|
Getting your Trinity Audio player ready...
|
ສ່ອງສະຕໍຣີ່ເຂົາທຸກມື້ ພໍເຫັນເຂົາໂພສຫຍັງກໍຕາມບໍ່ເຄີຍກົດໄລ້ໃຫ້ເລີຍ ແຕ່ຮູ້ໝົດວ່າເຂົາໄປທ່ຽວໃສ ຫຼື ກິນຫຍັງ, ເຫັນເຂົາໃຊ້ຊີວິດດີກໍລັກເບະປາກໃນໃຈ, ແຖມຍັງມັກສົ່ງໂພສຂອງເຂົາໄປຈົ່ມກັບໝູ່ຕົວເອງ ບໍ່ໄດ້ຕິດຕາມຍ້ອນມັກແຕ່ຕິດຕາມເພື່ອ “ຈັບຜິດ” ຫຼື ລໍຖ້າຈັງຫວະທີ່ເຂົາພາດ.
ຮູ້ຈັກພຶດຕິກຳ Hate-following ທີ່ໂລກອອນລາຍກຳລັງຈະເຂົ້າມາປ່ຽນແປງເຮັດໃຫ້ຄົນສ່ວນໃຫຍ່ເກີດຄວາມບໍ່ພໍໃຈໃນຕົວເອງ ແລະ ມັກເກີດການປຽບທຽບກັບຄົນໃນໂຊຊຽວ.
Hate-following ໝາຍເຖິງພຶດຕິກຳທີ່ໃຜບາງຄົນກຳລັງຕິດຕາມຄົນໃດໜຶ່ງໃນໂຊຊຽວມີເດຍທັງໆທີ່ບໍ່ມັກເຂົາ ຫຼື ອາດຮູ້ສຶກໝັ່ນໃສ້, ອິດສາ ຫຼື ບໍ່ເຫັນດີນຳ Lifestyle ຂອງເຂົາ, ບໍ່ວ່າຈະເປັນຄວາມຄິດ ຫຼື ເນື້ອຫາທີ່ລາວໂພສ ແຕ່ກໍຍັງເລືອກທີ່ຈະກົດຕິດຕາມ ແລະ ເບິ່ງຊີວິດເຂົາຜ່ານໂຊຊຽວຢູ່ຕະຫຼອດ.
ທຸກຄົນສົງໄສຄືມ່ວນບໍ່ວ່າເປັນຫຍັງຄົນເຮົາຈຶ່ງເກີດມີພຶດຕິກຳແບບ Hate-following ມື້ນີ້ມ່ວນເລີຍນຳຂໍ້ມູນທີ່ໄດ້ໄປສຶກສາມາແຊຣ໌ໃຫ້ທຸກຄົນໄດ້ລອງມາທຳຄວາມຮູ້ຈັກກັນກັບພຶດຕິກຳນີ້, ເຮົາອາດຈະເຮັດມັນໂດຍທີ່ບໍ່ຮູ້ຕົວກໍໄດ້ ແລະ ຄວນຫຼີກລ້ຽງມັນແນວໃດເພື່ອໃຫ້ໂຊຊຽວມີເດຍຍັງເປັນພື້ນທີ່ສະບາຍໃຈໃຫ້ກັບເຮົາຕໍ່ໄປໄດ້.
ຫຼຸດຄວາມຢາກຮູ້ ຫຼື ປຽບທຽບກັບຊີວິດຕົນເອງ
ການທີ່ໄດ້ເຫັນສິ່ງທີ່ຄົນອື່ນມີ ແຕ່ເຮົາບໍ່ສາມາດມີໄດ້ມັນເຮັດໃຫ້ເຮົານັ້ນເກີດການປຽບທຽບ ແລະ ມັກນຳມາດ້ອຍຄ່າຕົວເອງມັນຍິ່ງເປັນການທີ່ເຮົາຈະແຮງແນມໂລກໄປໃນດ້ານລົບ, ເກີດການທໍ້ແທ້ໃນຊິວິດ.
