Alita ສະມາຊິກຄົນລາວໃນວົງ AIKA ອີກໜຶ່ງຄວາມພູມໃຈໄດ້ເດບິວເປັນສິລະປິນຢູ່ປະເທດໄທ
Alita ຫຼື Alita Alounsavath ເປັນຄົນທີ່ມີຄວາມໂດດເດັ່ນໃນການຮ້ອງເພງມາຕັ້ງແຕ່ນ້ອຍ, ຜ່ານປະສົບການປະກວດຢູ່ເວທີໃຫຍ່ໃນບ້ານເຮົາ ແລະ ເຄີຍມີຜົນງານເພງ ຕົ້ນໄມ້ທີ່ບໍ່ໄດ້ຫົດ (2022) ກັບ ໂລກອ້ອມຕົວ (2024) ທີ່ຮ່ວມຮ້ອງກັບ HORLOCK ສິລະປິນລາວຄຸນນະພາບອີກຄົນຂອງບ້ານເຮົາມາແລ້ວ ເຊິ່ງໃຜທີ່ເຄີຍໄດ້ຟັງຕ້ອງຂໍບອກວ່າຕອນນັ້ນຕ້ອງມີແອບເສຍນ້ຳຕາກັບເພງຂອງພວກເຂົາມາບໍ່ຫຼາຍກໍໜ້ອຍແຫຼະ.
ສິ່ງທີ່ເຮັດໃຫ້ຮູ້ສຶກພູມໃຈເລີຍກໍຄື ຈາກມື້ນັ້ນທີ່ໄດ້ຟັງເພງ ຈົນຮອດມື້ນີ້ລາວສາມາດເຮັດຕາມຄວາມຝັນໄດ້ສຳເລັດ ແລະ ເປີດໂຕເປັນສິລະປິນແບບເຕັມໂຕຢູ່ປະເທດໄທ ຖືວ່າເປັນການເດີນຕາມຮອຍຮຸ່ນເອື້ອຍຄື ແຮນນ່າ 4EVE ເລີຍກໍວ່າໄດ້.
ປັດຈຸບັນ, Alita ໄດ້ເດບິວໃນເພງ ເກມນີ້ກຳລັງຈະເດີນ ຫຼື เกมส์นี้กำลังจะเดิน (Game On) ທີ່ມີສະມາຊິກອີກໜຶ່ງຄົນຄື Marisa ເຊິ່ງທັງສອງຄົນມາຈາກ Projext52.
Alita ແລະ Marisa ພວກເຂົາທັງສອງ ເດບິວໃນຊື່ AIKA ເຊິ່ງເພງເປີດໂຕຂອງພວກເຂົາກໍມາພ້ອມກັບແນວຄອນເຊັບສຸດໜ້າຮັກ ເພາະໄດ້ເລົ່າເຖິງຄວາມຮັກທີ່ບໍ່ຕ້ອງມານັ່ງຖ້າໃຫ້ຟ້າລິຂິດ ແຕ່ເລືອກທີ່ຈະວາງແຜນ ແລະ ລິຂິດຄວາມຮັກດ້ວຍໂຕເອງແບບນຽນໆ.
ພວກເຮົາທຸກຄົນມາໃຫ້ກຳລັງໃຈ Alita ແລະ ວົງ AIKA ນຳກັນເດີ ເຂົ້າໄປຟັງເພງຂອງລາວກັນຫຼາຍໆ ຮັບຮອງລະວັງຖືກກັບດັກຄວາມໜ້າຮັກຂອງທັງສອງສາວແນ່ນອນ.