ໜ້າຫຼັກ Muan.la - ສາລະບັນເທີງ Muan Watch - ມ່ວນຊວນເບິ່ງ ລົມກັນຫຼັງເບິ່ງ Stranger Things Season 5 Volume 1 – ມ່ວນແຮງ ຈົນຢາກເບິ່ງຕອນທີ່ເຫຼືອຕໍ່ຕອນນີ້ເລີຍ!
Muan Watch - ມ່ວນຊວນເບິ່ງ

ລົມກັນຫຼັງເບິ່ງ Stranger Things Season 5 Volume 1 – ມ່ວນແຮງ ຈົນຢາກເບິ່ງຕອນທີ່ເຫຼືອຕໍ່ຕອນນີ້ເລີຍ!

ຣີວິວ Stranger Things Season 5 Volume 1 ມ່ວນສຸດ ຕື່ນເຕັ້ນ ແລະ ເຕັມໄປດ້ວຍຄວາມລັບທີ່ບໍ່ຄາດຄິດ

ແບ່ງປັນ
Getting your Trinity Audio player ready...

ໄດ້ເບິ່ງແລ້ວບໍ່? ນີ້ຄືຄຳຖາມທຳອິດທີ່ຢາກຖາມທຸກຄົນທີ່ຍັງບໍ່ທັນໄດ້ເບິ່ງ Stranger Things Season 5 Volume 1! ເພາະຕ້ອງບອກກ່ອນເລີຍວ່າ ຫຼັງຈາກທີ່ຊີຊັນກ່ອນຈົບລົງແບບໃຫ້ຄາໃຈກັນທົ່ວໂລກ ເຮົາກໍລໍຖ້າການກັບມາຂອງກຸ່ມເດັກນ້ອຍ Hawkins ດົນແຮງ… ແຕ່ພໍໄດ້ເບິ່ງ 4 ຕອນທຳອິດໃນ Volume ນີ້ແລ້ວ ບອກເລີຍວ່າ ຄຸ້ມຄ່າການລໍຄອຍແຮງ!

ສຳລັບໃນຊີຊັນນີ້, ຕັ້ງແຕ່ຕອນທຳອິດເລີຍ ຮູ້ສຶກໄດ້ວ່າ ເຮົາຈະໄດ້ພົບກັບເນື້ອເລື່ອງທີ່ຮຸນແຮງກວ່າທຸກຄັ້ງ. ສະນັ້ນໃຜທີ່ຍັງລັງເລຢູ່ວ່າຈະເບິ່ງ ຫຼື ບໍ່ເບິ່ງ ອ່ານຣີວິວນີ້ແລ້ວຮັບຮອງວ່າ ຈະຕ້ອງໄປສະໝັກ Netflix ເບິ່ງແນ່ນອນ.

4 ຕອນທຳອິດທີ່ບໍ່ປານີຄົນເບິ່ງ ເພາະຍົກລະດັບຄວາມໂຫດ

ອີ່ຫຍັງທີ່ເປັນຄວາມຄາໃຈຕັ້ງແຕ່ຊີຊັນກ່ອນ, Volume 1 ນີ້ຈັດໃຫ້ແບບບໍ່ມີການຢຸດພັກເລີຍ. ເຫດການໃນປີ 1987 ນີ້ ເປັນເຫດການ 4 ປີຫຼັງຈາກທີ່ Will ຫາຍໄປໃນຊີຊັນທຳອິດ, ຄວາມມ່ວນມັນເລີ່ມຂຶ້ນຕັ້ງແຕ່ນາທີທຳອິດຈົນເຖິງສາກສຸດທ້າຍທີ່ເຮັດໃຫ້ເຮົາຕ້ອງຕົບເຂົ່າດັງໆ.

ຄວາມໂຫດຂອງເນື້ອເລື່ອງໃນ Volume ນີ້ຖືກຍົກລະດັບຂຶ້ນຈາກຊີຊັນກ່ອນໆຫຼາຍ ແບບບໍ່ມີການປານີຄົນເບິ່ງອີກຕໍ່ໄປ. ຖ້າຄິດວ່າຊີຊັນກ່ອນທີ່ Vecna ຫັກແຂນຫັກຂາເຫຍື່ອຂອງມັນນັ້ນໂຫດແລ້ວ, ຊີຊັນນີ້ຕ້ອງກຽມຕົວໃຫ້ພ້ອມເລີຍເດີ້.

