|
Getting your Trinity Audio player ready...
|
ການເປັນຕົວເອງນັ້ນກໍຖືວ່າເປັນສະເໜ່ທີ່ມີລັກສະນະທີ່ໂດດເດັ່ນບໍ່ຄືໃຜ ແລະ ການທີ່ເຈົ້າຕ້ອງການທີ່ຈະຢາກເພີ່ມສະເໜ່ນັ້ນບໍ່ໄດ້ໝາຍຄວາມວ່າພວກເຮົາຈະຕ້ອງປ່ຽນແປງຕົວຕົນຂອງເຮົາ, ແຕ່ມັນເປັນການເພີ່ມສະເໜ່ໃຫ້ດີຂຶ້ນກວ່າເກົ່າ ແລະ ເປັນການເພີ່ມຄຸນສົມບັດທີ່ດີໃຫ້ຕົວເອງ, ເຮັດໃຫ້ຄົນອ້ອມຂ້າງຮູ້ສຶກດີທີ່ໄດ້ຢູ່ໃກ້ເຈົ້າ.
ມື້ນີ້ມ່ວນກໍມີ 6 ສິ່ງດີໆທີ່ຢາກຈະແຊຣ໌ເພື່ອໃຜຕ້ອງການເພີ່ມສະເໜ່ໃຫ້ໜ້າສົນໃຈຂຶ້ນໃນທຸກໆສະຖານະການ, ບໍ່ວ່າຈະເປັນໃນງານສັງສັນ ຫຼື ການພົບເຈິກັບຄົນໃນສັງຄົມໃໝ່ໆ, ການສ້າງຄວາມສຳພັນທີ່ດີກັບຄົນອ້ອມຂ້າງທີ່ໃຜເຫັນກໍຢາກຈະເຂົ້າຫາ.
1. ການຟັງ
ການຟັງຢ່າງຕັ້ງໃຈຈະເຮັດໃຫ້ຄົນທີ່ກຳລັງເວົ້າຢູ່ກັບເຮົາຮູ້ສຶກໄດ້ຖືກໄດ້ຮັບຄວາມສົນໃຈ ແລະ ມີຄຸນຄ່າ, ການທີ່ເຈົ້າຮັບຟັງໂດຍບໍ່ຂັດ ແລະ ເຂົ້າໃຈສິ່ງທີ່ອີກຄົນກຳລັງຕ້ອງການຈະສື່ສານເປັນສິ່ງສຳຄັນ ຖ້າເຈົ້າເປັນຜູ້ຟັງທີ່ດີກໍຈະໄດ້ຮັບຄວາມເຊື່ອໃຈ ແລະ ສ້າງຄວາມຜູກພັນທາງໃຈໄດ້ໄວກວ່າ.
2. ຮອຍຍິ້ມ
ຮອຍຍິ້ມແມ່ນສັນຍາລັກຂອງມິດຕະພາບ ແລະ ການເປີດໃຈ, ມັນຊ່ວຍໃຫ້ບັນຍາກາດຜ່ອນຄາຍ ແລະ ເຮັດໃຫ້ຄົນອື່ນຮູ້ສຶກດີຂຶ້ນ. ການຍິ້ມຢ່າງຈິງໃຈພຽງໜຶ່ງເທື່ອສາມາດເຮັດໃຫ້ອາລົມຄົນທີ່ກຳລັງສົນທະນາສ້າງຄວາມຮູ້ສືກໄປໃນທາງບວກໄດ້.
3. ຄວາມໝັ່ນໃຈ
ຄວາມໝັ້ນໃຈເປັນສິ່ງທີ່ດຶງດູດໃຈ, ເພາະມັນສະແດງໃຫ້ເຫັນເຖິງຄວາມໝັ້ນໃຈໃນຕົວເອງເຮັດໃຫ້ຄົນທີ່ຢູ່ອ້ອມຂ້າງຕົວເຈົ້າຮູ້ສຶກໄວ້ວາງໃຈ ແລະ ຮູ້ສຶກວ່າສາມາດພຶງພາເຈົ້າໄດ້. ຄວາມໝັ້ນໃຈທີ່ດີຕ້ອງມາພ້ອມກັບຄວາມຖ່ອມຕົວເພື່ອບໍ່ໃຫ້ເບິ່ງຄືການໂອ້ອວດເກີນໄປ.
4. ການເອົາໃຈໃສ່
ການໃສ່ໃຈກັບລາຍລະອຽດເລັກໆນ້ອຍໆເຊັ່ນ: ການຈື່ຈໍາສິ່ງທີ່ຄົນອື່ນເວົ້າ ຫຼື ສະແດງໃຫ້ເຫັນວ່າເຈົ້າຈື່ສິ່ງທີ່ສໍາຄັນສໍາລັບເຂົາ ເປັນການສະແດງໃຫ້ເຫັນວ່າເຈົ້າໃສ່ໃຈ ແລະ ໃຫ້ຄຸນຄ່າໃນຕົວເຂົາ ເຊິ່ງສິ່ງນີ້ຈະເຮັດໃຫ້ເຈົ້າມີຄວາມໜ້າເຊື່ອຖື, ໜ້າສົນໃຈ ແລະ ມີສະເໜ່.
5. ການເບິ່ງໂລກໃນເຊິ່ງບວກ
ຄົນທີ່ມີທັດສະນະຄະຕິທີດີຈະດຶງດູດຄົນເຂົ້າຫາ, ເພາະວ່າພວກເຂົາມັກຈະແຜ່ພະລັງງານບວກອອກມາ ເພາະການມີທັດສະນະຄະຕິທີ່ດີເຊັ່ນນີ້ຈະເຮັດໃຫ້ເຈົ້າເປັນຄົນທີ່ຄົນອື່ນໆຕ້ອງການຈະຢູ່ໃກ້ເພື່ອໃຫ້ໄດ້ຮັບແຮງບັນດານໃຈ ແລະ ຄວາມສຸກ.
6. ຄວາມຈິງໃຈ
ການສະແດງຕົວຕົນທີ່ແທ້ຈິງຂອງເຈົ້າໂດຍບໍ່ຕ້ອງພະຍາຍາມເປັນຄົນອື່ນ, ສ້າງຄວາມໝັ້ນໃຈ ແລະ ຄວາມໄວ້ວາງໃຈທີ່ຈິງໃຈເຮັດໃຫ້ຄົນທີ່ຢູ່ອ້ອມຕົວເຈົ້າຮູ້ສຶກສະບາຍໃຈ ແລະ ເປັນທີ່ເພິ່ງພໍໃຈ. ສະເໜ່ໃນສ່ວນນີ້ມັກຈະມາຈາກຄວາມຊື່ສັດຕໍ່ຕົວເອງທີ່ບໍ່ໄດ້ສ້າງມັນຂຶ້ນມາເພື່ອຫຼອກລວງຄົນອື່ນ.
ໂດຍ: ທີມບັນນາທິການ Muan
