The Crown Exclusive

ຕາໜຶ່ງ ຈັນທະແສນສັກ ຄວ້າລາງວັນ Best Talent Award ໃນການປະກວດ Miss International Queen 2025

ໂດຍ: Chanthasone Insixiangmai

16 September 2025● 215

ເປັນລາງວັນແຫ່ງຄວາມພາກພູມໃຈທີ່ຕົວແທນປະເທດລາວ ຕາໜຶ່ງ – ອິນທະວົງ ຈັນທະແສນສັກ ສາມາດຄວ້າມາໄດ້ ນັ້ນກໍຄືລາງວັນ ຄວາມສາມາດພິເສດດີເດັ່ນ (Best Talent) ໃນການປະກວດ Miss International Queen 2025 ທີ່ປະເທດໄທ.

ຕາໜຶ່ງ – ອິນທະວົງ ຈັນທະແສນສັກ ເປັນຜູ້ດຳລົງຕຳແໜ່ງ Miss Queen Laos 2025 ເຊິ່ງໄດ້ເດີນທາງເຂົ້າຮ່ວມການປະກວດເຊິ່ງຈັດຂຶ້ນຢູ່ໄທ ໃນລະຫວ່າງເດືອນກັນຍາ 2025 ນີ້.

ສຳລັບການແຂ່ງຂັນຮອບ National Costume and Talent Quest ແມ່ນມີຂຶ້ນໃນວັນທີ 15 ກັນຍາ 2025 ເຊິ່ງໃນຮອບນີ້ ຕາໜຶ່ງ ຕົວແທນຈາກປະເທດລາວໄດ້ຂຶ້ນສະແດງໂຊປະສົມປະສານ ລະຫວ່າງການຟ້ອນໃນຊຸດລາວໃນຕອນຕົ້ນ ກ່ອນທີ່ຈະປ່ຽນຊຸດກາຍເປັນຊຸດສີແດງ ພ້ອມທັງເຕັ້ນ “ຢ່າບູລີ້” ເຊິ່ງເປັນຜົນງານຂອງລາວເອງຮ່ວມກັບທີມ Reeriew ພາຍໃຕ້ສັງກັດ Alist Laos. ທີ່ພິເສດກໍຄືການສະແດງນີ້ ລາວໄດ້ສະມາຊິກທີມຂອງລາວຈາກ Reeriew ຂຶ້ນຮ່ວມສະແດງນຳ.

ເພງທີ່ລາວເຕັ້ນ ນອກຈາກຈະເປັນຜົນງານຂອງໂຕເອງແລ້ວ ຍັງມີການນຳເອົາເພງຂອງ Beyonce ມາ remix ໃໝ່ເປັນເວີຊັນປະສົມປະສານກັບດົນຕີລາວ ເພື່ອສະແດງຄວາມເປັນລາວໃຫ້ຄົນທົ່ວໂລກເຫັນການ

ຕາໜຶ່ງ ໄດ້ໃຫ້ສຳພາດຫຼັງການສະແດງຈົບວ່າ “ຕາໜຶ່ງເກີດຂຶ້ນມາຈາກທີມ ຫຼີລຽວທ່ຽວລາວ ຖ້າບໍ່ມີພວກເຂົາ ກໍຈະບໍ່ມີຕາໜຶ່ງໃນມື້ນີ້. ຢາກໃຫ້ຮູ້ວ່າ ກະເທີຍລາວກໍມີດີຄືກັນເດີ.”

ການສະແດງນີ້ ເວົ້າໄດ້ວ່າເປັນສະແດງອອກເຖິງຕົວຕົນຂອງ ຕາໜຶ່ງ ໄດ້ເປັນຢ່າງດີ ເຊິ່ງການເຕັ້ນ ເປັນສິ່ງທີ່ລາວຫຼົງໃຫຼ ແລະ ການນຳສະເໜີຄວາມເປັນ ຫຼີລຽວ ເຊິ່ງເປັນທີ່ມາຂອງລາວ ແລະ ເຮັດໃຫ້ເປັນທີ່ຮູ້ຈັກໃນວົງການບັນເທີງລາວ ແລະ ການສະແດງນີ້ກໍເຮັດໃຫ້ລາວຄວ້າລາງວັນ Best Talent Award ມາໄດ້.

ສຳລັບການປະກວດດັ່ງກ່າວນີ້ ຈະດຳເນີນໄປຕະຫຼອດເດືອນກັນຍາ 2025 ໂດຍມີຜູ້ເຂົ້າຮ່ວມການປະກວດຈາກທົ່ວໂລກຈຳນວນ 23 ປະເທດ.

ທຸກຄົນສາມາດຕິດຕາມການປະກວດຄັ້ງນີ້ໄດ້ໃນຮອບຕ່າງໆ ເພື່ອໃຫ້ກຳລັງໃຈ ຕາໜຶ່ງ – ອິນທະວົງ ຈັນທະແສນສັກ ຕົວແທນຈາກປະເທດລາວໄດ້ ຕາມກຳນົດການດັ່ງນີ້:

-National Costume and Talent ວັນທີ 15 ກັນຍາ 2025 ທີ່ Emsphere

-The Preliminary ວັນທີ 18 ກັນຍາ 2025 ທີ່ Tiffany’s Show Pattaya

– The Crowning Finale ວັນທີ 20 ກັນຍາ 2025 ທີ່ Tiffany’s Show Pattaya

ຮັບຊົມການຖ່າຍທອດທຸກກິດຈະກຳການປະກວດໄດ້ທາງ YouTube ຂອງ Miss International Queen ແລະ ຮອບ The Crowning Finale ສາມາດຮັບຊົມໄດ້ທາງ ສະຖານີໂທລະພາບ ຊ່ອງ 3 ຂອງໄທ ເວລາ 21:40 ໂມງ.