ໂດຍສະເພາະສາກຮຸນແຮງທີ່ເວົ້າໄດ້ເລີຍວ່າ ຈັດເຕັມຍິ່ງກວ່າເກົ່າ. ທັງ Demogorgon ແລະ Vecna ຕ່າງກໍອອກໂຮງມາຈັດການຄົນທີ່ຂວາງທາງພວກມັນແບບບໍ່ຢັ້ງ. ຄວາມໜັກໜ່ວງ ຄວາມເລືອດສາດທີ່ເພີ່ມຂຶ້ນມາໃນຊີຊັນນີ້ ມັນເຮັດໃຫ້ບັນຍາກາດທັງໜັກໜ່ວງ, ທັງຕື່ນເຕັ້ນ ແລະທັງມືດມົນໃນຂະນະດຽວກັນ ຈົນເຮົາເບິ່ງໄປກໍຕ້ອງກຳມືແໜ້ນໄປ.

ມັນບໍ່ແມ່ນຊີຣີສ໌ສຳລັບເດັກນ້ອຍອີກຕໍ່ໄປແລ້ວ ເພາະມັນເຕີບໃຫຍ່ຂຶ້ນມາພ້ອມກັບຄົນເບິ່ງຄືພວກເຮົານີ້ລະ.

ທີມລ່າ Vecna ກັບມາຮວມໂຕກັນອີກຄັ້ງ

ສິ່ງທີ່ເຮັດໃຫ້ໃຈເຮົາຟູແມ່ນການທີ່ຕົວລະຄອນຫຼັກທັງໝົດໄດ້ກັບມາຮວມໂຕກັນອີກຄັ້ງ ເພື່ອຮັບມືກັບ Vecna ທີ່ຮ້າຍກວ່າເກົ່າ. ການເຫັນທຸກຄົນຢືນຢູ່ຄຽງບ່າຄຽງໄຫຼ່ກັນອີກຄັ້ງມັນເຮັດໃຫ້ເຮົານຶກເຖິງວ່າ ມັນຜ່ານມາຫຼາຍປີແລ້ວຕັ້ງແຕ່ເຮົາໄດ້ພົບເຂົາເຈົ້າເທື່ອທຳອິດ.

ເລື່ອງລາວຈະພາເຮົາໄປສຳຫຼວດເລິກເຖິງຕົ້ນກຳເນີດຂອງ Upside Down, ແຜນລັບຂອງທະຫານ ແລະ ທີ່ສຳຄັນ: ເຄື່ອງມືໃນການລ່າຄັ້ງນີ້ຄືວິທະຍຸ. ເຂົາເຈົ້າຕ້ອງໃຊ້ການສື່ສານ ແລະ ຕາມຕິດຄື້ນສຽງເພື່ອຄົ້ນຫາ Vecna ທີ່ກຳລັງເຊື່ອງຊ້ອນໂຕເອງຢູ່…

ອ່ານຕື່ມ:  Dire Wolves: ຈາກ Game of Thrones ສູ່ການຟື້ນຄືນຊີບໃນໂລກແຫ່ງຄວາມຈິງ

ເຮົາຄິດວ່າ ການເອົາເຕັກໂນໂລຢີຍຸກ 80s ມາໃຊ້ໃນການຕໍ່ສູ້ກັບສິ່ງເລິກລັບຈາກອີກມິຕິໜຶ່ງເປັນໄອເດຍທີ່ດີ ແລະ ເຂົ້າກັບຍຸກສະໄໝຫຼາຍ. ວິທະຍຸທີ່ເຄີຍເປັນພຽງແຕ່ເຄື່ອງມືສື່ສານລະຫວ່າງຕົວລະຄອນໃນເລື່ອງ ໃນຊີຊັນນີ້ກາຍເປັນອາວຸດສຳຄັນໃນການເອົາຊີວິດລອດ. ມັນເຮັດໃຫ້ເຮົາເຫັນພາບວ່າ Stranger Things ນັ້ນຢູ່ໃນຍຸກທີ່ບໍ່ມີສະມາດໂຟນ ບໍ່ມີອິນເຕີເນັດ – ທຸກຢ່າງເປັນ analog ແລະມັນກໍເພີ່ມຄວາມຕື່ນເຕັ້ນໃຫ້ກັບການລ່າຄັ້ງນີ້ຫຼາຍຂຶ້ນ.

