ທຸກຄວາມຜິດພາດເປັນບົດຮຽນທີ່ດີສະເໝີໃຫ້ກັບເຮົາ ອະດີດບໍ່ສາມາດເອົາມາຕັດສິນຄຸນຄ່າຂອງເຮົາໃນປັດຈຸບັນໄດ້
ເນື້ອເລື່ອງແມ່ນໄດ້ເວົ້າເຖິງເລື່ອງຂອງໂນ້ ແລະ ດາ. ທັງສອງໄດ້ເປັນໝູ່ສະໄໝຮຽນມັດທະຍົມ ແລະ ຮຽນຫ້ອງດຽວກັນ. ຕອນນີ້ໄດ້ດຳເນີນດ້ວຍການຍ້ອນເວລາກັບໄປ-ກັບມາ, ເຮັດໃຫ້ເຫັນທັງເລື່ອງລາວອະດີດ ແລະ ປັດຈຸບັນທີ່ເປັນຢູ່ຂອງທັງສອງຄົນທີ່ຍັງມີເລື່ອງຕິດຄ້າງໃນໃຈທີ່ຕ້ອງການທີ່ຈະສະສາງມັນອອກໄປ.
ພາບໄດ້ຕັດຍ້ອນກັບໄປໃຫ້ເຫັນພາບຕອນມັດທະຍົມ, ດາ ຜູ້ທີ່ມີພອນສະຫວັນໃນການຮ້ອງເພງ ແລະ ມີຄວາມໂດດເດັ່ນຈົນໃຜໆກໍຢາກທຳຄວາມຮູ້ຈັກ. ດາ ມີຄວາມຮູ້ສຶກພິເສດກັບ ເຕ້ ໜຸ່ມສຸດຮັອດປະຈຳຫ້ອງທີ່ທັງຮຽນເກັ່ງ, ຫຼິ້ນກິລາເດັ່ນ, ໜ້າຕາດີ. ແຕ່ເຕ້ກຳລັງຈະຍ້າຍໄປຢູ່ຕ່າງປະເທດກັບພໍ່ແມ່ກໍເລີຍຈະຈັດປາຕີ້ອຳລາກັບໝູ່ເພື່ອນ.
ໂນ້ ເຊິ່ງເປັນໝູ່ສະໜິດກັບ ເຕ້ ໄດ້ແນະນຳໃຫ້ດາຮ້ອງເພງເພື່ອບອກແທນຄວາມຮູ້ສຶກໃຫ້ເຕ້, ແຕ່ມີເຫດການໜຶ່ງທີ່ເຮັດໃຫ້ດານັ້ນຢ້ານການຮ້ອງເພງໄປຕະຫຼອດຊີວິດ, ມີອາການວິຕົກກັງວົນ ແລະ ໂນ້ກໍເປັນສ່ວນໜຶ່ງໃນເຫດການທີ່ເຮັດໃຫ້ດາເປັນແບບນັ້ນ.
ເບິ່ງຕອນທີ 4 ມີຊື່ວ່າ: ບໍ່ເປັນຫຍັງທີ່ຈະເຮັດຜິດພາດ | It’s Okay to Make Mistakes
ໂນ້ ບັງເອີນໄດ້ພົບກັບດາທີ່ມາຮ້ານກາແຟສຸກໃຈ, ເພື່ອມາຖ່າຍຣີວິວ. ໂນ້ຍັງຮູ້ສຶກຜິດຕໍ່ດາຈຶ່ງຢາກຂໍໂທດກັບເລື່ອງລາວທີ່ຜ່ານມາ. ທັງສອງໄດ້ລົມກັນເລື່ອງບັນຫາທີ່ເກີດຄິດ ແລະ ໄດ້ລົມກັນແບບເປີດໃຈວ່າບໍ່ມີໃຜຜິດເພາະທັງສອງຄົນໃຈຮ້ອນດ້ວຍການເອົາອາລົມນຳທາງ. ທັງສອງໄດ້ສະສາງບັນຫາທີ່ຄ້າງຄາກັນມາຍາວນານ ແລະ ດານັ້ນກໍກ້າທີ່ຈະຂ້າມຜ່ານຄວາມຢ້ານກັບມາຮ້ອງເພງໄດ້ອີກຄັ້ງເພາະເອື້ອຍຂອງລາວ.
ບົດຮຽນໃນຕອນນີ້ໄດ້ບອກໃຫ້ແອັດຮູ້ວ່າທຸກຄວາມຜິດພາດເປັນບົດຮຽນທີ່ດີສະເໝີ, ເພາະທຸກອຸປະສັກຄືການເຕີບໃຫຍ່ ແລະ ເຮັດໃຫ້ຄິດໄດ້ວ່າເຮົາບໍ່ຄວນກັບໄປເຮັດສິ່ງນັ້ນອີກຄັ້ງ, ບໍ່ຄວນເອົາອາດີດມາຕັດສິນຄຸນຄ່າຂອງເຮົາໃນປັດຈຸບັນ.
ການກ້າວຜ່ານຄວາມຢ້ານ ແລະ ຈິດໃຈທີ່ເຂັ້ມແຂງຂອງຕົວລະຄອນດາ, ກຳລັງໃຈດີໆຈາກຄົນອ້ອມຂ້າງນັ້ນມີສ່ວນສຳຄັນກຳຄົນທີ່ເປັນໂລກວິຕົກກັງວົນ.
ໂນ້ ຍັງຄົງເປັນຕົວລະຄອນທີ່ໜ້າຮັກສະເໝີຕັ້ງແຕ່ຕອນທຳອິດ, ເປັນຄົນທີ່ມີແຕ່ຄວາມຫວັງດີຕໍ່ຄົນອື່ນຢູ່ຕະຫຼອດເວລາ, ມັກຊ່ວຍເຫຼືອ ແລະ ເຫັນອົກເຫັນໃຈຄົນອື່ນ. ນຳທຸກຄວາມຜິດພາດມາປັບປຸງແກ້ໄຂໃຫ້ດີຂຶ້ນເລື່ອຍໆຈົນເຖິງປັດຈຸບັນ
ໃນຕອນນີ້ມັນຍັງໄດ້ລວມເຖິງມິດຕະພາບລະຫວ່າງຄອບຄົວ ແລະ ໝູ່ເພື່ອນທີ່ຍັງຄົງເປັນຫ່ວງ ແລະ ຫວັງດີໃຫ້ກັນ. ກ່ອນທີ່ຈະຈົບຕອນທີ່ 4 ກໍໄດ້ແຝງບັນຫາອີກຫຼາຍຢ່າງທີ່ກຳລັງຈະເກີດຂຶ້ນເພື່ອປູທາງໄປສູ່ ຕອນຈົບໃນຕອນທີ 5 ຂອງ ສຸກໃຈ It’s Okay the series.
ໂດຍ: ທີມບັນນາທິການ Muan