Déymi ກັບຜົນງານທຳອິດສິລະປິນທີ່ຈະພາເຮົາຫຼົງໃຫຼໄປກັບ Lost in the Ocean

I’m just a sailboat with broken heart ປະໂຫຍດສຸດເຮີດຈຸກໃຈທີ່ປະກົດຢູ່ໃນເນື້ອເພງທີ່ແສນລະມຸ່ນໃນ Lost in the Ocean ຈາກ Déymi Artist ເທສດີຄົນນີ້.

ພານິດາ ສູນທະກິດ ຫຼື Deymi ໄວເກືອບຈະ 22 ປີ ປັດຈຸບັນກຳລັງຮຽນຢູ່ສະຖາບັນສຸດສະກະ ສາຂາໂປຣແກຣມ. ເປັນຄົນອິນໂທຣເວີດ ມີໂລກສ່ວນໂຕສູງ ອາດຈະເບິ່ງງຽບໆແຕ່ວ່າຖ້າໄດ້ຮູ້ຈັກກໍເວົ້າຫຼາຍຂື້ນ, ສ່ວນຫຼາຍໝູ່ມັກຈະບອກວ່າເປັນຄົນຄ້ອນຂ້າງຕິສທ໌ເຂົ້າໃຈຍາກໜ້ອຍໜຶ່ງ.

ເວລາວ່າງມັກຟັງເພງ, ຫຼິ້ນເກມ, ຮ້ອງເພງເປັນບາງເທື່ອ ຖ້າມີອາລົມແນ່ມັກແຕ່ງເພງຫຼິ້ນກັບກີຕ້າ. ນອກຈາກກິດຈະກຳຍາມວ່າງອື່ນແລ້ວກໍຈະເປັນການຖ່າຍຮູບແນວຟີມ, aesthetic ແລະ ການແຕ່ງໂຕຫຼາຍກວ່າ.

ຈຸດເລີ່ມຕົ້ນຂອງການໄດ້ມາເປັນສິລະປິນຄືຕອນຮຽນໃໝ່ໆຮຽນຫ້ອງດຽວກັນກັບ Imel ແລ້ວກໍໄດ້ເປັນໝູ່ກັນຍ້ອນມັກຮ້ອງເພງ, ຟັງເພງຄືກັນໄດ້ມີໂອກາດໄດ້ໄປນັ່ງຫຼິ້ນລອງຊອກແຕ່ງເພງໃສ່ບີດໃນຢູທູບນຳກັນ. ຕໍ່ມາ Imel ກະມາຊວນວ່າ Just”, Gomen ແລະ ອ້າຍວິນຢາກເຮັດຄ່າຍເພງນ້ອຍໆທີ່ຊັບພອດຊ່ວຍເຫຼືອເຮັດເພງໃຫ້ກັນ ແລະ ກັນ. ສ່ວນໂຕຮູ້ສຶກຍິນດີທີ່ເຮົາໄດ້ເປັນສ່ວນໜຶ່ງໃນນັ້ນນຳ.

ສ່ວນສະໄຕລ໌ເພງທີ່ເຮົາຢາກເຮັດແມ່ນຈະເປັນ pop ທີ່ປະສົມປະສານກັບ alternative indie R&B ແລະ soul ໜ້ອຍໜຶ່ງ ເພາະໄດ້ແຮງບັນດານໃຈມາຈາກວົງ the 1975 ເປັນວົງທີ່ມີສະໄຕລ໌ເພງທີ່ຫຼາກຫຼາຍ, ມີເອກະລັກເປັນຂອງຕົວເອງບໍ່ວ່າຈະເລື່ອງສຽງເພງ, ດົນຕີ, ການເລົ່າເລື່ອງຜ່ານເນື້ອເພງ ແລະ ວິທີການນຳສະເໜີຂອງເຂົາເຈົ້າ, ການໃຊ້ Synthesizer ກັບເມໂລດີ້ທີ່ມັນຕິດຫູຟັງແລ້ວຢາກເຮັດເພງເລີຍ.