ຄວາມລັບຂອງ Will ທີ່ເຮັດໃຫ້ຕ້ອງອ້າປາກຄ້າງ!

ທີ່ຂາດບໍ່ໄດ້ເລີຍຄືໂຕເອກຂອງເຮົາຄື Will Byers! ຕະຫຼອດການເບິ່ງ Volume ນີ້ ເຮົາຈະໄດ້ເຫັນການພັດທະນາຂອງໂຕລະຄອນນີ້ໃນແບບທີ່ບໍ່ຄາດຄິດ. Will ທີ່ເຄີຍເປັນພຽງແຕ່ເດັກນ້ອຍຜູ້ຖືກເຄາະຮ້າຍ ຕ້ອງມີແມ່ຄອຍປົກປ້ອງຢູ່ຕະຫຼອດ, ຕອນນີ້ກາຍເປັນສ່ວນສຳຄັນຂອງທຸກຢ່າງ ເປັນຜູ້ທີ່ກ້າຕັດສິນໃຈ, ກ້າວອອກຈາກຫຼັງຂອງແມ່ ແລະ ຍອມຮັບໃນຕົວຕົນຂອງໂຕເອງ.

ເນື້ອເລື່ອງໄດ້ປິດພາກນີ້ດ້ວຍເຊີໄພຣສ໌ໃຫຍ່ທີ່ກ່ຽວຂ້ອງກັບ Will ໂດຍສະເພາະ… ບອກເລີຍວ່າສາກປິດໃນ EP.4 ນີ້ມັນເດັດຈົນເຮົາຕ້ອງອ້າປາກຄ້າງ ແລະຮ້ອງອອກມາວ່າ “ເວົ້າແທ້?”

ເຮົາບໍ່ສາມາດເວົ້າຫຼາຍກວ່ານີ້ໄດ້ເພາະຈະສະປອຍ ແຕ່ຮັບຮອງວ່າມັນຈະເຮັດໃຫ້ທຸກຄົນຕ້ອງຟ້າວໄປລົມກັບໝູ່ເລີຍທັນທີ (ແຕ່ກະຢ່າໄປສະປອຍຄົນອື່ນເດີ). ມັນເປັນການປິດທີ່ສ້າງຄວາມຢາກເບິ່ງຕໍ່ໃນ Volume 2 ແບບຊະນິດທີ່ວ່າຢາກໃຫ້ປ່ອຍອອກມາຕອນນີ້ເລີຍ.

ຄວາມເລິກລັບຂອງ Upside Down ກຳລັງຖືກເປີດເຜີຍ

ອີກສ່ວນໜຶ່ງທີ່ເຮັດໃຫ້ Volume ນີ້ມ່ວນຫຼາຍແມ່ນການທີ່ເຮົາໄດ້ຄຳຕອບຂອງຫຼາຍໆຄຳຖາມທີ່ສົງໄສມາຕັ້ງແຕ່ຊີຊັນທຳອິດ. Upside Down ແມ່ນຫຍັງກັນແທ້? ເປັນຫຍັງມັນຈຶ່ງເກີດຂຶ້ນ? Vecna ມີຄວາມເຊື່ອມໂຍງກັບໂຄງການລັບຂອງທະຫານແນວໃດ?

ຄຳຕອບເຫຼົ່ານີ້ກຳລັງເລີ່ມຖືກເປີດເຜີຍອອກມາເທື່ອລະໜ້ອຍ.

ສະຫຼຸບ

ຖ້າເຈົ້າເປັນແຟນຊີຣີສ໌ Stranger Things, Volume 1 ນີ້ຄືການກ້າວທີ່ໜັກແໜ້ນ, ຕື່ນເຕັ້ນ ແລະເຕັມໄປດ້ວຍການສຳຫຼວດໂລກທີ່ມືດມົນຂອງ Hawkins ຫຼາຍຂຶ້ນ. ມັນເປັນການເລີ່ມຕົ້ນທີ່ສົມບູນແບບສຳລັບການສົ່ງທ້າຍຊີຣີສ໌ທີ່ພວກເຮົາຮັກມາເປັນເວລາຫຼາຍປີ.

