ເມື່ອບໍ່ດົນມານີ້ ມີປະເດັນສຸດຮ້ອນໃນໂລກອອນລາຍ ທີ່ຫຼາຍຄົນອອກມາສະແດງຄວາມຄິດເຫັນກ່ຽວກັບການເລືອກຄູ່ຄອງ. ໂດຍສະເພາະຄຳເວົ້າທີ່ວ່າ: “ນອກຈາກຈະເລືອກຜູ້ຊາຍທີ່ດີແລ້ວ, ຄວນເລືອກຜູ້ຊາຍທີ່ມີເງິນ ແລະ ສາມາດ Support ເຈົ້າໄດ້. ຢ່າໄປເລືອກແຕ່ຮັກແທ້ທີ່ບໍ່ມີເງິນ ເພາະຊີວິດຈິງທຸກຢ່າງລ້ວນຂັບເຄື່ອນດ້ວຍເງິນ.”
ແລ້ວຄຳຖາມກໍຄື: ເງິນຄຳສຳຄັນແນວໃດໃນຄວາມສຳພັນ? ແລະ ຖ້າຕັດສິນໃຈຄົບກັນແລ້ວ, ເຮົາຈະຈັດການບັນຫາການເງິນທີ່ແຕກຕ່າງກັນແນວໃດ ເພື່ອໃຫ້ຄວາມຮັກໄປຕໍ່ໄດ້ແບບຍືນຍົງ? Muan.space ຂໍນຳສະເໜີ RelationTips ທີ່ຈະຊ່ວຍໃຫ້ໝູ່ເພື່ອນທຸກຄົນເຫັນພາບທີ່ຊັດເຈນຂຶ້ນ!
ຄວາມຮັກທີ່ບໍ່ໂຣແມນຕິກ: ເມື່ອເງິນເຂົ້າມາກ່ຽວຂ້ອງ
ເຮົາມັກຖືກສອນມາວ່າ “ຄວາມຮັກຊະນະທຸກຢ່າງ”, ແຕ່ໃນຊີວິດຈິງ, ໃນບາງມິຕິຂອງຄວາມຮັກມັນບໍ່ໄດ້ໂຣແມນຕິກປານໃດ. ໂດຍສະເພາະເລື່ອງ “ເງິນຄຳ” ທີ່ມັກຈະເປັນຕົວປ່ຽນຜັນກຳນົດທິດທາງຂອງຄວາມສຳພັນວ່າຈະສັ້ນ ຫຼື ຍາວ.
ເງິນ ເຂົ້າໄປກ່ຽວຂ້ອງກັບຄວາມສຳພັນເພາະມັນເປັນຕົວແທນຂອງຫຼາຍສິ່ງຫຼາຍຢ່າງສຳລັບຄົນເຮົາ: ບໍ່ວ່າຈະເປັນ ອຳນາດ, ການໂອບອ້ອມ ຫຼື ຄວາມປອດໄພ ທີ່ກ່ຽວຂ້ອງກັບການເກັບອອມ ແລະ ອິດສະລະພາບ ໃນການໃຊ້ຊີວິດ.
ການທີ່ຈະບໍ່ເວົ້າເລື່ອງເງິນອອກມາແບບກົງໄປກົງມາ ເພາະຄິດວ່າເປັນເລື່ອງທີ່ລະອຽດອ່ອນນັ້ນ, ມັນຄືກັບການປ່ອຍໃຫ້ບັນຫາຄ່ອຍໆເຕີບໃຫຍ່ໃນຄວາມສຳພັນ. ມີຫຼາຍໆຜົນການວິໄຈທີ່ກ່ຽວຂ້ອງກັບເລື່ອງຂອງການເງິນທີ່ມີຜົນກະທົບກັບຊີວິດຄູ່ ເຊັ່ນ:
ຄວາມຂັດແຍ່ງເລື່ອງເງິນຄືສາເຫດອັນດັບຕົ້ນໆຂອງການຢ່າຮ້າງ: ຕາມຜົນການສຶກສາຈາກມະຫາວິທະຍາໄລລັດແຄນຊັສ (Kansas State University) ພົບວ່າ: ການໂຕ້ຖຽງກັນເລື່ອງເງິນຄຳແມ່ນປັດໄຈສຳຄັນທີ່ສຸດທີ່ນຳໄປສູ່ການຢ່າຮ້າງໄດ້ ເຊິ່ງມີນ້ຳໜັກຫຼາຍກວ່າການໂຕ້ຖຽງກັນເລື່ອງລູກ, ເພດສຳພັນ ຫຼື ເລື່ອງຄອບຄົວຝ່າຍໃດຝ່າຍໜຶ່ງ. ການໂຕ້ຖຽງກັນເລື່ອງເງິນມັກຈະ ຍາວນານ ແລະ ຮຸນແຮງ ກວ່າການໂຕ້ຖຽງເລື່ອງອື່ນໆ.
