ມາແຮງກັນສຸດໆໃນຕອນນີ້ກັບແຣັບເປີສາວໜ້າໃໝ່ເຈົ້າຂອງເພງ “ສາວປັອບສະຕາ” ທີ່ມາໃນແນວສະໜຸກສະໜານມ່ວນຊື່ນ ແລະ ເພງ “ບໍ່ເປັນຫຍັງ” ທີ່ມາໃນແນວຊື້ງໆເສົ້າໆແຕ່ຕ້ອງຂໍບອກວ່າທັງສອງເພງແມ່ນມ່ວນ ແລະ ຟັງງ່າຍ, ທຸກຄົນຕ້ອງໄດ້ລອງຟັງກັນ.
ພອນສະຫວັນ ໂຊກປີຊາ ຫຼື ແນ່ມ, ສິລະປິນສາວແດນຈຳປາສັກຈາກພາກໃຕ້ຂອງລາວ ທີ່ທັງຮ້ອງ-ແຣັບ ແລະ ແຕ່ງເພງເອງ, ປັດຈຸບັນອາຍຸ 26 ປີ. ຫຼ້າສຸດເພງທີ່ໄດ້ປ່ອຍອອກມາໃຫ້ພວກເຮົາໄດ້ຟັງໃນຊ່ອງຍູທູປຂອງລາວຢ່າງເພງສາວປັອບສະຕາ ກໍເປັນເພງທີ່ເຮັດໃຫ້ເປັນກະແສຫຼາຍທັງໃນໂຊຊ້ຽວມີເດຍໃນຕິກຕອກ ແລະ ເຟສບຸກ ຕ່າງກໍແຫ່ກັນແຊຣ໌ເພງຂອງລາວພ້ອມດ້ວຍບອກຕໍ່ກັນວ່າຕ້ອງໄດ້ຮີບມາຟັງກ່ອນຈະລົມກັບໝູ່ບໍ່ຮູ້ເລື່ອງ.
ຈາກທີ່ມ່ວນໄດ້ລົມກັບແນ່ມ, ລາວນັ້ນກໍເປັນຄົນສະບາຍໆງ່າຍໆ ແລະ ບໍ່ມັກຄວາມວຸ່ຍວາຍ, ເວລາວ່າງກໍມັກອ່ານປຶ້ມ, ຟັງເພງ ແລະ ຂຽນເພງ. ດ້ວຍຄວາມເປັນຄົນງ່າຍໆອາຫານທີ່ລາວມັກກິນກໍກິນໄດ້ໝົດເລີຍ, ບໍ່ມີເມນູໃດມັກເປັນພິເສດແຕ່ຈະບໍ່ມັກກິນເຜັດ ແລະ ເຄັມ.
ແນ່ມມີໄອດໍທີ່ມັກກໍຄື Centralcee ແລະ Vanda. ສີ່ງທີ່ເປັນເປົ້າໝາຍໃນປັດຈຸບັນນີ້ກໍຄືການເຮັດເພງ, ເຊິ່ງຈຸດເລີ່ມຕົ້ນກ່ຽວກັບຄວາມມັກໃນການຮ້ອງເພງ-ແຣັບແມ່ນຍ້ອນໃຈມັກເຖິງວ່າຈະເປັນຄົນຮ້ອງເພງບໍ່ມ່ວນຫຼາຍ ແລະ ລາວກໍໄດ້ຄິດໄວ້ຫຼາຍປີແລ້ວເລື່ອງການເຮັດເພງເປັນຂອງຕົວເອງ ແຕ່ບໍ່ມີໂອກາດໄດ້ລົງມືເຮັດຈັກເທື່ອ, ໃນປີ 2025 ນີ້ ກໍຕ້ອງຮີບເລີ່ມລົງມືແລ້ວ ແລະ ຍ້ອນຮູ້ຈັກກັບ Jo Laotai producer ຈາກ 22 studio, ຫຼັງຈາກນັ້ນ ກໍໄດ້ອອກມາເປັນເພງທີ່ໄດ້ປ່ອຍໄປໃຫ້ທຸກຄົນໄດ້ຟັງ.
ຜົນງານທີ່ລາວໄດ້ປ່ອຍອອກມາທັງໝົດຕອນນີ້ກໍມີ 2 ເພງຄື: ເພງ ຕ້ອງບໍ່ເປັນຫຍັງ ແລະ ເພງ ສາວປັອບສະຕາ. ເພງທີ່ເຮັດໃຫ້ທຸກຄົນຮູ້ຈັກແນ່ມຫຼາຍຂຶ້ນກໍເປັນເພງທີ 2 ເພງ ສາວປັອບສະຕາ, ເຊິ່ງແຮງບັນດານໃຈໃນການແຕ່ງເພງແມ່ນຢາກປະຍຸກເພງບ້ານເຮົາໃຫ້ເຂົ້າກັບສະໄໝນີ້.
