສ້າງກົດມາແລ້ວແຕ່ບໍ່ຍອມປະຕິບັດກໍບໍ່ມີຄວາມໝາຍ ເພາະພວກເຂົາເຫຼົ່ານັ້ນບາງຄັ້ງກໍຈະເຮັດໂຕເປັນເຫຍື່ອເພື່ອເຮັດໃຫ້ເຮົາສົງສານ ແລະ ຢາກໄດ້ໃນສິ່ງທີ່ຕ້ອງການຫຼາຍເກີນໄປ. ສະນັ້ນເຮົາຄວນເຄົາລົບຕົນເອງໂດຍການຮຽນຮູ້ທີ່ຈະປະຕິເສດເພື່ອປົກປ້ອງຄວາມຮູ້ສຶກຕົນເອງ ແລະ ປະຕິບັດຕາມກົດທີ່ຕົນເອງສ້າງຂຶ້ນ.
ການຮັບມືກັບຄົນແບບນີ້ຕ້ອງໃຊ້ຄວາມອົດທົນ ແລະ ຄວາມເຂົ້າໃຈ. ແຕ່ສິ່ງທີ່ສໍາຄັນແມ່ນການຮັກສາຄວາມສຳພັນໃຫ້ສົມດຸນກັນ ແລະ ໃຫ້ແນ່ໃຈວ່າເຈົ້າບໍ່ຮູ້ສຶກອຶດອັດຫຼາຍເກີນໄປ.
ໂດຍ: ທີມບັນນາທິການ Muan
