ຍ້ອນຫຍັງການມາຂອງ Clozer ຈຶ່ງປຸກກະແສ Boy Band ລາວຂຶ້ນມາອີກຄັ້ງ ໃນຮອບ 10 ປີ?

ວົງການເພງລາວໄດ້ຫ່າງຫາຍຈາກຄຳວ່າ Boy Band ມາດົນນານ ຖ້າຈະຍ້ອນກັບໄປກໍເປັນເວລານັບສິບປີມາແລ້ວ ເຊິ່ງກໍຍັງບໍ່ທັນມີວົງໃດທີ່ເປີດໂຕມາໃໝ່ ແລະ ກາຍເປັນກະແສຖືກກ່າວເຖິງເປັນວົງກວ້າງແບບນີ້. ການມາຂອງ Clozer ສິລະປິນກຸ່ມ 5 ຄົນພາຍໃຕ້ Miracle Music ຈຶ່ງຖືວ່າເປັນຄວາມຕື່ນເຕັ້ນ ແລະ ເປີດສັກກະຫຼາດໃໝ່ຂອງກຸ່ມສິລະປິນທີ່ເປັນຜູ້ຊາຍໃນ LPOP ໃຫ້ກັບມາຄຶກຄື້ນອີກຄັ້ງ.

ສະນັ້ນ, ພວກເຮົາຈຶ່ງຈະພາໄປຮູ້ຈັກໜຸ່ມໆວົງ Clozer ໃຫ້ຫຼາຍຂຶ້ນຜ່ານມຸມມອງຕ່າງໆທີ່ຫຼາຍຄົນອາດຈະຍັງບໍ່ຮູ້. ພວກເຂົາໄດ້ເດບິວ (Debut) ເລີ່ມຕົ້ນເພງທຳອິດດ້ວຍພະລັງແຮງໃຈ-ແຮງກາຍເພື່ອທີ່ຈະຕໍ່ສູ້ ດ້ວຍຄວາມຫວັງທີ່ຢາກສ້າງສັນຜົນງານຂອງພວກເຂົາ ໃຫ້ LPOP ໃຫ້ເປັນທີ່ຮູ້ຈັກຂຶ້ນທັງໃນປະເທດ ແລະ ຕ່າງປະເທດ.

ສຳລັບ Clozer, ພວກເຂົາ ໄດ້ເກັບຕົວຝຶກຊ້ອມດົນເຖິງ 2 ປີ ນັບຕັ້ງແຕ່ປີ 2023 ແລະ ພວກເຂົາຍັງແມ່ນ Boy Band ທຳອິດຂອງຄ້າຍ Miracle Music ເຊິ່ງປະກອບມີສະມາຊິກທັງໝົດ 5 ຄົນໄດ້ແກ່: ຫວັງ, ອາຫຼົງ, ເມກ, ແທນ ແລະ ຕົ້ນ. ໃນປີ 2024 ທີ່ຜ່ານມາ, ຄ້າຍ Miracle Music ກໍໄດ້ Debut ວົງ Girl Group ເຊັ່ນ MVIIZ ອອກມາ ແລະ ຖືວ່າໄດ້ຮັບຄວາມນິຍົມພໍສົມຄວນ.

ໃນປີ 2025 ວົງ Clozer ໄດ້ປ່ອຍເພງທຳອິດຂອງພວກເຂົາທີ່ມີຊື່ວ່າ “FIGHTER” ນີ້ບໍ່ແມ່ນພຽງແຕ່ເປັນເພງ Debut ແຕ່ມັນຍັງມີຄວາມໝາຍດີໆຢູ່ໃນນັ້ນກໍຄືການທີ່ໜຸ່ມໆວົງ Clozer ໄດ້ບອກເລື່ອງລາວຂອງພວກເຂົາທີ່ມີຄວາມຝັນ, ການຕໍ່ສູ້, ຄວາມໝັ້ນໃຈໃນແນວທາງຂອງຕົນເອງ ແລະ ການທີ່ຈະເດີນທາງໄປພ້ອມກັນກັບທຸກຄົນ ພວກເຂົາຖືໄດ້ວ່າເປັນບອຍແບນກຸ່ມໃໝ່ທີ່ເປັນຕົວແທນຂອງ Gen Z.

