Working Tips

ເປັນຫຍັງການສະເຫຼີມສະຫຼອງ ແລະ ດົນຕີ ຈຶ່ງສົ່ງຜົນດີຕໍ່ການເຮັດວຽກ?

ໂດຍ: Chanthasone Insixiangmai

26 December 2024● 260

ເປັນຫຍັງການສະເຫຼີມສະຫຼອງ ແລະ ດົນຕີ ຈຶ່ງສົ່ງຜົນດີຕໍ່ການເຮັດວຽກ? ແຊຣ໌ຂໍ້ຄິດດີໆທີ່ໄດ້ຈາກການຮ່ວມງານ Christmas Get Together and Winter Sonata ທີ່ Crowne Plaza ແລະ Holiday Inn & Suites Vientiane

ແອັດມິນຢາກມາເລົ່າເລື່ອງລາວຫຼັງຈາກທີ່ໄປຮ່ວມງານຂອງ ຄຣາວພລາຊ່າ ແລະ ຮໍລິເດ ອິນ ແອນ ສຫວີທສ໌ ວຽງຈັນ (Crowne Plaza Vientiane ແລະ Holiday Inn & Suites Vientiane) ເມື່ອວັນພະຫັດທີ 12 ທັນວາ 2024 ທີ່ຜ່ານ ເຊິ່ງພວກເຂົາໄດ້ສ້າງສັນຄໍ່າຄືນແຫ່ງເທດສະການທ້າຍປີຜ່ານງານ Christmas Get Together and Winter Sonata Concert ທີ່ເຕັມປ່ຽມໄປດ້ວຍບັນຍາກາດແຫ່ງຄວາມສຸກ ແລະ ຄວາມສ້າງສັນ.

ໃນຄໍ່າຄືນທີ່ພິເສດນີ້ ທີມງານ Muan Specialty ແລະ ແຂກທຸກຄົນໄດ້ສຳຜັດກັບຊ່ວງເວລາແຫ່ງການພັກຜ່ອນທີ່ອົບອຸ່ນ ບໍ່ວ່າຈະເປັນອາຫານ ແລະ ເຄື່ອງດື່ມທີ່ຄັດສັນມາຢ່າງພິຖີພິຖັນ ຊ່ວຍເສີມບັນຍາກາດໃຫ້ໜ້າຈົດຈຳ. ການສົນທະນາກັນໃນລະຫວ່າງທີ່ມີການບັນເລງບົດເພງທີ່ແສນພິເສດຈາກ Christmas Choir ເຮັດໃຫ້ທຸກຄົນສຳຜັດໄດ້ເຖິງບັນຍາກາດຂອງຄຣິສມາດ ແລະ ປີໃໝ່ທີ່ກຳລັງຈະມາຮອດ.

ນອກຈາກນັ້ນ ໃນງານຍັງມີການສະແດງຄອນເສີດອໍເຄສຕຣາ Winter Sonata Concert ຈາກ The Pianist Vientiane Orchestra ທີ່ສ້າງສັນດົນດີທີ່ເຊື່ອມໂຍງຄວາມຄລາດສິກ, ຮ່ວມສະໄໝ ແລະ ວັດທະນະທຳລາວເຂົ້າກັນຢ່າງລົງຕົວ. ສຽງດົນຕີທີ່ມ່ວນໆບໍ່ພຽງແຕ່ສ້າງຄວາມເພີດເພີນ ແຕ່ຍັງເປັນແຮງບັນດານໃຈທີ່ກະຕຸ້ນໃຫ້ເຮົາຮັບຮູ້ເຖິງຄວາມງົດງາມຂອງສິລະປະ, ຊີວິດ, ການເຕີມແຮງບັນດານໃຈ ແລະ ການພັກຜ່ອນຫຼັງຈາກທີ່ເຮັດວຽກມາຢ່າງຍາວນານຕະຫຼອດປີ.

