ມື້ນີ້ ມ່ວນ ຈະພາທຸກຄົນມາຮູ້ຈັກກັບໜຸ່ມບາຣິສຕາຄົນໜຶ່ງກໍຄື Fhilippée. ນອກຈາກອາຊີບທີ່ລາວຮັກຢ່າງການຊົງກາແຟແລ້ວນັ້ນ, ລາວຍັງມີອີກບົດບາດໜຶ່ງຄືການຮ້ອງເພງ ແລະ ຕອນນີ້ລາວກໍໄດ້ມີເພງທຳອິດເປັນຂອງຕົວເອງແລ້ວເດີ.
ຈັນສະຖາພອນ ຊຸມພົນພັກດີ ຫຼື Fhilippée ພື້ນເພແມ່ນເປັນຄົນ ນະຄອນຫຼວງວຽງຈັນ, ລາວມີຊື່ໃນວົງການຄື FCS The Viper ທີ່ສື່ຄວາມໜາຍປະກອບມາຈາກຕົວຕົນຂອງລາວແທ້ໆ, ເຊິ່ງຕົວ F ແມ່ນຫຍໍ້ມາຈາກຊື່ຫຼິ້ນ “Fhilippée”, C ແມ່ນຫຍໍ້ມາຈາກຊື່ແທ້ “CHANSATHAPHONE” ແລະ S ແມ່ນຫຍໍ້ມາຈາກນາມສະກຸນ “SOUMPHOLPHAKDY”.
ຄຳວ່າ The Viper ແມ່ນເປັນໝວດປະເພດງູຊະນິດໜຶ່ງທີ່ພໍພວກເຮົາຟັງແລ້ວອາດຈະຄືເປັນໂຕຮ້າຍຕະຫຼອດ ຍ້ອນຄວາມເປັນສັດທີ່ມີພິດ ແຕ່ຫາກເບິ່ງດີໆແລ້ວມັນກໍເປັນພຽງສັດຊະນິດໜຶ່ງທີ່ທຳມະຊາດໄດ້ສ້າງມາໃຫ້ມັນມີພິດ ເພື່ອໃຊ້ໄວ້ປ້ອງກັນຕົວເອງເພື່ອຄວາມຢູ່ລອດ ແຖມຍັງສ້າງໃຫ້ມັນວ່ອງໄວ, ຄ້ອງແຄ້ວ, ດຸດັນ ມີຄວາມອັນຕະລາຍທຸກການໂຈມຕີ ແລະ ມັນກໍຮອບຄອບອີກດ້ວຍ.
ແຮງບັນດານໃຈໃນການແຕ່ງເພງ
ຈຸດເລີ່ມຕົ້ນໃນສາຍດົນຕີຂອງລາວແມ່ນໄດ້ຍິນພໍ່ຮ້ອງເພງໃຫ້ຟັງຕັ້ງແຕ່ຍັງນ້ອຍ ເຊິ່ງເປັນເພງລາວສະໄໝເກົ່າ, ພໍໃຫຍ່ຂຶ້ນມາກໍໄດ້ຟັງຫຼາກຫຼາຍແນວ ຫຼັງຈາກນັ້ນລາວກໍຮູ້ສຶກວ່າມັກຮ້ອງເພງ ແລະ ຫຼົງໄຫຼໃນເພງແຣັບ ເພາະມັນບອກເລົ່າເລື່ອງລາວໄດ້ດີເລີຍເລີ່ມທີ່ຂະຮ້ອງເພງໃນວົງສ້າງສັນກັບໝູ່ ແຕ່ຕອນັ້ນກໍຍັງບໍ່ໄດ້ຈິງຈັງຫຼາຍ.
