ຫຼາຍຄົນອາດຈະຮູ້ສຶກຄຸ້ນເຄີຍ ແລະ ຄຸ້ນໜ້າສາວຄົນນີ້ຜ່ານການໂຕ້ວາທີມາກ່ອນຢູ່ແລ້ວ ແຕ່ມື້ນີ້ມ່ວນຈະພາມາຮູ້ຈັກລາວໃຫ້ຫຼາຍຂຶ້ນກວ່າເກົ່າ ໃນບົດບາດການເຮັດວຽກໃນດ້ານກົດໝາຍ ແລະ ຍັງເປັນພິທີກອນໜ້າໃໝ່ທີ່ຈະມາເຜີຍມຸມມອງການເດີນທາງຂອງລາວໃນການຂັບເຄື່ອນສັງຄົມ ແລະ ການພັດທະນາໄວໜຸ່ມ ເພື່ອສ້າງສັງຄົມໃຫ້ໜ້າຢູ່ສຳລັບຄົນຮຸ່ນໃໝ່.
ສຸພາວັນ ແສນສຸພັນ ຫຼື ຕຸລີ່ ປັດຈຸບັນກຳລັງເຮັດວຽກເພື່ອເກັບກ່ຽວປະສົບການທາງດ້ານຂົງເຂດກົດໝາຍ ແລະ ກົດໝາຍສິ່ງແວດລ້ອມ ພ້ອມທັງໄດ້ປະກອບສ່ວນໃນການສ້າງການມີສ່ວນຮ່ວມຂອງໄວໜຸ່ມລາວ. ລາວມັກຈະປະກອບສ່ວນໃນກິດຈະກຳຕ່າງໆໃນຊຸມຊົນສຳລັບໄວໜຸ່ມ ແລະ ຫຼາຍຄົນກໍຈະສັງເກດເຫັນວ່າລາວມີລັກສະນະເປັນຄົນທີ່ Extrovert (ຄົນມັກເຂົ້າສັງຄົມ) ຫຼາຍ ແລະ ມ່ວນ ກໍໄດ້ຮັບຄຳຢືນຢັນຈາກລາວວ່າ ແຕ່ກ່ອນກໍເປັນແບບນັ້ນແທ້ ແຕ່ພໍເວລາຜ່ານໄປລາວເຂົ້າໃຈໂລກຫຼາຍຂຶ້ນ, ຄວາມມັກ-ຮັກໃນຫຼາຍໆສິ່ງກໍໄດ້ຜັນປ່ຽນໄປຕາມການເວລາ, ມັນໄດ້ຊ່ວຍເຮັດໃຫ້ລາວເປັນຄົນທີ່ມັກຄວາມສະຫງົບຫຼາຍຂຶ້ນ ແລະ ມັກບັນຍາກາດງຽບໆທີ່ສຽງບໍ່ດັງຫຼາຍເກີນໄປ.
ຕຸລີ່ ກັບບົດບາດວຽກສາຍພິທີກອນ
ເມື່ອເວົ້າເຖິງເລື່ອງວຽກໃນສາຍພິທີກອນແມ່ນມັນໄດ້ເລີ່ມຈາກ ຕຸລີ່ ໄດ້ເຂົ້າໄປຊ່ວຍຄົນຮູ້ຈັກກ່ອນ ເພື່ອເກັບກ່ຽວຊົ່ວໂມງບິນ ແລະ ອາໄສພື້ນທີ່ໃນການສຶກສາຂັ້ນຕອນການເຮັດວຽກ ລວມໄປເຖິງທັກສະຕ່າງໆໃນການແກ້ໄຂບັນຫາສະເພາະໜ້າ ເຊິ່ງແທ້ຈິງແລ້ວໃນສະໄໝຮຽນມັດທະຍົມ, ຢູ່ໂຮງຮຽນຈະມີຊົ່ວໂມງຮຽນທັກສະການເວົ້າຕໍ່ໜ້າສາທາລະນະທຸກໆວັນເສົາຕາມໂປຣແກຣມ, ລາວໄດ້ຮຽນເວົ້າປະມານ 2-3 ເດືອນ ປະກອບກັບລາວເປັນຄົນມັກລົມ-ມັກເວົ້າ ເລີຍໄດ້ມີໂອກາດເປັນຕົວແທນໂຮງຮຽນໄປແຂ່ງໂຕ້ວາທີ.
