ເຄີຍເປັນບໍ່? ຢາກມີແຟນ, ຢາກມີຄົນລົມນຳໃຈຈະຂາດ ແຕ່ພໍມີຄົນທັກມາແລ້ວຊໍ້າພັດຄ້ານຕອບ, ຕອບແບບສັ້ນໆບໍ່ໃສ່ໃຈ ຫຼື ຮ້າຍສຸດແມ່ນ ຄ້ານຕໍ່ບົດສົນທະນາ. ບາງເທື່ອກໍເຖິງຂັ້ນບໍ່ຮູ້ວ່າຊິລົມຫຍັງກັບເຂົາດີ. ພາວະນີ້ເຮົາເອີ້ນກັນວ່າ Dry Texting ຫຼື ແປແບບບ້ານໆເຮົາກໍຄື “ແຊັດແຫ້ງ” ນັ້ນເອງ.
ສາເຫດມັນມາຈາກໃສ? ຄວາມຈິງແລ້ວພາວະນີ້ເຮົາສາມາດເປັນກັນໄດ້ທຸກຄົນ. ເຫດຜົນກໍຄື ທຸກມື້ນີ້ ໂລກອອນລາຍເຮັດໃຫ້ເຮົາເບື່ອໜ່າຍ ແລະຊິນຊາ ເພາະພື້ນທີ່ການລົມກັນຂອງເຮົາຖືກຮຸກຮານດ້ວຍເລື່ອງວຽກ, ເນື້ອຫາລົບໆ, ການຜິດຖຽງກັນຂອງຄົນທີ່ເຮົາບໍ່ໄດ້ຮູ້ຈັກ ຫຼື ບາງເທື່ອກໍຍ້ອນເຮົາຕ້ອງໄປໂຟກັສກັບວຽກ ຫຼື ການຮຽນຈົນບໍ່ມີເວລາລົມກັບໃຜ. ອີກຢ່າງໜຶ່ງ, ທັກສະການລົມແບບຫຼິ້ນໆ ຫຼື small talk ຂອງເຮົາກໍເລີ່ມຈາງຫາຍໄປ ເຮັດໃຫ້ເຮົາກາຍເປັນຄົນລົມບໍ່ເກັ່ງ.
ສະນັ້ນ, ບັນຫາໂລກແຕກຂອງຄົນຢາກມີແຟນແຕ່ຄ້ານແຊັດ ຈຶ່ງຄືກັບງູກິນຫາງທີ່ຫາທາງອອກຍາກ. ເພາະເຮົາເອງກໍເຜີເຮັດແບບນັ້ນຈົນກາຍເປັນນິໄສ, ຕອບແບບສົ່ງໆ ບໍ່ໃສ່ໃຈ ຈົນບາງເທື່ອກໍລືມໄປວ່າເຮົາເອງກະເປັນຄົນທີ່ຢາກມີໃຜຈັກຄົນຄືກັນ.
ແລ້ວເຮົາຕ້ອງປັບແນວໃດດີຈຶ່ງຈະຫຼີກໜີຈາກພາວະ Dry Texting ນີ້ໄດ້?
ຖ້າຢາກມີໃຜຈັກຄົນໃນຊີວິດ, ບໍ່ຢາກເຫງົາ ວິທີການງ່າຍໆເລີຍກໍຄື ຕ້ອງເລີ່ມຕົ້ນທີ່ “ການຕັ້ງໃຈລົມ” ທີ່ບໍ່ແມ່ນພຽງແຕ່ການສົ່ງຂໍ້ຄວາມຕອບແບບສົ່ງໆໄປຊື່ໆ.