“ບໍ່ຄ່ອຍຈະເຫັນເພງທີ່ມີສຳນຽງຂອງລາວທ້ອງຖິ່ນປະສົມກັບດົນຕີສະໄໝໃໝ່ຫຼາຍພໍປານໃດ, ເລີຍຢາກໃຊ້ສຳນຽງຄຳເວົ້າທ້ອງຖິ່ນທີ່ເປັນເອກະລັກ ແລະ ສ້າງສີສັນແປກໃໝ່ໃຫ້ບ້ານເຮົາຫຼາຍຂຶ້ນ” ແນ່ມໄດ້ກ່າວໄວ້.
ບັນຍາກາດການຖ່າຍເອັມວີເພງ ສາວປັອບສະຕາ ທີ່ໄດ້ປ່ອຍອອກມາຫຼ້າສຸດທີ່ມີສອງເວີຊັ່ນ “ສາວ Pop Star ແລະ ແຣັບຕອນໃດ?” ນັ້ນແມ່ນແຕກຕ່າງກັນຫຼາຍ ເພາະສາວປັອບສະຕາເວີຊັ່ນທຳອິດຄື: ຖ່າຍຢູ່ແຂວງຈຳປາສັກ, ບ້ານຂອງແນ່ມເອງ, ແຕ່ເວີຊັ່ນ ແຣັບຕອນໃດ? ແມ່ນເດີນທາງມາໄກ ເດີນທາງຂຶ້ນມານະຄອນຫຼວງວຽງຈັນ, ເຊິ່ງວ່າມີຫຍຸ້ງຍາກຫຼາຍຢ່າງ ແຕ່ເຖິງວ່າຈະມີອຸປະສັກສ່ຳໃດກໍດີໃຈທີ່ເພງອອກມາດີເກິນຄາດໄວ້.
ໃນສ່ວນເອກະລັກແນວເພງຂອງແນ່ມທີ່ແຕກຕ່າງແມ່ນລວມທຸກຢ່າງເລີຍ ເພາະຫຼັກໆກໍຄືເນື້ອເພງຂອງລາວຈະມີຄວາມແປກຫູຜູ້ຟັງຄົນໃນບ້ານເຮົາໃນອະນາຄົດແນ່ນອນ ແລະ ແນ່ມຍັງມີຄວາມຄິດວ່າຢາກຈະຊ່ວຍສະໜັບສະໜຸນເປັນແບບຢ່າງໃຫ້ນ້ອງໆລຸ້ນໃໝ່, ເພາະນ້ອງໆຫຼາຍຄົນແມ່ນພວກເຂົາເກັ່ງຫຼາຍ ແຕ່ພວກເຂົາຍັງຂາດຄວາມໝັ້ນໃຈ ແລະ ການຍອມຮັບຈາກສັງຄົມ.
ແນ່ມເລີຍຄິດວ່າຢາກເປັນພຽງສ່ວນໜຶ່ງທີ່ຊ່ວຍຊຸກດັນໃຫ້ນ້ອງໆກ້າອອກມາສະແດງຈຸດຢືນຄວາມມັກຮັກໃນເລື່ອງສິລະປະທາງດົນຕີຫຼາຍຂຶ້ນ.
ຖ້າໃນອະນາຄົດສິລະປິນລາວທີ່ແນ່ມຢາກຮ່ວມຜົນງານນຳຫຼາຍທີ່ສຸດກໍຄື Sts73 ແລະ Zamio P ຖ້າມີໂອກາດ ຫຼື ມີຄວາມເປັນໄປໄດ້ນັ້ນແນ່ມບອກວ່າກໍຈະດີໃຈຫຼາຍ.
ສຸດທ້າຍນີ້ຝາກຜົນງານຂອງແນ່ມທີ່ຈະປ່ອຍໃນໄວໆນີ້ແດ່ເດີ ລາວກຳລັງຈະມີ single ທີ່ຈະປ່ອຍຕ້ອນຮັບເດືອນແຫ່ງຄວາມຮັກ ກຸມພາ 2025 ນີ້ ແລະ ເພງອື່ນໆອີກທີ່ກຳລັງຕາມມາ. ຝາກຜົນງານປັດຈຸບັນ ແລະ ຜົນງານໃນອະນາຄົດຊ່ວຍທີ່ຕິດຕາມຮັບຟັງ ແລະ ເປັນກໍາລັງໃຈໃຫ້ແນ່ມກັນແດ່ເດີພີ່ນ້ອງ.
ໂດຍ: ທີມບັນນາທິການ Muan