IG: thesubme

Déymi ຍັງໄດ້ເລົ່າໃຫ້ມ່ວນຟັງອີກວ່າ ໃນຕອນນີ້ເປົ້າໝາຍໃນຊີວິດໃນການເປັນສິລະປິນທີ່ຕ້ອງເຮັດໃຫ້ໄດ້ແມ່ນການເຮັດເພງທີ່ເປັນຕົວຂອງຕົວເອງທີ່ສຸດ ແລະຢາກເຮັດໃຫ້ຄົນຟັງໄດ້ຮູ້ສຶກອິນ, ຮູ້ສຶກເຊື່ອມໂຍງກັບມັນເທົ່າທີ່ເຮັດໄດ້. ສ່ວນຄວາມຝັນທີ່ຢາກເຮັດທີ່ສຸດແມ່ນການອອກອາລະບຳທີ່ມັນຄ້ອນຂ້າງມີຄວາມໝາຍ, ແບບອັດແໜ້ນຄວາມຄິດ,ອາລົມທຸກຢ່າງລົງໄປໃນນັ້ນ.

ຕັ້ງແຕ່ໄດ້ປ່ອຍເພງ Lost in the Ocean ໄປ ຮູ້ສຶກພູມໃຈ ລະກະ ໝັ້ນໃຈໃນໂຕເອງຫຼາຍຂຶ້ນໃນການເດີນທາງເປັນສິລະປິນ ແລະ ຄິດຢາກເຮັດເພງທີ່ມັນດີຂຶ້ນໄປເລື້ອຍໆ ມີຄວາມຢາກຈະປັບປຸງໃນສ່ວນທີ່ເຮົາຄິດວ່າສາມາດເຮັດໃຫ້ມັນດີຂຶ້ນກວ່ານີ້ໄດ້ອີກ. ເພງທີ່ປ່ອຍອອກໄປນັ້ນຢ່າງໜ້ອຍກໍອາດຈະເຮັດໃຫ້ຄົນຟັງໄດ້ຮັບຮູ້ຄວາມຮູ້ສຶກທີ່ເຂົາເຈົ້າບໍ່ສາມາດສະແດງອອກມາໄດ້ ຫຼື ຮູ້ວ່າເຂົາກະບໍ່ໄດ້ຮູ້ສຶກໂດດດ່ຽວແບບນີ້ຄົນດຽວ. ສຳລັບ ສິລະປິນໜ້າໃໝ່ທີ່ສົນໃຈເຮັດເພງແນວນີ້ຢາກໃຫ້ເຂົາເຈົ້າໄດ້ກ້າ ແລະ ມີຄວາມໝັ້ນໃຈໃນການສະແດງຄວາມເປັນໂຕເອງອອກມາໃນເພງແນວນີ້ຫຼາຍຂຶ້ນ ໂດຍບໍ່ຕ້ອງຢ້ານວ່າມັນຊິບໍ່ເປັນທີ່ຍອມຮັບ ການເຮັດເພງໃນແບບຂອງເຮົາມັນດີທີ່ສຸດ.

ສຸດທ້າຍນີ້ກະຢາກຝາກຜົນງານເພງທຳອິດຂອງ Déymi ທີ່ປ່ອຍອອກໄປບໍ່ດົນມານີ້ຊື່ວ່າ Lost in the ocean ເປັນເພງທີ່ປຽບທຽບເລື່ອງລາວຄວາມຮັກລະຫວ່າງ ເຮືອ ແລະ ລົມ ໃນມະຫາສະໝຸດ. ໃນອະນາຄົດມີແຜນຢາກເຮັດເພງທີ່ມັນຫຼາກຫຼາຍ ແລະ ລອງເຮັດສິ່ງໃໝ່ໆຂຶ້ນອີກ.

ໂດຍ: ທີມບັນນາທິການ Muan