ຈຸດເລີ່ມຕົ້ນຂອງວົງ Clozer

Clozer ເກີດຂຶ້ນຍ້ອນໂປຣເຈັກ Gen Z ຂອງ “ຊູໂມ້ ຈັນເທວາ” ເຊິ່ງເປັນຜູ້ມີປະສົບການໃນວົງການບັນເທີງລາວ ແລະ ຢູ່ເບື້ອງຫຼັງສິລະປິນລາວຫຼາຍຄົນ. ໂປຣເຈັກນີ້ຈັດຂຶ້ນເພື່ອຊອກຫາຜູ້ທີ່ມີຄວາມຝັນຢາກເປັນສິລະປິນ ແລະ ຊຸກດັນໄວໜຸ່ມລາວໃຫ້ພັດທະນາທັກສະຕົວເອງຢູ່ຕະຫຼອດເວລາ.

ຊື່ Clozer ມີຄວາມໝາຍພິເສດທີ່ແປວ່າ “ໃກ້ຊິດ” ເພາະເມັມເບີ (Member) ໃນວົງສ່ວນໃຫຍ່ແມ່ນມາຈາກຕ່າງແຂວງເກືອບທັງໝົດ ຫຼື ບາງຄົນກໍບໍ່ຄ່ອຍໄດ້ໃກ້ຊິດກັບຄອບຄົວ, ຊື່ວົງ Clozer ກໍເລີຍເປັນອີກຊື່ໜຶ່ງທີ່ເຂົ້າມາເຕີມເຕັມໃນສ່ວນທີ່ເມັມເບີໃນວົງຂາດຫາຍໄປ ແລະ ຖືວ່າເປັນບ້ານຫຼັງທີສອງຂອງສະມາຊິກວົງ Clozer ເລີຍກໍວ່າໄດ້ ເພາະພໍສະມາຊິກຢູ່ນຳກັນແລ້ວມີຄວາມຮູ້ສຶກອົບອຸ່ນຄືຄອບຄົວ.

Ton: ພົມວິຫານ ອິນທະນາ ຫຼື ຕົ້ນ ຕາມທີ່ທຸກຄົນເຄີຍໄດ້ຍິນ ແລະ ເອີ້ນກັນມາຕະຫຼອດ. ຕຳແໜ່ງ Rap, Dance ແລະ Sub Vocal.

ສ່ວນສະໂລແກນຂອງຕົ້ນຫວາ ບໍ່ມີເລີຍດີກວ່າ ຮາຮາ. ລັກສະນະນິໄສຂອງຕົ້ນທີ່ແຟນຄລັບຫຼາຍໆຄົນບໍ່ຄ່ອຍຮູ້ແມ່ນ ຕົ້ນເປັນຄົນມັກຂີ້ກວນ ເຫັນໃຜຢູ່ຊື່ໆບໍ່ໄດ້ ຕ້ອງໄດ້ມີແນວເຂົ້າໄປຢອກ, ເຂົ້າໄປກວນໃຫ້ເຂົາເຈົ້າຍິ້ມຫົວ ແຕ່ບາງທີກໍກວນເກີນຈົນເຂົາເຈົ້າລຸມຫົວກວນກັບ.

ເພງ Fighter

ກ່ອນຈະມາເປັນເພງ Fighter ໜຸ່ມໆວົງ Clozer ກໍຜ່ານການຝຶກຊ້ອມມາຫຼາຍ, ຊ້ອມເກືອບທຸກມື້ເລີຍ ເຊິ່ງໃນທຸກໆມື້ທີ່ພວກເຂົາໄປຊ້ອມ ກໍໄດ້ຫາແນວໃໝ່ໆມາຝຶກທັກສະຕົວເອງຕະຫຼອດເວລາ ບໍ່ວ່າຈະເປັນ Cover ເພງ KPOP ຫຼື TPOP ເພື່ອເອົາໄປຂຶ້ນສະແດງໃນງານ, ທັງຊ້ອມຮ້ອງ ແລະ ເຕັ້ນໃນເວລາດຽວກັນ, ຊ້ອມ entertain ແຟນຄລັບໃຫ້ຮູ້ສຶກມ່ວນໄປກັບພວກເຂົາໃນການສະແດງເທິງເວທີ.

