ເຮົາຢູ່ໃນຍຸກທີ່ອິນເຕີເນັດສາມາດພາໄປຮູ້ຈັກກັບສິ່ງໃໝ່ໆໄດ້ຢ່າງງ່າຍດາຍ ແລະ ມັນລວມເຖິງຂ່າວສານຕ່າງໆ, ຊຸມຊົນໃນໂລກອອນລາຍ ຫຼື ການໄດ້ຮັບອິດທິພົນຈາກວັດທະນະທຳຕ່າງປະເທດທີ່ໄດ້ເຂົ້າມາປະສົມປະສານເອກະລັກໄດ້ຢ່າງກົມກ່ອມກັບວັດທະນະທຳທ້ອງຖິ່ນລາວ.

ຫຼາຍຄົນຄົງຈະສົງໄສ ແລະ ເກີດຄຳຖາມໃນຫົວວ່າ Pop Culture ຫຼື ວັດທະນະທຳປັອບແມ່ນຫຍັງ? ສິ່ງທີ່ໄວໜຸ່ມໄດ້ສະແດງອອກທາງພຶດຕິກຳວ່າຈະເປັນທັງເພງ, ແຟຊັນ ຫຼື ຄົນທີ່ມີຊື່ສຽງກຳລັງນິຍົມເປັນກະແສໃນສັງຄົມ. ມ່ວນ ຂໍເວົ້າໃຫ້ເຂົ້າໃຈກັນງ່າຍໆເລີຍວ່າ “Pop Culture ຄື ສິ່ງທີ່ຜູ້ຄົນກຳລັງມັກ ແລະ ເຮັດຕາມກັນເປັນຈຳນວນຫຼາຍ” ໂດຍສະເພາະກຸ່ມໄວໜຸ່ມທີ່ເຊື່ອມໂຍງກັນຜ່ານໂຊຊຽວມີເດຍ.

Pop Culture ບໍ່ພຽງແຕ່ “ຜ່ານມາແລ້ວຜ່ານໄປ” ແຕ່ມັນໄດ້ກາຍເປັນສ່ວນໜຶ່ງ ແລະ ໄດ້ຊືມເລີກເຂົ້າເຖິງຈິດໃຈພວກເຂົາ ແລະ ມັນໄດ້ປຽບສະເໝື່ອນກັບໂລກນ້ອຍໆທີ່ເລືອກຍຶດເອົາມາເປັນສ່ວນໜຶ່ງໃນການໃຊ້ຊີວິດຂອງຕົວເອງ ເພື່ອສະແດງໃຫ້ເຫັນວ່າພວກເຂົາກໍມີຕົວຕົນ.

ໃນປັດຈຸບັນນີ້, ໄວໜຸ່ມກຳລັງສ້າງສັງຄົມໃໝ່ຈາກສິ່ງທີ່ພວກເຂົາຮັກ ສິ່ງທີ່ສຳຄັນກວ່ານັ້ນຄືການກະທຳທຸກຢ່າງທີ່ພວກເຂົາສະແດງອອກມັນໄດ້ສະທ້ອນຄວາມຮູ້ສຶກ, ຄວາມຄິດ  ແລະ ຕົວຕົນຂອງຄົນໃນສັງຄົມໃນເມືອງວຽງຈັນ. Pop Culture ມັນໄດ້ສ້າງຄວາມມີຊີວິດຊີວາໃຫ້ພວກເຂົາ ບໍ່ວ່າຈະເປັນກິດຈະກຳຕ່າງໆໃຫ້ພວກເຂົາເຮັດ, ການໄດ້ຮັບແຮງບັນດານໃຈໃໝ່ໆທີ່ດີໃນການສ້າງສັນຜົນງານຂອງພວກເຂົາ ແລະ ການເຮັດໃຫ້ສັງຄົມມ່ວນຊື່ນຂຶ້ນມາໄດ້.

