Highly Sensitive Person ຮູ້ວິທີຮັບມືຄວາມເຈັບປວດດ້ານຈິດໃຈຈາກການຖືກກະຕຸ້ນງ່າຍ

ຖ້າເຈົ້າຮູ້ສຶກວ່າຕົວເອງນັ້ນເປັນຄືຟອງນ້ຳທີ່ມັກຈະດູດຊັບຄວາມຮູ້ສຶກຈາກຄົນອ້ອມຂ້າງມາໃສ່ຕົວເອງສະເໝີ ບໍ່ວ່າຈະເປັນການຮັບຮູ້ຄວາມຮູ້ສຶກຂອງຄົນອື່ນໄດ້ໄວ, ມັກຈະເຂົ້າໃຈອາລົມຂອງຄົນອ້ອມຂ້າງຈົນບາງຄັ້ງກໍເກັບມາຄິດ ແລະ ວຸ່ນວາຍໃຈເປັນຫວ່ງຄົນອ້ອມຂ້າງຈົນຫຼາຍເກີນໄປຈົນເຮັດໃຫ້ເກີນຄວາມຮູ້ສຶກໜັກໃຈ ແລະ ເມື່ອຍກັບສິ່ງທີ່ເປັນຢູ່ ໃຫ້ລອງມາທຳຄວາມຮູ້ຈັກເພື່ອສ້າງຄວາມເຂົ້າໃຈກັບ Highly Sensitive Person (HSP) ກັນກ່ອນ.

Highly Sensitive Person (HSP)

HSP ແມ່ນເປັນຄົນທີ່ມີລັກສະນະລະອຽດອ່ອນ, ມີຄວາມຄິດສ້າງສັນ, ມັກສິລະປະ – ດົນຕີ, ມີປະສາດສຳຜັດໄວຕໍ່ສຽງດັງ – ແສງ, ບັນຍາກາດທີ່ວຸ່ນວາຍ ຫຼື ໄວຕໍ່ກັບສິ່ງກະຕຸ້ນຫຼາຍກວ່າຄົນທົ່ວໄປ. ມັກຈະປະມວນຜົນສິ່ງຕ່າງໆຊັບຊ້ອນຫຼາຍກວ່າຄົນທົ່ວໄປ ແລະ ຍັງຮູ້ສຶກເຈັບປວດກັບຄຳເວົ້າ ຫຼື ພຶດຕິກຳບາງຢ່າງງ່າຍກວ່າຄົນອື່ນສະເໝີ.

ຂໍ້ດີຂອງ Highly Sensitive Person (HSP)

ເຫັນອົກເຫັນໃຈ ແລະ ເຂົ້າໃຈຜູ້ອື່ນ: HSP ມີຄວາມສາມາດໃນການຮັບຮູ້ ແລະ ເຂົ້າໃຈຄວາມຮູ້ສຶກຂອງຄົນອ້ອມຂ້າງ, ເຮັດໃຫ້ເປັນຜູ້ຮັບຟັງທີ່ດີ ແລະ ສາມາດສ້າງຄວາມສຳພັນທີ່ເລິກເຊິ່ງກັບຄົນອ້ອມຂ້າງໄດ້ງ່າຍ.

ຄວາມຄິດສ້າງສັນ: ມີຄວາມອ່ອນໄຫວຕໍ່ລາຍລະອຽດ ແລະ ອາລົມອັນເລິກເຊິ່ງ ເຮັດໃຫ້ HSP ມັກມີຄວາມຄິດສ້າງສັນສາມາດສະແດງອອກຜ່ານສິລະປະ, ດົນຕີ ຫຼື ການຂຽນໄດ້ດີ.

ລະອຽດຮອບຄອບ: HSP ມັກຈະສັງເກດເຫັນລາຍລະອຽດທີ່ຄົນອື່ນອາດເບິ່ງຂ້າມ ເຮັດໃຫ້ດີຕໍ່ການເຮັດວຽກທີ່ຕ້ອງການຄວາມລະມັດລະວັງສູງ.

ສາມາດປະມວນຜົນຢ່າງເລິກເຊິ່ງ: ເປັນຄົນທີ່ຄິດຫຼາຍ, ສາມາດວິເຄາະ ແລະ ຄິດຢ່າງຮອບຄອບໃນທຸກໆເລື່ອງ, ກ່ອນຈະສະແດງຫຍັງອອກມາບໍ່ວ່າທັງການເວົ້າ ຫຼື ການກະທຳ ເຮັດໃຫ້ເປັນຄົນທີ່ມີທັດສະນະຄະຕິທີ່ເປັນເອກະລັກ.