ຖ້າສາມາດຍ້ອນກັບໄປແກ້ໄຂຊ່ວງເວລາໜຶ່ງໃນຊີວິດ, ຢາກເຮັດຫຍັງ?
“ຖ້າຍ້ອນເວລາກັບໄປໄດ້ຢາກກັບໄປຊ່ວງປະຖົມ ຈະນອນໃຫ້ຫຼາຍໆ, ໃນສ່ວນທີ່ເຫຼືອແມ່ນບໍ່ໄດ້ຢາກແກ້ໄຂຫຍັງແລ້ວ ເພາະພະຍາຍາມ Embrace (ໂອບກອດ) ກັບທຸກສິ່ງທີ່ຜ່ານເຂົ້າມາໃຫ້ຮຽນຮູ້ ຫຼື ອີກຢ່າງໜຶ່ງແມ່ນຢາກປ່ຽນແປງຕົວເອງຫຼາຍກວ່າ ເພາະເປັນຄົນຍືດເຍື້ອ, ຕັ້ງໃຈຊິເຮັດວຽກມື້ນີ້ ພັດໄປເຮັດມື້ອື່ນ ບໍ່ຈົບບໍ່ສິ້ນຈົນກວ່າຊິໃກ້ເດດລາຍ” ຕຸລີ່ກ່າວພ້ອມຍິ້ມຫົວດ້ວຍຄວາມອາລົມດີ.
ທັກສະການເວົ້າທີ່ ຕຸລີ່ ໄດ້ຮັບ ແລະ ຝືກຝົນ ມັນໄດ້ຮັບການຂັດເກົາໃນຊ່ວງນັ້ນເປັນຕົ້ນມາ ພໍລາວໄດ້ມາເຮັດວຽກພິທີກອນທີ່ສ່ວນໃຫຍ່ແມ່ນຮັບກ່ຽວກັບງານສາຍພັດທະນາ ແລະ ຜົນພອຍໄດ້ທີ່ລາວໄດ້ຮັບຄືການໄດ້ເຕີມໄຟໃຫ້ຕົວເອງ. ວຽກໃນດ້ານນີ້ກໍທ້າທາຍຢູ່ບາງເທື່ອ ບາງງານກໍອາດຈະຕ້ອງໄດ້ປ່ຽນກະທັນຫັນ ເຊິ່ງມັນກໍຈະມີໂໝດປົກກະຕິ ແລະ ໂໝດທີ່ພີກ (peak) ໄປເລີຍ. ບາງເທື່ອຢູ່ດີໆກໍຈະມີຣີເຄວສມາໃໝ່ໃນໜ້າງານ ໂດຍສະເພາະງານທີ່ເປັນສອງພາສາ, ແຕ່ຖືວ່າມ່ວນ ແລະ ທ້າທາຍໄປອີກແບບໃນການເຮັດໂປຣເຈັກສຽງ ຖືວ່າ ຕຸລີ່ ໄດ້ຮຽນຮູ້ຫຼາຍຈາກວຽກສາຍພິທີກອນ.
ປະສົບການໃນການເຮັດກິດຈະກຳທີ່ຜ່ານມາ, ສິ່ງທີ່ປະທັບໃຈ ແລະ ພູມໃຈທີ່ສຸດ
ຕຸລີ່ ເປັນຄົນໜຶ່ງທີ່ມັກ-ຮັກໃນການເຮັດກິດຈະກຳ ແລະ ລາວກໍພູມໃຈກັບທຸກປະສົບການທີ່ຜ່ານເຂົ້າມາໃນຊີວິດ ເພາະຖ້າຂາດອັນໃດໜຶ່ງໄປມັນກໍຄືຈະບໍ່ແມ່ນລາວທີ່ເປັນລາວໃນຮູບແບບປັດຈຸບັນນີ້. ຕຸລີ່ ໄດ້ເລົ່າໃຫ້ ມ່ວນ ຟັງ ແລະ ພາຍ້ອນກັບໄປໃນສະໄໝຍັງນ້ອຍຕອນທີ່ລາວຮຽນຢູ່ ມ. ປາຍ.
