ຟັງເພງຮັກສຸດເສົ້າ “ເປັນດັ່ງມື້ວານ” ຈາກ Dr.Isolate ນັກຮ້ອງໜ້າໃໝ່ສຸດເລິກລັບ
ມາແລ້ວເພງເຕັມຂອງນັກຮ້ອງໜ້າໃໝ່ທີ່ມີຄວາມເລິກລັບກັບ Dr.Isolate ໃນເພງທຳອິດຂອງລາວທີ່ມີຊື່ວ່າ “ເປັນດັ່ງມື້ວານ” ເພງນີ້ໄດ້ເລົ່າເຖິງອາລົມຄວາມຮູ້ສຶກທີ່ທັງເສົ້າ ແລະ ການອ້ອນວອນເຖິງຄວາມຮັກທີ່ໄດ້ສິ້ນສຸດລົງໄປໃຫ້ກັບຄືນມາເປັນຄືເກົ່າ.
ດ້ວຍກິ່ນອາຍຂອງເພງທີ່ເປັນ Indie Pop ແລະ ເນື້ອໃນຂອງເພງທີ່ບໍ່ຊັບຊ້ອນ ຈຶ່ງເຮັດໃຫ້ເພງນີ້ຟັງງ່າຍ ບວກກັບບອກເລົ່າອາລົມຄວາມຮູ້ສຶກດ້ວຍພາສາທີ່ກົງໄປກົງມາ.
ສຳລັບເພງນີ້ ຖືວ່າເປັນເພງເປີດຂອງ Dr.Isolate ເຊິ່ງມາຈົນຮອດຕອນນີ້ເຮົາກໍຍັງບໍ່ທັນຮູ້ວ່ານັກຮ້ອງຄົນນີ້ແມ່ນໃຜ ໂດຍໃນໂຊຊຽວມີເດຍຂອງລາວ ໄດ້ມີການບອກໄວ້ວ່າ “ບໍ່ຈຳເປັນຕ້ອງຮູ້ດອກວ່າຂ້ອຍແມ່ນໃຜ ເສບຜົນງານເພງຂ້ອຍກໍພຽງພໍແລ້ວ.”
ໃນຕອນນີ້ເຖິງເຮົາຈະບໍ່ຮູ້ໜ້າຄ່າຕາ ຄືກັບກຳລັງເບິ່ງລາຍການນັກຮ້ອງຫຼັງກຳແພງ ແຕ່ສິລະປິນຄົນນີ້ມີຂອງ ເພາະລາວກຳລັງລັກເຮັດເພງໃໝ່ລໍໄວ້ອີກແລ້ວ ອີກໜຶ່ງເພງ ເຊິ່ງລາວໄດ້ບອກໄວ້ຜ່ານຂໍ້ຄວາມໃນ Facebook Stories ຂອງລາວວ່າ ຈະປ່ອຍພາຍໃນທ້າຍເດືອນຕຸລາ 2025 ນີ້.
ຟັງເພງ ເປັນດັ່ງເມື່ອວານ ໄດ້ແລ້ວມື້ໃນ YouTube ແລະ ສະຕຣີມມິງແພລດຟອມທັງ Apple Music ແລະ Spotify.