ເມັມເບີແຕ່ລະຄົນກໍມີສິ່ງທີ່ມັກແຕກຕ່າງກັນໃນເພງ Fighter ເຊິ່ງທ່ອນຮ້ອງທີ່ “ຕົ້ນ” ຮູ້ສຶກມັກເປັນພິເສດກໍຄືທ່ອນ Rap ຂອງ ເມກ “ມື້ຖ່າຍທຳເອັມວີສາກທີ່ມີລົດນັ້ນ ອ້າຍເມກໄດ້ຖ່າຍໃນສາກຕອນທຳອິດແມ່ນເປັນພຽງແຕ່ລົດເກົ່າໆທຳມະດາ ບໍ່ໄດ້ເຄື່ອນທີ່ໄປໃສ ແລະ ສະຖານທີ່ດ້ານນອກລົດກໍບໍ່ໄດ້ເຂົ້າກັບແສງສີໃນລົດຂະໜາດນັ້ນ. ຕອນນັ້ນອ້າຍເມກຖ່າຍຕອນເຊົ້າ ແຕ່ພໍມາເບິ່ງໃນເອັມວີມັນຕ່າງຈາກພາບທີ່ເຮົາເຫັນຕົວຈິງແຮງ ກໍເລີຍຮູ້ສຶກຕົກໃຈ ແລະ Surprise ໃນເວລາດຽວກັນກ່ຽວກັບການຕັດຕໍ່ຂອງທີມງານທີ່ເຮັດອອກມາໄດ້ດີຂະໜາດນີ້,” ຕົ້ນ ກ່າວ.

Wang: ຫວັງ-ວິໄລ ໄຊສົມບັດ ສະໂລແກນຫວັງ Wang handsome. ຕຳແໜ່ງ Vocal ແລະ ຖືວ່າເປັນນັກຮ້ອງສຽງດີສຽງຫວານເລີຍແຫຼະ ສ່ວນນິໄສສ່ວນຕົວຈະເປັນຄົນງຽບໆເອົາໃຈເກັ່ງ, ຂີ້ຕົກໃຈງ່າຍ-ຂີ້ຢ້ານ ແລະ ຍັງແຕ່ງກິນແຊບ.

ຄວາມຮູ້ສຶກຂອງໜຸ່ມໆວົງ Clozer ຫຼັງ Debut

ຫຼັງຈາກທີ່ໄດ້ປ່ອຍເພງ Debut ເປັນຂອງຕົວເອງເປັນຄັ້ງທຳອິດ, ໜຸ່ມໆ Clozer ໄດ້ເລົ່າຄວາມຮູ້ສຶກທີ່ມີໃຫ້ມ່ວນຟັງວ່າ: “ຮູ້ສຶກເປັນກຽດ ແລະ ດີໃຈຫຼາຍທີ່ໄດ້ເປັນໜ້າເປັນຕາແທນປະເທດລາວ, ໄດ້ເປັນບາດກ້າວທຳອິດຂອງວົງການ LPOP ທີ່ກຳລັງເປັນກະແສໃນຕອນນີ້. ຮູ້ສຶກດີໃຈແທນທຸກຄົນໃນວົງທີ່ຈະໄດ້ມີຜົນງານຕ່າງໆຕາມມາ, ດີໃຈທີ່ມີຖານແຟນຄລັບເພີ່ມຂຶ້ນ, ມີຄົນຮູ້ຈັກວົງ Clozer ຫຼາຍຂຶ້ນ ເພາະທຸກຄົນໃນວົງໄດ້ເຮັດມັນສຳເລັດແລ້ວ ແລະ ກໍຮູ້ສຶກດີໃຈທີ່ຫຼາຍໆຄົນພູມໃຈໃນໂຕພວກເຮົາທີ່ເຮັດຜົນງານອອກມາໄດ້ດີຂະໜາດນີ້.”

“ພວກເຮົາ Clozer ຮູ້ສຶກດີໃຈແທນແຟນຄລັບທີ່ຕິດຕາມລໍຖ້າຜົນງານຂອງພວກເຮົາມາດົນ ເຊິ່ງມື້ນີ້ກໍໄດ້ເຮັດໃຫ້ກຸ່ມຄົນເຫຼົ່ານັ້ນປະທັບໃຈໃນຕົວພວກເຮົາໄດ້ ບໍ່ພຽງແຕ່ກຸ່ມແຟນຄລັບທີ່ຖ້າເບິ່ງຜົນງານພວກເຮົາ ແຕ່ເປັນທຸກຄົນເລີຍ, ທັງທີ່ຫາກໍຮູ້ຈັກພວກເຮົາ Clozer ຫຼື ຮູ້ຈັກກັນມາດົນແລ້ວ, ຖ້າບໍ່ມີກຸ່ມຄົນທີ່ໜ້າຮັກແບບນີ້ພວກເຮົາ Clozer ກໍຄືຊິບໍ່ດີໃຈຫຼາຍຂະໜາດນີ້ ແລະ ມີຄວາມສຸກຫຼາຍຂະໜາດນີ້ມາກ່ອນ”.

