Muan RelationTips

ຕ້ອງຈາກລາແນວໃດໃຫ້ຮູ້ສຶກເຈັບໜ້ອຍກວ່າໃນອະດີດ?

ໂດຍ: Khainapha Chanthathilath

19 December 2024● 269

ຕອນທີ່ເຮົາອາຍຸຍັງນ້ອຍ ເຮົາເຂົ້າໃຈວ່າຄົນອ້ອມໂຕເຮົາຈະຢູ່ນຳເຮົາໄປຕະຫຼອດ ຈົນລືມຄິດເຖິງ “ການຈາກລາ” ຈົນກະທັ້ງເລີ່ມໄດ້ຮູ້ຈັກຄົນຫຼາຍຂຶ້ນຈົນເຈິເຫດການ ໝູ່ສະໜິດຍ້າຍໄປຮຽນບ່ອນໃໝ່ ຫຼື ສັດລ້ຽງແສນຮັກໄດ້ເສຍ ຫຼື ຕາຍໄປ ເຮົາຈຶ່ງໄດ້ຮູ້ເຖິງລົດຊາດຂອງການຈາກລາເປັນຄັ້ງທຳອິດ.

ຫຼັງຈາກນັ້ນ ແນ່ນອນວ່າ ເຮົາຈະໄດ້ພົບກັບການຈາກລາອີກຫຼາຍຄັ້ງ ແລະ ຫຼາຍຮູບແບບ ບໍ່ວ່າຈະເປັນ ເລີກລາກັບແຟນ, ຍ້າຍບ່ອນຢູ່, ຄົນໃນຄອບຄົວຈາກໄປໂດຍບໍ່ມີວັນກັບມາ ເຮັດໃຫ້ເຂົ້າໃຈວ່າ ການປ່ຽນແປງເກີດຂຶ້ນໄດ້ຕະຫຼອດເວລາ ແລະ ບໍ່ມີໃຜທີ່ຢູ່ຄຽງຂ້າງເຮົາໄປຕະຫຼອດ ນອກຈາກໂຕເຮົາເອງ. ເຖິງວ່າເຮົາຈະພົບກັບການຈາກລາຫຼາຍຄັ້ງແລ້ວກໍຕາມ ແຕ່ນັ້ນກໍບໍ່ແມ່ນວ່າເຮົາຈະຄຸ້ນເຄີຍກັບມັນ ເມື່ອມັນເກີດຂຶ້ນອີກຄັ້ງ ຄວາມເຈັບປວດກໍບໍ່ໄດ້ໜ້ອຍລົງເລີຍ.

ນັກບຳບັດຈິດຊື່ ເອຟ. ໄດແອນ ບາດ ໄດ້ແນະນຳ 5 ວິທີຊ່ວຍໃຫ້ການຈາກລາເຈັບປວດໜ້ອຍລົງໃນບົດຄວາມ ‘5 Ways to Make Goodbye Less Painful’. ມີຫຍັງແດ່ນັ້ນ ໄປອ່ານພ້ອມກັນເລີຍ.

1. ຍອມຮັບຄວາມຮູ້ສຶກທີ່ຫຼາກຫຼາຍ

ເຮົາອາດຈະຮູ້ສຶກຕື່ນເຕັ້ນເວລາໄດ້ເຮັດຫຍັງໃໝ່ໆ, ຮູ້ສຶກເສົ້າເມື່ອບໍ່ໄດ້ພົບກັບຄົນທີ່ຮັກ, ສັດລ້ຽງ ຫຼື ຄອບຄົວເປັນເວລາຫຼາຍປີ ແລະ ອາດຈະກັງວົນເມື່ອຮູ້ສຶກບໍ່ໝັ້ນໃຈກັບອະນາຄົດໂຕເອງ. ການມີຄວາມຮູ້ສຶກທີ່ຫຼາກຫຼາຍເປັນເລື່ອງທີ່ປົກກະຕິຂອງຄົນເຮົາ ສະນັ້ນເຮົາຄວນຮັບຮູ້ ແລະ ມີພື້ນທີ່ໃຫ້ກັບຄວາມຮູ້ສຶກເຫຼົ່ານັ້ນ ເຊິ່ງຈະຊ່ວຍໃຫ້ເຮົາຜ່ານໄລຍະເວລາທີ່ເຈັບປວດໄປໄດ້.

2. ເຊື່ອໃນໂຕເອງວ່າບໍ່ໄດ້ຕັດສິນໃຈຜິດ

ການທີ່ເຮົາຮູ້ສຶກເສົ້າ ຫຼື ກັງວົນກັບການປ່ຽນແປງ ບໍ່ໄດ້ແປວ່າເຮົາເລືອກເດີນທາງຜິດ. ຫຼາຍຄັ້ງການທີ່ເຮົາຢາກຮັບໂອກາດດີໆ ກໍອາດເລີ່ມດ້ວຍການເສັ້ນທາງທີ່ຍາກລຳບາກ ດ້ວຍການບອກລາສິ່ງທີ່ເຄີຍເຮັດມາຕະຫຼອດ. ຍົກຕົວຢ່າງ ການເລີກກັບແຟນທີ່ຢູ່ນຳກັນແລ້ວມີແຕ່ບັນຫາ ຫຼື ຄວາມທຸກໃຈ. ການຈາກກັນໄປເຕີບໂຕ ອາດເປັນຫົນທາງທີ່ດີທີ່ສຸດ ນັ້ນບໍ່ໄດ້ແປວ່າເຮົາຕັດສິນໃຈຜິດ.

