Muan Listen - ມ່ວນຊວນຟັງ

BIGPOM & PHASOUTHIN ເຕີມພະລັງໃຈໃຫ້ຄົນໄກບ້ານໃນເພງ “ຄົນໂຕນ້ອຍ”

ໂດຍ: Khainapha Chanthathilath

08 April 2026● 86

ຖ້າເຈົ້າເປັນຄົນໜຶ່ງທີ່ຕ້ອງຫ່າງຈາກບ້ານເກີດ ແລະ ຄອບຄົວ, ເດີນທາງອອກມາເພື່ອຕາມຫາຄວາມຝັນຢູ່ໃນເມືອງໃຫຍ່ ພ້ອມທັງເກີດຄຳຖາມຊ້ຳໆວ່າ ຊີວິດຄົນຕ້ອງດິ້ນຮົນເພື່ອຫຍັງ?

BIGPOM ແລະ PHASOUTHIN ກໍຈະມາເຕີມພະລັງໃຈໃຫ້ຄົນໄກບ້ານ ໂດຍການສົ່ງເພງໃໝ່ທີ່ຖ່າຍທອດຊີວິດຄົນສູ້ຝັນຜ່ານບົດເພງທີ່ມີຄວາມໝາຍໃນມຸມມອງຂອງ “ຄົນໂຕນ້ອຍ” ທີ່ຕ້ອງອົດທົນ ແລະ ຕໍ່ສູ້ພຽງຄົນດຽວໃນເມືອງທີ່ແສນວຸ່ນວາຍໃນເພງໃໝ່ນີ້.

ການໄລ່ຕາມຄວາມຝັນກໍຄືແຮງຂັບເຄື່ອນສຳຄັນທີ່ເຮັດໃຫ້ຄວາມວຸ່ນວາຍໃນເມືອງໃຫຍ່ກາຍເປັນພຽງບົດທົດສອບທີ່ຄົນໂຕນ້ອຍພ້ອມຈະແລກເພື່ອໃຫ້ບັນລຸຈຸດໝາຍ ແຕ່ກໍຢ່າລືມວ່າເຮົາຍັງມີບ້ານ ແລະ ຄອບຄົວລໍຖ້າໃຫ້ເຮົາກັບໄປຫາຢູ່ເດີ.

ເພງ “ຄົນໂຕນ້ອຍ” ຈຶ່ງເປັນເພງທີ່ໄດ້ເລົ່າເຖິງຊີວິດຄົນໆໜຶ່ງ ຫຼື ການເປັນພຽງຄົນໂຕນ້ອຍໆທີ່ຕ້ອງໄດ້ປະເຊີນກັບອຸປະສັກ ແລະ ຄວາມເມື່ອຍຈາກການດິ້ນຮົນຕໍ່ສູ້ກັບອຸປະສັກ ແຕ່ກໍຕ້ອງອົດທົນເພາະມີຄວາມມຸ່ງໝັ້ນທີ່ຈະກ້າວໄປໃຫ້ເຖິງຈຸດໝາຍທີ່ຕັ້ງໃຈໄວ້ດ້ວຍໂຕເອງ.

ເຖິງວ່າເພງນີ້ຈະເວົ້າເຖິງການສູ້ຊີວິດທີ່ມີຄວາມລຳບາກທັງດ້ານຈິດໃຈ ແລະ ຮ່າງກາຍ ແຕ່ສິ່ງທີ່ເຮັດຮູ້ສຶກເຖິງຄວາມອົບອຸ່ນຫົວໃຈໄດ້ດີກໍແມ່ນການທີ່ໄດ້ສອດແຊກຄຳສອນຂອງພໍ່ທີ່ຄອຍເຕືອນ.

ເປັນການໃຫ້ກຳລັງໃຈວ່າ ບ້ານຄືຄວາມສຸກເປັນພື້ນທີ່ປອດໄພ  ຖ້າຕ້ອງການພັກຜ່ອນກໍສາມາດກັບບ້ານເກີດໄດ້ ແລະ ມັນຍັງຄົງເປັນສະຖານທີ່ທີ່ພ້ອມຕ້ອນຮັບເຮົາສະເໝີ.