4 ຕອນທຳອິດເຫຼົ່ານີ້ພິສູດໃຫ້ເຫັນວ່າ Duffer Brothers ຍັງມີເຕັກນິກໃນການເຮັດໃຫ້ພວກເຮົາຕິດຈໍ, ຄາໃຈ ແລະຢາກເບິ່ງຕໍ່ໄປເລື້ອຍໆ. ມັນມີທຸກຢ່າງທີ່ເຮົາຮັກຈາກຊີຣີສ໌ນີ້ ບໍ່ວ່າຈະເປັນ ມິດຕະພາບ, ຄວາມກ້າຫານ, ແອັກຊັນຈັດເຕັມ ແລະ ພະລັງຂອງຕົວຮ້າຍ.

ອ່ານຕື່ມ:  Weak Hero Class 1 ຊີຣີສ໌ດັດແປງມາຈາກ Webtoon ແນວດຣາມ່າສະທ້ອນບັນຫາການບູລລີ້ໃນໂຮງຮຽນ

ຖ້າມີຫຍັງທີ່ເຮົາຢາກບອກ ກໍຄືຊິແມ່ນ ບໍ່ຕ້ອງຄິດຫຼາຍ, ຕ້ອງເບິ່ງດຽວນີ້ເລີຍ! ຮັບຮອງວ່າຈະຕິດໃຈແບບດຽວກັນກັບເຮົາ. ຫຼັງຈາກເບິ່ງຈົບ 4 ຕອນນີ້ແລ້ວ ເຮົາກໍຈະໄດ້ມານັບວັນລໍຖ້າ Volume 2 ກັບພວກເຮົາຢ່າງແນ່ນອນ.

ແລ້ວເຈົ້າເດ? ເບິ່ງຈົບແລ້ວມີຄວາມຄິດເຫັນແນວໃດກັບ 4 ຕອນທຳອິດນີ້? ເຊີໄພຣສ໌ຂອງ Will ເຮັດໃຫ້ຕະລຶງບໍ່? ມາລົມໃຫ້ຟັງແນ່ເດີ (ແຕ່ຢ່າຟ້າວສະປອຍເທື່ອ)

ຂຽນໂດຍ
Chanthasone Insixiangmai - Editor-in-Chief

ຄອນເທັນຄຣີເອເຕີທີ່ເລີ່ມຈາກການຂຽນເນື້ອຫາກ່ຽວກັບ Tech ກ່ອນຈະຫຍັບມາຂຽນກ່ຽວກັບເລື່ອງວົງການບັນເທີງ ແລ້ວສຸດທ້າຍຂຽນມັນໄປທຸກຢ່າງ ຈົນກາຍເປັນຜູ້ຄຸມຄຸນນະພາບຂອງເນື້ອຫາທັງໝົດໃນ Muan (ຖ້າມີບ່ອນໃດຜິດ ນັ້ນແມ່ນຄວາມຜິດຂ້ອຍທີ່ເບິ່ງບໍ່ທົ່ວ 55). ມັກເອົາເລື່ອງຕ່າງໆທີ່ພົບໃນຊີວິດປະຈຳວັນມາເລົ່າຕໍ່ເພື່ອໃຫ້ເຂົ້າກັບ ມ່ວນ, ກົງກັບຄວາມສົນໃຈຂອງຜູ້ອ່ານ ແລະ ເຂົ້າໃຈງ່າຍ. ມັກຖ່າຍຮູບ ແລະ Pop Culture.