ແລ້ວເປັນຫຍັງພວກເຮົາຈຶ່ງເອົາເລື່ອງນີ້ມາເລົ່າສູ່ທຸກຄົນຟັງ? ຈາກການໄປຮ່ວມງານນີ້ ພວກເຮົາຄິດວ່າ ນີ້ບໍ່ແມ່ນພຽງແຕ່ການໄດ້ໄປພັກຜ່ອນ ແລະ ພົບປະກັບຜູ້ຄົນເທົ່ານັ້ນ ແຕ່ຍັງໄດ້ຂໍຄິດດີໆກ່ຽວກັບຄວາມສຳຄັນຂອງການພັກຜ່ອນ ທີ່ມີຜົນຕໍ່ກັບການເຮັດວຽກເຊັ່ນ:

1. ສຳລັບຜູ້ທີ່ເຮັດວຽກໃນສາຍຄຣີເອທີບ ແລະ ການຕະຫຼາດ, ການໄດ້ສຳຜັດກັບງານທີ່ສ້າງບັນຍາກາດແບບນີ້ ສາມາດເປັນແຫຼ່ງສ້າງແຮງບັນດານໃຈທີ່ດີເລີຍ ບໍ່ວ່າຈະເປັນການອອກແບບປະສົບການໃຫ້ກັບລູກຄ້າ ຫຼື ການຄິດແຄມເປນທີ່ເນັ້ນຄວາມຮູ້ສຶກເຊື່ອມໂຍງກັບຜູ້ຄົນ; ການປະສົມປະສານວັດທະນະທຳ ແລະ ສິລະປະເຂົ້າກັບການເລົ່າເລື່ອງໃນງານສະແດງດົນຕີຄັ້ງນີ້ ສະແດງໃຫ້ເຫັນວ່າ ຄວາມຄິດສ້າງສັນສາມາດເຂົ້າເຖິງຈິດໃຈຂອງຄົນໄດ້ຢ່າງເລິກເຊິ່ງ.
2. ການພັກຜ່ອນ ແລະ ດື່ມດໍ່າກັບສຽງເພງ ມີປະໂຫຍດຢ່າງສູງຕໍ່ກັບຊີວິດຂອງໄວເຮັດວຽກ. ຈາກການວິໄຈພົບວ່າ ການຟັງດົນຕີຊ່ວຍຫຼຸດລະດັບຄວາມເຄັ່ງຕຶງ ແລະ ກະຕຸ້ນການຜະລິດຮໍໂມນແຫ່ງຄວາມສຸກ ເຊັ່ນ: ໂດປາມີນ ເຊິ່ງສົ່ງຜົນດີຕໍ່ສຸຂະພາບຈິດ ແລະ ຮ່າງກາຍ. ນອກຈາກນີ້ ການຢຸດພັກເພື່ອສຳຜັດປະສົບການທາງດົນຕີ ຊ່ວຍເພີ່ມຄວາມຄິດສ້າງສັນ ແລະ ການຈົດຈໍ່ໃນການເຮັດວຽກໃນໄລຍະຍາວ,
3. ການລວມຕົວກັນໃນກິດຈະກຳແບບນີ້ ຍັງສົ່ງເສີມຄວາມສຳພັນທີ່ດີໃນທີມ ແລະ ການສື່ສານທີ່ມີປະສິດທິພາບໃນບ່ອນເຮັດວຽກອີກດ້ວຍ.

ສະຫຼຸບກໍຄື ໃນມຸມຂອງພວກເຮົາ, ງານນີ້ບໍ່ພຽງແຕ່ເປັນການສະເຫຼີມສະຫຼອງ ແຕ່ຍັງເປັນໂອກາດທີ່ເປີດພື້ນທີ່ໃຫ້ກັບການຢຸດພັກຜ່ອນ ແລະ ເຊື່ອມໂຍງຄວາມສຳພັນລະຫວ່າງກັນ ລວມທັງກະຕຸ້ນໃຫ້ເຮົາເລີ່ມຕົ້ນປີໃໝ່ທີ່ກຳລັງຈະມາຮອດນີ້ດ້ວຍຄວາມຮູ້ສຶກສົດຊື່ນ ແລະ ມີພະລັງສ້າງສັນຢ່າງເຕັມທີ່. ຖ້າຫາກໃຜກໍຕາມທີ່ກຳລັງຊອກຫາແຮງບັນດານໃຈສຳລັບການພັກຜ່ອນໃນຊ່ວງທ້າຍປີ, Crowne Plaza ແລະ Holiday Inn & Suites Vientiane ອາດຈະເປັນຄຳຕອບທີ່ຊ່ວຍເຕີມເຕັມທັງຈິດໃຈ ແລະ ພະລັງງານຂອງເຮົາກໍໄດ້.

ແລ້ວທຸກຄົນເດ, ຄິດວ່າການພັກຜ່ອນສະເຫຼີມສະຫຼອງ ແລະ ການສຳຜັດປະສົບການທາງດົນຕີ ມີຜົນດີກັບໂຕເອງແນວໃດແດ່? ຢ່າລືມຄອມເມັ້ນລົມກັນໄດ້ເດີ.

ໂດຍ: ທີມບັນນາທິການ Muan