Pop Culture ໃນໃຈໄວໜຸ່ມລາວຢູ່ນະຄອນຫຼວງວຽງຈັນ

Pop Culture ກຳລັງເຮັດໃຫ້ ນະຄອນຫຼວງວຽງຈັນ ມີຊີວິດຊີວາອີກຄັ້ງ

ຈາກຂໍ້ຄວາມທາງເທີງນີ້ ບໍ່ແມ່ນນິຍາມທີ່ເຮົາບໍ່ສາມາດເອື້ອມເຖິງອີກຕໍ່ໄປ ແຕ່ມັນແມ່ນສິ່ງທີ່ຢູ່ໃກ້ຕົວພວກເຮົາ ແລະ ສາມາດເຂົ້າເຖິງມັນໄດ້ຢູ່ແລ້ວ ໃນຕອນນີ້ກິດຈະກຳບາງສ່ວນທີ່ ມ່ວນ ເລົ່າເຖິງກໍສາມາດຈັບຕ້ອງໄດ້ ແລະ ມັນໄດ້ກາຍເປັນສ່ວນໜຶ່ງໃນຊີວິດປະຈຳວັນທີ່ພົບເຫັນຢູ່ຕະຫຼອດ.

ໃນມື້ພັກວັນເສົາ-ອາທິດ ຖ້າເຮົາໄດ້ລອງອອກໄປຍ່າງຫຼິ້ນຢູ່ສູນການຄ້າໃຈກາງເມືອງ, ອາດພົບກຸ່ມໄວໜຸ່ມທີ່ແຕ່ງຕົວ ງາມ-ຫຼໍ່ ແບບເກົາຫຼີ ຫຼື ຊຸດແຕ່ງກາຍທີ່ເທ່ສຸດພະລັງ ພວກເຂົາດູດີບໍ່ຕ່າງຫຍັງຈາກໄວໜຸ່ມຢູ່ຕ່າງປະເທດທີ່ເຫັນໃນໂຊຊຽວ ແລະ ພວກເຂົາທີ່ກຳລັງເຮັດກິດຈະກຳກ່ຽວກັບການເຕັ້ນ Random Dance ຫຼື Cover Dance (ໄດ້ຮັບກະແສມາຈາກວົງການ K-pop), ການແຂ່ງເຕັ້ນ Hip-Hop (ໄດ້ຮັບມາຈາກຝັ່ງອາເມລິກາ) ຫຼື ການແຂ່ງຂັນກິລາປະເພດຕ່າງໆ (Basketball, E-sports ແລະ ອື່ນໆ).

ພວກເຂົາມັກຈະລວມຕົວກັນເພື່ອແຂ່ງຂັນໃນງານເທດສະການໃດໜຶ່ງ ການແຂ່ງຂັນຄວາມສາມາດນີ້ກໍມ່ວນຊື່ນ ແລະ ດຸເດືອດ ເຮັດໃຫ້ອາລົມຄົນທີ່ເຂົ້າຮ່ວມງານກໍໄດ້ເຕີມໄຟ-ເຕີມກຳລັງໃຈເຊັ່ນດຽວກັນ.

ການເຊື່ອມໂຍງກັນຂອງໄວໜຸ່ມຜ່ານໂຊຊຽວມີເດຍ

ກິດຈະກຳອັອບລາຍທີ່ມີຢູ່ມັນກໍບໍ່ພຽງພໍ ແຕ່ຍັງດີທີ່ພວກເຂົາກໍຍັງມີແພລດຟອມອອນລາຍຢ່າງ TikTok ທີ່ກາຍເປັນພື້ນທີ່ໃນການສະແດງອອກຂອງພວກເຂົາອີກທາງໜຶ່ງ ເພາະສັງຄົມອອນລາຍກໍເປັນອີກທາງເລືອກໃຫ້ພວກເຂົາໃຊ້ເປັນເວທີໃຫ້ພວກເຂົາໄດ້ໃຊ້ສະແດງຕົວຕົນສະແດງຄວາມຄິດສ້າງສັນແບບບໍ່ມີຂອບເຂດຄວາມສາມາດ ແລະ ໃຊ້ໂທລະສັບພຽງໜ່ວຍດຽວກໍເຮັດໄດ້ແລ້ວ.