ກິດຈະກຳທີ່ Clozer ມັກເຮັດຮ່ວມກັນ

ຖ້າບໍ່ນັບເວລາຊ້ອມໜຸ່ມໆວົງ Clozer ມັກເຮັດກິດຈະກຳຮ່ວມກັນຢ່າງຫຼາກຫຼາຍ ແລະ ໜຶ່ງໃນນັ້ນຄື ຊວນກັນຫຼິ້ນເກມຕີປ້ອມ ເພາະວ່າເວລາມີໃຜແພ້-ໃຜຊະນະຈະໄດ້ຢອກ ຫຼື ເຢີ້ຍ ກັນນັ້ນເອງ ຖືວ່ານີ້ເປັນຊ່ວງເວລາການຜ່ອນຄາຍຂອງໜຸ່ມໆຈາກການຝຶກຊ້ອມຢ່າງໜັກ. ນອກຈາກນັ້ນ, ພວກເຂົາຍັງມັກພາກັນໄປແຕ່ງກິນຢູ່ບ້ານຂອງ ຊູໂມ້  ໂດຍມີ ຫວັງ ເປັນພໍ່ຄົວແຕ່ງເຂົ້າກິນໃຫ້ເມັມເບີທຸກມື້ ແລະ ຕົ້ນ ກໍເປັນຄົນທີ່ມັກລົມເລື່ອງວຽກກັບທຸກຄົນໃນວົງ ເປັນນັກວາງແຜນວ່າມື້ນີ້ຊິເອົາແນວໃດ, ຊ້ອມແບບໃດ, ຄິດເພງ, ອອກແບບທ່າເຕັ້ນ ຫຼື ແຕ່ງເພງຮ່ວມກັນ.

Mek: ເມກ ສະຫວັນ ຕຳແໜ່ງ Main Rap. ນິໄສຈະອອກໄປແນວກວນໆຕະຫຼົກ, ເວລາເຮັດຫຍັງແລ້ວຈະຈິງຈັງ ແລະ ເຕັມທີ່.

ບັນຍາກາດໃນກອງຖ່າຍເພງ Fighter

“ບັນຍາກາດໃນກອງຖ່າຍເອັມວີ ສຳລັບ ຕົ້ນ ແມ່ນຮູ້ສຶກມ່ວນ-ເອັນຈອຍແຮງ ເໝືອນບໍ່ໄດ້ມາຖ່າຍວຽກຄືມາຫຼິ້ນຫຼາຍກວ່າ ເຊິ່ງໃນກອງຖ່າຍນັ້ນ ຕົ້ນ ບໍ່ມີຄວາມກົດດັນຈາກອ້າຍໆທີມງານຕາກ້ອງເລີຍ, ການເວົ້າການຈາຂອງທີມງານຂ້ອນຂ້າງເປັນມິດ ແລະ ໜ້າຮັກຫຼາຍ,” ຕົ້ນ ເລົ່າ.

“ຖ້າຖາມວ່າຄວາມທ້າທາຍໃນການຖ່າຍເອັມວີຄັ້ງນີ້ແມ່ນຫຍັງ? ບອກເລີຍວ່າມີທຸກບ່ອນ, ຕັ້ງແຕ່ເຂົ້າສາກຕົວເອງ ຫຼື ສະຖານທີ່ຕ່າງໆກໍມີອຸປະສັກມາໃຫ້ Clozer ຕະຫຼອດບໍ່ວ່າຈະເປັນ ຝົນຕົກ, ກິ່ນເໝັນ-ອາກາດອັບຊື້ນຈົນຫາຍໃຈບໍ່ອອກ, ແດດຮ້ອນຜິວໄໝ້ ແລະ ເຈັບໂຕ ຖືວ່າຄົບທຸກລົດຊາດໃນທຸກສະຖານທີ່ທີ່ໄປຖ່າຍ ແລະ ຮູ້ສຶກທ້າທາຍກັບຕົວເອງພ້ອມ,” ຕົ້ນ ເລົ່າດ້ວຍຮອຍຍິ້ມ.

Than: ແທນ-ທັນວາ ບຸບຜາ Main Vocal ນິໄສສ່ວນຕົວເປັນຄົນຄຳຮູ້, ຟັງຄວາມ, ເຂົ້າກັບຄົນໄດ້ງ່າຍ ແລະ ກິນເກັ່ງ.