ມີຄວາມຈິງໃຈໃນການສ້າງຄວາມສຳພັນ: ໃຜທີ່ຢູ່ໃກ້ຄົນທີ່ເປັນ HSP ຈະສະບາຍໃຈ ແລະ ຮູ້ສຶກວ່າສາມາດພຶງພາໄດ້, ເພາະ HSP ມັກຈະໃຫ້ຄວາມສຳຄັນກັບຄົນອ້ອມຂ້າງ, ເປັນຫ່ວງ ແລະ ມັກຮັກສາຄວາມສຳພັນທີ່ມີຄວາມຫມາຍ ແລະ ມີຄວາມຈິງໃຈ.

ຜົນກະທົບຂອງ Highly Sensitive Person (HSP)

ຮູ້ສຶກໜັກລົ້ນເກີນໄປ (Overwhelmed): ການທີ່ໄວຕໍ່ສິ່ງກະຕຸ້ນເຊັ່ນ: ສຽງດັງ, ແສງສະຫວ່າງ ຫຼື ສະພາບແວດລ້ອມທີ່ວຸ່ນວາຍ ອາດເຮັດໃຫ້ຮູ້ສຶກເມື່ອຍລ້າ ຫຼື ເກີດຄວາມຮູ້ສຶກກົດດັນ.

ຄິດຫຼາຍເກີນໄປ: ການປະມວນຜົນທີ່ຊັບຊ້ອນ ແລະ ຄິດຢ່າງເລິກເຊິ່ງ ອາດເຮັດໃຫ້ຕິດຢູ່ກັບຄວາມຄິດ ຫຼື ກັງວົນໂດຍບໍ່ຈຳເປັນ.

ຮັບຄວາມເຈັບປວດງ່າຍ: ຖ້າຖືກຄຳວິຈານ ຫຼື ຖຶກຕຳໜິພຶດຕິກຳທີ່ບໍ່ດີພຽງເລັກນ້ອຍ ອາດສົ່ງຜົນກະທົບຕໍ່ HSP ຫຼາຍກວ່າຄົນທົ່ວໄປ.

ຕ້ອງການເວລາພັກຜ່ອນຫຼາຍ: ເນື່ອງຈາກຮັບສິ່ງກະຕຸ້ນໄດ້ຫຼາຍ HSP ອາດຕ້ອງການເວລາພັກຜ່ອນ ຫຼື ຢູ່ຄົນດຽວເພື່ອຟື້ນຟູພະລັງງານ.

ມີຄວາມກັງວົນໃຈຫຼາຍໃນການຕັ້ງຂອບເຂດ: ຖ້າຫາກພົບສະຖານະການທີ່ບໍ່ດີ ອາດຈະຍອມຮັບ ຫຼື ທົນຕໍ່ສະຖານະການທີ່ບໍ່ສະບາຍໃຈໄວ້ເອງ, ແບກຮັບທຸກຢ່າງໄວ້ພຽງຄົນດຽວເພື່ອຫຼີກລ້ຽງຄວາມຂັດແຍ້ງ ເຊິ່ງອາດເຮັດໃຫ້ຕົນເອງຕົກຢູ່ໃນຄວາມກົດດັນຫຼາຍກວ່າຄົນອື່ນ.

ວິທີດູແລຕົນເອງຖ້າເປັນ HSP

ສ້າງພື້ນທີ່ປອດໄພໃຫ້ຕົນເອງໂດຍການຫາມຸມງຽບໆເພື່ອພັກຜ່ອນຈິດໃຈ, ຖ້າການຮັບຄວາມຮູ້ສຶກຂອງຄົນອື່ນມາຫຼາຍຈົນເຮັດໃຫ້ເຈົ້າເມື່ອຍກໍຄວນກຳນົດຂອບເຂດກັບພວກເຂົາໃຫ້ຊັດເຈນເພາະທຸກບັນຫາເຈົ້າບໍ່ສາມາດເຂົ້າໄປຊ່ວຍແກ້ໄຂໄດ້ທັງໝົດ, ອອກຫ່າງຈາກສິ່ງທີ່ມາລົບກວນ ກະຕຸ້ນເຈົ້າຫຼາຍເກີນໄປ.

ໃຊ້ສິລະປະ, ດົນຕີ, ການຂຽນ, ທຳມະຊາດ ຫຼື ກິດຈະກຳທີ່ມັກ ເຂົ້າມາຊ່ວຍໃຫ້ເຈົ້າຜ່ອນຄາຍ ໃຫ້ລະບາຍຄວາມຮູ້ສຶກແນວບໍ່ດີອອກມາໃຫ້ຫຼາຍທີ່ສຸດ, ຝຶກ mindfulness ຫຼື meditation ເພື່ອຮັບມືກັບຄວາມຄິດທີ່ລົ້ນໃນຫົວຈົນເກີນໄປ.