ແຟນເກົ່າໄປຄົບກັບໝູ່ເຮົາ ຕ້ອງເຮັດແນວໃດ? ຮູ້ຮັບມືຄວາມອຶດອັດໃຈກັບສະຖານະການທີ່ຊັບຊ້ອນ
ເມື່ອໝູ່ບອກວ່າຈະນຳແຟນໃໝ່ມາໃຫ້ຮູ້ຈັກ ມັນກໍເປັນເລື່ອງທີ່ໃຜໆກໍຕ້ອງຮູ້ສຶກຍິນດີແນ່ນອນແມ່ນບໍ? ແຕ່ພໍໄດ້ເຫັນໜ້າແຟນໝູ່ເທົ່ານັ້ນແຫຼະ ຈາກຄວາມຍິນດີກໍກາຍເປັນຄວາມຮູ້ສຶກອຶດອັດໃຈເຂົ້າມາແທນ ເພາະແຟນໃໝ່ໝູ່ໜ້າຄຸ້ນໆຄືແຟນເກົ່າເຮົາເລີຍ (ກໍແຟນເກົ່າແທ້ໆນັ້ນແຫຼະ). ເລື່ອງແບບນີ້ມັນກໍຈະອອກໄປຄືໃນລະຄອນທີ່ເຮົາເບິ່ງແດ່ເນາະທຸກຄົນ ແຕ່ບໍ່ແມ່ນວ່າໃນຊີວິດຈິງຈະບໍ່ມີເຫດການແບບນີ້ເລີຍເດີ ແລະ ເຮົາກໍມັກຈະໄດ້ຍິນເລື່ອງແບບນີ້ເກີດຂຶ້ນກັບຄົນຢູ່ອ້ອມຂ້າງເຮົາສະເໝີ.
ເລື່ອງລາວທຸກຢ່າງທີ່ເກີດຂຶ້ນລ້ວນແລ້ວແຕ່ມີທີ່ມາທີ່ໄປ ຖ້າຫາກທຸກຄົນເຄີຍພົບເຫດການແບບນີ້ດ້ວຍຕົນເອງ ຫຼື ໄດ້ຍິນເລື່ອງຄວາມສຳພັນລະຫວ່າງ ເຮົາ-ໝູ່-ແຟນເກົ່າ ແມ່ນຕ້ອງພະຍາຍາມຫຼີກລ້ຽງໄວ້ເລີຍ ເພາະຖ້າເຮົາໄດ້ຕົກຢູ່ໃນສະຖານະການນັ້ນແລ້ວມັນຈະວຸ່ນວາຍກັນແບບສຸດໆ.
ແຕ່ຖ້າຫຼີກລ້ຽງບໍ່ໄດ້ ກໍຕ້ອງໄດ້ປະເຊີນໜ້າກັບເຫດການທີ່ເກີດຂຶ້ນ ເຖິງວ່າເລື່ອງລາວຂອງເຮົາ ແລະ ແຟນເກົ່າຈະຈົບກັນໄປດົນແລ້ວກໍຕາມ, ລອງທຳຄວາມເຂົ້າໃຈກ່ອນວ່າເລື່ອງຄວາມຮັກມັນຫ້າມກັນບໍ່ໄດ້ຢູ່ແລ້ວ ມັນເປັນເລື່ອງທີ່ອະທິບາຍໄດ້ຍາກຫຼາຍ ແຕ່ເລື່ອງຄວາມສຳພັນແບບນີ້ກໍເປັນເລື່ອງທີ່ອ່ອນໄຫວຫຼາຍໃນສັງຄົມ, ອາດຈະເກີດມີສຽງຊຸບຊິບນິນທາຂຶ້ນມາ ແລະ ສົ່ງຜົນກະທົບໃນດ້ານທີ່ບໍ່ດີຈົນເຮັດໃຫ້ເຮົາກັບໝູ່ຜິດໃຈກັນໄດ້.
