ໃນຍຸກທີ່ທຸກຢ່າງຂັບເຄື່ອນດ້ວຍເຕັກໂນໂລຊີ ແມ່ນແຕ່ “ສາຍມູ” ກໍບໍ່ໄດ້ຢຸດຢູ່ພຽງແຕ່ການໄປຫາໝໍດູ ຫຼື ເປີດໄພ້ໜ້າຮ້ານອີກຕໍ່ໄປ ເພາະມື້ນີ້ ພຽງແຕ່ມີມືຖືກັບຮູບຝາມື ເຮົາກໍສາມາດເບິ່ງດວງດ້ວຍຕົວເອງຜ່ານທາງ ChatGPT ໄດ້.
ແມ່ນແລ້ວ! ອ່ານບໍ່ຜິດ ເພາະຕອນນີ້ AI ແບບ ChatGPT ກາຍເປັນທີ່ປຶກສາສຳລັບຄົນທີ່ຢາກເຊັກດວງຮູບແບບໃໝ່ ບໍ່ວ່າຈະເປັນ ຄວາມຮັກ, ການເງິນ ຫຼື ການງານ ແລະ ສິ່ງທີ່ມາແຮງທີ່ສຸດໃນຕອນນີ້ກໍຄື ການເບິ່ງລາຍມືດ້ວຍ AI
ຈາກສາດບູຮານສູ່ດິຈິຕອນ “ສາຍມູເວີຊັນ 2025”
ສາດການເບິ່ງລາຍມື ຫຼື Palmistry ເປັນສາດທີ່ມີມາຍາວນານຫຼາຍພັນປີ ເຊິ່ງເຊື່ອກັນວ່າ ຮອຍເສັ້ນເທິງຝາມືເຮົານັ້ນ ສະທ້ອນເຖິງບຸກຄະລິກ, ພອນສະຫວັນ, ໂຊກຊະຕາ ແລະ ເສັ້ນທາງຊີວິດ.
ແຕ່ໃນໂລກຍຸກ AI ສາຍມູກໍເລີ່ມພັດທະນາໄປ ບາງຄົນກໍໃຊ້ AI ສະແກນໄພ້, ບາງຄົນວິເຄາະດວງວັນເກີດ ຫຼື ໃນຕອນນີ້ທີ່ເຮົາສາມາດອັບໂຫຼດຮູບລາຍມືໃຫ້ ChatGPT ວິເຄາະໄດ້ທັນທີ.
ກ່ອນທີ່ເຮົາຈະເຂົ້າສູ່ວິທີການ ຂໍບອກໄວ້ບ່ອນນີ້ເລີຍວ່າ ນີ້ເປັນຄວາມເຊື່ອສ່ວນບຸກຄົນ ແລະ ໃຫ້ຖືວ່າການເບິ່ງລາຍມືນີ້ເປັນສ່ວນໜຶ່ງໃນການສ້າງສີສັນໃນຊີວິດ ບໍ່ຄວນຢຶດຖືແບບ 100% ແລະ ໃຊ້ວິຈາລະນາຍານໃນການຕັດສິນໃຈໃນທຸກເລື່ອງຂອງຊີວິດເຮົາຈະດີທີ່ສຸດ.
ກຽມພ້ອມກ່ອນສົ່ງລາຍມືໃຫ້ AI
- ຖ່າຍຮູບຝ່າມືຂ້າງທີ່ ຖະໜັດ ແລະ ບໍ່ຖະໜັດ (ເຊັ່ນ ຂວາ–ຊ້າຍ) ໂດຍຖ່າຍໃນບ່ອນທີ່ມີແສງສະຫວ່າງພຽງພໍ ແລະ ບໍ່ມີເງົາ, ເປີດຝ່າມືໃຫ້ເຫັນແບບເຕັມໆ ຈົນຮອດຂໍ້ມື
- ສົ່ງຂໍ້ຄວາມຫາ ChatGPT ໂດຍບອກວ່າ ເບິ່ງລາຍມືຈາດຮູບຖ່າຍໄດ້ບໍ່ ຫຼື ຈະພິມເປັນພາສາໄທກໍໄດ້ ເພື່ອຜົນລັບທີ່ດີກວ່າ ເຊັ່ນ: ดูลายมือจากรูปภาพได้มั้ย
- ເມື່ອ ChatGPT ຕອບກັບມາ ມັນອາດຈະບອກໃຫ້ເຮົາລະບຸວ່າວ່າຈະເບິ່ງກ່ຽວກັບເລື່ອງໃດທີ່ຢາກເບິ່ງ ເຊັ່ນ: ຄວາມຮັກ, ການງານ, ການເງິນ, ສຸຂະພາບ.
