ເປັນທີ່ປຶກສາຢູ່ດີໆກໍໄດ້ເປັນໝາ 4 ຄຳແນະນຳສຳລັບໄລຟ໌ໂຄ້ຊຈຳເປັນທີ່ຢາກຢຸດໜ້າທີ່
ເລື່ອງຮັກໆໄວ້ໃຈຄົນໂສດ ເປັນຫຍັງຄົນໂສດຢືນໜຶ່ງເປັນທີ່ປຶກສາບັນຫາຫົວໃຈໄດ້ດີທັງທີ່ບໍ່ເຄີຍມີແຟນ
ໝູ່ມີບັນຫາຄວາມຮັກເທື່ອໃດແຊັດຫາເຮົາກ່ອນໂລດ, ແຕ່ປະສົບການເຮົາພັດເປັນສູນ, ບໍ່ເຄີຍມີແຟນ ຫຼື ຄົນລົມມາກ່ອນ ແລະ ຈະມັກຖືກເວົ້າໃຫ້ວ່າເຮົານິບໍ່ມີທາງເຂົ້າໃຈຄວາມຮັກຂອງຄົນອື່ນໄດ້ດອກ… (ແລ້ວມາຖາມເພື່ອ?)
ຄົນໂສດບໍ່ເຄີຍມີແຟນຈະໃຫ້ຄຳປຶກສາເລື່ອງຄວາມຮັກກັບຄົນມີແຟນໄດ້ແນວໃດ? ມັນບໍ່ສົມເຫດສົມຜົນແຕ່ໃນຄວາມເປັນຈິງ “ສະຖານະໂສດ” ບໍ່ໄດ້ເປັນຕົວວັດປະສົບການ ແລະ ມຸມມອງຕໍ່ຄວາມຮັກສະເໝີໄປບໍ່ໄດ້ໝາຍຄວາມວ່າຮັກບໍ່ເປັນຄວາມຮັກບໍ່ໄດ້ຈຳກັດແຕ່ “ແຟນ ຫຼື ຄູ່ຊິວິດ” ເທົ່ານັ້ນ ອາດຜູກພັນຈາກຄົນໃນຄອບຄົວ ແລະ ໝູ່ເພື່ອນ ຫຼື ຄົນໃກ້ຕົວ.
ຫາກສັງເກດຄົນໂສດຢູ່ອ້ອມຕົວເຮົາຈະເຫັນໄດ້ວ່າເປັນຄົນໜ້າຮັກ, ພໍໃຈໃນຊິວິດ, ເບິ່ງໂລກດ້ວຍຄວາມເຂົ້າໃຈ ແລະ ເມື່ອຢູ່ໃກ້ໆແລ້ວຈະໄດ້ຮັບພະລັງບວກທີ່ສຳຄັນຍັງເປັນຜູ້ຟັງທີ່ດີ ແລະ ໃຫ້ຄຳແນະນຳໃນທຸກເລື່ອງດ້ວຍເຫດນີ້ຄົນໂສດຈຶ່ງໄດ້ຮັບຕຳແໜ່ງ “ທີ່ປຶກສາ” ຂອງໝູ່ໆໄປເລີຍ.
ເມື່ອຕ້ອງໃຫ້ຄຳແນະນຳເລື່ອງໃດໜຶ່ງຄົນໂສດຈະວາງຕົວເປັນຄົນນອກເບິ່ງເຂົ້າໄປໃນບັນຫາແລ້ວທຳຄວາມເຂົ້າໃຈ, ໂດຍບໍ່ໃສ່ອາລົມ ແລະ ຄວາມຮູ້ສຶກມາເປັນທີ່ຕັ້ງ, ແຕ່ໃຊ້ເຫດ ແລະ ຜົນໃຫ້ຊ່ວຍຫາທາງອອກທີ່ເໝາະສົມກັບເລື່ອງນັ້ນ
ແຕ່ຄົນໂສດທີ່ວ່າພັດກາຍເປັນໝາ… ເມື່ອໝູ່ທີ່ເຮົາໃຫ້ຄໍາປຶກສາພາຕົວເອງກັບໄປຫາແຟນເກົ່າ 
ຫາກເຮົາຕ້ອງການທີ່ຈະຫຼຸດອອກຈາກການກິນອາຫານເມັດແບບນີ້ມ່ວນມີ 4 ຄໍາແນະນໍາສໍາລັບໝູ່ເພື່ອນທີ່ເບື່ອກັບການເປັນນ້ອງໝາໂຮ່ງໆ
1. ພະຍາຍາມບອກໃຫ້ໝູ່ໄປປັບຄວາມເຂົ້າໃຈກັບແຟນເອງ, ຍ້ອນຄວາມສໍາພັນສ່ວນໃຫຍ່ເກີດຈາກຄົນສອງຄົນ ແລະ ຜູ້ທີ່ສາມາດແກ້ໄຂບັນຫາຄວາມສໍາພັນໃຫ້ໄດ້ຕ້ອງແມ່ນພວກເຂົາເອງ.
2. ພາໝູ່ເວົ້າເລື່ອງອື່ນທີ່ຈະຊ່ວຍໃຫ້ພວກເຂົາຄິດຫາຕົວເອງ, ງ່າຍໆຄືຫາກໝູ່ເຮົາມີບັນຫາໃນຄວາມສໍາພັນຫຼາຍເຮົາຕ້ອງພາໝູ່ເລີ່ມຮັກຕົວເອງ ແລະ ເຮັດເພື່ອຕົວເອງຫຼາຍຂຶ້ນ ແລ້ວເຂົາຈະຮູ້ວິທີຈັດການກັບບັນຫາເອງ.
3. ພະຍາຍາມເຮັດໃຫ້ຕົວເອງບໍ່ວ່າງເຂົ້າໄວ້, ຫາກໝູ່ບໍ່ຍອມເຊົາມາຂໍຄໍາປຶກສາກັບເຮົາ ແລະ ເຮົາກໍເມື່ອຍທີ່ຕ້ອງຮັບຟັງບັນຫາເກົ່າໆຕະຫຼອດເຮົາຕ້ອງຊອກແນວເຮັດ ແລະ ບອກໝູ່ວ່າເຮົາຍັງບໍ່ສະດວກເທື່ອ.
4. ບອກໝູ່ແບບຕົງໆ, ຫາກບັນຫາຄວາມສໍາພັນຂອງໝູ່ມາເຮັດໃຫ້ເຮົາລໍາບາກ ເຮົາກໍຄວນບອກພວກເຂົາໄປເລີຍວ່າເຮົາບໍ່ສາມາດຊ່ວຍຫຍັງໄດ້ແລ້ວ. ບາງເທື່ອການທີ່ເຮົາຊ່ວຍຄົນອື່ນຫຼາຍເກີນໄປ ເຮົາກໍຈະຖືກດຶງພະລັງງານໄປຫຼາຍຈົນເມື່ອຍ.
ໃຜທີ່ມັກໄປຂໍຄໍາປຶກສາໝູ່ຢູ່ສະເໝີ ຢ່າລືມເດີວ່າໝູ່ກໍເມື່ອຍເປັນຄືກັນ, ພະຍາຍາມໃຫ້ພື້ນທີ່ໝູ່ໄດ້ໃຊ້ຊີວິດ ແລະ ເຮົາກໍລອງແກ້ໄຂບັນຫາໃນຄວາມສໍາພັນເອງລອງເບິ່ງເດີ
ໂດຍ: ທີມບັນນາທິການ Muan