ເຫດຜົນກໍຄື ການຖົກຖຽງກັນເລື່ອງເງິນບໍ່ພຽງແຕ່ເປັນເລື່ອງຂອງຈຳນວນເງິນເທົ່ານັ້ນ, ແຕ່ມັນສະທ້ອນເຖິງ “ຄຸນຄ່າ” ຂອງຄົນສອງຄົນຕໍ່ກັບເງິນ ເຊັ່ນ: ຄົນໜຶ່ງເຫັນເງິນເປັນຄວາມໝັ້ນຄົງ ຫຼື ອີກຄົນເຫັນເປັນເຄື່ອງມືສູ່ການໃຊ້ຊີວິດ. ດັ່ງນັ້ນ, ມັນຈຶ່ງກາຍເປັນບັນຫາທີ່ຝັງເລິກ ເພາະມັນກ່ຽວຂ້ອງກັບ ຄວາມໄວ້ວາງໃຈ ແລະ ຄວາມຮູ້ສຶກປອດໄພ ໃນຊີວິດຄູ່.
ຄູ່ຮັກທີ່ “ເຂົ້າກັນໄດ້ດີ” ທາງການເງິນຈະມີຄວາມສຸກກວ່າ: ການສຶກສາໜຶ່ງໂດຍ LendingTree ພົບວ່າ ເກືອບ 1 ໃນ 4 ຂອງຄູ່ຮັກເຄີຍຢຸດຄວາມສຳພັນຍ້ອນບັນຫາຄວາມບໍ່ລົງຕົວທາງການເງິນ (Financial Incompatibility). ນີ້ສະແດງໃຫ້ເຫັນວ່າ ການເຂົ້າໃຈ ແລະ ມີເປົ້າໝາຍການເງິນທີ່ສອດຄ່ອງກັນເປັນສ່ວນສຳຄັນສຳລັບຄວາມສຳພັນທີ່ຍືນຍົງ.
ໃຊ້ບັນຊີກາງຍິ່ງເພີ່ມຄວາມສຸກ: ການສຶກສາຂອງ UCLA Anderson Review ພົບວ່າ ຄູ່ຮັກທີ່ ຮວມເງິນກັນ ໃນບັນຊີຮ່ວມ (Joint Accounts) ມີທ່າອ່ຽງທີ່ຈະ ເພິງພໍໃຈໃນຄວາມສຳພັນຫຼາຍກວ່າ ຄູ່ຮັກທີ່ແຍກບັນຊີກັນໝົດ, ເພາະມັນຊ່ວຍສ້າງຄວາມຮູ້ສຶກ “ເປັນໜຶ່ງດຽວກັນທາງການເງິນ” (Financial Togetherness) ເຮັດໃຫ້ເປົ້າໝາຍ ແລະ ການໃຊ້ຈ່າຍຮູ້ສຶກເປັນເລື່ອງຮ່ວມກັນ.
4 ຂັ້ນຕອນສຳຄັນ: ຈັດການເລື່ອງເງິນໃນຄວາມສຳພັນຢ່າງມີລະບົບ
ເພື່ອໃຫ້ຄວາມຮັກ ແລະ ການເງິນໄປນຳກັນໄດ້ແບບຍືນຍົງ ແລະ ຫຼີກລ່ຽງການໂຕ້ຖຽງທີ່ບໍ່ມີປະໂຫຍດ, ເຮົາຄວນເລີ່ມຈາກການສື່ສານທີ່ເປີດໃຈ ແລະມີລະບົບຕາມຂັ້ນຕອນ ເຊັ່ນ:
1. ເລີ່ມສົນທະນາແບບພື້ນຖານເພື່ອເຂົ້າໃຈ “ທັດສະນະຄະຕິຕໍ່ເງິນ”
ເຮົາແຕ່ລະຄົນມີ “ປະຫວັດເລື່ອງເງິນ” (Money Story) ທີ່ແຕກຕ່າງກັນ ທີ່ໄດ້ຮັບການຫຼໍ່ຫຼອມມາຕັ້ງແຕ່ຕອນເປັນເດັກນ້ອຍຈາກຄອບຄົວ. ການເລີ່ມຕົ້ນສົນທະນາແບບພື້ນຖານຈະຊ່ວຍໃຫ້ເຂົ້າໃຈເຖິງທັດສະນະຄະຕິແລະຄ່ານິຍົມຂອງກັນແລະກັນຕໍ່ກັບເງິນຄຳ.
ຕົວຢ່າງຄຳຖາມ: “ຖ້າເຈົ້າຕ້ອງເລືອກອົດ, ເຈົ້າຈະຍອມອົດກິນ ຫຼື ອົດທ່ຽວ?”, “ຖ້າມີເງິນ 1 ຕື້, ເຈົ້າຈະເອົາໄປເຮັດຫຍັງ?” (ການລົງທຶນ, ການໃຊ້ຈ່າຍ, ຫຼື ການຊ່ວຍເຫຼືອຄົນອື່ນ)
2. ເປີດຕົວເລກໃຫ້ເຫັນຊັດເຈນຂຶ້ນ (ສ້າງ “ຄວາມໃກ້ຊິດທາງການເງິນ”)
ເມື່ອຄວາມສຳພັນເລີ່ມໃກ້ຊິດ, ຄວາມໂປ່ງໃສຄືສິ່ງສຳຄັນ. ການປິດບັງໜີ້ສິນ, ບັນຊີລັບ ຫຼື ລາຍໄດ້ ຖືເປັນ “ການນອກໃຈທາງການເງິນ” (Financial Infidelity) ເຊິ່ງສາມາດທຳລາຍຄວາມໄວ້ວາງໃຈໃນຄວາມສຳພັນໄດ້ບໍ່ຕ່າງຈາກການນອກໃຈທາງຮ່າງກາຍ.