ຕຸລີ່ ໄດ້ເລີ່ມຕົ້ນເສັ້ນທາງການເຮັດວຽກເພື່ອສັງຄົມ ໂດຍການສົ່ງເສີມວຽກງານສິດທິເດັກຮ່ວມກັບອົງການຈັດຕັ້ງສາກົນ ແລະ ພາກລັດ ໃນການເສີມສ້າງຄວາມເຂັ້ມແຂງໃຫ້ເດັກນ້ອຍກ່ຽວກັບສິດທິເດັກ ແລະ ຢຸດຕິຄວາມຮຸນແຮງຕໍ່ເດັກນ້ອຍມາໂດຍຕະຫຼອດໄປຈົນຮອດການໃຫ້ຄວາມຮູ້ກ່ຽວກັບສຸຂະພາບການຈະເລີນພັນ ເຊິ່ງມັນເປັນປະສົບການທີ່ດີ ແລະ ທ້າທາຍຫຼາຍ. ໃນການເຮັດວຽກດ້ານນີ້ກໍບໍ່ງ່າຍເລີຍ ເພາະການເຂົ້າໄປຫາເດັກນ້ອຍຫຼາຍໆກຸ່ມທີ່ມີຄວາມຮັບຮູ້ ຫຼື ຄວາມເຂົ້າໃຈທີ່ແຕກຕ່າງກັນ.
ເຖິງໃນໜ້າວຽກທີ່ ຕຸລີ່ ໄດ້ຮັບມາໃນບາງຄັ້ງມັນຈະຍາກລຳບາກແດ່ ແຕ່ກໍເຮັດໃຫ້ລາວຮູ້ສຶກມີຄວາມສຸກທຸກຄັ້ງທີ່ໄດ້ແບ່ງປັນຄວາມຮູ້ທີ່ມີ ແລະ ແລກປ່ຽນປະສົບການຮ່ວມກັບພວກເຂົາ. ໃນການເຮັດກິດຈະກຳທີ່ຜ່ານມາ ຕຸລີ່ ກໍໄດ້ມີຊ່ວງເວລາທີ່ເຮັດໃຫ້ລາວປະທັບໃຈຫຼາຍ ແລະ ມັນຍັງເປັນຂີດໝາຍທີ່ສຳຄັນໃນການຈຸດປະກາຍໄຟວຽກງານດ້ານສັງຄົມ, ການໄດ້ລົງໄປຊຸມຊົນທີ່ແຂວງອັດຕະປືລາວໄດ້ເຫັນບັນຫາທີ່ເກີດຂຶ້ນ ບໍ່ວ່າຈະເປັນຄວາມຮຸນແຮງໃນຄົວເຮືອນ, ການທີ່ເດັກນ້ອຍແຕ່ງດອງກ່ອນໄວອັນຄວນຍ້ອນປັດໄຈທາງດ້ານສັງຄົມ ແລະ ອື່ນໆອີກຫຼາກຫຼາຍ.
ການທີ່ຂ້ອຍໄດ້ໂອ້ລົມກັບໄວໜຸ່ມອັດຕະປືໃນຊ່ວງເວລານັ້ນທີ່ໄດ້ລົງພື້ນທີ່ ມັນເຮັດໃຫ້ຂ້ອຍໄດ້ຮັບຮູ້ເຖິງຄວາມທ້າທາຍໃນຊີວິດຂອງພວກເຂົາຫຼາຍ, ມັນໄດ້ສົ່ງຜົນກະທົບຕໍ່ຈິດໃຈຂ້ອຍ ແລະ ເຮັດໃຫ້ຮູ້ສຶກຄ້ອຍໃຈ. ຂ້ອຍໄດ້ແຕ່ບອກກັບຕົວເອງວ່າ ເຮົາຊິພະຍາຍາມໃຫ້ຄວາມຮູ້ເທົ່າທີ່ເຮົາມີເພື່ອແບ່ງປັນໃຫ້ພວກເຂົາ ແລະ ແບ່ງປັນຄວາມຮູ້ຜ່ານທາງຊ່ອງທາງຕ່າງໆໃຫ້ສາມາດເຂົ້າເຖິງເດັກນ້ອຍ ແລະ ໄວໜຸ່ມຫຼາຍໆຄົນ ເພື່ອໃຫ້ພວກເຂົາໄດ້ຮັບຮູ້ວ່າ ‘ພວກເຂົາບໍ່ໄດ້ຢືນຢູ່ພຽງລຳພັງ’.
