ລົມຫາຍໃຈ: ບົດເພງທີ່ປ່ຽນຄວາມເຈັບປວດໃຫ້ເປັນພະລັງໃຈ
ໃນໂລກທີ່ເຕັມໄປດ້ວຍຄວາມເຈັບປວດ ແລະ ການສູນເສຍ, ບາງຄັ້ງເຮົາກໍຮູ້ສຶກເໝືອນວ່າຊີວິດບໍ່ມີຄວາມຫວັງອີກຕໍ່ໄປ. ຄວາມຜິດຫວັງຈາກສິ່ງທີ່ຫຼອກລວງອາດເຮັດໃຫ້ເຮົາທໍ້ຈົນບໍ່ຢາກສູ້ຕໍ່ ແລະ ມັນກໍມືດມົນຈົນແນມຫາບໍ່ເຫັນຫົນທາງທີ່ຈະກ້າວເດີນຫາແສງສະຫວ່າງ.
ເພງ ລົມຫາຍໃຈ (Breathe) ຮ້ອງໂດຍ Thavisay ( ໄຊ – ທະວີໄຊ ແກ້ວບຸນພັນ) ໄດ້ສ້າງສຽງປຸກໃຈໃຫ້ຄົນຟັງໄດ້ລຸກຂຶ້ນມາອີກຄັ້ງ. ຫຼາຍຄົນອາດຈະເຄີຍພົບກັບເລື່ອງລາວຄວາມຜິດຫວັງ, ເສຍໃຈ ແລະ ຄວາມວຸ່ນວາຍທີ່ເກີດຂຶ້ນໃນຊີວິດ ເຊິ່ງເພງນີ້ໄດ້ສອນໃຫ້ເຮົາເຫັນວ່າ “ເຖິງວ່າບາງຢ່າງຈະຫາຍໄປ ແຕ່ເຮົາກໍຍັງມີສິ່ງທີ່ສຳຄັນທີ່ສຸດທີ່ຍັງເຫຼືອ” ນັ້ນຄື ລົມຫາຍໃຈ ຂອງເຮົາເອງ.
ເພງ ລົມຫາຍໃຈ (Breathe)
ວິດີໂອເພງໄດ້ເລົ່າເຖິງເລື່ອງລາວຂອງຄວາມສິ້ນຫວັງທີ່ ນາງເອກ (ສະແດງໂດຍ: ລູກນ້ຳ – ທິດາລັດ ວົງສິລິ) ພົບກັບບັນຫາເລື່ອງຂອງຄວາມສຳພັນທີ່ບໍ່ສົມຫວັງ ຈົນໂຕເອງກາຍເປັນແມ່ລ້ຽງດ່ຽວທີ່ຕ້ອງໄດ້ລ້ຽງລູກຄົນດຽວ ແລະ ເພງຍັງໄດ້ບອກເຖິງ ຄວາມຮູ້ສຶກ-ຄວາມເຈັບປວດ ທີ່ ນາງເອກກຳລັງປະເຊີນກັບຄວາມທໍລະມານທີ່ມີຫຼາຍເກີນໄປ, ຄິດຢາກຍອມແພ້ ແລະ ການທີ່ຕ້ອງກັບມາຕັ້ງຄຳຖາມວ່າ “ຂ້ອຍຈະຢູ່ແນວໃດ?“.
ຈາກຕົ້ນເພງທີ່ໄດ້ເລົ່າເຖິງຄວາມທໍ້ໃຈສູ່ການໃຫ້ກຳລັງໃຈທີ່ໄດ້ບອກເຕືອນວ່າ “ສິ່ງສຸດທ້າຍທີ່ເຫຼືອຂອງເຮົານັ້ນຍັງມີລົມຫາຍໃຈ” ໂດຍເພງໄດ້ສື່ຄວາມໝາຍຊຸກດັນ ແລະ ເປັນແບບຢ່າງໃຫ້ເຮົາເກັບເອົາຄວາມເຈັບປວດມາເປັນບົດຮຽນ, ເປັນແຮງໃຈ ແລະ ສູ້ຕໍ່ໄປເພື່ອເລີ່ມຕົ້ນຊີວິດໃໝ່, ໃຫ້ເຮົາເຊື່ອໃນຕົວເອງວ່າເຮົາຈະສາມາດຜ່ານພົ້ນຄວາມເຈັບປວດນີ້ໄປໄດ້.
ເພງ ລົມຫາຍໃຈ ຖືເປັນການບອກກ່າວທີ່ຊົງພະລັງ ສຳລັບ “ແມ່ລ້ຽງດ່ຽວ”. ເພາະການລ້ຽງ “ລູກ” ພຽງຄົນດຽວເຖິງວ່າມັນລຳບາກຂະໜາດໃດ ເພື່ອລູກແລ້ວນັ້ນ, ເຮົາກໍຕັ້ງໃຈໃຫ້ເຂົາມີອະນາຄົດອັນສົດໃສ ແລະ ຄອຍເຝົ້າເບິ່ງການເຕີບໃຫຍ່ໄປແນວທາງທີ່ດີ. ນີ້ຄືຄວາມຮັກ, ຄວາມຫວັງດີຂອງຄົນເປັນແມ່ທີ່ມີຕໍ່ລູກ.
ຊີວິດຈະໂຫດຮ້າຍພຽງໃດກໍຕາມ ເຮົາກໍຍັງມີໂອກາດທີ່ຈະເລີ່ມຕົ້ນໃໝ່ໄດ້ສະເໝີ. ເພງນີ້ຍັງສອນໃຫ້ເຮົາບໍ່ຍອມແພ້ຕໍ່ໂຊກຊະຕາ, ໃຫ້ເຊື່ອໃນພະລັງຂອງລົມຫາຍໃຈ ແລະ ຫົວໃຈທີ່ຍັງເຕັ້ນຢູ່. ມັນເປັນເພງທີ່ສື່ເຖິງຄວາມຫວັງ, ການຢືນຢັນໃນຕົນເອງ ແລະ ຄວາມເຊື່ອວ່າຕະຫຼອດເວລາທີ່ຫົວໃຈຂອງເຮົາຍັງເຕັ້ນ, ມັນຍັງບໍ່ສາຍເກີນໄປທີ່ຈະລຸກຂຶ້ນສູ້.