Muan Listen - ມ່ວນຊວນຟັງ

ຖ້າຮູ້ສຶກຢ່າລີລາຫຼາຍດຽວເຂົາບໍ່ຖ້າ ເພງຂອງຄົນຂີ້ອາຍ Oh why ບໍ່ຕ້ອງລີລາ ຈາກ Imel

ໂດຍ: Khainapha Chanthathilath

13 January 2026● 211

ຖ້າໃຫ້ດີກວ່ານີ້ ບໍ່ຕ້ອງລີລາ  ຖ້າມັນບໍ່ດີ ດຽວຂ້ອຍກັບໄປນອນຕໍ່.

ມາແລ້ວ, Imel ສາວນ້ອຍສຽງຫວານປ່ອຍເພງໃໝ່ ແລະ ນີ້ແມ່ນເພງທີ່ສອງຂອງລາວທີ່ມີຊື່ວ່າ “Oh why (ບໍ່ຕ້ອງລີລາ)” ໃນແນວດົນຕີ City Pop ທີ່ພໍຟັງໃນເທື່ອທຳອິດ ກໍຕ້ອງຄິດຮອດສິລະປິນສາວຢ່າງ Imel ຂຶ້ນມາທັນທີເລີຍ ເພາະຮູບແບບແນວດົນຕີ ແລະ ສຽງຮ້ອງໃສໆທີ່ມີເອກະລັກນີ້ທີ່ເຮັດໃຫ້ຄົນຟັງຈື່ລາວໄດ້ດີ.

Oh why (ບໍ່ຕ້ອງລີລາ) ແມ່ນເພງທີ່ສອງຂອງ Imel ແລະ ຍັງເປັນເພງທີ່ມີເລື່ອງລາວທີ່ເຊື່ອມໂຍງມາຈາກເພງ Trust issues (ຄອຍຖາມ) ທີ່ເປັນເພງທຳອິດຂອງລາວ.

ໃນເນື້ອຫາຂອງເພງນີ້ແມ່ນເປັນການບອກຄວາມຮູ້ສຶກເຖິງຄົນໆໜຶ່ງທີ່ເຮົາເອງເບິ່ງອອກວ່າກຳລັງມີຄວາມຮູ້ສຶກໃຫ້ກັນ. ແຕ່ຄົນນັ້ນ, ກໍຍັງບໍ່ມີຄວາມກ້າພໍໃນການສານຄວາມສຳພັນໃຫ້ເລີກເຊິ່ງຂຶ້ນຕື່ມ ເພງ Oh why (ບໍ່ຕ້ອງລີລາ) ເລີຍເປັນການບອກໃຫ້ຄົນໆນັ້ນຟ້າວບອກມາໃຫ້ຊັດເຈນໂດຍບໍ່ຕ້ອງລີລາ ເພາະຄວາມຮູ້ສຶກທີ່ມີຢູ່ມັນກົງກັນຫຼາຍຂະໜາດນີ້.

ເພງນີ້ກໍໄດ້ແຮງບັນດານໃຈຈາກຕົວ Imel ເອງ ທີ່ເຄີຍບໍ່ມີຄວາມກ້າ ແລະ ຂີ້ອາຍ ຄືກັນ, ເລີຍໄດ້ຖ່າຍທອດຄວາມຮູ້ສຶກອອກມາເປັນບົດເພງທີ່ກົງກັບໃຜຫຼາຍໆຄົນທີ່ຕ້ອງການກ້າວຜ່ານຄວາມກົງວົນໃຈ ພ້ອມສ້າງຄວາມກ້າຫານ ແລະ ຊັດເຈນກັບຄວາມຮູ້ສຶກໂຕເອງຕໍ່ໃຜຈັກຄົນໜຶ່ງ.

Imel ຍັງຝາກມາບອກທຸກຄົນທີ່ຍັງບໍ່ກ້າວ່າ “ຖ້າຮູ້ສຶກ ຢ່າລີລາຫຼາຍ ດຽວເຂົາບໍ່ຖ້າລະໃດ” ໂອ້! ແບບນີ້ພວກເຮົາຕ້ອງຮີບຟ້າວເລີຍໃດ ຊ້າຫຼາຍດຽວຈະອົດເດີ.