|
Getting your Trinity Audio player ready...
|
ໃຜເຄີຍຕົກຢູ່ໃນຄວາມສຳພັນແບບນີ້ບໍ່? ເປັນຄວາມສຳພັນທີ່ກືນບໍ່ເຂົ້າຄາຍບໍ່ອອກ, ສາມາດເກີດຂຶ້ນໃນທັງຄວາມສຳພັນຮູບແບບຄົນຮັກ, ໝູ່ ແລະ ຄອບຄົວ. ບາງຄົນມີແຟນກໍຮູ້ສຶກຄືບໍ່ມີ. ຢາກເລີກກໍເລີກບໍ່ໄດ້ເພາະຕິດຄຳວ່າ “ຮັກ” ຄວາມສຳພັນແບບນີ້ເອີ້ນວ່າ Toxic Relationship, ມື້ນີ້ມ່ວນຈະພາທຸກຄົນມາຮູ້ຈັກຄວາມສຳພັນຮູບແບບນີ້ຜ່ານບົດຄວາມ.
Toxic Relationship ແມ່ນຫຍັງ?
ຄວາມສຳພັນທີ່ເປັນພິດ ຫຼື ທີ່ຮູ້ກັນດີໃນຄຳວ່າຄວາມສຳພັນແບບ Toxic ເປັນຄວາມສຳພັນທີ່ບໍ່ສ້າງຜົນດີໃຫ້ຝ່າຍໃດຝ່າຍໜຶ່ງ ຫຼື ບໍ່ສ້າງຜົນດີໃຫ້ທັງສອງຝ່າຍ, ເກີດຄວາມເບື່ອໜ່າຍ, ມີການບັ່ນທອນຈິດໃຈກັນຕະຫຼອດເວລາ, ຮ້າຍແຮງໄປກວ່ານັ້ນອາດຈະເກີດການທຳຮ້າຍຮ່າງກາຍ ແລະ ຈິດໃຈກັນ. ຄົນສ່ວນໃຫຍ່ທີ່ກຳລັງຢູ່ໃນຄວາມສຳພັນທີ່ເປັນພິດກໍອາດຈະບໍ່ຮູ້ໂຕ ຫຼື ອາດຈະຄິດວ່າ ເລື່ອງສ່ຳນີ້ມັນຄົງຈະບໍ່ເປັນຫຍັງດອກໂດຍຮູ້ບໍ່ວ່າຖ້າເຮົາປ່ອຍປະລະເລີຍຄວາມສຳຄັນໃນຈຸດນີ້ໄປ ມັນຈະສົ່ງຜົນຕໍ່ຄວາມສຳພັນໃນອະນາຄົດຂອງເຮົາ ແລະ ກໍ່ເກີດຄວາມເຈັບປວດໃນໃຈອີກດ້ວຍ.
ສັນຍານທີ່ບົ່ງບອກວ່າເຮົາກຳລັງຢູ່ໃນ Toxic Relationship.
- ອີກຝ່າຍບໍ່ໃຫ້ພື້ນທີ່ສ່ວນຕົວເຮົາ ແລະ ບໍ່ຮັບຟັງຄວາມເຫັນເຮົາ.
- ເຮົາຈະຮູ້ສຶກໂດດດ່ຽວ, ຮູ້ສຶກບໍ່ໝັ້ນໃຈວ່າອີກຝ່າຍຮັກເຮົາແທ້ບໍ່?
- ເວລາຜິດກັນເຮົາກໍຈະເປັນຝ່າຍເສຍໃຈຝ່າຍດຽວ, ສ່ວນລາວກໍຈະເຮັດຄືກັນບໍ່ມີຫຍັງເກີດຂຶ້ນ.
- ເຮົາຕ້ອງເປັນຝ່າຍພະຍາຍາມປັບໂຕເຂົ້າຫາອີກຝ່າຍຕະຫຼອດເວລາ.
- ອີກຝ່າຍມີການໃຊ້ຄວາມຮຸນແຮງເຮັດໃຫ້ເຮົາຮູ້ສຶກຢ້ານລາວ.
ຈະອອກຈາກ Toxic Relationship ໄດ້ແນວໃດ?
- ຍອມຮັບຄວາມຈິງ: ເມື່ອຮູ້ແລ້ວວ່າອີກຝ່າຍບໍ່ໄດ້ໃຫ້ຄວາມສຸກເຮົາ, ເຮົາກໍຕ້ອງທຳໃຈຮັບມັນ ເພື່ອທີ່ຈະເດີນໜ້າຕໍ່ໄປໃຫ້ໄດ້.
- ເຜີຍຄວາມຮູ້ສຶກເຮົາໃຫ້ອີກຝ່າຍຮູ້: ບອກຄວາມຮູ້ສຶກໃນໃຈທີ່ບໍ່ກ້າບອກເຊັ່ນ: ຂ້ອຍຮູ້ສຶກບໍ່ດີຍ້ອນ…
- ຕັດສິນໃຈໃຫ້ຊັດເຈນ: ເມື່ອເວົ້າຄວາມຣູ້ສຶກໄປແລ້ວ ກໍຕ້ອງຕັດສິນໃຈວ່າຈະເອົາແນວໃດຕໍ່? ຈະຍອມກັບໄປເຈັບ ຫຼື ພໍສ່ຳນີ້?
- ໃຊ້ເວລາກັບຄົນທີ່ມອບພະລັງບວກ: ເປັນການດູແລຕົນເອງອີກວິທີໜຶ່ງ ເພາະຖ້າຢູ່ກັບແຕ່ຄົນທີ່ມີພະລັງບວກ ເຣົາກໍຈະມີຄວາມສຸກ.
ຂຶ້ນຊື່ວ່າຄວາມສຳພັນ, ບໍ່ວ່າຈະໃນຣູບແບບໃດ ກໍຕ້ອງເປັນຄວາມສຳພັນທີ່ທຸກຝ່າຍຕ່າງມີຄວາມສຸກ. ຖ້າເຣົາຢູ່ໃນຄວາມສຳພັນທີ່ບໍ່ມີຄວາມສຸກ ຫຼື ເປັນພິດແບບນີ້ ການທີ່ຈະຖອຍອອກມາເພື່ອຮັກສາຈິດໃຈຕົນເອງກໍເປັນເລື່ອງທີ່ດີ ແຕ່ຖ້າເລືອກຈະຢູ່ຕໍ່ແລ້ວປ່ຽນແປງໃຫ້ດີຂຶ້ນກໍເປັນເລື່ອງທີ່ດີເຊັ່ນກັນ, ສະນັ້ນ ຈົ່ງເຮັດໃຫ້ຄົນທີ່ເຮົາຮັກມີຄວາມສຸກສະເໝີຢ່າເຮັດໃຫ້ອີກຝ່າຍຮູ້ສຶກວ່າກຳລັງຕົກຢູ່ໃນ ຄວາມສຳພັດທີ່ເປັນພິດ ເດັດຂາດ ເພາະມັນຈະສົ່ງຜົນຮ້າຍຕໍ່ຄວາມສຳພັນນັ້ນໆແນ່ນອນ.
ໂດຍ: ທີມບັນນາທິການ Muan