ຂອບໃຈພາບ: ມາຕາມນັດ – Ma tam nut

TikTok ຍັງເປັນພື້ນທີ່ໃຫ້ຜູ້ສ້າງເນື້ອຫາທີ່ເປັນຄົນທຳມະດາສາມາດເລົ່າເລື່ອງໄດ້ຈົນເຮັດໃຫ້ບາງຄົນມີຄົນຮູ້ຈັກ ແລະ ກາຍເປັນຄົນມີຊື່ສຽງ, ກາຍເປັນວຽກ ແລະ ຕໍ່ຍອດເປັນລາຍໄດ້ຂຶ້ນມາຈາກການຣີວິວຮ້ານອາຫານ-ຄາເຟ່, Vlog ຊີວິດປະຈຳວັນ, OOTD ຫຼື Outfit of the Day (ສະໄຕລ໌ການແຕ່ງຕົວປະຈຳວັນ) ສິ່ງເຫຼົ່ານີ້ໄດ້ກາຍເປັນເນື້ອຫາຍອດນິຍົມທີ່ສ້າງສັນ ແລະ ກຳລັງຄອງໜ້າຟີດ TikTok ຢູ່ທຸກມື້ນີ້.

ວົງການເພງລາວກຳລັງກັບມາເປັນກະແສ

ສິລະປິນອິນດີ້ລາວ ແລະ HipHop ລາວກໍມາແຮງບໍ່ແພ້ກັນ, ສິລະປິນລາວໜ້າໃໝ່ສາຍອິນດີ້ຢ່າງຄ້າຍເພງ SurfTape ກຳລັງສ່ອງປະກາຍ ໂດຍມີເປົ້າໝາຍຢາກສ້າງ  “ຄື້ນແຫ່ງສຽງເພງ” ທີ່ພັດຜ່ານວົງການເພງລາວ ແລະ Rapper ທີ່ມີສາຍເລືອດລາວແບບເຂັ້ມຂຸນຕ້ອງການສ້າງສິ່ງທີ່ແຕກຕ່າງ ເພື່ອສະແດງສັກກະຍະພາບສູ່ສາຍຕາຊາວໂລກ ດ້ວຍທຳນອງເພງ-ຈັງຫວະດົນຕີ ທີ່ບໍ່ມີພາສາເຂດແດນໃດກັ້ນ. ສິລະປິນຮຸ່ນໃໝ່ຫຼາຍຄົນກໍມີໂອກາດຮ່ວມງານກັບສິລະປິນຕ່າງປະເທດ, ເລີ່ມມີແຟນເພງຕິດຕາມທັງໃນ ແລະ ນອກປະເທດ ສິ່ງທີ່ໄດ້ມາກໍດ້ວຍຄວາມສາມາດຂອງພວກເຂົາເອງແທ້ໆ.

ພວກເຂົາບໍ່ລໍຖ້າຄ້າຍໃຫຍ່ ແຕ່ພວກເຂົາໄດ້ຊ່ວຍກັນຜະລິດຜົນງານຂຶ້ນມາເອງ, ທັງການທົດລອງ ຜິດ-ຖືກ, ຝຶກຝົນສີມື ທີ່ພວກເຮົາບໍ່ອາດຮູ້ວ່າມັນຍາກຂະໜາດໃດ ເພາະບ້ານເຮົາຍັງບໍ່ມີສິ່ງທີ່ເອື້ອອຳນວຍໃຫ້ພວກເຂົາຢ່າງພຽງພໍ ແລະ ຄວາມພະຍາຍາມຂອງພວກເຂົາກໍບໍ່ເຄີຍຢຸດຢູ່ກັບທີ່ ພວກເຂົາເຫັນໂອກາດໂດຍໃຊ້ແພລດຟອມສະຕຣີມມິ່ງຢ່າງ YouTube, TikTok ແລະ Spotify ເປັນເວທີປ່ອຍຂອງ ຫຼື ຜົນງານເພງນັ້ນເອງ.