ເຫດການຈາກມື້ນັ້ນທີ່ໄດ້ພົບເຈິ ຕຸລີ່ ກໍໄດ້ເປັນຜູ້ໃຫຍ່ຂຶ້ນ ລາວຍັງຄົງສືບຕໍ່ຕັ້ງໜ້າເຮັດວຽກໃນການສ້າງການມີສ່ວນຮ່ວມໃຫ້ແກ່ໄວໜຸ່ມຄືເກົ່າ, ຫາກແຕ່ລາວໄດ້ມີການວາງແຜນເຮັດໃຫ້ມັນມີໂຄງສ້າງ ແລະ ການປະສານງານຮ່ວມກັບຫຼາຍພາກສ່ວນຍິ່ງຂຶ້ນ, ເພື່ອສ້າງຄວາມຮັບຮູ້ທີ່ດີໂດຍອາໄສການຮຽນຮູ້ນຳຜູ້ມີປະສົບການເຊັ່ນກັນ.
ຕຸລີ່ ເປັນຄົນທີ່ມີ Passion (ຄວາມຫຼົງໃຫຼ) ກ່ຽວກັບການສ້າງຄົນ ແລະ ສ້າງຄວາມສາມາດໃຫ້ໄວໜຸ່ມຕັ້ງແຕ່ຍັງນ້ອຍ, ເປັນຄົນມັກຕັ້ງຄຳຖາມຕະຫຼອດ ເພາະ ຕຸລີ່ ເຊື່ອສະເໝີວ່າໄວໜຸ່ມລາວແມ່ນເກັ່ງຫຼາຍ ແຕ່ພວກເຂົາຍັງຂາດພື້ນທີ່ໃນການສະແດງຄວາມຄິດເຫັນ ຫຼື ພື້ນທີ່ທີ່ພວກເຂົາສາມາດຮຽນຮູ້ບັນຫາໃດໜຶ່ງທີ່ສາມາດລົງເລິກ.
ຈາກເຫດຜົນທີ່ ຕຸລີ່ ໄດ້ຮັບຮູ້ມາ ແລະ ການເກັບຂໍ້ມູນຕົວຈິງທີ່ເກີດຂຶ້ນໃນລາວ ເຮັດໃຫ້ໃນປີ 2019 ຮຸ່ນເອື້ອຍ-ອ້າຍຂອງລາວ ໄດ້ສ້າງກຸ່ມຊຸມຊົນ Youth Initiative ທີ່ມີຊື່ວ່າ HUBBO ເຊິ່ງລາວເອງກໍໄດ້ເຂົ້າໄປຊ່ວຍປະສານງານນຳເອື້ອຍ-ອ້າຍໃນຊຸມຊົນນີ້, ດ້ວຍຄວາມທີ່ຢາກມີພື້ນທີ່ໃຫ້ໄວໜຸ່ມໄດ້ຝຶກຝົນທັກສະຄວາມຮູ້-ຄວາມສາມາດຂອງພວກເຂົາຜ່ານການເປັນອາສາສະໝັກ ຫຼື ການເຂົ້າຮ່ວມງານຝຶກອົບຮົມຕ່າງໆທີ່ເນັ້ນໄປທີ່ຫົວຂໍ້ທາງສັງຄົມບໍ່ວ່າຈະເປັນການສຶກສາ, ສິ່ງແວດລ້ອມ, ສຸຂະພາບຈິດ ໄປຈົນຮອດການສ້າງເຄືອຂ່າຍໄວໜຸ່ມໃຫ້ມີຄວາມແຂງແຮງຍິ່ງຂຶ້ນ.
ປະສົບການໃນຊີວິດທີ່ປ່ຽນແປງ ແລະ ເຮັດໃຫ້ການເບິ່ງໂລກປ່ຽນໄປ
ຈຸດປ່ຽນອີກເລື່ອງໃນຊີວິດຂອງ ຕຸລີ່ ກໍຕ້ອງຍ້ອນກັບໄປເມື່ອສາມປີກ່ອນ ລາວໄດ້ມີໂອກາດໄປແລກປ່ຽນງານທີ່ກ່ຽວຂ້ອງກັບສິ່ງແວດລ້ອມທີ່ຕິດພັນກັບແມ່ນ້ຳຂອງ ຈັດຂຶ້ນໂດຍ Sustainable Mekong Research Network ທີ່ເປັນງານລະດັບພາກພື້ນ. ໃນເວລານັ້ນລາວໄດ້ໄປຊ່ວຍບັນທຶກກອງປະຊຸມຢູ່ທີ່ປະເທດໄທ ແລະ ເປັນງານທີ່ລາວໄດ້ສຳຜັດກັບຄຳວ່າ “ນີ້ແຫຼະ ຜູ້ຊ່ຽວຊານ, ຄົນທີ່ມີຄວາມຊຳນານກັບວຽກງານທີ່ພວກເຂົາເຮັດຢູ່” ພາຍໃນງານກໍຈະມີການເຊີນນັກວິຊາການ, ຊ່ຽວຊານ ແລະ ຜູ້ເຮັດວຽກໃນດ້ານນະໂຍບາຍຈາກຫຼາຍໆປະເທດ.