ຕົວຢ່າງທີ່ຄວນເປີດເຜີຍ: ລາຍໄດ້ປະຈຳ, ຄ່າໃຊ້ຈ່າຍຕໍ່ເດືອນ, ເປົ້າໝາຍທ້ອນເງິນ ຫຼື ໜີ້ສິນທີ່ມີຢູ່.
3. ຮ່ວມກັນວາງລະບົບການຈັດການເງິນ (ຕັດສິນໃຈແບບ “ທີມດຽວກັນ”)
ສິ່ງທີ່ຄວນຕົກລົງກັນແມ່ນວິທີການຈັດການເງິນຮ່ວມກັນ ໂດຍຄຳນຶງເຖິງຄວາມສະດວກຂອງທັງສອງຝ່າຍ.
ລະບົບກະເປົາສ່ວນຕົວ + ກະເປົາກາງ (Hybrid/Yours, Mine, Ours): ວິທີນີ້ເປັນທີ່ນິຍົມ ເພາະທຸກຄົນຍັງມີເງິນສ່ວນຕົວໄວ້ໃຊ້ຈ່າຍຕາມທີ່ຕົນເອງຕ້ອງການ (ສ້າງຄວາມຮູ້ສຶກເປັນອິດສະລະ) ແລະ ມີບັນຊີກອງກາງສຳລັບຄ່າໃຊ້ຈ່າຍຮ່ວມ ແລະ ການເກັບເງິນຮ່ວມກັນ. ວິທີນີ້ເຮັດໃຫ້ທັງສອງຝ່າຍຮູ້ສຶກວ່າມີ ສຽງທີ່ສະເໝີພາບ ໃນການຕັດສິນໃຈ.
4. ຈັດລຳດັບຄວາມສຳຄັນ ແລະ ຕັ້ງເປົ້າໝາຍຮ່ວມກັນ
ສິ່ງທີ່ທຳລາຍຄວາມສຳພັນບໍ່ແມ່ນການມີເງິນໜ້ອຍ, ແຕ່ແມ່ນການມີເປົ້າໝາຍການເງິນທີ່ແຕກຕ່າງກັນໂດຍສິ້ນເຊີງ. ການວາງແຜນຮ່ວມກັນຈະເຮັດໃຫ້ຮູ້ວ່າຈະໃຊ້ເງິນເພື່ອແນໃສ່ອະນາຄົດໃດກ່ອນ.
ຕົວຢ່າງການຈັດລຳດັບ: ຊຳລະໜີ້ສິນ (ສ້າງຄວາມໝັ້ນຄົງ) → ທ້ອນເງິນສຳລັບການລົງທຶນຮ່ວມ (ສ້າງຄວາມຮັ່ງມີ) → ທ້ອນເງິນສຳລັບການທ່ອງທ່ຽວ (ສ້າງປະສົບການຮ່ວມ).
ສະຫຼຸບ: ຄວາມຮັກບໍ່ຈຳເປັນຕ້ອງເສຍສິ່ງໃດສິ່ງໜຶ່ງໄປ
ຄຳກ່າວທີ່ວ່າ “ຊີວິດຈິງທຸກຢ່າງລ້ວນຂັບເຄື່ອນດ້ວຍເງິນ” ແມ່ນເປັນຄວາມຈິງສ່ວນໜຶ່ງ. ແຕ່ເງິນພຽງຢ່າງດຽວກໍບໍ່ສາມາດຊື້ຄວາມເຂົ້າໃຈ ແລະ ຄວາມໄວ້ວາງໃຈໄດ້.
ເຮົາອາດບໍ່ຈຳເປັນຕ້ອງເລືອກລະຫວ່າງ “ຮັກແທ້” ແລະ “ເງິນ”. ຖ້າຫາກເຮົາສາມາດເປີດໃຈລົມກັນ, ເຂົ້າໃຈທັດສະນະຄະຕິທາງເງິນຂອງກັນ ແລະ ກັນ ແລະ ຮ່ວມກັນຈັດການບັນຫາການເງິນຢ່າງມີລະບົບ ກໍຈະສາມາດສ້າງອະນາຄົດທີ່ມີທັງຄວາມຮັກ ແລະ ເງິນຄຳໄປພ້ອມກັນໄດ້.
ໝູ່ເພື່ອນເດ, ຄິດແນວໃດກັບເລື່ອງຂອງການເງິນໃນຄວາມສຳພັນ? ເຄີຍມີວິທີຈັດການບັນຫາການເງິນແບບໃດທີ່ໄດ້ຜົນແດ່? ສາມາດຮ່ວມສະແດງຄວາມເຫັນກັບເຮົາໄດ້ເດີ.