ເມື່ອ Pop Culture ເຂົ້າມາຢູ່ໃນຊີວິດປະຈຳວັນ

• ຮ້ານຄາເຟ່ທີ່ບົ່ງບອກເຖິງໄລຟ໌ສະໄຕລ໌ຊາວເມືອງ: ຄາເຟ່ສຸດຊິກ ທຸກຮ້ານມີມຸມສວຍງາມ ແລະ ແສງດີ ຕົວຮ້ານແມ່ນໄດ້ຜຸດຂຶ້ນຫຼາຍທົ່ວຕົວເມືອງວຽງຈັນ ໂດຍຮ້ານເຫຼົ່ານີ້ໃນວຽງຈັນຫຼາຍແຫ່ງຖືກອອກແບບໃຫ້ຖ່າຍຮູບງາມ, ມີມຸມສຳລັບໂພສລົງອິນສະຕາແກຣມ ທັງຟີລເກົາຫຼີ-ຍີ່ປຸ່ນ ຫຼື ມິນິມອລ ເພື່ອດຶງດູດສາຍ Cafe Hopper ທີ່ມາຖ່າຍລົງໂຊຊຽລ.

• ແຟຊັນແມ່ນການສະແດງຕົວຕົນອີກສິ່ງໜຶ່ງ: ສາຍແຟຊັນໃນວຽງຈັນກໍແຕ່ງຕົວດູດີບໍ່ເບົາເລີຍ ເຄື່ອງນຸ່ງກາຍເປັນອີກພາສາທີ່ໄວໜຸ່ມໃຊ້ເລົ່າວ່າພວກເຂົາເປັນໃຜ, ບາງຄົນແຕ່ງແນວເກົາຫຼີ Casual ແລະ ບາງຄົນເລືອກແນວສະຕຣີດແວທີ່ມີຄວາມເປັນຕົວເອງ ສິ່ງເຫຼົ່ານີ້ມັນໄດ້ເຮັດໃຫ້ເຫັນວ່າທຸກການແຕ່ງຕົວຄື ການປະກາດເອກະລັກທີ່ແນມເຫັນແລ້ວຮູ້ເລີຍໂດຍບໍ່ຕ້ອງໃຊ້ຄຳເວົ້າໃດໆ.

• ຄຣີເອເຕີຮຸ່ນໃໝ່ສ້າງແຮງບັນດານໃຈ: ຫຼາຍຄົນທີ່ຫຼິ້ນໂຊຊຽຈາກທຳອິດກໍຖ່າຍຫຼິ້ນໆ ແຕ່ປະກົດວ່າຄລິບທີ່ເຮັດກາຍເປັນໄວຣັສ ແລະ ຈາກນັ້ນກໍມີຜູ້ຕິດຕາມຫຼາຍຂຶ້ນກາຍເປັນຜູ້ມີຊື່ສຽງ, ມີລູກຄ້າມາຈ້າງງານຈົນເຮັດໃຫ້ມັນກາຍເປັນລາຍໄດ້ຫຼັກເລີຍກໍວ່າໄດ້ ເພາະການເຮັດການຕະຫຼາດໃນປັດຈຸບັນຫຼາຍໆແບຣນກໍມັກຈະໃຫ້ພວກເຂົາເຫຼົ່ານີ້ໃຫ້ມາຊ່ວຍສ້າງຄວາມຄິດສ້າງສັນເພື່ອໄດ້ປະສົບການທີ່ແປກໃໝ່ແກ່ກຸ່ມລູກຄ້າພວກເຂົາ.

ພະລັງຂອງກະແສ Pop Culture ແລະ ສິ່ງຄວນລະວັງ

ໄວໜຸ່ມຍຸກໃໝ່ກຳລັງຊ່ວຍກັນຊຸກດັນເອກະລັກ Pop Culture ໃນລາວ ສ້າງແຮງບັນດານໃຈໃໝ່ໆໃຫ້ຊຸມຊົນ, ເຮັດໃຫ້ຊາວໂລກແນມເຫັນເພື່ອໃຫ້ພວກເຂົາໄດ້ຮູ້ຈັກໃຫ້ກາຍເປັນ Soft Power ເພື່ອຊ່ວຍກະຕຸ້ນທຸລະກິດ ແລະ ເປັນການດຶງລາຍໄດ້ຈາກນອກປະເທດເຂົ້າມາພາຍໃນທ້ອງຖິ່ນເຊັ່ນ: ຮ້ານກາເຟ, ຮ້ານອາຫານ, ຮ້ານເສື້ອຜ້າແຟຊັ່ນ ຫຼື ເຄື່ອງນຸ່ງແບບທ້ອງຖິ່ນລາວ ແລະ ກິດຈະກຳອີເວັ້ນຕ່າງໆ.