ບົດຄວາມທີ່ກ່ຽວຂ້ອງ

Weak Hero Class 2 ພາກຕໍ່ສຸດເດືອດຖືກໃຈສາຍແອັກຊັນ ແລະ ກຸ່ມນັກເລງໂຈດໃໝ່ສຸດຫິນ

ຊີຣີສ໌ພາກຕໍ່ຈາກ Weak Hero Class 1 ທີ່ເລື່ອງລາວໄດ້ເລົ່າເຖິງຕົວຫຼັກຂອງເລື່ອງຢ່າງ Yeon Si-eun ນັກຮຽນເກັ່ງ, ສະຫຼາດ ແລະ ມີໄຫວພິບດີທີ່ມີນິໄສເປັນຄົນນິ່ງໆບໍ່ມັກສະແດງອອກກັບສາຍຕາທີ່ແສນເສົ້າ....

Weak Hero Class 1 ຊີຣີສ໌ດັດແປງມາຈາກ Webtoon ແນວດຣາມ່າສະທ້ອນບັນຫາການບູລລີ້ໃນໂຮງຮຽນ

Weak Hero ແມ່ນຊີຣີສ໌ທີ່ຖືກດັດແປງມາຈາກ Webtoon ເຊິ່ງເປັນແນວແອັກຊັນ, ດຣາມ່າ ແລະ ຄວາມສຳພັນມິດຕະພາບລະຫວ່າງໝູ່ເພື່ອນໃນໂຮງຮຽນ ທີ່ມ່ວນຕ້ອງຂໍບອກເລີຍວ່າເລື່ອງນີ້ສາກຕໍ່ສູ້ແມ່ນມັນສຸດ ແລະ ນັກສະແດງຫຼັກຢ່າງພະເອກກໍສະແດງຄວາມຮູ້ສຶກອອກມາໃຫ້ອາລົມມືດມົນປົນອຶດອັດໄດ້ຢ່າງເລີກເຊິ່ງ. ໃນຕອນທີ່ກຳລັງເບິ່ງຊີຣີສ໌ເລື່ອງນີ້ກໍເຮັດໃຫ້ຮູ້ສືກອິນຕາມສຸດໆ,...

Dire Wolves: ຈາກ Game of Thrones ສູ່ການຟື້ນຄືນຊີບໃນໂລກແຫ່ງຄວາມຈິງ

ໃຜທີ່ເປັນແຟນຊີຣີສ໌ Game of Thrones  ຄົງຈະຈື່ສາກທຳອິດຂອງຊີຣີສ໌ເລື່ອງນີ້ໄດ້ເປັນຢ່າງດີ ເຊິ່ງເປັນຕອນທີ່ Ned Stark ກັບລູກໆຂອງລາວຍ່າງເຂົ້າໄປໃນປ່າ ແລະ ພົບກັບລູກໝາປ່າຍັກຫຼາຍໂຕນອນຢູ່ຂ້າງທາງ. ລູກໝາປ່າເຫຼົ່ານັ້ນບໍ່ແມ່ນແຕ່ສັດປ່າທີ່ພວກເຂົາທີ່ບັງເອີນພົບເຫັນເທົ່ານັ້ນ...

ເບິ່ງພາກຕໍ່ຊີຣີສ໌ເດັດ 3 ເລື່ອງໜ້າເບິ່ງໃນປີ 2025 ໃນ Netflix

ສາຍຊີຣີສ໌ເຊີນທາງນີ້ ໃຜທີ່ໄດ້ເບິ່ງຊີຣີສ໌ ແລະ ເປັນແຟນຈາກທັງ 3 ເລື່ອງເຊັ່ນ: Squid Game, Wednesday ແລະ Stranger Things...

ກ່ຽວກັບພວກເຮົາ - About Muan

ມ່ວນ - Muan.Space ຫຼື Muan.la ພື້ນທີ່ຈຸດປະກາຍແຮງບັນດານໃຈ ແລະ ສົ່ງຜົນກະທົບທີ່ດີ ໃຫ້ກັບສັງຄົມຜ່ານເລື່ອງລາວ ເນື້ອຫາສາລະ ບັນເທີງທີ່ສ້າງສັນ. ກໍ່ຕັ້ງຂຶ້ນໃນປີ 2016 ພາຍໃຕ້ບໍລິສັດການຕະຫຼາດ BIZGITAL ຈຳກັດ. 🔴👑☕🦖💼🧭 ມ່ວນ - Muan.Space ຫຼື Muan.la is the Premier Destination for Creative & Entertainment Content in Laos. A business unit of a Digital Marketing Technology, BIZGITAL Company Limited since 2016.