FCS The Viper ຕາມເດີມແລ້ວລາວເປັນຄົນມັກຂຽນເພງ ແຕ່ທີ່ຜ່ານມາຍັງບໍ່ໄດ້ມີໂອກາດໄດ້ເຮັດ, ລາວມັກເບິ່ງລາຍການແຣັບ ເພາະຮູ້ສຶກວ່າພວກເຂົາສາມາດເລົ່າເລື່ອງລາວຊີວິດຜ່ານເພງແຣັບໄດ້ກິນໃຈ.
ມີເຫດການໜຶ່ງທີ່ເກີດຂຶ້ນ ແລະ ເຮັດໃຫ້ລາວເສຍໃຈຫຼາຍ ເພາະຖືກຊ່ວງເວລາທີ່ໄດ້ເສຍ ພໍ່ ໄປແບບກະທັນຫັນ ບໍ່ທັນໄດ້ຕັ້ງໂຕ, ນີ້ກໍເລີຍເປັນຈຸດເລີ່ມຕົ້ນເພງທີ່ມີຊື່ວ່າ “ພໍ່” ທີ່ລາວໄດ້ສ້າງມາເພື່ອມອບໃຫ້ພໍ່.
ເພາະຍັງຮູ້ສຶກເສຍດາຍທີ່ບໍ່ໄດ້ຕອບແທນບຸນຄຸນເທົ່າທີ່ຄວນ, ຍັງມີຫຼາຍເລື່ອງລາວທີ່ຢາກຈະເຮັດທີ່ຢາກຈະເວົ້າກັບ ພໍ່ ແຕ່ມັນສາຍເກີນໄປ ເລີຍໄດ້ແຕ່ບອກເລົ່າເລື່ອງລາວຄວາມຮູ້ສຶກທີ່ຢາກເວົ້າກັບພໍ່ຜ່ານເວລາໃນເພງທີ່ມີ 4:32 ນາທີ ທີ່ລວມທຸກສິ່ງທຸກຢ່າງອັນແສນເຈັບປວດ ແລະ ຫວັງວ່າພໍ່ຈະໄດ້ຟັງມັນ.
FCS The Viper ຢາກຝາກບອກທຸກຄົນວ່າ:
ຖ້າທຸກຄົນທີ່ຍັງມີໂອກາດໄດ້ດູແລ ພໍ່ ໃຫ້ພວກເຈົ້າຫັນໜ້າກັບໄປເບິ່ງຜູ້ທີ່ໃຫ້ກຳເນີດເຮົາມາ ກ່ອນທີ່ຈະບໍ່ມີໂອກາດເຮັດມັນຄືກັບຂ້ອຍ.
ເນື້ອຫາຂອງເພງແມ່ນມາຈາກ ພໍ່ ແລະ ໄດ້ເຮັດເພງເພາະການສູນເສຍ ຈາກລູກຊາຍທີ່ບໍ່ຄ່ອຍກ້າສະແດງຄວາມຮັກຕໍ່ພໍ່ ທັງໆທີ່ມີຮ້ອຍລ້ານຄວາມໃນໃຈທີ່ຢາກບອກ ແຕ່ບໍ່ກ້າສະແດງອອກ.
ເພງ “ພໍ່” ແມ່ນ FCS The Viper ແລະ ນ້ອງຊາຍຂອງລາວທີ່ມີຊື່ໃນວົງການວ່າ TTZOLO ຊ່ວຍກັນຂຽນມັນຂຶ້ນມາ ເພາະໃນຊ່ວງວິນາທີລົມຫາຍໃຈສຸດທ້າຍໃນຊີວິດຂອງພໍ່ ແມ່ນລາວ ແລະ ນ້ອງຊາຍທີ່ຢູ່ກັບພໍ່ ເຊິ່ງທັງສອງນັ້ນໄດ້ເຂົ້າໃຈອາລົມຄວາມຮູ້ສຶກໃນເວລານັ້ນໄດ້ດີກວ່າໃຜ.