View this post on Instagram

A post shared by ມ່ວນຊວນໄປ (@muansuanpai)

ແຕ່ມັນກໍຍັງມີສິ່ງທີ່ພວກເຮົາຕ້ອງລະວັງຄື ຄວາມກົດດັນໃນການ “ຕາມກະແສ” ຈົນອາດເຮັດໃຫ້ຮູ້ສຶກບໍ່ພໍໃຈໃນຕົວເອງ ຫຼຶ Low Self-esteem ມັນອາດຈະເຮັດໃຫ້ສະພາບຈິດໃຈພວກເຮົາອ່ອນແອໄດ້, ບາງຄົນອາດຮູ້ສຶກວ່າ “ຕົວເອງບໍ່ເຂົ້າກັບເລື່ອງນີ້” ຫຼື “ຂ້ອຍບໍ່ແມ່ນສາຍນີ້” ເຮັດໃຫ້ເກີດຄວາມຮູ້ສຶກຖືກແບ່ງແຍກອອກຈາກຊຸມຊົນ.

ອະນາຄົດຂອງ Pop Culture ໃນນະຄອນຫຼວງວຽງຈັນ

ນະຄອນຫຼວງວຽງຈັນກຳລັງເຂົ້າສູ່ຍຸກໃໝ່ຂອງຄວາມຄິດສ້າງສັນໂດຍທີ່ໂລກຂອງ Pop Culture ໄດ້ເຊື່ອມໂຍງກັນດ້ວຍໂຊຊຽວມີເດຍ ແລະ ເປີດໂອກາດໃຫ້ຄົນຮຸ່ນໃໝ່ໄດ້ມີເວທີໃນການສະແດງອອກທັງອິນຟລູເອນເຊີ (Influencer) ຫຼື ສິລະປິນລາວທີ່ມີເພງດັງໄດ້ຮັບຄວາມນິຍົມຂຶ້ນ. ເນຶ້ອຫາທີ່ພວກເຂົາສ້າງສັນມັນຍິ່ງຈະໂດດເດັ່ນເພາະໄວໜຸ່ມກໍໄດ້ຫັນມາສົ່ງເສີມກັນຫຼາຍຂຶ້ນ ປະກອບດ້ວຍອິນທິພົນຈາກ Pop Culture ທີ່ກຳລັງເຂົ້າມາໃນປະເທດລາວເຮົາ ໄດ້ເຫັນຊ່ອງທາງການແຂ່ງຂັນດ້ານເສດຖະກິດ.

ໃນປີ 2024 – 2025 ນີ້, ກໍເລີ່ມມີຄ້າຍເພງໄດ້ສ້າງ ແລະ ປ່ອຍຜົນງານເພງທີ່ຫຼາກຫຼາຍຂອງສິລະປິນທັງເປັນ ກຸ່ມຍິງ-ຊາຍ, Raper-Hip hop ແລະ ອິນດີ້ ອອກມາເຮັດໃຫ້ວົງການບັນເທີງລາວກັບມາມີສີສັນຄືກັນກັບຊ່ວງປີ 2000 ທີ່ພວກເຮົາໄດ້ນິຍາມໄວ້ວ່າ L-POP.

ຫຼັງຈາກນີ້ທຸກຄົນລອງສັງເກດນະຄອນຫຼວງວຽງຈັນຂອງເຮົາ ວ່າມັນອາດຈະມີຄາເຟ່ເປີດໃໝ່, ເພງໃໝ່ຈາກສິລະປິນທີ່ເຮົາບໍ່ຄຸ້ຍເຄີຍ ຫຼື ແນວແຟຊັນທີ່ເປັນກະແສຢູ່. ຕອນນີ້ເຈົ້າກຳລັງເລີ່ມ “ມັກນະຄອນຫຼວງວຽງຈັນ” ແລ້ວ ຫຼື ຍັງ?