ຮັກທີ່ເຈັບທີ່ສຸດ ຄືການຖ້າຄົນທີ່ບໍ່ຫວນກັບມາ ຟັງ “ຈົມປັກ” ຈາກ BLACK EYES
ເຄີຍເປັນບໍ່… ທັງໆທີ່ຫ່າງກັນໄປດົນແລ້ວ ແຕ່ເປັນຫຍັງເຮົາຄືຍັງຢູ່ທີ່ເກົ່າ?
ນີ້ຄືສິ່ງທີ່ວົງ BLACK EYES ຢາກເລົ່າໃຫ້ເຮົາຟັງໃນເພງ “ຈົມປັກ” ຂອງພວກເຂົາ. ໃນເລື່ອງຂອງຄວາມຮັກ ມັນກໍຈະມີທັງຄົນທີ່ຕັດໃຈໄດ້ໄວ ແລະ ຄົນທີ່ບໍ່ສາມາດອອກຈາກວັງວົນນັ້ນໄດ້.
ຈິດໃຈເຂົາຄົງເຂັ້ມແຂງດີ ເພາະສາມາດກ້າວໄປທາງໜ້າໄດ້ ແລ້ວເລີ່ມຕົ້ນຊີວິດໃໝ່ ແລະ ມີຄວາມສຸກໄປຮຽບຮ້ອຍແລ້ວ ແຕ່ເຮົາກັບຍັງຕິດຢູ່ໃນອະດີດ ບໍ່ສາມາດກ້າວຂ້າມຄວາມເຈັບປວດນັ້ນໄປໄດ້ເລີຍ, ເມື່ອໃດທີ່ຫຼັບຕາພາບຄວາມຊົງຈຳເກົ່າໆ ກໍຍັງຕາມມາຫຼອກຫຼອນຢູ່ຕະຫຼອດ.
ເນື້ອຫາຂອງເພງນີ້ມັນແທງໃຈກັນສຸດໆ ແລະ ໄດ້ເລົ່າເຖິງຄວາມຈິງອັນເຈັບປວດຂອງການນັ່ງຖ້າຄົນທີ່ຮັກທຸກໆມື້ ຫວັງໃຫ້ເຂົາເຈົ້າກັບຄືນມາ ທັງໆທີ່ຮູ້ດົນແລ້ວວ່າເຂົາເຈົ້າບໍ່ມີວັນກັບມາອີກ.
ເຖິງວ່າເວລາຈະຜ່ານໄປດົນປານໃດ ຄວາມຮູ້ສຶກທີ່ຍັງຄ້າງຄາກໍຍັງເຮັດໃຫ້ຄົນທີ່ຖືກຖິ້ມໄວ້ທາງຫຼັງຕ້ອງຮັບມືກັບຄວາມຄວາມໂດດດ່ຽວຢູ່ຄົນດຽວ. ມັນຄືການປຽບທຽບໃຫ້ເຫັນຄວາມແຕກຕ່າງຢ່າງຊັດເຈນ ລະຫວ່າງຄົນທີ່ຫຼຸດພົ້ນອອກໄປໄດ້ ແລ້ວກັບຄົນທີ່ຍັງຍຶດຕິດຢູ່ໃນມຸມມອງຄວາມຮັກທີ່ແສນເສົ້ານີ້.
ມ່ວນຊວນຟັງ ຢາກແອບບອກວ່າ BLACK EYES ຍັງຄົງເອກະລັກດົນຕີແນວຣັອກ (Rock) ແລະ ສົ່ງຕໍ່ແງ່ມຸມຄວາມຮັກໄວ້ໄດ້ໜ້າປະທັບໃຈຕາມສະບັບລາຍເສັ້ນຂອງພວກເຂົາໄວ້ແບບຊັດເຈນຄືເກົ່າເລີຍ.