- ໃສ່ໃຈໃຫ້ຫຼາຍຂຶ້ນ: ຖ້າເຮົາສົນໃຈໃຜ, ລອງພິມໃຫ້ຫຼາຍຂຶ້ນ, ຫາຫົວຂໍ້ລົມທີ່ເຂົາສົນໃຈ ຫຼື ຫາຫົວຂໍ້ທີ່ລົມກັນໄດ້ທັງສອງຝ່າຍ. ວາງເວລາໃນການລົມກັນໄວ້ (ເທົ່າທີ່ຈະມີເວລາ) ເຖິງວ່າຈະຮູ້ສຶກເບື່ອກໍຕາມ ເພາະໂຕເອງຢາກມີແຟນເນາະ!
- ສະແດງຄວາມເປັນຕົວເອງ: ລອງຄົ້ນຫາມຸມທີ່ເປັນຕົວເອງອອກມາ. ບໍ່ວ່າຈະເປັນເລື່ອງທີ່ມັກ, ຄວາມສົນໃຈ ຫຼືອາລົມຕະຫຼົກແບບຫຼິ້ນມຸກຕ່າງໆ ເພື່ອໃຫ້ອີກຝ່າຍຮູ້ສຶກມ່ວນທີ່ໄດ້ລົມນຳເຮົາ. ວິທີນີ້ຈະເຮັດໃຫ້ການແຊັດກັນກັບມາມ່ວນ ແລະ ຕື່ນເຕັ້ນຄືກັບຕອນທີ່ເຮົາແຊັດກັນໃໝ່ໆ.
- ຖ້າພະຍາຍາມແຊັດແລ້ວແຕ່ບໍ່ໄປບໍ່ມາ ນີ້ເລີຍ 👉 ລອງໄປເຈິກັນ: ຖ້າສຸດທ້າຍແລ້ວແຊັດກັນແບບໃດກໍຍັງບໍ່ຄືບໜ້າ, ລອງນັດເຈິກັນເລີຍ. ການໄປເຈິກັນຊ່ວຍໃຫ້ເຮົາໄດ້ສຳຜັດຄວາມເປັນຄົນ ແລະ ຄວາມມີຕົວຕົນຂອງອີກຝ່າຍໄດ້ຊັດເຈນຂຶ້ນ. ຄັ້ງຕໍ່ໄປ ຫຼັງຈາກການໄປເຈິໜ້າກັນມາແລ້ວ, ເວລາເຮົາຈະຕອບແຊັດແບບສົ່ງໆໄປ, ເຮົາກໍຈະຄິດຂຶ້ນມາໄດ້ວ່າຄົນນີ້ລາວມີຄວາມຮູ້ສຶກຄືກັບເຮົາ, ເຮົາຄວນໃສ່ໃຈລາວໃຫ້ຫຼາຍຂຶ້ນ. ຫາສິ່ງທີ່ມັກຮ່ວມກັນ, ເຊັ່ນ: ໄປເບິ່ງໜັງ, ໄປຄອນເສີດ, ອອກກຳລັງກາຍ, ຫຼື ໄປຍ່າງສວນ ກໍສາມາດຊ່ວຍໄດ້ ເພື່ອໃຫ້ມີຫົວຂໍ້ໃນການລົມກັນເພີ່ມຂຶ້ນ.
ແຕ່ຖ້າເປັນເຮົາເອງທີ່ໄປເຈິຄົນທີ່ dry texting ໃສ່ເຮົາ ໃຫ້ລອງເບິ່ງໃນມຸມກັບກັນ ບໍ່ຟ້າວໃຈຮ້າຍໃຫ້ເຂົາ. ບາງເທື່ອເຂົາອາດຈະມີເຫດຜົນບາງຢ່າງຄືທີ່ວ່າວ່າ. ລອງຊວນເຂົາລົມໃຫ້ຫຼາຍຂຶ້ນ ອາດຊ່ວຍໃຫ້ໄປກັນຕໍ່ໄດ້. ພະຍາຍາມເປັນຝ່າຍເລີ່ມຕົ້ນກ່ອນ ຖ້າຢາກໃຫ້ຄວາມສຳພັນນັ້ນສືບຕໍ່.
ຢາກມີແຟນກໍຕ້ອງໄດ້ພະຍາຍາມແນ່ເດີ້, ສູ້ໆ!