ໂຄງການ ຫຼື ວຽກງານທີ່ ຕຸລີ່ ໄດ້ມີໂອກາດເຂົ້າໄປສຳຜັດນັ້ນລ້ວນແລ້ວແຕ່ເປັນໂອກາດສຳຄັນ ເພາະລາວເປັນຄົນທີ່ມີຄວາມສົນໃຈໃນເລື່ອງວຽກງານສິ່ງແວດລ້ອມຢູ່ແລ້ວ ແລະ ໃນເວລານັ້ນຫົວຂໍ້ນີ້ກໍຖືວ່າເປັນບັນຫາທີ່ຫຼາຍໆປະເທດໃຫ້ຄວາມສຳຄັນໃນການເຮັດວຽກເຊັ່ນດຽວກັນ.
ເມື່ອເວົ້າເຖິງສິ່ງແວດລ້ອມທີ່ຕິດພັນກັບແມ່ນ້ຳຂອງ ພວກເຮົາຍັງຂາດຄວາມຮູ້ດ້ານວິຊາການຫຼາຍຢ່າງ ເຊິ່ງໃນຕອນນັ້ນຊ່ຽວຊານຈາກຫຼາຍປະເທດໄດ້ປຶກສາຫາລືກັນກໍໃຊ້ແຕ່ສັບວິຊາການ ເຖິງລາວຈະງົງກັບຄຳສັບເຫຼົ່ານັ້ນແຕ່ມັນກໍເປັນຄວາມມ່ວນທີ່ເພີນຫົວໃຈຈົນບັນຍາຍໄດ້ບໍ່ໝົດ. ລາວໄດ້ໄປເຈິກັບຊ່ຽວຊານຜູ້ໜຶ່ງຈາກປະເທດໃນລຸ່ມແມ່ນ້ຳຂອງ ມັນໄດ້ເຮັດໃຫ້ລາວມີໂອກາດໂອ້ລົມທຳຄວາມຮູ້ຈັກກັບຊ່ຽວຊານຄົນນັ້ນ ແລະ ໄດ້ຮັບຟັງມາວ່າ:
ແມ່ນ້ຳຂອງແມ່ນມີຄວາມສຳຄັນຫຼາຍໂດຍສະເພາະກັບປະເທດລາວທີ່ເປັນປະເທດທີ່ບໍ່ມີຊາຍແດນຕິດຈອດກັບທະເລ ແລະ ດ້ວຍຄວາມທີ່ປະຊາກອນລາວແມ່ນອາໄສເອື່ອຍອີງກັບການດຳລົງຊີວິດທີ່ຕິດພັນກັບແມ່ນ້ຳຂອງໃນການລ້ຽງຊີບ, ມັນເປັນສິ່ງສຳຄັນທີ່ເຮົາຄວນສຶກສາ ແລະ ຄວນຮຽນຮູ້ຫຼາຍຂຶ້ນ, ພ້ອມທັງປະກອບສ່ວນເທົ່າທີ່ພວກເຮົາສາມາດເຮັດໄດ້.