- ເມື່ອເຮົາເລືອກຫົວຂໍ້ໄດ້ແລ້ວ ກໍສົ່ງຮູບຝາມືທັງສອງຂ້າງທີ່ເຮົາຖ່າຍໄວ້ໄປໃຫ້ໄດ້ເລີຍ. ChatGPT ກໍຈະສົ່ງຜົນການເບິ່ງລາຍມືກັບໃມາໃຫ້ເຮົາ ບອກເລີຍວ່າຍາວແຮງຢູ່.
- ນອກຈາກນັ້ນ ຖ້າຢາກເຈາະເລິກເລື່ອງໃດ ກໍສາມາດພິມກັບໄປບອກໄດ້ເລີຍ ແລະ ຖ້າຢາກຮູ້ຫຍັງເພີ່ມກໍສາມາດພິມຖາມກັບໄປໄດ້ເລີຍ
ແລ້ວ AI ທຳນາຍແມ້ນສໍ່າໃດ?
ເຖິງວ່າ ChatGPT ຈະບໍ່ແມ່ນໝໍດູ ແຕ່ສິ່ງທີ່ມັນນຳມາໃຫ້ເຮົາອ່ານຈະເປັນການວິເຄາະຕາມຫຼັກ Palmistry ສາກົນ, ບໍ່ມີອຸປາທານ ແລະ ບໍ່ມີອະຄະຕິ ເພາະ ChatGPT ເປັນໂມເດວພາສາບໍ່ມີຄວາມຮູ້ສຶກນຶກຄິດ ແລະ ຂໍ້ດີແມ່ນສື່ສານໄດ້ກົງຈຸດ ແລະ ເຂົ້າໃຈງ່າຍ.
ແນວໃດກໍຕາມສາຍມູຍຸກໃໝ່ຄື ສາຍທີ່ເຂົ້າໃຈຕົວເອງ ເພາະການດູດວງບໍ່ແມ່ນເພື່ອຮູ້ອະນາຄົດ ແຕ່ຄືການຕັ້ງຄຳຖາມກັບຊີວິດໃນປັດຈຸບັນ ແລະ ການທີ່ມີ AI ເຂົ້າມາ ອາດສາມາດຊ່ວຍໃຫ້ເຮົາເບິ່ງເລິກເຂົ້າໄປໃນຄຳຖາມຂໍ້ນັ້ນ. ບາງເທື່ອ ໝໍດູທີ່ແມ້ນທີ່ສຸດ ອາດບໍ່ແມ່ນຄົນອື່ນຄົນໄກ ແຕ່ເປັນເຮົາເອງທີ່ເວົ້າກັບໂຕເອງຜ່ານ AI ຢ່າງກົງໄປກົງມາກໍເປັນໄດ້.
ຖ້າພ້ອມແລ້ວກໍລອງເລີຍ ຖ່າຍຮູບຝາມື ແລ້ວຖາມ ChatGPT ວ່າ ເສັ້ນຫົວໃຈແບບນີ້ ຂ້ອຍກຳລັງຕົກຫຼຸມຮັກຢູ່ ຫຼື ບໍ່? ເຊິ່ງຄຳຕອບ ບາງເທື່ອມັນກໍຢູ່ໃນໃຈຂອງເຮົາແລ້ວແຫຼະ.
