Muan Listen - ມ່ວນຊວນຟັງ

ຟັງ ແດນຈໍາປາ ຈາກ GEMI9PK ເພງທີ່ເລົ່າກ່ຽວຄວາມງາມຂອງປະເທດລາວ

ໂດຍ: Khainapha Chanthathilath

13 April 2026● 42

GEMI9PK ສິລະປິນແຣັບເປີຈາກສັງກັດ  Highbros ຕ້ອນຮັບບຸນປີໃໝ່ລາວໂດຍການປ່ອຍເພງໃໝ່ທີ່ມີຊື່ວ່າ “ແດນຈໍາປາ Dan Champa” ອອກມາໃຫ້ພວກເຮົາໄດ້ຟັງກັນແລ້ວ.

ເພງນີ້ມີກິ່ນອາຍດົນຕີແບບດັ້ງເດີມຂອງລາວປະສົມປະສານກັບແນວເພງແບບປັອບ (Pop) ແລະ ແອບໂຟຣບີດ (Afrobeats) ເຊິ່ງໄດ້ຮັບແຮງບັນດານໃຈຈາກວັດທະນະທຳ, ປະເພນີຂອງແຕ່ລະຊົນເຜົ່າ ແລະ ຄວາມງົດງາມຂອງປະເທດລາວ.

ເປັນເພງທີ່ຟັງແລ້ວເຮັດໃຫ້ຮູ້ສຶກດີ ແຖມຍັງມີຄວາມໝາຍທີ່ຊ່ວຍເຕືອນໃຈຄົນຟັງວ່າ ເຖິງພວກເຮົາຈະມີຄວາມແຕກຕ່າງກັນ ແຕ່ຄວາມຮັກຄືສິ່ງທີ່ເຊື່ອມໂຍງພວກເຮົາທຸກຄົນໄວ້ນຳກັນ.

ເພງ ແດນຈໍາປາ ມີຈັງຫວະດົນຕີທີ່ຟັງງ່າຍລ່ຽນໄຫຼ ເປັນການປະສົມປະສານລະຫວ່າງສຽງດົນຕີສະໄໝໃໝ່ ແລະ ທ່ອນຮຸກ (Hook) ທີ່ຕິດຫູ. ເພງນີ້ຍັງໄດ້ສື່ສານເຖິງຄວາມຈິງໃຈ ຄວາມຮັກແສນອົບອຸ່ນ ແລະ ການຮັກແພງກັນຂອງຄົນລາວ.

ເສັ້ນທາງດົນຕີຂອງ GEMI9PK ມີຈຸດເລີ່ມຕົ້ນທີ່ໜ້າສົນໃຈຫຼາຍ ເຊິ່ງລາວແມ່ນແຣັບເປີທີ່ມີຄວາມສົນໃຈໃນວັດທະນະທຳຮິບຮັອບ (Hip-hop) ໃນເກມ GTA San Andreas.

ລາວກໍມັກທີ່ຈະແຕ່ງໂຕຮຽນແບບຕາມໂຕລະຄອນໃນເກມທີ່ມີຊື່ວ່າ Sean (Sweet), ສ່ວນແຣັບເປີທີ່ລາວມັກ ແລະ ເປັນແຮງບັນດານໃຈກໍແມ່ນ Mike Shinoda ຈາກວົງ Linkin Park ແລະ Eminem ໃນການຊຸກດັນໂຕເອງຈົນກາຍມາເປັນສິລະປິນທີ່ຖ່າຍທອດເອກະລັກຂອງລາວໃນປັດຈຸບັນ.