ເປົ້າໝາຍການໃຊ້ຊີວິດຫຼັງຈາກນີ້
FCS The Viper ໄດ້ເລົ່າໃຫ້ມ່ວນຟັງວ່າ ກໍຢາກເດີນໃນສາຍສິລະປິນ ແລະ ກໍຄິດວ່າໃຫ້ມັນເປັນເລື່ອງຂອງອານາຄົດໄປກ່ອນ ເຊິ່ງໃນຕອນນີ້ແມ່ນຢາກແຊຣ໌-ຢາກບອກເລົ່າເລື່ອງລາວຊີວິດຜ່ານບົດເພງໃຫ້ຫຼາຍຄົນໄດ້ຟັງ. ການຮ້ອງເພງມັນຍາກຫຼາຍ ເພາະກ່ອນຈະຖ່າຍທອດອາລົມຜ່ານສຽງເພງມັນບໍ່ງ່າຍ, ຕ້ອງໃຊ້ພະລັງຄວາມຄິດ ແລະ ຢາກໃຫ້ຜູ້ຄົນໄດ້ເຫັນໃນມຸມມອງຂອງລາວທີ່ໄດ້ສື່ສານອອກໄປຢ່າງເຕັມທີ່.
ຄວາມແຕກຕ່າງລະຫວ່າງ ບາຣິສຕາ ແລະ ການຮ້ອງເພງ
ບົດບາດທີ່ລາວໄດ້ເຮັດທັງສອງຄື ບາຣິສຕາ ແລະ ການຮ້ອງເພງ, ແມ່ນມີຄວາມແຕກຕ່າງກັນຫຼາຍຢ່າງ ເພາະຢ່າງໜຶ່ງກໍເປັນວຽກບໍລິການ ແລະ ອີກຢ່າງເປັນສິລະປິນ. ແຕ່ສິ່ງທີ່ຄືກັນທັງສອງຢ່າງແມ່ນລາວມີເປົ້າໝາຍອັນດຽວກັນຄື “ການສົ່ງຕໍ່ຄວາມຮູ້ສຶກ ແລະ Passion ໃຫ້ຜູ້ຮັບໄດ້ຮັບຄວາມສຸກ, ເສົ້າ ແລະ ລົດຊາດແຊບໆຂອງກາແຟ.
FCS The Viper ມີສິລະປິນທີ່ມັກແມ່ນ Jazz JSPKK ຮູ້ສຶກວ່າມີຊີວິດຄ້າຍຄືກັນກັບລາວ ເປັນນັກສະແດງຕາຫຼົກທີ່ສູ້ຊີວິດ ແລະ ເສຍພໍ່, ເພາະສ່ວນໂຕ FCS The Viper ກໍມີອາຊີບເປັນ Barista ທີ່ຜ່ານເກມການແຂ່ງຂັນ, ໄດ້ສູ້ກັບອຸປະສັກ ແລະ ເສຍພໍ່ຄືກັນ.
ປັດຈຸບັນແມ່ນລາວໄດ້ປ່ອຍຜົນງານມາພຽງແຕ່ເພງດຽວ, ຖ້າມີໂອກາດ ຫຼື ເວລາທີ່ເໝາະສົມກໍຈະສ້າງສັນຜົນງານອື່ນໆໃຫ້ພວກເຮົາທຸກຄົນໄດ້ຟັງກັນອີກແນ່ນອນ. ສຸດທ້າຍ FCS The Viper ໄດ້ຝາກເຖິງທຸກຄົນໃຫ້ລົງມືເຮັດໃນສິ່ງທີ່ມັກ, ສາມາດເຮັດໄດ້ເລີຍ ບໍ່ຕ້ອງຖ້າໃຫ້ຄວາມສຳເລັດມາຫາເຮົາ, ພວກເຮົາຕ້ອງແລ່ນເຂົ້າໄປຫາມັນ ແລ້ວພວກເຮົາຈະຮູ້ວ່າເຮົາຢູ່ເໜືອທຸກຢ່າງ ຢ່າໃຫ້ໂຊກສະຕາມາກຳນົດຊີວິດເຮົາ.
