ປົກກະຕິເວລາເຮົາໂພສ Facebook ແລ້ວນຳລິງຄ໌ເວັບໄຊຕ່າງໆມາແປະໃສ່ໂພສ ເພື່ອໃຫ້ຄົນກົດໄປເບິ່ງຂໍ້ມູນຕ່າງໆທີ່ເຮົາຢາກເອົາມາແບ່ງປັນ ແຕ່ກ່ອນນັ້ນແມ່ນບໍ່ເປັນຫຍັງ ແຕ່ຕໍ່ໄປນີ້ Facebook ເພິ່ນຈະ “ຈຳກັດ” ບໍ່ໃຫ້ເຮັດແບບນັ້ນໄດ້ແລ້ວເດີທຸກຄົນ.
ນີ້ຖືວ່າເປັນສັນຍານເຕືອນຄັ້ງໃຫຍ່ເລີຍ ສຳລັບເຈົ້າຂອງເພຈ ຫຼື ສາຍແປະລິ້ງ (Affiliate) ໃນ Facebook ເພາະຕັ້ງແຕ່ໃນຊ່ວງທ້າຍປີ 2025-ປັດຈຸບັນ, ມີລາຍງານຢືນຢັນຈາກ Meta ວ່າ ພວກເຂົາກຳລັງທົດສອບການຈຳກັດການໂພສລິ້ງຈາກພາຍນອກແພລັດຟອມຢ່າງຈິງຈັງ ເພື່ອບີບໃຫ້ຜູ້ໃຊ້ງານຫັນໄປສະໝັກບໍລິການ Meta Verified (ເຄື່ອງໝາຍຕິກສີຟ້າຫຼັງຊື່) ຫຼາຍຂຶ້ນ.
ສາຍຟຣີຢ່າງ ກັອດຈິ ກໍຮູ້ສຶກເສົ້າເລີຍ ເພາະຢູ່ລາວເຮົາເອງກໍຖືວ່າ “ໜີບໍ່ພົ້ນ” ຄືກັນ. ຕໍ່ໄປຖ້າເຮົາບໍ່ຈ່າຍເງິນລາຍເດືອນໃຫ້ Facebook (Meta Verified) ເຮົາຈະຖືກຈຳກັດ ແລະ ຖືກປິດກັ້ນການເບິ່ງເຫັນ (Reach) ເລີຍ. ມື້ນີ້ ກັອດຈິ ກໍຈະມາສະຫຼຸບປະເດັນສຳຄັນທີ່ “ສາຍແປະລິ້ງ” ຕ້ອງຮູ້ ແລະ ກຽມຮັບມືກັນ.
ສຳລັບສາຍຟຣີຈະໂພສລິ້ງໄດ້ໜ້ອຍລົງ
ໃຜທີ່ເປັນສາຍຟຣີອາດຈະສາມາດແປະ 2 ຄັ້ງຕໍ່ເດືອນເທົ່ານັ້ນ ໂດຍທີ່ Facebook ເລີ່ມທົດສອບຈຳກັດຈຳນວນໂພສທີ່ມີລິ້ງໄປຍັງເວັບໄຊພາຍນອກເຊັ່ນ: ເວັບຂ່າວ, YouTube ຫຼື Blog ຖ້າໂພສເກີນນັ້ນຈະຖືກປິດກັ້ນການເບິ່ງເຫັນ ເຮັດໃຫ້ບໍ່ມີຄົນເຫັນໂພສເຮົາເລີຍ.
ຢາກໂພສໄດ້ຫຼາຍຕ້ອງ “ຈ່າຍເງິນ”
Facebook ຢາກໃຫ້ເຮົາສະໝັກບໍລິການ Meta Verified ຖ້າເຮົາຈ່າຍເງິນລາຍເດືອນ ຈຶ່ງຈະສາມາດໂພສລິງຄ໌ໄດ້ຫຼາຍ ແລະ ເປັນປົກກະຕິຄືເກົ່າ.
ຍ້ອນຫຍັງ Facebook ຈຶ່ງເຮັດແບບນີ້?
ເພາະ Facebook ບໍ່ຢາກໃຫ້ຜູ້ໃຊ້ກົດອອກໄປແພລັດຟອມອື່ນ ແລະ ຢາກໃຫ້ຫຼິ້ນຢູ່ໃນ Facebook ດົນໆ ຖ້າເຮົາຈະພາຄົນອອກໄປນອກແອັບ (ໂດຍການກົດລິ້ງອອກໄປ) Meta ກໍຈະເກັບຄ່າທຳນຽມນັ້ນເອງ.
ວິທີຮັບມືໃນການແປະລິງຄ໌ (ແບບງ່າຍໆ ບໍ່ຕ້ອງເສຍເງິນ)
- ຢ່າແປະລິ້ງໃນໂພສ: ໃຫ້ໂພສຮູບງາມໆ ຫຼື ຂຽນຂໍ້ຄວາມກ່ອນ ໂດຍຂຽນບອກໃນໂພສວ່າ “ສົນໃຈເບິ່ງລິ້ງຢູ່ຄອມເມັ້ນເດີ” ຈາກນັ້ນໃຫ້ຄົນໄປກົດເຂົ້າລິ້ງຢູ່ກ້ອງຄອມເມັ້ນແທນ ເພາະ Facebook ຍັງບໍ່ທັນໄດ້ຫ້າມໃນຈຸດນີ້ເທື່ອ.
- ເຮັດວິດີໂອສັ້ນ Reels: ກ່ອນວິດີໂອຈະຈົບໃຫ້ Hook ບອກຄົນເບິ່ງທຸກຄັ້ງວ່າສາມາດເບິ່ງຕໍ່ໄດ້ທີ່ລິ້ງກ້ອງຄອມເມັ້ນ ເພາະ Reels ໃນ Facebook ມັກຈະດັນວິດີໂອໃຫ້ຄົນເຫັນຫຼາຍກວ່າໂພສທີ່ມີແຕ່ລິ້ງ.