ຄຳເວົ້ານັ້ນຈຶ່ງເປັນຈຸດເລີ່ມຕົ້ນຈຸດປະກາຍໄຟໃນຕົວຂອງ ຕຸລີ່ ໃນການເລີ່ມຕົ້ນສຶກສາ ແລະ ອ່ານຂ່າວກ່ຽວກັບເລື່ອງສິ່ງແວດລ້ອມຫຼາຍຂຶ້ນເພື່ອເພີ່ມຄວາມຮູ້ໃຫ້ຕົວເອງໄປຈົນຮອດການຈັດງານໄວໜຸ່ມໃນຫົວຂໍ້ກ່ຽວກັບຄວາມຍືນຍົງຂອງແມ່ນ້ຳຂອງ ເຊິ່ງໃນເວລານັ້ນລາວກໍໄດ້ຈັດເປັນງານນ້ອຍໆແບບອອນລາຍທີ່ມີການເຊີນຊ່ຽວຊານຈາກທາງປະເທດໄທ ແລະ ຜູ້ທີ່ເຮັດວຽກໃນຂົງເຂດນີ້ຈາກທາງປະເທດລາວໃຫ້ໄດ້ແບ່ງປັນໃນຫຼາຍມຸມມອງກໍຄືມຸມມອງຂອງດ້ານເຕັກນິກວິຊາການ, ມຸມມອງດ້ານນະວັດຕະກຳ, ມຸມມອງການເຮັດວຽກໃກ້ຊິດກັບຊຸມຊົນ ແລະ ໄວໜຸ່ມ.
ໃນເວລານັ້ນກໍໄດ້ຮັບການຕອບຮັບທີ່ດີຫຼາຍຈາກທາງຜູ້ເຂົ້າຮ່ວມທີ່ສະແດງຄວາມດີໃຈທີ່ມີພື້ນທີ່ໃຫ້ພວກເຂົາໄດ້ເຂົ້າໃຈເລື່ອງສະພາບການປ່ຽນແປງດິນຟ້າອາກາດທີ່ສົ່ງຜົນກະທົບກັບແມ່ນ້ຳຫຼາຍຂຶ້ນ.
ສິ່ງທີ່ຈະເລືອກຮຽນ ຖ້າມີໂອກາດໂດຍບໍ່ມີຂໍ້ຈຳກັດດ້ານເວລາ ແລະ ຄ່າໃຊ້ຈ່າຍ?
ຕຸລີ່ ຍິ້ມ ແລະ ຫົວຂຶ້ນພ້ອມເວົ້າກັບ ມ່ວນ ວ່າ: “ເປັນຄຳຖາມທີ່ຍາກແຮງ ຂ້ອຍມີຫຼາຍຢ່າງທີ່ຢາກຮຽນ, ຢາກຮຽນພາສາໃໝ່ໆ, ຢາກຮຽນເລື່ອງຖານຂໍ້ມູນ ແລະ ກໍຢາກຮຽນນັ້ນຮຽນນີ້ເຕັມໄປໝົດ. ແຕ່ຖ້າບໍ່ມີຂໍ້ຈຳກັດເລື່ອງເວລາກັບຄວາມສາມາດຂອງຂ້ອຍນຳ, ກໍຢາກລອງຮຽນດົນຕີກັບພວກຖ່າຍທຳເຊັ່ນ Storytelling ທີ່ຢາກຮຽນເພາະເບິ່ງແລ້ວຮູ້ສຶກວ່າເປັນງານສິລະປະທີ່ສວຍງາມ, ມີຈິດວິນຍານ ແລະ ຄືຊິຈຶ້ງແຮງຄັນເຮັດເປັນ”.
ຜູ້ທີ່ເປັນແຮງບັນດານໃຈ ແລະ ເປັນແບບຢ່າງທີ່ດີຂອງ ຕຸລີ່
“ສິ່ງທີ່ກຳລັງຈະເວົ້າມັນກໍຄຶຊິເປັນຄຳຕອບຄ້າຍໆນາງງາມ ແຕ່ທຸກຄົນທີ່ຜ່ານເຂົ້າມາໃນຊີວິດຂ້ອຍແມ່ນເປັນແບບຢ່າງໃນຊີວິດທັງໝົດ, ຫາກແຕ່ວ່າຈະເປັນແບບຢ່າງທີ່ດີ ຫຼື ບໍ່ດີ ເພາະບາງຄົນຜ່ານເຂົ້າມາໃຫ້ເຮົາໄດ້ຮຽນຮູ້, ບາງຄົນຜ່ານເຂົ້າມາໃຫ້ເຮົາມີແຮງໃຈ ແລະ ໃນຂະນະທີ່ບາງຄົນຜ່ານເຂົ້າມາເປັນແບບຢ່າງທີ່ເຮັດໃຫ້ຮູ້ສຶກວ່າເຮົາຈະບໍ່ຢາກເຕີບໃຫຍ່ໄປເປັນແບບນີ້. ການທີ່ຢູ່ຄົນລະມຸມກໍຈະເບິ່ງເລື່ອງລາວກັນຄົນລະດ້ານ, ຫາກເວົ້າເຖິງແຮງບັນດານໃຈທີ່ມີ ຂ້ອຍກໍຄິດຮອດຕົວເອງໃນອີກຫ້າປີຂ້າງໜ້າເລີຍ ເພາະຂ້ອຍມັກຈະມີພາບທີ່ວາດຝັນວ່າຢາກໃຫຍ່ໄປເປັນຄົນແບບໃດນັ້ນເອງ ແລະ ການທີ່ໄດ້ຍ້ອນກັບໄປເບິ່ງຕົວເອງໃນຫ້າປີກ່ອນຄືກັນ ມັນເຮັດໃຫ້ເຫັນ ແລະ ໄດ້ຄຳນຶງໄດ້ວ່າຂ້ອຍກະເຕີບໃຫຍ່ຂຶ້ນມາຫຼາຍແລ້ວໃດນິ,” ຕຸລີ່ກ່າວ.
