ຖ້າບໍ່ໂສດກໍບໍ່ເຂົ້າໃຈດອກ! ຫຼາຍໆຄົນທີ່ບໍ່ມີຄູ່ຮັກກໍມັກຈະບອກແບບນີ້ກັບໝູ່ເພື່ອນ ເພາະເຮົາເອງກໍອົດທີ່ຈະອິດສາໝູ່ບໍ່ໄດ້, ນັດເຈິກັນກັບໝູ່ເພື່ອນເທື່ອໃດພວກເຂົາກໍມາກັນເປັນຄູ່ໆຕະຫຼອດ.
ມື້ນີ້ກັອດຈິເລີຍລວມ 7 ແອັບຫາຄູ່ຍອດນິຍົມທີ່ຄົນເວົ້າເຖິງຫຼາຍທີ່ສຸດໃນໂຊຊ້ຽວມີເດຍມາຝາກ ແລະ ກໍໄດ້ຄັດສັນມາໃຫ້ແລ້ວ, ອີງຕາມຂໍ້ມູນສະຖິຕິທີ່ຜູ້ຫຼິ້ນສາມາດສັງເກດໄດ້ຈາກການນຳໃຊ້ ແລະ ການສົນທະນາທົ່ວໂລກ.
ສຳລັບທັງ 7 ແອັບນີ້ແມ່ນດາວໂຫຼດໄດ້ທັງ App Store ແລະ Google Play, ການໃຊ້ງານແອັບເຫຼົ່ານີ້ແມ່ນຄວນໃຊ້ວິຈາລະນະຍານໃນການຫຼິ້ນ ແລະ ໃຫ້ໃຊ້ສະຕິໃນການຄັດກອງຜູ້ຄົນທີ່ຈະເຂົ້າມາທຳຄວາມຮູ້ຈັກ.
1. Tinder
ເປັນແອັບຫາຄູ່ທີ່ມີຊື່ສຽງທີ່ສຸດໃນໂລກ ແລະ ຖືກກ່າວເຖິງເລື້ອຍໆໃນໂຊຊ້ຽວມີເດຍ ເນື່ອງຈາກຕົວແອັບນັ້ນມີການໃຊ້ງານທີ່ງ່າຍດ້ວຍລະບົບການ “ປັດຊ້າຍ-ປັດຂວາ” ແລະ ຖານຜູ້ໃຊ້ກໍກວ້າງ, ເໝາະກັບສາຍໂສດທີ່ຕ້ອງການອອກເດດ ແລະ ຫາຄູ່ທີ່ຖືກໃຈ.
2. Coffee Meets Bagel
ເໝາະກັບຄົນທີ່ຕ້ອງການຫາຄູ່ແບບບໍ່ຕ້ອງຮີບຮ້ອນ ແລະ ເນັ້ນໄປທີ່ການສ້າງຄວາມສຳພັນທີ່ຍືນຍົງ. ຖ້າມັກການຫາຄູ່ແບບມີຄຸນນະພາບ ແລະ ບໍ່ມັກຄວາມສັບສົນ, CMB ຖືວ່າເປັນທາງເລືອກທີ່ດີ.
3. Bumble
ເປັນແອັບທີ່ໂດດເດັ່ນດ້ວຍຄຸນສົມບັດທີ່ໃຫ້ຜູ້ຍິງເປັນຜູ້ສົ່ງຂໍ້ຄວາມກ່ອນ, ເຮັດໃຫ້ແອັບຖືກກ່າວເຖິງຫຼາຍອີກແອັບໜຶ່ງເລີຍກໍວ່າໄດ້, ໂດຍສະເພາະໃນກຸ່ມທີ່ສົນໃຈເລື່ອງຄວາມສະເໝີພາບທາງເພດ ແລະ ການຫາຄູ່ແບບມີຄຸນນະພາບ.
4. OkCupid
ແອັບນີ້ມີຊື່ສຽງດ້ານການສ້າງໂປຣໄຟລ໌ທີ່ມີລະອຽດ ແລະ ຄຳຖາມທີ່ຊ່ວຍຈັບຄູ່ເພື່ອສ້າງຄວາມສົນໃຈ, OkCupid ຖືກກ່າວເຖິງຫຼາຍໃນໂຊຊຽລມີເດຍໂດຍກຸ່ມຄົນທີ່ມັກການຫາຄູ່ແບບອີງໃສ່ຄວາມເຂົ້າກັນໄດ້ທາງບຸກຄະລິກ.
5. Omi
Omi ເປັນທາງເລືອກທີ່ດີສຳລັບຄົນທີ່ຕ້ອງການຫາຄູ່ ຫຼື ເພື່ອນທີ່ມີຄວາມປອດໄພ ແລະ ສ້າງສັນຫຼາຍ, ໂດຍສະເພາະໃຜທີ່ມັກຟີເຈີຣ໌ທີ່ແຕກຕ່າງຈາກແອັບຫາຄູ່ທົ່ວໄປ.
6. HER
HER ເປັນທາງເລືອກທີ່ດີສຳລັບຜູ້ຍິງໃນກຸ່ມ LGBTQ+ ທີ່ຕ້ອງການຫາຄູ່ ຫຼື ເຊື່ອມຕໍ່ກັບຊຸມຊົນທີ່ມີຄວາມຄິດທີ່ຄ້າຍຄືກັນ ແລະ ມັນບໍ່ພຽງແຕ່ເປັນແອັບຫາຄູ່ແຕ່ຍັງເປັນພື້ນທີ່ທາງສັງຄົມທີ່ສະໜັບສະໜຸນການສະແດງຕົວຕົນ ແລະ ຄວາມສະເໝີພາບ.
7. Grindr
ເປັນແອັບຫາຄູ່ສຳລັບກຸ່ມ LGBTQ+ (ໂດຍສະເພາະຜູ້ຊາຍ) ທີ່ຖືກກ່າວເຖິງຫຼາຍໃນໂຊຊ້ຽວມີເດຍ ແລະ ການສົນທະນາກ່ຽວກັບການອອກເດດໃນຊຸມຊົນນີ້ແມ່ນເປັນທີ່ນິຍົມໃນການໃຊ້ງານດ້ວຍລະບົບຕຳແໜ່ງທີ່ຢູ່.
ໂດຍ: ທີມບັນນາທິການ Gadzila
