|
Getting your Trinity Audio player ready...
|
“ຄົບກັນຊ່ວງທໍາອິດກໍຫວານກັນເປັນເລື່ອງທໍາມະດາ, ລອງຄົບກັນດົນໆເບິ່ງແມະ…”
ຄໍາເວົ້າລັກສະນະນີ້ເຮົາມັກຈະເຫັນໃຜຈັກຄົນຄອມເມັ້ນໃນໂພສຂອງດາລາ ຫຼື ຄົນດັງທີ່ກໍາລັງມີຄວາມສຸກກັບແຟນຢູ່ຕະຫຼອດ ແລະ ເຮົາກໍປະຕິເສດບໍ່ໄດ້ເລີຍວ່າບາງຄູ່ກໍໝົດໂປຣໂມຊັ່ນໄວອີ່ຫຼີ… ແຕ່ການໝົດໂປຣມັນກໍບໍ່ໄດ້ໝາຍຄວາມວ່າພວກເຂົາຈະເລີກກັນສະເໝີໄປ.
ຄູ່ຮັກຫຼາຍຄູ່ເລີກກັນໃນເວລາສັ້ນໆ, ບາງຄູ່ເລີກກັນຫຼັງຄົບໄດ້ໄລຍະໜຶ່ງ ແລະ ສ່ວນໜ້ອຍທີ່ຈະຮັກກັນດົນນານຈົນແກ່ເຖົ້າ. ຄູ່ທີ່ຢູ່ນໍາກັນດົນປານນັ້ນພວກເຂົາເຮັດໄດ້ແນວໃດ? ຄໍາຕອບແມ່ນພວກເຂົາມີຄວາມອົດທົນ, ເຂົ້າໃຈ ແລະ ຄວາມຜູກພັນກັນຈຶ່ງສາມາດຢູ່ນໍາກັນໄດ້ຫຼາຍກວ່າເຄິ່ງຊີວິດ.
ແຕ່ກ່ອນທີ່ເຮົາຈະກ້າວໄປສູ່ຂັ້ນຕອນ ຮັກກັນຈົນແກ່ເຖົ້ານັ້ນ, ແຕ່ລະຄູ່ຕ້ອງໃຊ້ ‘ພາສາຮັກ’ ຂອງຕົວເອງກັບຄົນຮັກຂອງເຮົາໃຫ້ພໍດີພໍພຽງ. ພາສາຮັກນັ້ນປະກອບມີ 5 ຮູບແບບຄື:
1. ການສື່ສານ
ການໃຊ້ຄໍາເວົ້າສື່ສານ, ຍ້ອງ ແລະ ບອກຮັກອີກຝ່າຍລວມເຖິງການສົ່ງຂໍ້ຄວາມ, ຂຽນຈົດໝາຍ, ຂຽນຄໍາເວົ້າຫວານໆໃສ່ເຈ້ຍ Note ໃຫ້ອີກຝ່າຍ. ພາສາຮັກນີ້ບໍ່ໄດ້ມີແຕ່ການບອກຮັກເທົ່ານັ້ນ, ແຕ່ຍັງລວມເຖິງ ການເວົ້າຂອບໃຈ, ການຍ້ອງ, ການໃຫ້ກໍາລັງໃຈ.
2. ການສໍາຜັດ
ສົ່ງຄວາມຮັກຜ່ານການສໍາຜັດຮ່າງກາຍເຊັ່ນຈັບມື, ກອດ, ເກາະແຂນ, ຫອມແກ້ມ, ຈູບ ແລະ ອີກຫຼາຍໆວິທີ. ເມື່ມະນຸດສໍາຜັດກັນ ຮ່າງການຈະຫຼັ່ງຮໍໂມນ Oxytocin ເຊິ່ງເປັນຮໍໂມນແຫ່ງຄວາມຮັກ, ຄວາມເຊື່ອໃຈ ແລະ ຜູກພັນ.
3. ການໃຫ້ເວລາ
ການໃຊ້ເວລານໍາກັນແບບ Quality Time (ໃຊ້ເວລາຮ່ວມກັນຢ່າງມີຄຸນນະພາບ) ເປັນພາສາຮັກທີ່ເກີດຂຶ້ນຈາກການເຮັດກິດຈະກໍາທີ່ໜ້າສົນໃຈຮ່ວມກັນເຊັ່ນ: ເບິ່ງໜັງ, ນັ່ງລົມກັນ, ຫຼິ້ນເກມນໍາກັນ, ເຮັດກິນນໍາກັນ ແລະ ອື່ນໆອີກຫຼາຍຢ່າງທີ່ທັງສອງມັກເຮັດນໍາກັນ.
4. ການເອົາໃຈ
ການເຮັດສິ່ງຕ່າງໆໃຫ້ອີກຝ່າຍກໍເປັນການສະແດງເຖິງຄວາມຮັກຂອງເຮົາດ້ວຍການບໍລິການອີກຝ່າຍໂດຍສະໝັກໃຈເຊັ່ນ: ຊ່ວຍວຽກເຮືອນ, ຂັບລົດໃຫ້, ເຮັດອາຫານໃຫ້, ມ້ຽນບ້ານໃຫ້ ລວມໄປເຖິງເລື່ອງເລັກນ້ອຍຄືເປີດປະຕູໃຫ້ກໍຍັງເປັນການສະແດງຄວາມຮັກຢ່າງໜຶ່ງ.
5. ການມອບຂອງຂວັນ
ພາສາຮັກຂອງສາຍເປກໍແມ່ນການມອບຂອງຂວັນໃຫ້ນີ້ແຫຼະ. ການໃຫ້ຂອງຂວັນອີກຝ່າຍໃນກາລະໂອກາດພິເສດ ຫຼື ພຽງຢາກໃຫ້ກໍໃຫ້ເປັນການສະແດງເຖິງຄວາມຮັກທີ່ມີມາຫຼາຍຍຸກຫຼາຍສະໄໝເຊິ່ງຂອງຂວັນບໍ່ຈໍາເປັນຕ້ອງແພງ ຫຼື ຫຼູຫຼາ ແຕ່ມັນອາດເຕັມໄປດ້ວຍຄວາມໝາຍ ຫຼື ບາງຢ່າງທີ່ເຮົາຕັ້ງໃຈເຮັດໃຫ້ກໍສາມາດເຕີມເຕັມໄດ້ແລ້ວ.
ເຄັດລັບການຮັກສາຄວາມຮັກໄວ້ໃຫ້ໄດ້ດົນໆແມ່ນການສ້າງໂປຣໂມຊັ່ນເພື່ອ ‘ເຕີມເຕັມ’ ຄວາມຮູ້ສຶກຂອງກັນແລະກັນຢູ່ສະເໝີ. ຫາກວ່າເຮົາເລີ່ມບໍ່ໃສ່ໃຈເທື່ອໃດ ເທື່ອນັ້ນແຫຼະທີ່ຄວາມຮັກຈະເລີ່ມຈືດຈາງຄືກັບຄໍາເວົ້າທີ່ວ່າ “ຫວານຕົ້ນຈືດປາຍ”
ໂດຍ: ທີມບັນນາທິການ Muan