ແຜນການທີ່ຈະເຮັດຄວາມຝັນໃຫ້ສຳເລັດ
ຕຸລີ່ ມີຄວາມຝັນຢາກເປັນຊ່ຽວຊານໃນຂົງເຂດໃດໜຶ່ງ ທີ່ລາວສາມາດຮູ້ເລິກເຊິ່ງກ່ຽວກັບເລື່ອງນັ້ນແທ້ໆ ໃນຕອນນີ້ລາວກໍຍັງຄົ້ນຫາສິ່ງທີ່ຕົວເອງຢາກສຶກສາຢ່າງຈິງຈັງ ແລະ ລາວກໍຍັງຢາກໄປເປັນອາສາສະໝັກຢູ່ເຂດນອກຈັກໄລຍະໜຶ່ງ, ໃນຕອນທີ່ເງື່ອນໄຂຫຼາຍຢ່າງເອື້ອອຳນວຍຕໍ່ຕົວລາວ ເຊິ່ງສິ່ງທີ່ລາວຄິດໃນຕອນນີ້ແມ່ນການທີ່ຕ້ອງຈັດລຳດັບຄວາມສຳຄັນ, ການເຮັດວຽກປີກຍ່ອຍນ້ອຍໆໃຫ້ແລ້ວໂດຍການຄ່ອຍໆເຮັດເທື່ອລະອັນກ່ອນ ເພາະສິ່ງທີ່ລາວຢາກຮຽນຮູ້ກໍໃຊ້ເວລາດົນ.
ຖ້າມີໂອກາດໄດ້ເຮັດວຽກໃນໂຄງການທີ່ສາມາດປ່ຽນແປງຊີວິດຄົນໄດ້
ໂຄງການທີ່ຈະສາມາດປ່ຽນແປງ ຫຼື ຊ່ວຍເຫຼືອຄົນໄດ້ ກໍມີຫຼາຍໂຄງການທີ່ ຕຸລີ່ ຢາກເຮັດບໍ່ວ່າໂຄງການທີ່ຕິດພັນກັບໄວໜຸ່ມໃນເລື່ອງສິ່ງແວດລ້ອມ ແລະ ໂຄງການທີ່ລາວຢາກເລົ່າເລື່ອງວຽກງານຄົນເຮັດວຽກໃນດ້ານຕ່າງໆ ນັ້ນຈຶ່ງເປັນເຫດຜົນທີ່ລາວຢາກຮຽນເລື່ອງການຖ່າຍທຳເພື່ອເປັນອີກໜຶ່ງວຽກງານໃນການສື່ສານໃຫ້ຄົນພາຍນອກໄດ້ຮັບຮູ້ ແລະ ມັນຍັງເປັນອີກສ່ວນໜຶ່ງທີ່ຈະສາມາດເຮັດໃຫ້ພຶດຕິກຳຄົນຮຸ່ນໃໝ່ສາມາດປ່ຽນແປງໄປໃນທາງທີ່ດີຂຶ້ນໄດ້.
