Muan Watch - ມ່ວນຊວນເບິ່ງ

ຊວນຟິນເຄມີຄູ່ໃໝ່ຈາກຊີຣີສ໌ເກົາຫຼີ Perfect Crown ສັນຍາຮັກປອມໆຂອງອົງຊາຍ ແລະ ຄຸນໜູທາຍາດເສດຖີ

ໂດຍ: Khainapha Chanthathilath

21 April 2026● 133

ຕ້ອງຂໍບອກວ່າຟິນແຮງ! ກັບເຄມີຂອງນັກສະແດງທັງສອງຈາກຊີຣີສ໌ເກົາຫຼີເລື່ອງ Perfect Crown ຄື IU ນັກຮ້ອງ ແລະ ນັກສະແດງຊື່ດັງທີ່ໄດ້ໂຄຈອນມາປະກົບຄູ່ກັບນາຍແບບ ແລະ ນັກສະແດງຊາຍ ຜູ້ທີ່ມີເອກະລັກທີ່ຮອຍຍິ້ມລະມຸນ Byeon Woo-seok.

ໃນຄອມເມັ້ນ (Comment) ຂອງຊາວເນັດສາຍຣີວິວຮູບເງົາ-ຊີຣີສ໌ ໃຜກໍບອກເປັນສຽງດຽວກັນວ່າມ່ວນ ແລະ ຫ້າມພາດເລີຍ. ມ່ວນຊວນເບິ່ງ ກໍຕ້ອງຮີບໄປຫາເບິ່ງທັນທີທັນໃດ ເພື່ອຈະນຳມາເລົ່າຕໍ່ໃຫ້ທຸກຄົນຟັງກັນເລີຍ.

Perfect Crown ແມ່ນຊີຣີສ໌ Romantic Drama ທີ່ຈະພາທຸກຄົນໄປສຳຜັດກັບໂລກສົມມຸດຂອງເກົາຫຼີໃຕ້ຍຸກໃໝ່ທີ່ຍັງມີລະບອບກະສັດ ໂດຍເລື່ອງລາວຈະເລົ່າໃນມຸມເສັ້ນທາງຄວາມຮັກຂອງອົງຊາຍ I-an (ພະເອກ) ແລະ Hui-ju ຄຸນໜູ ທາຍາດມະຫາເສດຖີ (ນາງເອກ).

ທ່າມກາງແຮງກົດດັນທາງດ້ານສັງຄົມ-ການເມືອງ ອົງຊາຍ I-an ໄດ້ເຂົ້າໄປພົວພັນກັບການຍາດຊີງອຳນາດພາຍໃນລາດສະວົງ ເຮັດໃຫ້ຈຳເປັນຕ້ອງໄດ້ເຮັດສັນຍາແຕ່ງງານປອມໆກັບHui-ju ເຊິ່ງຍ້ອນເກມການເມືອງທີ່ເກີດຂຶ້ນຈຶ່ງເຮັດໃຫ້ພວກເຂົາຮວມມືກັນ.

ໃນລະຫວ່າງນັ້ນພວກເຂົາໄດ້ຮູ້ຈັກກັນ ແລະ ກັນຫຼາຍຂຶ້ນຈົນເກີດເປັນຄວາມຮັກ ແຕ່ຄວາມຮັກທີ່ມີຈະສາມາດເອົາຊະນະກຳແພງທາງຊົນຊັ້ນໄດ້ບໍ່? ຫຼື ວ່າມຸງກຸດທີ່ສົມບູນແບບຈະຕ້ອງແລກມາດ້ວຍບາງສິ່ງທີ່ສູນເສຍໄປຕະຫຼອດການ.

ເລື່ອງ Perfect Crown ຈົບແລ້ວເດີ, ທຸກຄົນສາມາດໄປເບິ່ງທັງ 12 ໄດ້ທີ່ Disney+ ເລີຍ