ແຮງບັນດານໃຈໃນການເຮັດເພງ

ໜຸ່ມໆວົງ Clozer ໄດ້ຮັບແຮງບັນດານໃຈມາຈາກພວກເຂົາເອງ ເພາະທີ່ຜ່ານມາພວກເຂົາໄດ້ຕໍ່ສູ້ ແລະ ພົບເຈິຜ່ານຫຍັງມາຫຼາຍຢ່າງບໍ່ວ່າຈະເປັນທັງຄວາມສຸກ, ທຸກ, ເສົ້າ, ທໍ້ແທ້, ເສຍໃຈ ແລະ ຫຼາຍໆຄວາມຮູ້ສຶກຕ່າງໆ ແຕ່ພວກເຂົາກໍຍັງເລືອກທີ່ຈະສູ້ເພື່ອຄວາມຝັນຕົວເອງຈົນອອກມາເປັນຊື່ເພງວ່າ Fighter.

Along: ອາຫຼົງ-ພອນສະຫວັນ ບານຸວົງ Main Vocal ແລະ Dance.

ມີລັກສະນະນິໄສທີ່ອ່ອນນ້ອມຖ່ອມຕົນ, ຄຳຮູ້, ຍິ້ມເກັ່ງ, ກິນໜ່ອຍ ແລະ ຂີ້ໄຫ້ບາງເວລາ.

ຄວາມທ້າທ້າຍໃນການເປັນສິລະປິນລາວ

Clozer ໄດ້ພົບເຈິກັບຄວາມທ້າທາຍໃໝ່ໆຢູ່ຕະຫຼອດ ແລະ ພວກເຂົາບອກວ່າ ສິ່ງທີ່ກັງວົນກໍແມ່ນເລື່ອງຄວາມສາມາດ ດ້ວຍຄວາມທີ່ປະເທດລາວເຮົາຍັງເປັນປະເທດນ້ອຍໆຢູ່ ເວລາມີຜົນງານຫຍັງອອກມາກໍມັກຖືກປຽບທຽບກັບປະເທດເພື່ອນບ້ານຢູ່ສະເໝີ ຫຼື ຕ້ອງເຈິກັບຄຳດູຖູກຕ່າງໆຈາກຄົນປະເທດດຽວກັນ, ການບໍ່ສະໜັບສະໜຸນຈາກຄົນກັນເອງ ແລະ ວົງການບັນເທິງລາວເຮົາກໍຍັງບໍ່ທັນເປີດກວ້າງຂະໜາດນັ້ນຈົນສາມາດເຮັດໃຫ້ປະເທດອື່ນໆຮູ້ຈັກຜົນງານຕ່າງໆຂອງຄົນລາວເຮົາ.

“ສຸດທ້າຍ ພວກເຮົາຂໍຝາກທຸກໆຄົນສະໜັບສະໜຸນ ແລະ ເອັນດູພວກເຮົາວົງ Clozer ໄປດົນໆແດ່ເດີ ເພາະວ່າພວກເຮົາຈະໄດ້ມີການສ້າງຜົນງານໃໝ່ໆໃຫ້ທຸກຄົນໄດ້ຮັບຊົມຢູ່ຕະຫຼອດ ຈະບໍ່ເຮັດໃຫ້ທຸກຄົນຜິດຫວັງແນ່ນອນ ເຊິ່ງເພງຕໍ່ໄປຂໍສະປອຍໜ່ອຍໜຶ່ງແດ່ວ່າ ຈະເປັນເພງທີ່ທຸກຄົນມ່ວນ ແລະ ຮູ້ສຶກເອັນຈອຍນຳໄດ້ແນ່ນອນ,” ຕົ້ນ ກ່າວປິດທ້າຍ.

ການມາຂອງພວກເຂົາ ເປັນສັນຍານບອກວ່າ LPOP ຂອງລາວກຳລັງຕື່ນຂຶ້ນມາອີກຄັ້ງ. ຈາກກະແສຕ່າງໆທີ່ເກີດຂຶ້ນທັງໃນລາວເອງ, ປະເທດເພື່ອນບ້ານ ຫຼື ພາກພື້ນ ລວມເຖິງຄຸນນະພາບຂອງເພງ Fighter ທັງໃນແງ່ຂອງການຜະລິດ ແລະ ການນຳສະເໜີ ກໍຍິ່ງຕອກຢໍ້່ໍາວ່າ ສິ່ງທີ່ຈະເກີດຂຶ້ນຕໍ່ໄປນີ້ຈະເປັນການສ້າງມາດຕະຖານໃໝ່ໃນວົງການເພງລາວ ເຊິ່ງມັນຈະໄປຕໍ່ໄດ້ໄກຂຶ້ນ ກໍຕ້ອງໄດ້ແຮງສະໜັບສະໜຸນຈາກທຸກໆຄົນເຊັ່ນກັນ.