ນິຍາມຄວາມສຳເລັດໃນຊີວິດຂອງ ຕຸລີ່
ຄວາມສຳເລັດສຳລັບ ຕຸລີ່ ຄືຄວາມຮູ້ສຶກທີ່ລາວສາມາດພາກພູມໃຈ ແລະ ດີໃຈກັບຕົວເອງ, ຟັງທຳອິດກໍເບິ່ງຄືຈະງ່າຍແຕ່ມັນກໍເປັນເລື່ອງທີ່ຍາກຫຼາຍສຳລັບລາວ. ຫຼາຍຄັ້ງເວລາລາວເຮັດຫຍັງແລ້ວສຳເລັດ ຕຸລີ່ ກໍມັກຈະມີຄວາມຮູ້ສຶກຢາກຕັ້ງຄຳຖາມກັບຕົວເອງຕະຫຼອດວ່າ ”ຍ້ອນຄົນສະໝັກໜ້ອຍເລີຍໄດ້ຮັບໂອກາດ, ຟຸກຕິເບາະ ເລີຍຜ່ານ ຫຼື ອີ່ຫຍັງຕ່າງໆນາໆ” ຈຶ່ງເຮັດໃຫ້ມັນເປັນເລື່ອງທີ່ຍາກຫຼາຍທີ່ລາວຈະຮູ້ສຶກວ່າລາວ “ເຮັດໄດ້ດີ” ເພາະທຸກຄົນມັກຈະຕິດພາບລາວຮ່ວມເຮັດກິດຈະກຳຫຼາຍຢ່າງ.
ໃນເບື້ອງຫຼັງ ຕຸລີ່ ກໍໄດ້ລົ້ມລຸກຄຸກຄານເກືອກຕົມເຊັ່ນກັນ ຈົນບາງຄັ້ງກໍເຮັດໃຫ້ລາວເມື່ອຍ ແລະ ສູນເສຍກຳລັງໃຈ ແຕ່ລາວກໍກຳລັງຝຶກຕົວເອງໃຫ້ພູມໃຈກັບຄວາມສຳເລັດລະຫວ່າງທາງ ເຖິງຕອນນີ້ລາວຍັງເຮັດໄດ້ບໍ່ເຕັມຮ້ອຍ, ແຕ່ລາວກໍຮູ້ສຶກດີໃຈທີ່ຢ່າງໜ້ອຍຍັງໄດ້ຄຳນຶງວ່າມັນເປັນສິ່ງທີ່ຄວນເຮັດ ແລະ ເພື່ອສຸຂະພາບຈິດ-ໃຈຂອງລາວເອງໃນໄລຍະຍາວ.
ຢາກເຮັດຫຍັງ ຖ້າມີຄວາມສາມາດພິເສດທີ່ບໍ່ມີໃຜຄິດວ່າເປັນໄປໄດ້?
“ໜ້າສົນໃຈຫຼາຍສຳລັບຫົວຂໍ້ນີ້ ຖ້າເລືອກໄດ້ຢາກມີພະລັງທີ່ຊ່ວຍໃຫ້ທຸກຄົນຮັບຟັງກັນດ້ວຍໃຈທີ່ເປີດກວ້າງປະນີປະນອມກັນ ພາຍໃນໂລກທີ່ມີຄວາມຂັດແຍ້ງ ແລະ ຄວາມບໍ່ເຂົ້າໃຈກັນມັນມັກເກີດຂຶ້ນຫຼາຍ. ຂ້ອຍຄິດວ່າການຮັບຟັງກັນຢ່າງຕັ້ງໃຈ, ການທຳຄວາມເຂົ້າໃຈກັນໃຫ້ຫຼາຍຂຶ້ນນັບເປັນສິ່ງທີ່ວິເສດຫຼາຍທີ່ຈະຊ່ວຍໃຫ້ພວກເຮົາມີຄວາມເຫັນອົກເຫັນໃຈ ເພື່ອຮັບປະກັນວ່າສຽງຂອງທຸກຄົນຖືກຮັບຟັງ, ສຽງຂອງທຸກຄົນມີຄວາມໝາຍ ຖ້າມີພະລັງນີ້ຂ້ອຍເຊື່ອວ່າພວກເຮົາຈະສາມາດສ້າງຄວາມເຊື່ອມໂຍງກັນໃຫ້ເຂັ້ມແຂງຍິ່ງຂຶ້ນ ແລະ ມັນຈະເປັນພື້ນທີ່ທີ່ຜູ້ຄົນຮູ້ສຶກຖືກເຄົາລົບ, ມີຄຸນຄ່າ ແລະ ມີແຮງບັນດານໃຈໃນການຂັບເຄື່ອນເພື່ອເຮັດສິ່ງທີ່ດີຮ່ວມກັນ”. ຕຸລີ່ກ່າວ.