ໃຜທີ່ກຳລັງກັງວົນເລື່ອງນີ້ ເພາະບໍ່ຢາກມີບັນຫາກັບໝູ່ ແລະ ຍັງຕ້ອງການຮັກສາຄວາມສຳພັນທີ່ດີໄວ້, ພວກເຮົາມາຫາທາງອອກກັນດີກວ່າຈະມີວິທີໃດແດ່ໃນການຈັດການກັບຄວາມຮູ້ສຶກທີ່ຊັບຊ້ອນ ໃນສະຖານະການທີ່ອ່ອນໄຫວ ເພື່ອຮຽນຮູ້ການຮັບມືກັບຄວາມຮູ້ສຶກ ແລະ ການຮັກສາມິດຕະພາບຄວາມສຳພັນບໍ່ໃຫ້ເຮົາກັບໝູ່ເກີດຄວາມບາດໝາງກັນໄດ້ໃນອະນາຄົດຈາກເຫດການນີ້.
ວິທີຮັບມືກັບສະຖານະການ ເມື່ອແຟນເກົ່າເຮົາໄປຄົບກັບໝູ່
1. ຈັດການຄວາມຮູ້ສຶກຂອງຕົນເອງກ່ອນ
ເມື່ອຮູ້ຂ່າວອາດຈະຮູ້ສຶກຕົກໃຈ ຫຼື ອຶດອັດໃຈ ແຕ່ສິ່ງສຳຄັນທີ່ສຸດແມ່ນໃຫ້ເວລາຕົນເອງໄດ້ຮັບມືກັບຄວາມຮູ້ສຶກເຫຼົ່ານັ້ນກ່ອນ, ຢ່າຟ້າວຕັດສິນໃຈ ຫຼື ເວົ້າສິ່ງໃດອອກໄປໃນຂະນະທີ່ເຮົາຍັງສັບສົນ.
2. ລົມກັບໝູ່ຢ່າງເປີດໃຈ
ລົມກັບໝູ່ຂອງເຮົາຢ່າງກົງໄປກົງມາດ້ວຍເຫດຜົນ, ບອກຄວາມຮູ້ສຶກຂອງເຮົາດ້ວຍຄວາມຈິງໃຈ ແລະ ຕັ້ງໃຈຟັງເຫດຜົນຂອງລາວ.
3. ສ້າງຂອບເຂດ (Boundary) ທີ່ຊັດເຈນ
ເພື່ອຫຼີກລ້ຽງຄວາມອຶດອັດໃຈຄວນສ້າງຂອບເຂດທີ່ຊັດເຈນ, ຫຼີກລ້ຽງການເຂົ້າໄປແຊກແຊງຄວາມສຳພັນ, ຢ່າເວົ້າເຖິງເລື່ອງໃນອະດີດ, ບໍ່ຕ້ອງຮູ້ທຸກເລື່ອງຂອງພວກເຂົາ ແລະ ບໍ່ຕ້ອງພະຍາຍາມຢູ່ຮ່ວມກັນຕະຫຼອດເວລາ.
4. ຢ່າເວົ້າຮ້າຍ ຫຼື ນິນທາ
ການເວົ້າເລື່ອງບໍ່ດີກ່ຽວກັບແຟນເກົ່າໃຫ້ໝູ່ຟັງ ເພາະຈະເຮັດໃຫ້ເຮົາເບິ່ງບໍ່ດີ ແລະ ເຮັດໃຫ້ເກີດບັນຫາຮ້າຍແຮງຂຶ້ນ, ໃຫ້ລະວັງວ່າການກະທຳທີ່ເຮົາຈະສະແດງອອກໄປ ຖ້າເຮົາຕ້ອງການຮັກສາມິດຕະພາບໃຫ້ຍອມຮັບ ແລະ ເຄົາລົບການຕັດສິນໃຈຂອງໝູ່.