ຄວາມອິດສາ
ມະນຸດເຮົາມັກຈະມີດ້ານມືດໃນຕົວເອງສະເໝີ ຍິ່ງເຫັນເຂົາມີຄວາມສຳເລັດ ຫຼື ຄວາມໝັ້ນໃຈໃນການເຮັດໃນສິ່ງທີ່ເຮົາເຮັດບໍ່ໄດ້ຄືເຂົາ, ຄວາມອິດສາຄືສິ່ງທີ່ຢູ່ເລີກສຸດຂອງໃຈມັນກໍຈະອອກມາຖ້າເຮົາຂາດວິຈາລະນະຍານ ມ່ວນຄິດວ່າບໍ່ມີໃຜທີ່ຈະມັກຕົວເອງໃນດ້ານນີ້ແນ່ນອນ.
ຢ່າໃຊ້ໂຊຊຽວເປັນຊ່ອງທາງລະບາຍອາລົມ ຫຼື ຄວາມບໍ່ພໍໃຈຂອງຕົນເອງ
ເພາະການໂພສຍັງໄປໃນໂຊຊຽວດ້ວຍອາລົມ-ຂາດສະຕິ ເຖິງວ່າມັນຈະເປັນໜ້າ Feed ຂອງເຮົາກໍຕາມ, ແຕ່ຢ່າລືມວ່າທຸກຄົນສາມາດເຫັນໃນສິ່ງທີ່ຢູ່ໃນໃຈເຮົາຈົນໝົດ ມັນຈະສະແດງໃຫ້ເຫັນເຖິງທັດສະນະຄະຕິໃນດ້ານທີ່ບໍ່ດີຂອງເຮົາໄດ້ ເພາະບໍ່ແມ່ນວ່າທຸກຄົນໃນໂຊຊຽວຈະຮູ້ຈັກ, ຮັກ ແລະ ຫວັງດີກັບເຮົາແທ້ໆ.
ຮູ້ວ່າບໍ່ມັກແຕ່ກໍຢຸດເບິ່ງບໍ່ໄດ້
ຄວາມຮູ້ສຶກທີ່ຂັດແຍ້ງໃນໃຈນີ້ເປັນສິ່ງທີ່ເວົ້າງ່າຍແຕ່ກໍເຮັດຍາກຫຼາຍ, ໃຫ້ຕັ້ງໃຈຄັກໆແລ້ວຖາມຕົວເອງວ່າ “ຈະຢຸດຕອນໃດຮີບປ່ຽນແປງເລີຍດີກວ່າບໍ່?” ເພາະຖ້າຍິ່ງປ່ອຍໃຈເຮົາຈະຍິ່ງເໝື່ອຍ, ທຸກຫຼາຍກວ່າສຸກ ໃຫ້ Unfollow ລ້າງ Feed ເຂົາໄປເລີຍຈະໄດ້ບໍ່ຮັບຮູ້ອີກຕໍ່ໄປ.
ຕິດຕາມສິ່ງທີ່ເຮັດໃຫ້ໄດ້ຮັບແຮງບັນດານໃຈ
ຢູ່ກັບຕົວເອງກ່ອນແລ້ວລອງຄິດວ່າສິ່ງທີ່ເບິ່ງເຫັນໃນໂຊຊຽວມີເດຍແມ່ນຫຍັງທີ່ເຮັດໃຫ້ເຮົາສະບາຍໃຈ, ຮູ້ສຶກມີຄວາມສຸກທຸກຄັ້ງທີ່ເບິ່ງ ແລະ ຍິ້ມໄດ້ເຊັ່ນ: ສັດລ້ຽງ, ທຳມະຊາດ, ສິລະປິນທີ່ມັກ ຫຼື ເລື່ອງລາວຕະຫຼົກ.