3. ລະບາຍອາລົມອອກມາ

ເຮົາມັກຈະຕອບວ່າເຮົາໂອເຄ ເວລາທີ່ມີຄົນມາຖາມວ່າເຮົາຮູ້ສຶກແນວໃດ. ທັງນີ້ກໍເພື່ອຮັກສາມາລະຍາດ ແລະ ຊິນເຄີຍ. ແຕ່ເທື່ອນີ້ ໃນຕອນທີ່ເຮົາຕ້ອງຈາກລາ, ເຮົາກໍຕ້ອງໄດ້ບອກໄປຕາມຄວາມຈິງວ່າເຮົາຮູ້ສຶກແນວໃດ ສື່ສານອາລົມອອກໄປໃຫ້ເປັນຮູບເປັນຮ່າງ ອາດຈະດ້ວຍການຂຽນ ຫຼື ເລົ່າໃຫ້ຄົນທີ່ໄວ້ໃຈຟັງ. ນີ້ຊ່ວຍໃຫ້ເຮົາເຂົ້າໃຈເລື່ອງລາວໄດ້ດີຂຶ້ນ ແລະ ອາລົມເບົາລົງ. ພ້ອມນີ້ການສະແດງຄວາມອ່ອນແອໃຫ້ອີກຝ່າຍເຫັນ ຊ່ວຍໃຫ້ຄວາມສຳພັນແໜ້ນແຟ້ນຂຶ້ນ.

4. ໃຫ້ເວລາໂຕເອງໄດ້ຕຶກຕອງ

ລອງໃຫ້ເວລາໂຕເອງໄດ້ຕຶກຕອງໃຫ້ດີໃນທຸກໆດ້ານ ກ່ອນທີ່ຈະເຮັດຫຍັງລົງໄປ. ຕົວຢ່າງ: ເຮົາຢາກອອກຈາກວຽກທີ່ເຮັດໃຫ້ເຮົາທຸກໃຈ ພໍຮອດຕອນຈະຈາກລາກໍພ້ອມຈະໄປແບບບໍ່ເຫຼືອເຍື່ອໃຍ ພ້ອມທີ່ຈະເວົ້າບໍ່ດີ ຫຼື ກະແທກປະຕູຫັນຫຼັງຍ່າງໜີທັນທີ. ແຕ່ໃຜຈະຮູ້ວ່າ ມື້ໜຶ່ງເຮົາອາດຈະໄດ້ກັບມາຮ່ວມງານກັບບໍລິສັດເກົ່າ ຫຼື ເພື່ອນຮ່ວມງານເກົ່າອີກ? ປະສົບການທີ່ເຮົາໄດ້ຮັບໃນບ່ອນນີ້ກໍອາດຈະມີບົດຮຽນທີ່ດີຢູ່ນຳ ຈາກກັນດ້ວຍດີຈະດີກວ່າວ່າບໍ່?

5. ໃນເວລາໂຕເອງໃນການປັບໂຕ

ການຈາກລາປະເພດທີ່ເຈັບປວດຫຼາຍ ເຊັ່ນ: ການສູຍເສຍຄົນທີ່ເຮົາຮັກ ຫຼື ການຈົບຄວາມສຳພັນ ມັກຈະເຮັດໃຫ້ເຮົາກັບໄປເບິ່ງອະດີດໃນແບບທີ່ຜິດໄປຈາກຄວາມຈິງ. ເປັນຕົ້ນວ່າຄວາມສຳພັນທີ່ເປັນພິດສຸດໆ ແລະ ເຮົາເຄີຍຕ້ອງຮ້ອງໄຫ້ເພາະແຟນເກົ່າຫຼາຍເທື່ອ ແຕ່ພໍເລີກກັນເຮົາຊໍ້າພັດເບິ່ງເຫັນແຕ່ຂໍ້ດີເຕັມໄປໝົດ. ຄວາມເສຍໃຈທີ່ມາຈາກການຈາກລາເຮັດໃຫ້ເຮົາສົງໄສໃນການຕັດສິນໃຈຂອງຕົວເອງ.

ແມ່ນຢູ່ວ່າ ຕອນທຳອິດມັກຈະຍາກ ເຮົາອາດຈະບໍ່ໄດ້ຕື່ນມາ ແລະ ຮູ້ສຶກດີຂຶ້ນມາທັນທີທັນໃດໃນມື້ໂັດໄປ, ແຕ່ບໍ່ໄດ້ໝາຍຄວາມວ່າເຮົາຈະຮູ້ສຶກເສົ້າຢູ່ແບບນັ້ນຕະຫຼອດໄປກ ດັ່ງນັ້ນເຮົາຕ້ອງໃຈດີ ແລະ ໃຫ້ເວລາຕົວເອງໃນການປັບໂຕແດ່. ມື້ໜຶ່ງທຸກຢ່າງຈະລົງໂຕແນ່ນອນ.

ການຈາກລາເປັນເລື່ອງຍາກກໍແມ່ນຄວາມຈິງ, ແຕ່ການເລືອກທີ່ຈະບໍ່ສ້າງຄວາມຊົງຈຳໃໝ່ໆເລີຍ ເພາະຢ້ານຄວາມເຈັບປວດນັ້ນ ຟັງເບິ່ງເປັນເລື່ອງໜ້າເສຍດາຍຢ່າງຍິ່ງ. ຈະດີກວ່າບໍຫາກເຮົາໃຊ້ 5 ວິທີນີ້ຮັບມື ຢ່າງການໃຫ້ເວລາຕົວເອງ, ເບິ່ງການຈາກລາໃນຖານະບົດຮຽນທີ່ດີ ແລະຄ່ອຍໆ ຢຽວຢາຕົວເອງຈົນກັບມາຮູ້ສຶກດີອີກຄັ້ງ?

ໂດຍ: ທີມບັນນາທິການ Muan